དེ་རིང་གསུང་ཆོས་ཉིན་གསུམ་གྱི་མཐའ་མ་དེར་༧གོང་ས་མཆོག་ནས་དད་ལྡན་དོན་གཉེར་ཅན་རྣམས་ནས་ཉིན་ལྟར་བྱང་ཆུབ་སེམས་དཔའི་སྡོམ་པ་ལེན་ཐུབ་ན་ཕན་ཐོགས་ཆེན་པོ་ཡོད་སྐོར་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་ཆ་བཞག་ན་བྱང་ཆུབ་སེམས་དཔའི་སྡོམ་པ་ཉིན་ལྟར་རེ་ཞིག་སྨོན་ལམ་བཏབ་ནས་སྡོམ་པ་ལེན་གྱི་ཡོད། སྤྱིར་སངས་རྒྱས་བཅོམ་ལྡན་འདས་ཀྱི་རྗེས་འབྲང་བ་རེད། སངས་རྒྱས་བཅོམ་ལྡན་འདས་ཀྱིས་སྤངས་རྟོགས་མཐར་ཕྱིན་པ་ཡོང་རྒྱུའི་ལམ་གཙོ་བོ་དེ་ག་རེ་ཡིན་པ་ཁོང་རང་གི་ཉམས་མྱོང་གི་ཐོག་ནས་བྱང་ཆུབ་ཀྱི་སེམས་ཟེར་བ་དེ། ང་ཚོས་ཉམས་ལེན་བྱ་རྒྱུ་གཙོ་བོ་དེ་ཆགས་ཀྱི་ཡོད་རེད། བཅོམ་ལྡན་འདས་ཁོང་རང་ནས་འདི་ཉམས་བཞེས་གནང་ནས་གྲངས་མེད་གསུམ་དུ་ཚོགས་བསགས། མཐར་མངོན་པར་རྫོགས་པ་སངས་རྒྱས་ནས་དུས་ད་ལྟ་ཡིན་ནའང་བཅོམ་ལྡན་འདས་ཀྱིས་གསུང་གི་འོད་གསལ་འདི་འཛམ་བུ་གླིང་ཀུན་ལ་ཁྱབ་སྡོད་མཁན་ཞིག་ཆགས་ཀྱི་ཡོད་རེད་པཱ། དེ་འདྲ་སོང་ཙང་། ང་ཚོ་ཚང་མས་ཉིན་རེ་བཞིན་དུ་བྱང་ཆུབ་སེམས་དཔའི་སྡོམ་པ་བླངས་རྒྱུ་བྱུང་པ་ཡིན་ན་ཕན་ཐོགས་ཆེན་པོ་ཞེ་དྲགས་རེད། བཤད་མ་ཐག་པ་ནང་བཞིན་ངོས་རང་གི་ངོས་ནས་ཆ་བཞག་ན། ཉིན་ལྟར་བྱང་ཆུབ་སེམས་དཔའི་སྡོམ་པ་དང་སྔགས་ཀྱི་སྡོམ་པའང་ལེན་གྱི་ཡོད། དེར་བརྟེན། དེ་རིང་མཇུག་ཏུ་དགེ་བ་བྱང་ཆུབ་སེམས་དཔའི་སྡོམ་པ་ཞིག་འབོགས་ཆོག་བྱེད་དགོས་དྲན་བྱུང་། ཞེས་གསུངས་སོང་།
བཀའ་ཆོས་དང་འབྲེལ་ནས་མགོན་པོ་གང་ཉིད་མཆོག་གིས། རང་གཅེས་འཛིན་གྱི་བློ་དང་གཞན་གཅེས་འཛིན་གྱི་བློའི་སྐོར་ལ་ངོ་སྤྲོད་དང་། སྐྱེ་འགྲོ་ཀུན་གྱིས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པར་བརྟེན། ཚང་མས་སེམས་སྐྱིད་པ་དང་ལུས་བདེ་བ་ཞིག་འདོད་ཀྱི་ཡོད་པ་རེད། དེར་བརྟེན་རང་གཅེས་འཛིན་གྱིས་སེམས་མ་སྐྱིད་པ་ཡོང་གི་ཡོད་པས། རང་གཅེས་འཛིན་དེ་སྐྱོན་ལ་བལྟས་ནས་གཞན་གཅེས་འཛིན་དང་དུ་བླངས་ཚེ། རང་བཞིན་གྱིས་སེམས་ནང་གི་སྙིང་སྟོབས་ལ་ཕན་ཐོགས་ཡོང་བ་དང་། དེའི་རྐྱེན་གྱིས་སེམས་ལ་ཞི་བདེ་བརྒྱ་ཆ་བརྒྱ་ཐམ་པ་བསླེབ་ཐུབ་སྐོར། དེ་བཞིན་ང་ཚོ་ཚང་མས་བྱང་ཆུབ་ཀྱི་སེམས་ཀྱི་ཉམས་ལེན་གང་ཐུབ་བྱ་དགོས་སྐོར་དང་། སྔགས་དྲངས་པ་དང་ལྷ་བསྒོམ་ནས་སེམས་ལ་ཞི་བདེ་ཡོང་དཀའ་བས། བྱང་ཆུབ་སེམས་ཀྱིས་རང་གཅེས་འཛིན་གྱི་སྐྱོན་དང་གཞན་གཅེས་འཛིན་གྱི་ཡོན་ཏན་ལ་བསམ་བློ་གཏོང་ཚེ། དོན་དངོས་སུ་སེམས་ལ་ཞི་བདེ་ཡོང་ཐུབ་ཀྱི་ཡོད་པས། ཆོས་གྲོགས་ཚང་མས་དེའི་ཐོག་ལ་དགོངས་པ་བཞེས་དགོས་སྐོར་སོགས་བཀའ་ཆོས་དང་འབྲེལ་ནས་བཀའ་སློབ་གནང་སོང་།
མཇུག་ཏུ་བཀའ་འདྲི་བཀའ་ལན་གྱི་སྐབས་སུ་ཐའེ་ཝན་ནས་ཡོང་བའི་གསུང་ཆོས་ཞུ་མཁན་བུད་མེད་ཅིག་གིས། ཏོག་དབྱིབས་ནད་ཡམས་ཀྱི་དུས་སུ་མི་མང་པོ་ལུས་སེམས་ཀྱི་འཕྲོད་བསྟེན་ལ་དོ་སྣང་ཤུགས་ཆེ་རུ་སོང་ཡོད་སྟབས། ནང་ཆོས་ལས་ལུས་སེམས་ཀྱི་བདེ་བ་བསྐྲུན་པའི་ཐབས་ཐུན་མོང་མ་ཡིན་པ་གང་ཡོད་སྐོར་བཀའ་འདྲི་ཞུས་པར་རྒྱལ་བ་རིན་པོ་ཆེ་མཆོག་གིས། སེམས་ལ་དངངས་སྐྲག་མེད་པའི་ཐོག་ནས་ཞི་བདེ་བྱུང་ན། ལུས་ཀྱི་འབྱུང་བ་དེ་དག་ཆ་སྙོམས་པོ་བྱས་ནས་སྡོད་ཐུབ་ཀྱི་ཡོད་པ་དང་། སེམས་ནང་ཞི་བདེ་བསྐྲུན་པ་ནི་ལུས་ཀྱི་འཕྲོད་བསྟེན་བྱས་པ་མ་རེད་དེ། འཕྲོད་བསྟེན་ཡག་ཤོས་དེ་སེམས་ཞི་བདེ་བློ་བག་ཕེབས་པོའི་ཐོག་ནས་སྡོད་རྒྱུ་དེ་ཡིན། དངངས་སྐྲག་དང་དོགས་པ་སོགས་མི་བྱེད་པར་སེམས་ལྷོད་ལྷོད་ཡོང་བར་གཞན་གཅེས་འཛིན་གྱི་བློ་དང་འབྲེལ་བ་ཞེ་དྲགས་ཡོད། གཞན་ཐབས་ཐུན་མོང་མ་ཡིན་པ་ཟེར་དུས་རྩ་རླུང་གི་ཉམས་ལེན་སོགས་རྙོག་དྲ་ཚ་པོ་རེད། ཅེས་བཀའ་ལན་གནང་སོང་།
དེ་ནས་གསུང་ཆོས་ཞུ་མཁན་བུད་མེད་ཅིག་གིས། བོད་དང་ཤིན་ཅང་ནང་དུ་མི་རིགས་རྩ་མེད་གཏོང་བའི་གདུག་རྩུབ་ཅན་གྱི་སྲིད་ཇུས་ལག་སྟར་བྱེད་བཞིན་ཡོད་དུས། གནས་སྟངས་དེ་འདྲའི་འོག་བྱང་ཆུབ་ཀྱི་སེམས་གང་འདྲ་ཉམས་ལེན་གནང་དགོས་སྐོར་བཀའ་འདྲི་ཞུས་པར་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོར་ཆ་བཞག་ན། བོད་ནང་དུ་རྒྱ་མི་གུང་ཁྲན་གྱིས་དགོན་པ་གཏོར་བ་དང་ཆོས་པ་དེ་ཚོ་ལ་བསམ་ནག་བྱས་ནས་བསད་པ་དེ་འདྲ་ཡོང་གི་ཡོད་རེད། དེ་ཡོང་དུས་སེམས་ནང་དུ་དེ་དག་ནི་འཕྲལ་སེལ་གྱི་ཆགས་སྡང་གི་བློ་དེ་འདྲ་ཞིག་གི་གཞན་དབང་དུ་བཏང་ནས་ལས་ངན་བསགས་ཀྱི་འདུག་བསམ་ནས་སྙིང་རྗེ་སྐྱེས་པ་མ་གཏོགས། ཁོང་ཁྲོ་ཟ་རྒྱུ་ཕལ་ཆེར་མི་འདུག་བཱ། དེ་ནི་གཙོ་བོ་གཅེས་འཛིན་རེད་ཤག གཞན་གཅེས་འཛིན་གྱི་བསམ་བློ་ཏོག་ཙམ་ཡོད་ན། དེ་འདྲའི་ལས་ངན་གསོག་མཁན་དེ་དག་ལ་དམིགས་བསལ་གྱིས་བརྩེ་བའི་བློ་སྐྱེས་པ་མ་གཏོགས་ཁོང་ཁྲོ་ཟ་བའི་བློ་ཕལ་ཆེར་མི་ཡོང་བ་རེད། ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
