དེ་རིང་༧གོང་ས་མཆོག་གིས་བདེ་ལེགས་སྨན་ཁང་གི་མགོ་ལས་ཡོངས་ལ་མཇལ་ཁ་སྩལ་སྐབས་ད་ལྟ་ཆབ་སྲིད་ཀྱི་ཐོག་ནས་བོད་རྒྱ་མིས་དབང་བསྒྱུར་ནས་བསྡད་ཡོད་པ་དང་མ་འོངས་པར་ནང་ཆོས་ཐོག་ནས་རྒྱ་ནག་དབང་བསྒྱུར་ཐུབ་པ་ཞིག་ཆགས་ཀྱི་རེད། ཅེས་གསུངས།
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་རྒྱལ་བའི་ཕོ་བྲང་དུ་བདེ་ལེགས་སྨན་ཁང་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་སྐབས་དང་བསྟུན་ནས། སྨན་ཁང་གི་ལས་ཀྱི་སྣེ་མོ་བ་ཡོངས་ལ་མཇལ་ཁའི་སྐབས། ༧སྐུ་མདུན་མཆོག་དང་འཕགས་པ་ཝ་ཏི་བཟང་པོའི་སྐུ་བཞུགས་ཡོད་སྟབས་དྷ་སར་ཡོད་པའི་བདེ་ལེགས་སྨན་ཁང་ནི་སྨན་ཁང་དམིགས་བསལ་བ་ཞིག་ཡིན་ཞིང་། བོད་ཀྱི་བདེན་མཐའ་ཏན་ཏན་གསལ་རྒྱུ་ཡིན་པ་དང་བདེ་ལེགས་སྨན་ཁང་གི་མགོ་ལས་ཡོངས་བཙན་བྱོལ་དུ་ཡོད་པའི་བྱས་རྗེས་ཅན་གྱི་བོད་མི་ཆགས་ཡོད་པའི་ཡི་རངས་བསྔགས་བརྗོད་བཅས་མཛད་གནང་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། མི་མང་མཆོག་དམན་དབྱེ་བ་མེད་པར་ཚང་མ་ལ་ཕན་ཐོགས་ཆེན་པོ་ཡོད། དེར་བརྟེན། ངོས་ནས་བདེ་ལེགས་སྨན་ཁང་ལ་བསྟེན་གཏུགས་བྱེད་མཁན་གྱི་མི་ཚང་མའི་ཚབ་བྱས་ནས། ཁྱེད་རང་ཚོར་ཐུགས་རྗེ་ཆེ་ཟེར་གྱི་ཡིན། ད་དུང་ང་ཚོའི་བདེ་ལེགས་སྨན་ཁང་གི་སྨན་པ་ལ་བསྟེན་ཏེ་ཕན་ཐོགས་ཞེ་དྲགས་བྱུང་ཟེར་ནས་དགའ་མོས་བྱེད་མཁན་མང་པོ་ཞེ་དྲགས་ཡོང་གི་འདུག སྤྱིར་ས་ཆ་གང་སར་ཡོད་པའི་སྨན་ཁང་གཅིག་པ་རེད་དེ། ངོས་རང་གི་སྡོད་ས་དང་འཕགས་པ་ཝ་ཏི་བཟང་པོའི་སྐུ་འདིར་བཞུགས་ཡོད་པས། འདི་གར་ཡོད་པའི་སྨན་ཁང་འདི་དམིགས་བསལ་ཆགས་ཀྱི་ཡོད། ཁྱེད་རང་ཚོས་དེ་ལུགས་ཀྱིས་ནད་པ་ལ་ལྟ་རྟོགས་བྱ་རྒྱུ་སོགས་སྔར་བཞིན་དུ་ཧུར་ཐག་བྱོས་ཤོག་ཨ། ངོས་རང་གིས་སྨོན་ལམ་བརྒྱབ། ཁྱེད་རང་ཚོས་སྒྲོལ་མའི་སྐུ་འདི་རྟེན་ལ་ཉར་བ་དང་། ནད་པ་ལ་ལྟ་སྐབས་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ་ཞེས་པའི་སྒྲོལ་མའི་གཟུངས་སྔགས་འདི་རྒྱུན་དུ་དྲངས་ཚེ་ཕན་ཐོགས་ཡོད་ལ། ངོས་ཀྱིས་སྨོན་ལམ་བརྒྱབ། སེམས་སྐྱིད་པ་བྱོས་ནས་སྡོད་ཨ། ཞེས་གསུངས།
མགོན་པོ་གང་ཉིད་མཆོག་གིས་མུ་མཐུད་དུ། སེམས་ཀྱི་གདིང་དེར་ང་ཚོ་བཙན་བྱོལ་དུ་སྡོད་པའི་སྐབས་བདེ་ལེགས་སྨན་ཁང་དུ་ལས་ཀ་བྱས་ནས་ལས་དགེ་བ་ཤུགས་ཆེན་པོ་བསགས་ཡོད་བསམ་པ་ཞིག་དང་། འཕགས་པ་སྤྱན་རས་གཟིགས་ཀྱི་སྐུ་འདི་ནི་སྐུ་རློན་པའི་བཟོ་འདྲ་བོ་རེད། དེའི་དྲུང་དུ་ཡོད་པའི་ས་གནས་ཀྱི་ནད་པ་ལ་ལྟ་རྟོགས་བྱེད་དུས། ཁོ་རང་ཚོར་དམིགས་བསལ་གྱི་ཁྱད་ཆོས་ཞིག་ཡོད་པ་རེད། ཤེས་སོང་ངམ། འཕགས་པ་སྤྱན་རས་གཟིགས་ཀྱིས་དུས་རྟག་ཏུ་གཟིགས་ཀྱི་ཡོད་བསམ་པ་ཞིག་བྱེད་དེ་བློ་བདེ་བོ་བྱོས་ནས་སྡོད་ཨ། ངོས་རང་འདིར་འཕགས་པ་སྤྱན་རས་གཟིགས་ཀྱི་མགྲོན་གཉེར་བཟོ་འདྲ་བོ་ཆགས་བསྡད་ཡོད་རེད། ཝ་ཏི་བཟང་པོ་འཕགས་པ་སྤྱན་རས་གཟིགས་ཀྱི་སྐུ་དངོས་ཆགས་བསྡད་ཡོད་རེད། ཤེས་སོང་ངམ། ངོས་འདིར་ཝ་ཏི་བཟང་པོའི་སྐུ་གཉེར་བཟོ་འདྲ་བོ་བསྡད་བསྡད་ཀྱི་ཡོད། གང་ལྟར་ཝ་ཏི་བཟང་པོས་བྱིན་རླབས་གནང་རྒྱུ་མ་གཏོགས་གསུང་བྱོན་རྒྱུ་ཡོད་མ་རེད། ངོས་རང་འདིར་ཝ་ཏི་བཟང་པོའི་སྐུ་ཚབ་བྱས་ནས་སྐད་ཆ་ཤོད་མཁན་ཆགས་བསྡད་ཡོད། ཤེས་སོང་ངམ། ཁྱེད་རང་ཚོ་ཚང་མ་སེམས་སྐྱིད་པོ་བྱོས། བློ་བདེ་བོ་བྱོས། ཚེ་རབས་ནས་ཚེ་རབས་འཕགས་པ་སྤྱན་རས་གཟིགས་ཀྱི་རྗེས་སུ་བཟུང་གི་རེད་བསམ་པ་བྱོས།
ད་ལྟ་ང་ཚོའི་བོད་ཀྱི་གནས་སྟངས་འདི་དཀའ་ངལ་ཡོད་པ་ཞིག་རེད་དེ། འགྱུར་བ་ཏན་ཏན་འགྲོ་ཡི་རེད། ངོས་རང་གིས་ངོ་ཤེས་པ་དེ་འདྲའི་བོད་ནང་ནས(University)ཡི་སློབ་ཕྲུག་དེ་འདྲའི་ངོས་ལ་བཤད་མྱོང་། ད་ལྟ་ཆབ་སྲིད་ཀྱི་ཐོག་ནས་བོད་རྒྱ་མིས་དབང་བསྒྱུར་ནས་བསྡད་ཡོད། མ་འོངས་པར་ང་ཚོས་ཆོས་ཕྱོགས་ཀྱི་ཐོག་ནས་རྒྱ་ནག་དབང་བསྒྱུར་ཐུབ་པ་ཞིག་ཆགས་ཀྱི་རེད། འདི་ཡིན་པའི་བཟོ་འདྲ་བོ་ཞིག་འདུག དེ་རིང་ཁ་སང་རྒྱ་ནག་ནང་དུ་ནང་པའི་ཆོས་ལ་དོ་སྣང་བྱེད་མཁན་ཤུགས་ཆེ་རུ་ཆེ་རུ་འགྲོ་བསྡད་ཀྱི་འདུག་པཱ། ནང་པའི་ཆོས་ལ་དོ་སྣང་བྱེད་མཁན་ཚོས་༧རྒྱལ་བ་བསྟན་འཛིན་རྒྱ་མཚོ་ཟེར་ནས་དམིགས་བསལ་གྱིས་དགའ་པོ་འདྲ་བོ་བྱེད་ཀྱི་འདུག་ག གང་ལྟར་བོད་ཀྱི་བདེན་མཐའ་སེལ་རྒྱུ་ཏན་ཏན་ཡོང་གི་རེད། ཁྱེད་རང་ཚོ་བཙན་བྱོལ་དུ་ཡོད་པའི་སྐབས་སུ་བྱས་རྗེས་བཞག་པའི་བོད་མི་ཆགས་བསྡད་ཡོད་རེད། ཕྱིན་ཆད་ང་ཚོ་གཟི་བརྗིད་ལྡན་པའི་ཐོག་ནས་བོད་ནང་དུ་གཞིས་བྱེས་མཉམ་འཛོམས་ཀྱི་ཉི་མ་ཤར་བའི་སྐབས། ཁྱེད་རང་ཚོ་སྤོབས་པ་བྱས་ནས་བོད་ནང་ནས་ཐུག་ཆོག་པ་བྱས། ཤེས་སོང་ངམ། བློ་བདེ་བོ་བྱས་ནས་སྡོད་ཨ། ཞེས་བཀའ་སློབ་སྩལ་སོང་།
གསར་འགོད་པ། བྱམས་པ་ཚེ་རིང་དང་བསྟན་འཛིན་ཕུར་བུ།
THANKS TO ALL OF YOU! 🙂