འཇར་མན་སྲིད་བློན་ཟུར་བ་ལྕམ་ཨན་ཇི་ལཱ་མཱེ་ཁེལ་ལགས་ཀྱིས་སྐྱབས་བཅོལ་བ་སྟོང་ཕྲག་མང་པོར་རོགས་རམ་བྱེད་བཞིན་ཡོད་པའི་ངོས་འཛིན་འོག འདི་ལོའི་རྒྱལ་ཚོགས་ཀྱི་རྒྱལ་སྤྱིའི་སྐྱབས་བཅོལ་གཟེངས་རྟགས་ཐོབ་འདུག
དེ་རིང་རྒྱལ་ཚོགས་ཀྱི་ལྷན་ཚོགས་ཐེངས་ ༥༡ པའི་སྟེང་འཇར་མན་སྲིད་བློན་ཟུར་བ་ལྕམ་ཨན་ཇི་ལཱ་མཱེ་ཁེལ་ལགས་ཀྱིས་ཡུན་རིང་དམག་འཁྲུག་དང་གར་འགྲོ་ངེས་མེད། དེ་བཞིན་སྐྱབས་བཅོལ་བའི་མི་མང་སྟོང་ཕྲག་མང་པོར་སྲུང་སྐྱོབ་དང་མདུན་ལམ་དང་འཚོ་བ་གསར་པ་བསྐྲུན་པ་སོགས་ཀྱི་ངོས་འཛིན་འོག ཕྱི་ལོ་ ༢༠༢༢ ལོའི་མཉམ་འབྲེལ་རྒྱལ་ཚོགས་ཀྱི་ནཱེན་སན་ (Nansen) སྐྱབས་བཅོལ་གཟེངས་རྟགས་ཐོབ་ཡོད་པའི་གསལ་བསྒྲགས་སྤེལ་འདུག་པ་དང་། གཟེངས་རྟགས་དེ་ཟླ་འདིའི་ཕྱི་ཚེས་ ༡༠ ཉིན་དངོས་སུ་ལྕམ་ཨན་ཇི་ལཱ་མཱེ་ཁེལ་ལགས་སུ་འབུལ་རྒྱུ་ཡིན་འདུག
གཟེངས་རྟགས་འོས་མི་འདེམས་སྒྲིག་ཚོགས་ཆུང་གིས། ལྕམ་ཨན་ཇི་ལཱ་མཱེ་ཁེལ་ལགས་ཀྱི་མགོ་ཁྲིད་ཀྱི་ནུས་པ་དང་སྙིང་སྟོབས། བྱམས་བརྩེ་བཅས་ཀྱིས། གར་འགྲོ་ངེས་མེད་དང་བདེ་འཇགས་འཚོལ་བཞིན་པའི་མི་མང་སྟོང་ཕྲག་མང་པོ་སྐྱོབ་ཐུབ་པ་མ་ཟད། དམག་འཁྲུག་དང་དྲག་གནོན། འགྲོ་བ་མིའི་ཐོབ་ཐང་འཕྲོག་པའི་གནས་སྟངས་འོག་བྲོས་བྱོལ་དུ་འགྲོ་བཞིན་པའི་མི་མང་པོར་སྲུང་སྐྱོབ་བྱེད་ཀྱི་ཡོད། ཁོང་མོས་འཇར་མན་གྱི་ཚོགས་སྡེ་ཁག་གི་རྒྱབ་ཏུ་སྟོབས་ཤུགས་སྤུངས་པ་བརྒྱུད་སྐྱབས་བཅོལ་བ་མང་པོར་སྣེ་ལེན་བྱས་ཏེ། སློབ་གསོ་དང་ལག་ཤེས་སྦྱོང་བརྡར། ལས་གནས་མཁོ་སྤྲོད་སོགས་ཀྱི་མཐུན་རྐྱེན་བསྐྲུན་གྱི་ཡོད་པ་མ་ཟད། ཁོང་ནི་འཇར་མན་གྱི་གནས་སྤོ་སྲིད་ཇུས་རྒྱ་སྐྱེད་གཏོང་མཁན་གྲས་ཀྱི་གཙོ་བོ་ཡིན་པ་དང་དེ་ལ་བརྟེན་ནས་ཉེན་ཁ་ཆེ་བའི་སྐྱབས་བཅོལ་བ་སྟོང་ཕྲག་མང་པོ་སྐྱོབ་ཐུབ་ཡོད། ཅེས་བརྗོད་འདུག
ད་རེས་གཟེངས་རྟགས་འོས་མི་འདེམས་སྒྲིག་ཚོགས་ཆུང་གིས་ལྕམ་ཨན་ཇི་ལཱ་མཱེ་ཁེལ་ལགས་དང་ལྷན་དུ་ས་ཁུལ་གྱི་སྐྱབས་བཅོལ་གཟེངས་རྟགས་ཐོབ་མཁན་བཞི་བསྒྲགས་འདུག དེ་དག་ནི་ཨ་ཧྥི་རི་ཁའི་སྐྱབས་བཅོལ་མེ་གསོད་རུ་ཁག་སྟེ། ཨ་ཧྥི་རི་ཁའི་ནང་ཤིང་སྡོང་སྟོང་ཕྲག་འདེབས་འཛུགས་དང་ནགས་ཚལ་སྲུང་སྐྱོབ། ཚེ་སྲོག་དང་འཚོ་བ། ཁོར་ཡུག་བཅས་སྲུང་སྐྱོབ་བྱེད་མཁན་(Mbera Fire Brigade) མེ་གསོད་རུ་ཁག་དང་མི་ཚེ་ལོ་ངོ་ ༥༠ ཙམ་སྡོད་གནས་མེད་པ་དང་དཀའ་ཉེན་ཆེ་བའི་མི་མང་པོར་སྡོད་གནས་དང་བདེ་འཇགས་ཀྱི་ཁོར་ཡུག་བསྐྲུན་མཁན་ཨ་རིའི་མི་སེར་སྐུ་ཞབས་(Vicenta González)ལགས། དེ་བཞིན་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་དུ་དཀའ་ཁག་ཆེ་བའི་མི་རྣམས་ལ་འཕྲོད་བསྟེན་དང་སློབ་གསོ། འཚོ་བ་སོགས་ཀྱི་ཐད་རམ་འདེགས་བྱེད་མཁན་(Meikswe Myanmar)། དཀྱིལ་ཤར་དང་བྱང་ཨ་ཧྥི་རི་ཁའི་ཁུལ་དུ་གཉའ་གནོན་དང་བྲན་གཡོག དབྱེ་འབྱེད་དང་དྲག་རྩུབ་སོགས་ཀྱི་དཀའ་ངལ་འོག་ནས་ཐར་བའི་བུ་མོ་རྣམས་ལ་སྨན་བཅོས་ལྟ་སྐྱོང་བྱེད་མཁན་སྨན་པ་ཧ་སན་ (Dr. Nagham Hasan)ལགས་བཅས་ཡིན་པ་རེད།
འཇར་མན་གྱི་སྲིད་བློན་ཟུར་པ་ལྕམ་ཨེན་ཇི་ལཱ་མཱེ་ཁེལ་ལགས་ནི། ཕྱི་ལོ་ ༡༩༥༤ ཟླ་ ༡ ཚེས་ ༡༧ ཉིན་འཇར་མན་ནུབ་མའི་ཧྰམ་བྷར་གྷི་ (Hamburg) ས་གནས་སུ་སྐྱེས་ཤིང་། མོས་ཚད་རྡུལ་དངོས་ཁམས་རིག་པའི་ཐོག་ལ་སློབ་སྦྱོང་གནང་སྟེ་ཕྱི་ལོ་ ༡༩༨༩ བར་ཚན་རིག་པ་གནང་སྟེ་ཞིབ་འཇུག་ལ་གཞོལ་ཡོད་པ་དང་། ཕྱི་ལོ་ ༢༠༠༠ ནས་ ༢༠༡༨ བར་ཡུལ་དེའི་ཡི་ཤུ་དམངས་གཙོ་ལྷན་ཚོགས་ (Christian Democractic Union) ཀྱི་དབུ་ཁྲིད་དང། ཕྱི་ལོ་ ༢༠༠༥ ནས་ ༢༠༢༡ བར་སྲིད་བློན་གྱི་ཕྱག་ལས་གནང་ཡོད་པ་མ་ཟད། ཡོ་རོབ་སྤྱི་མཐུན་ཚོགས་པའི་མང་མོས་དབུ་ཁྲིད་དང་། རང་དབང་འཛམ་གླིང་ཚོགས་པའི་དབུ་ཁྲིད་ཀྱང་ཡིན་སྟབས། འཛམ་གླིང་སྟེང་ཆེས་ནུས་སྟོབས་ཆེ་བའི་བུད་མེད་ཞིག་ཏུ་ངོས་འཛིན་བྱེད་བཞིན་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
