བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་འཁྲིད་གཞོན་པ་ཟུར་པ་ཀྲང་ཡུང་ཙི་ཞེས་པ་དེས་ལྐོག་རྔན་བླངས་བའི་དོགས་གཞིའི་འོག་ཧྲན་ཞི་ཞིང་ཆེན་ཞི་ཨན་འབྲིང་རིམ་མི་མང་ཁྲིམས་ཁང་དུ་ཁྲིམས་གཏུགས་བྱས་འདུག
བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་འཁྲིད་གཞོན་པ་ཟུར་པ་ཀྲང་ཡུང་ཙི། དྲ་ལམ་གྱི་པར།
ཁ་སང་ཕྱི་ཚེས་ ༣༠ ་ཉིན་རྒྱ་ནག་གཞུང་འབྲེལ་མི་མང་དྲ་བས་གནས་ཚུལ་སྤེལ་བ་ལྟར་ན། བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་འཁྲིད་གཞོན་པ་ཟུར་པ་ཀྲང་ཡུང་ཙི་ཟེར་བ་ཞིག་གིས། གོ་གནས་བེད་སྤྱད་དེ་ལྐོག་རྔན་འབོར་ཆེན་བླངས་ཡོད་པའི་དོགས་གཞིའི་འོག་བོད་རང་སྐྱོང་ལྗོངས་ཞིབ་བཤེར་ཁང་ནས་ཞི་ཨན་གྲོང་ཁྱེར་མི་མང་ཞིབ་བཤེར་ཁང་དུ་རྩིས་སྤྲད་ཡོད་པ་དང་། ད་ལྟའི་ཆར་ཞི་ཨན་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས་ཞིབ་བཤེར་བྱེད་བཞིན་ཡོད་འདུག
ད་ལོའི་ཕྱི་ཟླ་ ༡ ཚེས་ ༨ ཉིན་ལྐོག་རྔན་འབོར་ཆེན་བླངས་བའི་དོགས་གཞི་འོག་ཀྲང་ཡུང་ཙི་གོ་གནས་ནས་ཕབ་ཏེ་ཞིབ་བཤེར་བྱེད་མགོ་ཚུགས་ཡོད་པ་དང་། ཁོ་ནི་ཕྱི་ལོ་ ༢༠༢༢ ལོར་འཛིན་བཟུང་བྱས་པའི་སྟག་རྒན་དང་པོ་དང་། རྒྱ་ནག་རྒྱལ་ཡོངས་ཚོགས་ཆེན་ཐེངས་ ༡༩ པའི་རྗེས་སུ་བོད་རང་སྐྱོང་ལྗོངས་ཟེར་བའི་ཁོངས་ཀྱི་ཞིང་ཆེན་རིམ་པའི་མཐོ་རིམ་དཔོན་རིགས་ཤིག་གོ་གནས་ནས་གནས་དབྱུང་བཏང་བ་ཐོག་མ་དེ་ཆགས་ཡོད་སྐོར་བསྒྲགས་འདུག
འདི་ལོའི་ཕྱི་ཟླ་ ༧ ཚེས ༧ ཉིན་རྒྱ་ནག་གཞུང་ཕྱོགས་ནས་ཀྲང་ཡུང་ཙིས་ནག་ཉེས་ཚབས་ཆེན་བཟོས་ཡོད་སྐོར་ཡོངས་ཁྱབ་གསལ་བསྒྲགས་བྱས་ཏེ། དམར་ཕྱོགས་ཚོགས་པའི་ཚོགས་ཁུངས་ནས་ཕྱིར་འབུད་བཏང་ཡོད་པ་མ་ཟད། བོད་རང་སྐྱོང་ལྗོངས་ཟེར་བའི་སྐབས་ ༡༠ པའི་མི་མང་འཐུས་ཚོགས་ཀྱི་རྒྱུན་ལས་དང་འཐུས་མིའི་ཐོབ་ཐང་བཅས་བླངས་རྗེས། ཟླ་དེའི་ཕྱི་ཚེས་ ༢༥ ཉིན་རྒྱ་ནག་རྟོག་ཞིབ་ལས་ཁུངས་ཀྱིས་ཞིབ་བཤེར་ཁང་དུ་རྩིས་སྤྲོད་བྱས་ཡོད་པ་དང་། ཉིན་ཤས་གོང་དུ་རྒྱ་ནག་ཆེས་མཐོའི་མི་མང་ཞིབ་བཤེར་ཁང་ཟེར་བས་ནག་ཉེས་ར་འཕྲོད་ཀྱིས་དངོས་སུ་འཛིན་བཟུང་བྱས་ཡོད་ལུགས་བསྒྲགས།
ཀྲང་ཡུང་ཙི་འཛིན་བཟུང་བྱས་པའི་ཟླ་བ་དེ་ག་རང་དུ་བོད་རང་སྐྱོང་ལྗོངས་ཟེར་བའི་དམར་ཤོག་དྲིལ་བསྒྲགས་ཚན་པའི་མགོ་ཁྲིད་གཞོན་པ་ཟུར་བ་ཝང་ནིན་ཧྲིན་(王能生)ཡང་འཛིན་བཟུང་བྱས་ཡོད་འདུག་ལ། ཝང་ནིན་ཧྲིན་ཟེར་བ་དེས་ཕྱི་ལོ་ ༡༩༨༣ ནས་ ༢༠༢༡ བར་དུ་བོད་རང་སྐྱོང་ལྗོངས་ཟེར་བའི་དམར་ཤོག་དྲིལ་བསྒྲགས་ཚན་པའི་ནང་དྲིལ་བསྒྲགས་ཀྱི་ལས་ཀ་བྱས་ཏེ་འགན་འཛིན་སོགས་བྱས་ཡོད་འདུག
ཀྲང་ཡུང་ཙི་ནི་ཕྱི་ལོ་ ༡༩༧༩ ལོར་རྒྱ་ནག་ཡུན་ནན་དུ་སྐྱེས་ཞིང་། ཕྱི་ལོ་༡༩༩༨ལོ་ནས་བཟུང་སྔ་རྗེས་སུ་བོད་རང་སྐྱོང་ལྗོངས་ཟེར་བའི་སྐྱེ་ཁམས་ཁོར་ཡུག་སྲུང་སྐྱོང་ཚན་པའི་འགན་འཛིན་དང་། བོད་ལྗོངས་ལྷོ་ཁ་གྲོང་ཁྱེར་གྱི་དམར་ཤོག་དྲུང་ཡིག བོད་རང་སྐྱོང་ལྗོངས་ཟེར་བའི་མི་མང་སྲིད་གཞུང་གི་མགོ་འཁྲིད་གཞོན་པ་སོགས་བཅས་ཀྱི་འགན་འཁུར་ཡོད་འདུག གོ་དབང་ཆེན་པོ་ཐོབ་པའི་གོ་སྐབས་དང་བསྟུན་ཁོས་ལས་འགན་གཙང་ལེན་བྱས་མེད་པ་དང་། འབྲེལ་བ་བརྒྱུད་གོ་གནས་སྤར་བ། ཁྲིམས་མཐུན་མིན་པའི་ཁེ་དབང་གཉེར་བ། ཁྲིམས་འགལ་གྱིས་གཞན་གྱི་རྒྱུ་ནོར་འབོར་ཆེན་བླངས་ཡོད་ལུགས་སོགས་ཀྱི་ནག་ཉེས་གཡོགས་འདུག
བྱམས་པ་ཚེ་རིང་།
བྱམས་པ་ཚེ་རིང་།
