རྒྱ་མོ་ལུའུ་མིང་ཅན་ཞིག་གིས་ལྷ་ས་ནས་བོད་མི་ཚང་མ་རྩ་མེད་བཟོ་དགོས་ཀྱི་འདུག་ཅེས་བོད་མི་རྣམས་ལ་རང་ས་རང་ཡུལ་ནས་དམའ་འབེབ་མཐོང་ཆུང་དང་དབང་ཡོད་བཙན་གཏམ་བཤད་པ་དེར་དགོངས་སེལ་ཞུས་མེད་སྟབས་བོད་མི་མང་པོས་ངོ་རྒོལ་སྐྱོན་བརྗོད་བྱེད་བཞིན་འདུག
Chinese Soldiers at a flag-raising ceremony in front of the Potala Palace in Lhasa, capital of Tibet. Photo: Xinhua
ཟླ་འདིའི་ཚེས་ ༨ ཉིན་བོད་ཀྱི་རྒྱལ་ས་ལྷ་སར་ཡོང་བའི་རྒྱ་མོ་ཞིག་གིས། སྲིད་གཞུང་གིས་དོ་འཁུར་བྱ་རྒྱུ་མིན་ནམ། ལྷ་སའི་བོད་མི་ཚང་མ་རྩ་མེད་བཟོས་ནས་ལྷ་ས་རྒྱ་མིར་དབང་དགོས་ཀྱི་འདུག་ཅེས་བརྙན་ཐུང་ཞིག་སྐད་འཕྲིན་སོགས་སྤྱི་ཚོགས་དྲ་ལམ་དུ་བཀྲམས་རྗེས། བཙན་དབང་རིང་ལུགས་ཀྱི་ཐལ་ཆ་ཆེ་བའི་སྐད་ཆ་བཤད་ཆ་དེར་བོད་ཕྱི་ནང་གི་སྤྱི་ཚོགས་དྲ་ལམ་དུ་བོད་མི་མང་པོ་ཞིག་གིས་ངོ་རྒོལ་སྐྱོན་བརྗོད་བྱེད་བཞིན་འདུག
ཟླ་འདིའི་ཕྱི་ཚེས་ ༩ ཉིན་ལྷ་ས་གྲོང་ཁྱེར་ཉེན་རྟོག་ཁང་གིས་དེ་འབྲེལ་གསལ་བསྒྲགས་སྤེལ་བའི་ནང་། ཕྱི་ལོགས་ནས་ཡོང་བའི་ལུའུ་ག་གེ་མོས་མི་རིགས་མཐུན་སྒྲིལ་གཏོར་བཤིག་གཏོང་བའི་སྐད་ཆ་བཤད་དེ་སྤྱི་ཚོགས་དྲ་ལམ་དུ་བཀྲམ་པའི་གནད་དོན་དེར་ཞིབ་འཇུག་བྱེད་བཞིན་པའི་སྒང་ཡིན་ལ། བཅའ་ཁྲིམས་གཞིར་བཟུང་ཐག་གཅོད་བྱ་རྒྱུ་ཡིན་སྐོར་བསྒྲགས་འདུག
ཕྱིས་སུ་རྒྱ་མོ་ལུའུ་མིང་ཅན་དེས་ས་གནས་སྲིད་གཞུང་དང་མི་མང་སྤྱི་ལ་དགོངས་སེལ་ཞུས་ཡོད་ཀྱང་། མོས་བོད་མི་ཚང་མ་རྩ་མེད་བཟོ་དགོས་ཀྱི་འདུག་ཅེས་བོད་མིར་སྡང་ཟུག་གིས་རང་ས་རང་ཡུལ་ནས་དམའ་འབེབ་མཐོང་ཆུང་དང་དབང་ཡོད་བཙན་གཏམ་བཤད་པ་དེར་དགོངས་སེལ་ཞུས་མེད་སྟབས། བོད་མི་མང་པོས་སྤྱི་ཚོགས་དྲ་ལམ་སོགས་ནས་ལྷ་ས་ནི་བོད་མི་རིགས་ཀྱི་ཆབ་དཔལ་རིག་གསུམ་གྱི་ལྟེ་གནས་ཡིན་ལ། ཕྱི་ནས་ཡོང་བའི་འཁྱམ་པོ་ཞིག་ལ་སྐད་ཆ་དེ་འདྲ་བཤད་པའི་ཐོབ་ཐང་རྩ་བ་ནས་མེད་པའི་རྒོལ་གཏམ་སློག་གི་འདུག དེ་ཡང་ལྷ་ས་ནས་ཡིན་པའི་བོད་མི་ཞིག་གིས། རྒྱ་མོ་ཁ་ལ་ཐལ་བ་བླུག་རྒྱུ་ཞིག་གི་སྐད་ཆ་དེ་བོད་མིའི་སྙིང་ལ་གྲི་བཙུགས་པ་ལྟ་བུ་ཆགས་ཡོད་པ་དང་། སྐད་ཆ་དེ་ནི་མི་ཆོས་དང་འགལ་བའི་སྐད་ཆ་ཞིག་རེད། སྔོན་མ་རྒྱ་ནག་ཝུའུ་ཧན་སོགས་སུ་ཏོག་དབྱིབས་ནད་ཡམས་བྱུང་དུས། ང་ཚོ་བོད་མི་རྣམས་ནས་དམག་དང་མུ་གེ་མ་ཡོང་བ་ཤོག ནད་ཡམས་དེ་ལས་ཐར་བར་ཤོག་ཅེས་སྨོན་ལམ་བརྒྱབ་ཡོད་ཀྱང་། རྒྱ་མོ་དེས་བོད་མི་ཚང་མ་རྩ་མེད་གཏོང་དགོས་ཀྱི་འདུག ལྷ་ས་འདི་རྒྱ་མིས་བདག་བཟུང་བྱ་དགོས་ཀྱི་འདུག་ཅེས། གོང་རིམ་ནས་གནད་དོན་དེར་ཐག་གཅོད་ནན་པོ་བྱ་དགོས་པའི་རེ་སྐུལ་བྱས་འདུག
ཡང་བོད་མི་ཞིག་གིས། ཉེན་རྟོག་ཁང་གིས་རྒྱ་མོ་དེ་འཛིན་བཟུང་བྱས་རྗེས་མོ་རང་ནོར་འདུག་ཅེས་བཤད་པ་ཙམ་གྱིས་ང་ཚོ་ཡིད་ཚིམས་ནས་སྡོད་མི་རུང་བར་མུ་མཐུད་ཐག་གཅོད་ག་འདྲ་ཞིག་བྱེད་མིན་ལ་རྩད་གཅོད་གཏོང་དགོས་པ་དང་། མི་རིགས་དེ་རིགས་ལ་མ་འོངས་པར་བོད་མི་རིགས་ལ་དམའ་འབེབ་མཐོང་ཆུང་བྱེད་རྒྱུ་མི་འདུག་ཨ་བསམ་པའི་ཉམས་མྱོང་ཞིག་འཐོབ་ཐུབ་པ་བྱེད་དགོས་སྐོར་དང་། སྔོན་ཆད་ཀྱང་རྒྱ་མི་འདི་འདྲ་བྱེད་མཁན་བྱུང་ཡོད་ལ། མ་འོངས་པའང་ཡོང་རྒྱུ་ཡིན་པ་བཤད་མ་དགོས་པས་ཐག་གཅོད་ནན་མོ་བྱེད་དགོས། བོད་མི་རིགས་ཀྱི་ལོ་རྒྱུས་དང་རིག་གནས་ཀྱི་རྫོང་མཐུག་སའི་གནས་གལ་ཆེན་པོ་ཞིག་ལ་རྒྱ་མི་འཁྱམ་ཉུལ་བ་ཞིག་གིས་འདི་འདྲའི་མཐོང་ཆུང་བྱེད་དུས། བོད་མི་ཚོས་ཀྱང་ཁུ་སིམ་མེར་མི་སྡོད་པར་བོད་མི་ཡོངས་ཀྱི་མཐུན་སྒྲིལ་གྱི་རྣམ་པ་ཕྱིར་མངོན་དགོས་ཀྱི་ཡོད་ལ། འདི་ནི་སོ་སོའི་རིག་གཞུང་དང་བཅས་པར་སྲུང་སྐྱོབ་བྱེད་སྟངས་ཤིག་ཡིན་སྐོར་བརྗོད་འདུག
བྱམས་པ་ཚེ་རིང་།
