སྲིད་སྐྱོང་སྤེན་པ་ཚེ་རིང་མཆོག་གིས་སྣེ་ཁྲིད་པའི་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ཞིག་འཇར་མན་ནང་གཞུང་འབྲེལ་ཕྱོགས་ཕེབས་གནང་མུས་ཡིན་འདུག
ཟླ་འདིའི་ཕྱི་ཚེས་ ༧ ནས་ ༡༩ བར་འཇར་མན་གུ་ཡངས་ལྟ་གྲུབ་དར་སྤེལ་ཚོགས་པའི་ (Friedrich Naumann Foundation) གོ་སྒྲིག་འོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་འཇར་མན་དང་སྦེལ་ཇམ། སུད་ཝེ་ཌན་བཅས་ཀྱི་ནང་གཞུང་འབྲེལ་ཕྱོགས་ཕེབས་གནང་གི་ཡོད་པ་ལྟར། ཐེངས་འདིའི་སྲིད་སྐྱོང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་སྤྱི་འཐུས་ཁག་ཅིག་ལས་གྲུབ་པའི་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་དེ། ཟླ་འདིའི་ཕྱི་ཚེས་ ༩ ཉིན་འཇར་མན་གྱི་གྲོང་ཁྱེར་མུ་ནིག་གནམ་ཐང་དུ་འབྱོར་ཞིང་། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་གྲོང་ཁྱེར་མུ་ནིག་བོད་རིགས་ཚོགས་པས་ཁོང་རྣམ་པར་ཕེབས་བསུའི་སྣེ་ལེན་ཞུས་གྲུབ་མཚམས། སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་ཀྱི་ཐོག་མར་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་དེས། འཇར་མན་གྱི་བྷ་ཝེ་རི་ཡ་ (Bavaria) མངའ་སྡེའི་གྲོས་ཚོགས་ཀྱི་ལས་ཐོག་ཚོགས་གཞོན་དང་། མངའ་སྡེའི་རིག་གཞུང་དང་གསར་འགྱུར་ཚན་པའི་བློན་ཆེན་ཟུར་བ་སྐུ་ཞབས་ (Dr. Wolfgang Heubisch) མཆོག་དང་ལྷན་མཇལ་འཕྲད་གནང་ཡོད་ཅིང་། དེ་རྗེས་སྲིད་སྐྱོང་མཆོག་གིས་གྲོང་ཁྱེར་མུ་ནིག་ཁུལ་དུ་གནས་སྡོད་རང་རིགས་བོད་མི་རྣམས་ལ་མཇལ་འཕྲད་དང་བཀའ་སློབ་སྩལ་གྲུབ་མཚམས། བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམ་པ་འཇར་མན་རྒྱལ་ས་བྷར་ལིན་ལ་ཕེབས་ཐོན་གནང་ཡོད་པ་རེད།
དེ་ཡང་ཕྱི་ཚེས་ ༩ ཉིན་གྱི་དགོང་དྲོར་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་དེས། རྒྱལ་ས་བྷར་ལིན་ནང་རྟེན་གཞི་བྱས་པའི་རང་དབང་མང་གཙོ་སྲིད་དོན་ཚོགས་པའི་ (Free Democratic Party) ཁོངས་གཏོགས་འཇར་མན་གྱི་གུ་ཡངས་གཞོན་སྐྱེས་ཚོགས་པ་ཆེ་ཤོས་ཀྱི་སྐུ་ཚབ་གཞོན་སྐྱེས་རྣམས་དང་ཐུག་འཕྲད་གནང་ཡོད་ཅིང་། ཕྱི་ཚེས་ ༡༠ ཉིན་གྱི་སྔ་དྲོར་ཚོགས་ཆུང་དེས། རྒྱལ་ས་བྷར་ལིན་དུ་རྟེན་གཞི་བྱས་པའི་འཇར་མན་རོགས་ཚོགས་ (FNF) ལས་ཁུངས་ཀྱི་སྤྱི་ཁྱབ་འགན་འཛིན་ལྕམ་ཨ་ནེ་ཊི་ཝེ་ཊི་ (Annett Witte) ལགས་དང་རྒྱལ་སྤྱིའི་སྡེ་ཚན་གྱི་འགན་འཛིན་སྐུ་ཞབས་རཱ་ནེ་ཀཱ་ལབ་ (Dr Rene Klaff) ལགས། དེ་བཞིན་ཚོགས་པ་དེའི་རྒྱལ་སྤྱིའི་དངུལ་ཁང་གི་ལས་དོན་ཚན་པའི་འགན་འཛིན་ལྕམ་མཱ་ཁཱེ་ལ་ལི་སའོ་སི་ཀི་ (Dr Michaela Lissowski) ལགས། ཚོགས་པའི་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐུ་ཞབས་སཱ་ལུམ་ཨ་མིན་ (Dr Salim Amin) ལགས། ཚོགས་པའི་ཨེ་ཤ་ཡའི་སྡེ་ཚན་འགན་འཛིན་སྐུ་ཞབས་ཆཱར་ལེ་སི་ཌུ་ཝི་ན་ཇི་ (Charles du Vinage) ལགས་བཅས་དང་མཇལ་འཕྲད་གནང་ཡོད་འདུག
ད་དུང་ཕྱི་ཚེས་ ༡༠ ཡི་ཉིན་གུང་སྐུ་ཚབ་ཚོགས་ཆུང་དེས་འཇར་མན་གྲོས་ཚོགས་འཐུས་མི་སྐུ་ཞབས་ཝ་ལཱན་ཊིན་ (Valentin Abel) མཆོག་དང་ཁོང་གི་ཕྱག་རོགས་ཨན་ཌིར་ལེ་མན་ (Andre Lehmann) ལགས། ཉིན་རྒྱབ་ཏུ་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་དང་རོགས་སྐྱོར་ཚན་པའི་མགྲིན་ཚབ་པ་སྐུ་ཞབས་པེ་ཊར་ཧེ་ཌི་ (Peter Heidt)མཆོག་དང་། འཇར་མན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་དང་། ཨེ་ཤ་ཡ་དང་རྒྱ་ནག་གི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་སྐུ་ཞབས་ཧྥི་རན་ཀུ་མའོ་ལཱར་ (Frank Muller-Rosentritt) མཆོག་བཅས་དང་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་ཡོད་པ་རེད།
ཁ་སང་ཕྱི་ཚེས་ ༡༡ ཉིན་གྱི་སྔ་དྲོར་སྲིད་སྐྱོང་མཆོག་གིས་སྣེ་ཁྲིད་པའི་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་དེས། འཇར་མན་གྲོས་ཆོགས་འཐུས་མི་སྐུ་ཞབས་མེ་ཁལ་བྷ་རན་ཌི་ (Michael Brand) མཆོག་དང་གྲོས་ཚོགས་འཐུས་མི་པེ་ཊར་( Klaus-Peter Willsch ) མཆོག་རྣམ་གཉིས་དང་མཇལ་འཕྲད་གནང་ཡོད་པ་མ་ཟད། དེ་རྗེས་འཇར་མན་དུ་ཡོད་པའི་ཐའེ་ཝན་གྱི་གཞུང་ཚབ་མོ་སྐུ་ཞབས་ཤུས་ཊི་ཝེ་ (Dr Shieh Jhy-Wey) ལགས་དང་ལྷན་དུ་མཇལ་འཕྲད་གནང་ཡོད་འདུག
ཐེངས་འདིའི་སྲིད་སྐྱོང་སྤེན་པ་ཚེ་རིང་མཆོག་གི་གཞུང་འབྲེལ་ཕྱོགས་ཕེབས་མཉམ་དུ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་དངོས་གྲུབ་རྡོ་རྗེ་ལགས་དང་སྤྱི་འཐུས་གསེར་རྟ་ཚུལ་ཁྲིམས་ལགས། སྤྱི་འཐུས་དབྲ་རྩ་བསོད་ནམས་ནོར་བུ་ལགས། སྤྱི་འཐུས་དཀོན་མཆོག་ཡར་འཕེལ་ལགས། སྤྱི་འཐུས་ཚེ་རིང་དབྱངས་ཅན་མཆོག དེ་བཞིན་དཔལ་འབྱོར་ལས་ཁུངས་ཀྱི་དྲུང་ཚབ་བསྟན་འཛིན་ལེགས་གྲུབ་ལགས་དང་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། སྲིད་སྐྱོང་མཆོག་གི་སྒེར་དྲུང་བསྟན་འཛིན་གསལ་སྒྲོན་ལགས་བཅས་ཀྱིས་མཉམ་བཅར་ཞུས་ཡོད་འདུག
གསར་འགོད་པ། སྐལ་བཟང་སྦྱིན་པ།
