བོད་ཀྱི་སྐད་ཡིག་སྲུང་སྐྱོབ་དང་འབྲེལ་བའི་སྐོར་བསྐྱོད་བྱ་རྒྱུ་ཡིན་འདུག

བོད་ཀྱི་སྐད་ཡིག་ཞབས་ཞུ་ཁང་ངོས་ནས་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད་བོད་ཡིག་གི་བརྒྱ་ཆ་ ༩༥ ཡན་ལོན་པ་རྣམས་ལ་གཟེངས་བསྟོད་ཧིན་སྒོར་ལྔ་སྟོང་འབུལ་རྒྱུ་ཡིན་འདུག

དེ་རིང་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་སྐད་ཡིག་ཞབས་ཞུ་ཁང་ངོས་ནས། འདི་ལོར་སྦིར་ཇོ་ཏ་ར་དང་རྡེ་ར་ལྡུན་སོགས་རྒྱ་གར་བྱང་ཕྱོགས་ཀྱི་དགོན་པ་དང་སློབ་གྲྭ་ཁག དེ་བཞིན་གཞིས་ཆགས་ཁག་ཏུ་བོད་ཀྱི་སྐད་ཡིག་སྲུང་སྐྱོབ་ཀྱི་ཆེད་དུ་སྐོར་བསྐྱོད་ལས་འགུལ་ཐེངས་གསུམ་པ་སྤེལ་རྒྱུ་ཡིན་པའི་གསལ་བསྒྲགས་བྱས་སོང་།

སྐབས་དེར་བོད་ཀྱི་ཞབས་ཞུ་ཁང་གི་སྐབས་བཞི་བའི་འགན་འཛིན་ཐུབ་བསྟན་རབ་བརྟན་ལགས་ཀྱིས། གསར་འགོད་གསལ་བསྒྲགས་བསྐོང་ཚོགས་བྱ་དགོས་པའི་དགོས་དམིགས་སྐོར་ལ་བརྗོད་དོན། དེ་རིང་གཙོ་བོ་ང་ཚོས་ཉིན་གྲངས་ ༡༥ ནས་ ༢༠ ཙམ་གྱི་རིང་རྒྱ་གར་བྱང་ཕྱོགས་ཀྱི་སྦིར་ཇོ་ཏ་ར་དང་རྡུ་ར་ལྡུན་ཁུལ་གྱི་སློབ་གྲྭ་ཁག་དང་གཞིས་ཆགས་ཁག་ཚང་མའི་ནང་སྐད་ཡིག་སྐོར་བསྐྱོད་ཀྱི་ལས་འགུལ་སྤེལ་རྒྱུ་ཡིན། ལས་འགུལ་གྱི་དམིགས་ཡུལ་གཙོ་བོ་ནི་ང་ཚོའི་བཙན་བྱོལ་སྤྱི་ཚོགས་ནང་ཡིག་སྐད་ཉམས་ཆག་གི་གནས་སྟངས་དེ་དཀའ་ངལ་ཆེན་པོ་ཞིག་ཆགས་བསྡད་ཡོད། ལྷག་པར་དུ་བོད་ནང་ལ་ཆ་བཞག་ན་རྒྱ་མིས་ཆེད་མངགས་ནས་བོད་ཀྱི་སྐད་ཡིག་རྩ་མེད་བཟོས་དང་བཟོ་མུས་ཡིན་པའི་གནས་སྟངས་ཛ་དྲག་པོ་ཆགས་ཡོད། དེར་བརྟེན། ང་ཚོས་བཙན་བྱོལ་སྤྱི་ཚོགས་ནང་དེ་ལ་དཔག་པའི་གྲ་སྒྲིག་མ་བྱས་ཚེ། ད་ལྟའི་བོད་ནང་གི་ལོ་ལྔ་དང་བདུན་ཡིན་པའི་བྱིས་པ་ཚོ་མ་འོངས་པར་ཆེན་པོ་ཆགས་ཡོང་དུས། ཁོ་ཚོའི་བོད་ཀྱི་སྐད་ཡིག་གི་ཆུ་ཚད་ཧ་ཅང་ཞན་པོ་དང་རྒྱ་སྐད་བཀོལ་སྤྱོད་གཏོང་ཤུགས་ཆེན་པོ་དང་བོད་སྐད་བོད་ཡིག་བཀོལ་སྤྱོད་མི་གཏོང་མཁན་ཞིག་ཏུ་བསྒྱུར་བར་རྒྱ་ནག་གཞུང་གིས་ད་ལྟ་ནས་ལག་བསྟར་བྱེད་བཞིན་ཡོད་ལ། གང་ལ་གང་འཚམ་གྱི་འགྱུར་བ་འགྲོ་རྒྱུ་ཡིན་པ་གཏན་ཁེལ་བ་ཞིག་རེད། དེ་བས་ང་ཚོ་བཙན་བྱོལ་སྤྱི་ཚོགས་ནང་དེ་ལ་དཔག་པའི་གྲ་སྒྲིག་དང་ཅིག་མ་བྱས་པ་ཡིན་ན་ཏན་ཏན་འགྲིག་གི་མི་འདུག ཅེས་དང་། ད་ལྟ་དྲ་རྒྱའི་དུས་སྐབས་འདིར་སྤྱི་ཚོགས་བརྒྱུད་ལམ་ཁག་ཏུ་སྐད་ཡིག་གི་ལས་འགུལ་སྤེལ་ན་འགྲིག་གི་ཡོད་ཀྱང་། ས་གནས་ས་ཐོག་ཏུ་བསྐྱོད་ཚེ་སྐད་ཡིག་གི་ལས་འགུལ་ལ་ནུས་པ་ཆེན་པོ་འཐོན་གྱི་ཡོད་སྟབས། ད་ལོའི་ལས་འགུལ་བྱང་ཕྱོགས་གཞིས་སློབ་ཁག་ཏུ་བསྐྱོད་འཆར་ཡོད་སྐོར་བརྗོད་སོང་།

སྐད་ཡིག་སྐོར་བསྐྱོད་ཀྱི་ལས་འགུལ་གསལ་བསྒྲགས་དང་འབྲེལ་ནས་བོད་ཀྱི་སྐད་ཡིག་ཞབས་ཞུ་ཁང་གི་ངོས་ནས། པཎ་ཆེན་རིན་པོ་ཆེ་མཆོག་ཞིང་གཤེགས་ནས་ལོ་ངོ་ ༣༠ འཁོར་བ་ནས་བཟུང་། རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད། བོད་ཡིག་གི་ཡིག་རྒྱུག་བརྒྱ་ཆ་ ༩༥ ལོན་མཁན་བོད་རིགས་སློབ་མ་ཡོངས་ལ་གཟེངས་བསྟོད་ཧིན་སྒོར་ལྔ་སྟོང་རེ་སྤྲོད་བཞིན་པ་དེ། ནད་ཡམས་རྐྱེན་གྱིས་འདས་པའི་ལོ་གཉིས་རིང་སྤྲོད་ཐུབ་མེད་ཀྱང་། ད་ལོ་ནས་བསྐྱར་དུ་མགོ་འཛུགས་ཞུ་རྒྱུ་ཡིན་པའི་གསལ་བསྒྲགས་ཀྱང་སྤེལ་སོང་ལ། བོད་ཀྱི་སྐད་ཡིག་ཞབས་ཞུ་ཁང་ཕྱི་ལོ་ ༢༠༡༣ ལོར་སློབ་གྲྭ་འགྲིམས་བཞིན་པའི་སློབ་མ་ཁག་ཅིག་གིས་གསར་དུ་བཙུགས་ཤིང་། ཕྱི་ལོ་ ༢༠༡༥ ༧སྐུའི་འཁྲུངས་སྐར་སྲུང་གཙི་དང་འབྲེལ་ནས་རྒྱ་གར་ལྷོ་ཕྱོགས་གཞིས་གྲོང་ཁུལ་དུ་སྐད་ཡིག་སྐོར་བསྐྱོད་ཀྱི་ལས་འགུལ་དང་། ཕྱི་ལོ་ ༢༠༡༩ ལོར་པཎ་ཆེན་རིན་པོ་ཆེ་མཆོག་ཞིང་ལ་གཤེགས་ནས་ལོ་ངོ་ ༣༠ འཁོར་བའི་རྗེས་དྲན་དང་བསྟུན། ཀ་རྡོ་སྒང་གསུལ་ཁུལ་གྱི་བོད་མི་འདུས་སྡོད་གཞིས་གྲོང་དུ་སྐད་ཡིག་སྲུང་སྐྱོབ་དང་འབྲེལ་བའི་སྐོར་བསྐྱོད་བཅས་ཁྱོན་སྐོར་བསྐྱོད་ལས་འགུལ་ཐེངས་གཉིས་རིང་སྤེལ་ཡོད་འདུག

ཡང་བོད་ཀྱི་སྐད་ཡིག་ཞབས་ཞུ་ཁང་གི་དངུལ་གཉེར་ལོ་ཡག་བཀྲ་ཤིས་ལགས་ཀྱིས། བོད་ཀྱི་སྐད་ཡིག་ཞབས་ཞུ་ཁང་ངོས་ནས་རྒྱ་གར་ལྷོ་ཕྱོགས་ཀྱི་བོད་མིའི་གཞིས་གྲོང་ཁག་ཏུ་ཟ་ཁང་དང་ཚོང་ཁང་ཁག་གི་སྒོ་བྱང་བོད་ཡིག་ནང་འབྲི་བའི་ལས་འགུལ་སྤེལ་ཟིན་པ་ལྟར། ད་ལྟ་བོད་ཀྱི་ཉམས་པ་གསོ་བཅོས་དང་མི་ཉམས་གོང་འཕེལ་གཏོང་བར་བོད་མི་རེ་ངོ་རེར་འགན་ཡོད་པ་དང་བོད་ཀྱི་བཀོལ་སྤྱོད་གཏོང་མཁན་མུ་མཐུད་སེམས་ཤུགས་སྤར་དགོས་པ་ལས་སེམས་ཤུགས་གཅོག་རྒྱུ་མེད་སྐོར་སོགས་བརྗོད་ལ། བོད་ཀྱི་སྐད་ཡིག་ཞབས་ཞུ་ཁང་ངོས་ནས་༧རྒྱལ་ཡུམ་ཆེན་མོའི་རྐང་སྤོལ་འགྲན་སྡུར་སྐབས་སྦྱར་བྱང་བོད་ཡིག་དང་འགྲེལ་བརྗོད་ཀྱང་བོད་སྐད་བརྒྱག་དགོས་པའི་འབོད་སྐུལ་ཞུས་པ་ལྟར། ད་ལོའི་རྡུ་ར་ལྡུན་ཁུལ་དུ་ཚོགས་པའི་༧རྒྱལ་ཡུལ་ཆེན་མོའི་རྐང་སྤོལ་འགྲན་སྡུར་སྐབས་བོད་སྐད་ཀྱི་ལམ་ནས་འགྲེལ་བརྗོད་སོགས་ལེགས་པོ་གནང་བར་རྗེས་སུ་ཡི་རངས་དང་ཐུགས་རྗེ་ཞུ་རྒྱུ་ཡིན་སྐོར་བརྗོད་སོང་།

གསར་འགོད་པ། སྐལ་བཟང་སྦྱིན་པ།