བོད་མི་ནོར་གཡང་གིས་སྐེ་བཏགས་ནས་རང་ཤི་བརྒྱབ།

རྒྱ་ནག་གཞུང་གིས་ཏོག་དབྱིབས་ལ་ཁ་གཡར་ནས་བོད་མི་ཚོར་དམ་དྲག་བཙན་གནོན་ཤུགས་ཆེན་བྱེད་བཞིན་ཡོད་པའི་རྐྱེན་གྱིས་ནོར་གཡང་སོགས་བོད་མི་ཁག་ཅིག་ནས་རང་སྲོག་བཅད་ཡོད་པའི་གནས་ཚུལ་འཐོན་བཞིན་ཡོད་པ་རེད།

དེ་རིང་འདི་ག་བོད་ཀྱི་དུས་བབ་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། བོད་རང་སྐྱོང་ལྗོངས་ཁྲིན་ཀོན་ཆུའུ་ཟེར་བའི་དོག་སྡེ་ཁྲོམ་གཞུང་གསང་ཡིབས་གྲོང་ཚོའི་བོད་མི་ནོར་གཡང་ཞེས་པ་ཞིག་གིས་ཁྱིམ་དུ་སྐེ་བཏགས་ནས་རང་ཤི་བརྒྱབ་ཡོད་འདུག་ལ། ནོར་གཡང་ལགས་ནི་དུས་རྒྱུན་མར་ཆུར་སོགས་ཀྱིས་ཚོང་ལས་གཉེར་མཁན་ཞིག་ཡིན་འདུག

འདི་གའི་གནས་ཚུལ་མཁོ་སྤྲོད་པས། ཕྱི་ཚེས་ ༢༨ ཉིན་གྱི་ཉིན་རྒྱབ་ཆུ་ཚོད་ ༢ པ་ཙམ་ལ། གློ་བུར་དུ་གསང་ཡིབས་གྲོང་ཚོའི་ནང་དུ་དམག་མི་དང་སྨན་ཁང་གི་རླངས་འཁོར་གཉིས་ཡོང་སྟེ་ནོར་གཡང་ཚང་དུ་འཛུལ་ཡོད་པ་དང་། ཁྱིམ་མཚེས་ཚོས་སེམས་འཚབ་ཆེན་པོས་གནས་ཚུལ་ག་རེ་བྱུང་མིན་སྐད་ཆ་འདྲི་སྐབས། ཟླ་འདིའི་ཕྱི་ཚེས་ ༡༢ ཉིན་ཉེན་རྟོག་པས་ནོར་གཡང་ལགས་ཀྱི་ཨ་མ་དང་བཟའ་ཟླ་བཅས་ཁྱིམ་མི་གཞན་གསུམ་གྲྭ་བཞི་གྲོང་གསར་ཁུལ་གྱི་ཟུར་བཀག་ཁང་ཞིག་ཏུ་ཁྲིད་ཕྱིན་སྟབས། དེ་ནས་བཟུང་ནོར་གཡང་ལགས་གཅིག་པུར་ཁྱིམ་དུ་ལྷག་ཡོད་པ་དང་། ཕྱི་རོལ་དུ་འགྲོ་སྐྱོད་མི་ཆོག་པའི་ཁར་ཟུར་བཀག་ཁང་དུ་བཅུག་པའི་མི་མང་ལ་སྨན་བཅོས་དང་བཟའ་བཏུང་། འཚོ་བའི་མཁོ་ཆས་སོགས་ཀྱི་མཐུན་རྐྱེན་ཧ་ཅང་ཞན་པའི་གནས་ཚུལ་མང་པོ་ཞིག་སྤྱི་ཚོགས་ནང་ཁྱབ་ཡོད་སྟབས། ནོར་གཡང་ལགས་སེམས་སྡུག་གིས་མ་བཟོད་པར་རང་ཤི་བརྒྱབ་ཟིན་པའི་གནས་ཚུལ་ཤེས་རྟོགས་བྱུང་སྐོར་བརྗོད་བྱུང་།

འདི་ལོའི་ཕྱི་ཟླ་ ༨ ཙམ་ནས་བཟུང་བོད་ཀྱི་རྒྱལ་ས་ལྷ་ས་དང་གཞིས་ཀ་རྩེ། མངའ་རིས། དེ་བཞིན་མདོ་སྟོད་སྨད་ཀྱི་ས་ཁུལ་མང་པོ་ཞིག་ཏུ་ཏོག་དབྱིབས་ཁྱབ་གདལ་དུ་ཕྱིན་ཡོད་པ་དང་། ཐེམ་སྤང་བཀའ་རྒྱ་བསྒྲགས་ནས་ད་བར་ཉུང་མཐར་ཉིན་གྲངས་ ༥༠ ལྷག་འགྲོ་བཞིན་ཡོད་ཀྱང་། ད་དུང་ཡང་ཏོག་དབྱིབས་འགོས་ཁྱབ་མུ་མཐུད་ནས་འགྲོ་བཞིན་ཡོད་པ་མ་ཟད། ཏོག་དབྱིབས་ཟུར་བཀག་ཁང་དག་གི་སྨན་བཅོས་མཐུན་རྐྱེན་ཞན་པ་མ་ཟད། ཉིན་རེའི་བཟའ་བཏུང་དང་སྡོད་གནས་ལའང་དཀའ་ངལ་འཕྲད་དེ། མི་མང་གི་ལུས་སེམས་གཉིས་ལ་དཀའ་སྡུག་ཆེན་པོ་སྤྲོད་བཞིན་ཡོད་སྟབས། འདས་པའི་ཉིན་ཤས་ནང་བོད་མི་ཁག་ཅིག་ནས་རང་ཤི་བརྒྱབ་ཡོད་པའི་གནས་ཚུལ་འཐོན་གྱི་ཡོད་པ་རེད།