རྒྱ་གར་གྱི་བདེ་སྲུང་བློན་ཆེན་ཟུར་པ་ཞིག་སྐུ་གྲོངས་པར་ཐུགས་གསོ་ཞུས།

བོད་མིའི་སྒྲིག་འཛུགས་ཀྱི་སྲིད་ཚབ་རྒྱ་རི་སྒྲོལ་མ་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ནས་རྒྱ་གར་གྱི་བདེ་སྲུང་བློན་ཆེན་ཟུར་པ་སྐུ་ཞབས་མུ་ལ་ཡམ་སིངྒ་ཡ་དྷེབ་མཆོག་སྐུ་གྲོངས་བར་ཁོང་གི་ཤུལ་ལུས་ནང་མི་བཅས་ལ་ཐུགས་གསོ་ཞུས་འདུག

ཁ་སང་ཕྱི་ཚེས་ ༡༠ ཉིན་རྒྱ་གར་གྱི་བདེ་སྲུང་བློན་ཆེན་ཟུར་པ་སྐུ་ཞབས་མུ་ལ་ཡམ་སིངྒ་ཡ་དྷེབ་ (Shri Mulayam Singh Yadav)མཆོག་དགུང་གྲངས ༨༢ ཐོག་སྐུ་གྲོངས་ཡོད་སྟབས། དེ་རིང་བོད་མིའི་སྒྲིག་འཛུགས་ཀྱི་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་ནས་དམ་པ་ཁོང་གི་བུ་ཨ་ཀ་ལི་སི་ཡ་དྷ་ཝུ་( Shri Akhilesh Yadav) ལགས་ཀྱི་མཚན་ཐོག་ཏུ་ཐུགས་གསོ་ཞུས་པའི་ནང་། སྲིད་ཚབ་མཆོག་གིས་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་བྱས་ནས། ཁྱེད་ཀྱི་ཡབ་ཆེན་དམ་པ་སྐུ་འདས་གྲོངས་སུ་གྱུར་བར་གདུང་སེམས་མཉམ་སྐྱེད་ཞུ་ཡི་ཡོད་ལ། བཀའ་ཤག་ནས་དམ་པ་ཁོང་གིས་རྒྱ་གར་གྲོས་ཚོགས་སུ་བོད་དོན་རྒྱབ་སྐྱོར་དང་ཞུ་གཏུགས་གནང་བའི་བཀའ་དྲིན་ཚོར་གྱིན་ཡོད། སྐུ་ཞབས་མུ་ལ་ཡམ་སིངྒ་ཡ་དྷེབ་ (Shri Mulayam Singh Yadav) ལགས་ནི་རྒྱ་གར་གྱི་གཟེངས་སུ་ཐོན་པའི་ཆབ་སྲིད་པ་ཞིག་དང་བོད་ཀྱི་གྲོགས་པོ་ཞིག་ཡིན་པ་མ་ཟད། ཁོང་ནས་བོད་དོན་རྒྱབ་སྐྱོར་ཚད་ལྡན་གནང་བར་བཀྲིན་དྲན་གྱིན་ཡོད། ཅེས་གསུངས་འདུག

ཡང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཐུགས་གསོ་ཞུས་པའི་ནང་།  ཕྱི་ལོ ༢༠༡༧ ཟླ ༡༢ ནང་བོད་མི་མང་སྤྱི་འཐུས་ལྷན་ཚོགས་ཀྱི་འཐུས་མི་རྣམས་ཀྱིས་ཁྱེད་ཀྱི་ཡབ་ཆེན་དམ་པ་(མུ་ལ་ཡམ་སིངྒ་ཡ་དྷེབ) མཇལ་བའི་གོ་སྐབས་ཤིག་བྱུང་། ངས་བོད་མི་ཡོངས་ཀྱི་ཚབ་བྱས་ནས་དམ་པ་ཁོང་གིས་རྒྱུན་དུ་བོད་དོན་འཐབ་རྩོད་ཀྱི་ལས་སུ་ཞུགས་ནས་རྒྱ་གར་གྲོས་ཚོགས་སུ་བོད་ཀྱི་འཐབ་རྩོད་ལ་རྒྱབ་སྐྱོར་དང་གདུང་སེམས་མཉམ་སྐྱེད་གནང་བའི་བཀའ་དྲིན་ཞུ་འདོད་བྱུང་ལ། ང་ཚོས་དམ་པ་ཁོང་གི་རླབས་ཆེ་བའི་ལྟ་གྲུབ་དང་རིན་ཐང་ལྟ་ཚུལ་རྣམས་རྒྱུན་སྐྱོང་བྱ་རྒྱུ་ནི་ཁོང་ལ་རྗེས་དྲན་ཞུ་སྟངས་ཆེས་ཡག་ཤོས་ཤིག་ཡིན། ཞེས་དང་། ཚོགས་གཙོ་མཆོག་ནས་བོད་མི་མང་སྤྱི་འཐུས་ལྷན་ཚོགས་དང་བོད་མི་ཡོངས་ཀྱི་ཚབ་གནང་སྟེ་དམ་པ་ཁོང་གི་ནང་མི་ཡོངས་ལ་གདུང་སེམས་མཉམ་སྐྱེད་ཞུས་འདུག

དམ་པ་མུ་ལ་ཡམ་སིངྒ་ཡ་དྷེབ་ (Shri Mulayam Singh Yadav) མཆོག་ནི་ཕྱི་ལོ ༡༩༣༩ ཟླ ༡༡ ཚེས ༢༢ ཉིན་རྒྱ་གར་ཨུ་ཊར་པ་ཌེ་ཤི (Uttar Pradesh) ཡི་ས་ཧྥི་( Safai) ཞེས་པའི་གྲོང་སྡེ་ཆུང་ཆུང་ཞིག་ཏུ་སྐྱེས་ཤིང་། ཕྱི་ལོ ༡༩༧༧ ལོར་ཁོང་ཉིད་ཨུ་ཊར་པ་ཌེ་ཤི་མངའ་སྡེའི་སྤྱི་ཁྱབ་བློན་ཆེན་དུ་བདམས།  ཕྱི་ལོ ༡༩༨༠ ལོར་མངའ་སྡེའི་གྲོས་ཚོགས་གོང་མའི་ཚོགས་གཙོར་འདེམས་ཐོན་བྱུང་། ཁོང་གིས་སྔ་རྗེས་སུ་རྒྱ་གར་གྲོས་ཚོགས་གོང་མའི་གྲོས་ཚོགས་འཐུས་མི་ཐེངས་བདུན་དང་། ཕྱི་ལོ་ ༡༩༩༦ ལོར་རྒྱ་གར་གྱི་བདེ་སྲུང་བློན་ཆེན་གནང་ཡོད་པ་མ་ཟད། ཁོང་ནི་རྒྱ་གར་གྲོས་ཚོགས་ནང་བོད་དོན་གླེང་སློང་བྱེད་མཁན་ཞིག་ཀྱང་ཡིན་འདུག

གསར་འགོད་པ། དཔལ་ལྡན།