གངས་སྐྱིད་ཀྱི་རྡིབ་སྐྱོན་བྱུང་བའི་གཞུང་ལམ་བསྐྱར་བཟོ་བྱེད་པར་འགྲོ་སོང་བཀའ་འཁྲོལ་ཐོབ་ཡོད་པའི་གནས་ཚུལ་འདུག

དྷ་ཤོད་ནས་གངས་སྐྱིད་དུ་ཐད་ཀར་འགྲོ་སའི་གཞུང་ལམ་ལ་རྡིབ་སྐྱོན་བྱུང་ནས་ཟླ་གཉིས་མ་ཟིན་ཙམ་འགྲོ་ཡི་ཡོད་པ་དང་དྷ་ས་ས་གནས་མགོ་འཛིན་ལགས་ནས་གཞུང་ལམ་དེ་བསྐྱར་བཟོ་བྱེད་པར་རྒྱ་གར་གཞུང་ནས་འགྲོ་སོང་བཀའ་འཁྲོལ་ཐོབ་ཟིན་ཡོད་སྐོར་འགྲེལ་བརྗོད་གནང་བྱུང་།

དྲག་ཆར་བབས་རྐྱེན་གྱིས་དྷ་ཤོད་ནས་གངས་སྐྱིད་དུ་འགྲོ་སའི་ཝེ་ཇི་ཕ་ལི་སི་ (Vijay palace hotel )གཤམ་འོག་གི་གཞུང་ལམ་རྡིབ་སྐྱོན་བྱུང་བར་བརྟེན། དྷ་ཤོད་ནས་མེག་གྷན་རི་གྲོང་དུ་འགྲོ་མཁན་ཚོ་སྨན་རྩིས་ཁང་གི་རྒྱབ་ཕྱོགས་ཀྱི་གཞུང་ལམ་གསར་པ་བརྒྱུད་ནས་འགྲོ་དགོས་ཀྱི་ཡོད་པ་དང་། གཞུང་ལམ་དེ་ཀྱག་ཀྱོག་ཆེ་ཞིང་རྒྱ་ཆུང་བའི་རྐྱེན་གྱིས་འགྲིམ་འགྲུལ་འཚང་ཁ་ཆེ་བར་བརྟེན། དྷ་ས་ས་གནས་མགོ་འཛིན་ལས་ཁུངས་དང་མེས་དབོན་གཙུག་ལག་དཔེ་སྟོན་སློབ་གྲྭའི་ཕ་མའི་ཚོགས་ཆུང་ནས་སྔ་རྗེས་སུ་རྒྱ་གར་གཞུང་ལ་བདེ་སྡུག་ཞུས་ཡོད་འདུག་ལ། དེ་རིང་ཕྱི་ཚེས་ ༡༢ ཉིན་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས་ལས་མགོ་ག་དུས་འཛུགས་ཐུབ་མིན་ཤེས་ཀྱི་མེད་ཀྱང་། གཞུང་ལམ་བསྐྱར་བཟོའི་འགྲོ་གྲོན་ཐད་བཀའ་འཁྲོལ་ཐོབ་ཟིན་ཡོད་པ་གོ་ཡི་འདུག་ཅེས་བརྗོད་བྱུང་།

 འདི་གའི་གསར་འགོད་པས་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་སུ་གཞུང་ལམ་བརྡིབས་ནས་ཟླ་ངོ་གཉིས་མ་ཟིན་ཙམ་འགྲོ་ཡི་ཡོད་ཀྱང་། ད་ལྟའང་བཟོ་མ་ཐུབ་པའི་རྒྱུ་རྐྱེན་གང་ཡིན་དྲིས་པར་ཁོང་གིས། གཞུང་ལམ་དེ་བརྡིབས་ནས་ཉིན་གཅིག་གི་རྗེས་སུ་དྷ་ས་ས་གནས་མགོ་འཛིན་གྱིས་རྒྱ་གར་གྱི་འབྲེལ་ཡོད་ལས་ཁུངས་ཁག་དང་། དྷ་ས་ཁུལ་གྱི་རྒྱ་གར་དཔོན་རིགས་རྣམས་དང་ཐུག་འཕྲད་བྱས་ཏེ་ལམ་བརྡིབས་པའི་གནད་དོན་དེའི་སྐོར་ཞུ་བསྡད་ཀྱི་ཡོད། གཞུང་ལམ་དེ་ནི་སྐུ་མདུན་གྱི་ཕེབས་ལམ་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། རྒྱ་གར་གྱི་གནད་ཡོད་མི་སྣ་སོགས་ཀྱི་ཕེབས་ལམ་ཡིན་པས། ལམ་དེ་གནད་འགག་ཅན་ཞིག་ཆགས་ཡོད་ཀྱང་ལམ་སེང་བཟོ་མ་ཐུབ་པའི་གནད་འགག་གཙོ་བོ་དེ་ག་རེ་ཡིན་མིན་ད་ལྟའང་གསལ་པོ་ཞིག་གཏན་ནས་བཤད་ཐུབ་ཀྱི་མི་འདུག ཅེས་འགྲེལ་བརྗོད་གནང་བྱུང་།

མེས་དབོན་གཙུག་ལག་དཔེ་སྟོན་སློབ་གྲྭའི་སྤྱི་སྤྱོད་རླངས་འཁོར་རྣམས་ཀྱིས་སྔ་དགོང་གཉིས་སུ་མེག་གྷན་དང་གངས་ཅན་སྐྱིད་གཤོངས་སུ་གནས་སྡོད་བྱེད་མཁན་སློབ་ཕྲུག་ཚོ་ཤེས་རབ་དགའ་ཚལ་སློབ་གླིང་དུ་ཡོད་པའི་དཔེ་སྟོན་སློབ་གྲྭར་སྐྱེལ་ལེན་བྱེད་པར་དཀའ་ངལ་འཕྲད་ཀྱི་ཡོད་པར་བརྟེན། དཔེ་སྟོན་སློབ་གྲྭའི་ཕ་མའི་ཚོགས་ཆུང་གིས་ཀྱང་ཡི་གེ་འབྱོར་ཡོད་པའི་སྐོར་ལ་ཁོང་གིས། ཉེ་སྔོན་དཔེ་སྟོན་སློབ་གྲྭའི་ཕ་མའི་ཚོགས་ཆུང་གིས་ཡི་གེ་སྦྱོར་བ་བཞིན། ང་ཚོས་ས་གནས་རྫོང་དཔོན་ལས་ཁུངས་(DC) ལ་ཡི་གེ་བསྐུར་ཡོད་བས། ས་གནས་རྫོང་དཔོན་གྱིས་(whatapp ) བརྒྱུད་ལམ་བརྡིབས་པའི་གནད་དོན་དེ་འབྲེལ་ཡོད་ལས་བྱེད་ཡོངས་ལ་ཡར་ཞུས་ཟིན་ཡོད་སྐོར་འགྲེལ་བརྗོད་གནང་བྱུང་ཡང་། ད་ལྟ་རྒྱ་གར་གྱི་འོས་བསྡུ་བསླེབ་གྲབས་ཡོད་པས་བྲེལ་ཟིང་ཆེན་པོ་ཆགས་ཡོད་པ་མ་ཟད། རྒྱ་གར་སྲིད་བློན་མུ་དྷི་མཆོག་ཨུ་ནར་ཕེབས་ཀྱི་ཡོད་སྟབས།  གཞུང་ལམ་བསྐྱར་བཟོ་བྱ་རྒྱུ་དེ་ལམ་སེང་ཡོང་ཐབས་མེད་པ་འདྲ་བོ་ཞིག་འདུག་ཀྱང་། ད་ལྟ་མངའ་སྡེ་གཞུང་ནས་གཞུང་ལམ་བསྐྱར་བཟོ་བྱ་རྒྱུར་དངུལ་གྱི་བཀའ་འཁྲོལ་ཐོབ་ཟིན་པ་གོ་ཐོས་བྱུང་། ཡིན་ནའང་། གཞུང་ལམ་ག་དུས་བཟོ་འཆར་ཡོད་མེད་སོགས་ངེས་གཏན་མེད་སྐོར་བརྗོད་བྱུང་།

དྷ་ཤོད་ནས་གངས་སྐྱིད་དུ་ཐད་ཀར་འགྲོ་བའི་གཞུང་ལམ་དེ་འདི་ལོའི་ཕྱི་ཟླ་ ༨ ཚེས་ ༡༨ ཉིན་གྱི་དགོང་མོར་རྡིབ་སྐྱོན་བྱུང་ཡོད་པ་དང་། གཤམ་འོག་གི་གཞུང་ལམ་དུ་ཆུ་རུད་འདམ་ཉོག་ཚབས་ཆེན་རྒྱུག་སྟེ་ཉིན་ཤས་རིང་འགྲོ་སྐྱོད་བྱེད་དཀའ་བའི་གནས་སུ་གྱར་ཡོད་པ་རེད། ད་ལྟ་ཆར་དུས་རིམ་གྱིས་རྫོགས་ཏེ་གནམ་གཤིས་གང་ཙམ་ཡག་པོ་ཡོད་པས་དྷ་ས་ཁུལ་གྱི་མི་མང་གིས་རྒྱ་གར་གཞུང་ནས་གང་མགྱོགས་གཞུང་ལམ་བསྐྱར་བཟོ་ཐུབ་པའི་རེ་བ་རྒྱག་བཞིན་འདུག

གསར་འགོད་པ། དཔལ་ལྡན།