ཁ་སང་ཕྱི་ཚེས་ ༣༠ ཉིན་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༥༡ པའི་ཐོག་བོད་ནང་གི་དངོས་ཡོད་གནས་སྟངས་སྐོར་ལ་གཏམ་བཤད་གནང་ཡོད་འདུག
ཕྱི་ཟླ་ ༩ ཚེས་ ༧ ནས་ཟླ་ ༡༠ པའི་ཚེས་ ༡༢ བར་འཚོག་བཞིན་པའི་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༥༡ པའི་ཐོག་འཛམ་གླིང་རྒྱལ་ཁབ་ ༢༧ ཙམ་གྱི་སྐུ་ཚབ་རྣམ་པས་འགྲོ་བ་མིའི་ཐོབ་ཐང་གི་གནས་སྟངས་ཐོག་གསུང་བཤད་དང་བགྲོ་གླེང་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༣༠ ཉིན་སུད་སིར་གནས་བཞུགས་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ནས་རྒྱ་ནག་གཞུང་གིས་གཞིས་ལུས་བོད་མི་རྣམས་ལ་ཚད་ལས་འདས་པའི་གཉའ་གནོན་བྱེད་མུས་ཡིན་པས། རྒྱལ་ཚོགས་ཀྱིས་བོད་མི་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་ལྟ་ཞིབ་དང་། རྒྱ་ནག་གཞུང་གིས་རིམས་ནད་ལ་ཁ་གཡར་ནས་བོད་ཀྱི་རྒྱལ་ས་ལྷ་སར་ཐེམ་སྤང་བཀག་རྒྱ་བསྡམས་ཏེ། དྲག་གནོན་བྱེད་མུས་ཡིན་པར་ཉུལ་ཞིབ་དང་ལྟ་རྟོག་ནན་མོ་དགོས་པའི་རེ་སྐུལ་ཞུས་ཡོད་འདུག
བོད་དོན་གཏམ་བཤད་སྐབས་མགོ་ལོག་འཇིགས་མེད་ལགས་ཁོང་རང་ནས་རྒྱ་ནག་གཞུང་གི་བཙོན་འོག་ནས་སྡུག་སྦྱོང་མནར་གཅོད་ཚད་མེད་མྱངས་བའི་ལོ་རྒྱུས་ངོ་སྤྲོད་དང་སྦྲགས། ཉེ་ལམ་རྒྱ་ནག་གཞུང་གིས་འཆར་གཞི་དང་ལྡན་པའི་ཐོག་ནས་བོད་ནང་གི་རྫོང་སྡེ་ཁག་མང་པོ་ཞིག་ཏུ་དམག་མི་འགྲེམས་འཇོག་བྱས་ཏེ། བོད་ཀྱི་སྐད་ཡིག་དང་ངོ་བོ་སོགས་རྩ་མེད་གཏོང་ཐབས་བྱེད་མུས་ཡིན་པ་མ་ཟད། བོད་ཀྱི་ཆོས་རིག་གི་ལྟེ་གནས་ཁག་ལ་སྡང་ཟུག་ཆེན་པོས་དྲག་གནོན་བྱེད་མུས་ཡིན་པ། དེ་བཞིན་མི་སྒེར་གྱི་ཁ་པར་དང་སྡོད་ཁང་སོགས་ལ་གློ་བུར་དུ་ཞིབ་བཤེར་བྱས་ཏེ། བོད་ནང་གི་བོད་མི་རྣམས་ཀྱི་ལུས་སེམས་གཉིས་ལ་སུན་གཙེར་ཡང་ཡང་བཟོ་ཡི་ཡོད་པས། རྒྱལ་སྤྱིའི་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་གིས་རྒྱ་ནག་གཞུང་ལ་བོད་ནང་གི་བོད་མི་ཚོས་སོ་སོའི་སྐད་ཡིག་སྦྱང་སྤྱོད་དང་། ཆོས་ཕྱོགས་ཀྱི་ལས་རིམ་རྣམས་སྤེལ་དུ་འཇུག་དགོས་པའི་འབོད་སྐུལ་གནང་དགོས་པ་མ་ཟད། བོད་མི་རྣམས་ཀྱི་གཞི་རྩའི་ཐོབ་ཐང་ལ་བརྩི་འཇོག་བྱ་དགོས་པའི་འབོད་སྐུལ་གནང་དགོས་སྐོར་ཞུས་ཡོད་འདུག
ཁོང་གིས། ཉེ་ལམ་རྒྱ་ནག་གཞུང་གིས་བོད་ཀྱི་སློབ་གྲྭ་མང་པོ་ཞིག་ཏུ་རྒྱ་སྐད་གཙོ་བོ་སློབ་ཁྲིད་བྱེད་དུ་འཇུག་གི་ཡོད་པ་མ་ཟད། ཐ་ན་བྱིས་གཉོར་ཁང་ནས་བྱིས་པ་རྣམས་ལ་རྒྱ་སྐད་རྒྱ་ཡིག་ཁོ་ན་སློབ་ཀྱིན་ཡོད་པ་དང་། ཕ་མ་ཚོས་རང་གི་བྱིས་པ་རྣམས་ལའང་བོད་སྐད་བཤད་མི་ཆོག་པ་དང་། བོད་ཡིག་སློབ་ཁྲིད་བྱ་མི་ཆོག་པའི་བཙན་བཀའ་བཏང་དང་གཏོང་བཞིན་ཡོད་སྐོར་དང་། ལྷག་པར་དུ་རྒྱ་ནག་གཞུང་གིས་བོད་ཀྱི་ཤེས་ཡོན་པའི་སྡེ་རྣམས་རྨེག་མེད་དུ་བཟོ་སླད། བོད་ནང་གི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་དང་། དྷི་ལྷ་ལྡན་ལགས་གཉིས་ལ་ཉེས་མེད་ཁྲིམས་ཐག་བཅད་པ་དང་། ད་ལྟའང་གར་སོང་ཆ་མེད་དུ་གྱུར་བའི་གངས་སྐྱེས་སྒྲུབ་པ་སྐྱབས་སོགས་འཛིན་བཟུང་བཙོན་འཇུག་བྱས་ཏེ། འཆར་གཞི་ལྡན་པའི་ངང་ནས་བོད་ནང་གི་ཤེས་ཡོན་པ་དང་བོད་ཀྱི་རིག་གཞུང་འབུར་འཇོམས་གཏོང་མུས་ཡིན་སྐོར་གཏམ་བཤད་གནང་ཡོད་འདུག
ཡང་མགོ་ལོག་འཇིགས་མེད་ལགས་ཀྱིས། རྒྱ་ནག་གཞུང་གིས་ནད་ཡམས་ལ་ཁ་གཡར་ནས་བོད་མི་རྣམས་ལ་དྲག་གནོན་དང་ཆབ་སྲིད་ཀྱི་གོ་གནས་སྤྱད་ནས་མི་མང་ཚོད་འཛིན་བྱེད་བཞིན་ཡོད་པ་དང་། ལྷ་་ས་ཁུལ་དུ་རིམས་ནད་འགོས་མཁན་རྣམས་ལ་གཞི་རྩའི་སྨན་བཅོས་ལྟ་སྐྱོང་མེད་པའི་ཁར། རིམས་ནད་འགོས་མེད་པའི་བོད་མི་རྣམས་ཀྱང་རིམས་ནད་འགོས་མཁན་དང་མཉམ་དུ་ཟུར་བཀག་ཏུ་བཞག་སྟེ། བོད་མི་རྣམས་ལ་ཟས་གོས་སོགས་ཡག་པོ་མ་སྟེར་བར་དཀའ་སྡུག་ཆེན་པོ་འཕྲད་བཞིན་ཡོད་སྟབས། བོད་ནང་གི་བོད་མི་མང་པོ་ཞིག་ལ་ལུས་སེམས་གཉིས་ཀྱི་ཐད་ནས་དཀའ་ངལ་ཤུགས་ཆེན་འཕྲད་ནས་རང་ཤི་བརྒྱབ་ཡོད་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་ཚན་པ་དང་རང་དབང་གི་ཆེད་མཁས་པ་རྣམས་ཆ་རྐྱེན་གང་ཡང་མེད་པའི་ཐོག་ནས་བོད་ནང་དུ་བསྐྱོད་དེ། བོད་ནང་གི་དངོས་ཡོད་ཀྱི་གནས་བབ་ལ་རྒྱུས་ལོན་གསལ་པོ་དང་། རྒྱ་ནག་གཞུང་གིས་རིམས་ནད་ལ་ཁ་གཡར་ནས་བོད་མི་རྣམས་ལ་དྲག་གནོན་བྱེད་བཞིན་པ་མཚམས་འཇོག་ཡོང་བའི་འབོད་སྐུལ་གནང་ཡོད་སྐོར་རེ་སྐུལ་ཞུས་ཡོད་འདུག
གསར་འགོད་པ། དཔལ་ལྡན།
