རྒྱ་གར་གྱི་མངའ་སྡེ་ ༡༦ ལྷག་གི་ནང་སྒོ་ཕྱུགས་གྲངས་ས་ཡ་ ༢ ལྷག་ལ་པགས་པའི་འབྲུམ་ནད་(Lumpy Skin Disease)ཞེས་པ་ཞིག་འགོས་ཁྱབ་ཏུ་འགྲོ་བཞིན་ཡོད་ཀྱང་སེམས་ཅན་ནས་མི་ལ་འགོས་པའི་གནས་ཚུལ་ད་ལྟ་ཐོན་མི་འདུག
རྒྱ་གར་གྱི་གུ་ཇཱ་རཱ་ཐི་དང་རཱ་ཇཱ་སི་ཐན། ཧ་རི་ཡ་ན། པན་ཇབ། ལྡི་ལི། ཨུ་ཊར་པར་ཌེ་ཤི། ཧི་མ་ཅལ་སོགས་མངའ་སྡེ་ཁག་ ༡༦ ལྷག་གི་ནང་དུ་བ་གླང་དང་མ་ཧེ་སོགས་སྒོ་ཕྱུགས་སེམས་ཅན་ས་ཡ་ ༢ ལྷག་ལ་པགས་པའི་འབྲུམ་ནད་(Lumpy Skin Disease )ཞེས་པ་ཞིག་འགོས་ཁྱབ་ཏུ་འགྲོ་མུས་ཡིན་འདུག་ལ། ད་ལྟ་བར་དུ་ཉུང་མཐར་སེམས་ཅན་གྲངས་ ༩༧༠༠༠ ལྷག་ལ་འཆི་སྐྱོན་བྱུང་ཡོད་སྟབས། ཟླ་འདིའི་ཕྱི་ཚེས་ ༣༡ ཉིན་རྒྱ་གར་ཆེས་མཐོའི་ཁྲིམས་ཞིབ་ཁང་ནས་དེ་འབྲེལ་ཉན་ཞིབ་ཅིག་འཚོག་རྒྱུ་ཡིན་འདུག
འདི་ལོའི་ཕྱི་ཟླ་ ༥ པའི་ནང་གུ་ཇཱ་རཱ་ཐི་མངའ་སྡེའི་ནང་འབྲུམ་ནད་དེ་ཁྱབ་པའི་མགོ་བཙུགས་ཏེ་ད་ལྟའི་ཆར་མངའ་སྡེ་ཁག་ ༡༦ ལྷག་གི་ནང་ཁྱབ་ཡོད་པའི་ཁྲོད་ནས་གུ་ཇཱ་རཱ་ཐི་དང་རཱ་ཇཱ་སི་ཐན། པན་ཇབ། ཧི་མ་ཅལ། ཨུ་ཊར་པར་ཌེ་ཤི་བཅས་ནི་འགོས་ཁྱབ་ཆེ་ཤོས་ཀྱི་མངའ་སྡེ་ལྔ་ཆགས་ཡོད་འདུག་ལ། པགས་པའི་འབྲུམ་ནད་འདི་ནི་དུག་སྦྲང་དང་སྦྲང་ནག གཏེ་ཁེ་སོགས་ཀྱིས་སེམས་ཅན་མང་པོའི་ཁྲག་འཇིབ་པ་ནས་ཕན་ཚུན་འགོས་ཁྱབ་འབྱུང་གི་ཡོད་པ་མ་ཟད། སྒོ་ཕྱུགས་ཀྱི་ཟན་ཆས་དང་ཆུ་སོགས་ལས་ཀྱང་འགོས་ཀྱི་ཡོད་འདུག ནད་ཡམས་དེ་འགོས་ན་སེམས་ཅན་གྱི་ལུས་ཡོངས་སུ་ཚ་བ་རྒྱས་པ་དང་འབྲུམ་འབུར་ཐོན་པ། མིག་ཆུ་བཞུར་བ། ཟུངས་ཤུགས་ཉམས་པ། འོ་མ་སྐམ་པ། མངལ་ཤོར་བ་སོགས་ཀྱི་ནད་རྟགས་ཡོང་གི་ཡོད་འདུག་ལ། ཟླ་འདིའི་ཚེས ༧ ཉིན་རྒྱ་གར་སྒོ་ཕྱུགས་ཉམས་ཞིབ་ཁང་(Indian Veterinary Research institute)གིས་སྒོ་ཕྱུགས་ ༨༥༠ ལ་བརྟག་དཔྱད་བྱས་ཏེ་དེའི་ཁྲོད་ཀྱི་སྒོ་ཕྱུགས་ ༣༠༠ ལ་འགོས་ནད་དེ་ཕོག་མེད་པའི་བརྟག་འབྲས་ཐོན་ཡོད་ཀྱང་། མི་ལ་འགོས་པའི་གནས་ཚུལ་གང་ཡང་ཐོན་མེད་འདུག
དེའི་ཐད་རྒྱ་གར་ཕྱུགས་ནད་ཉམས་ཞིབ་ཁང་(IVRI))་གི་འགན་འཛིན་ཨ་ཤོ་ཀ་ཀུ་མཱར་མོ་ཧན་ཌི་(Ashik Kumar Mohanty)ཡིས། པགས་པའི་འབྲུམ་ནད་འགོས་པའི་སེམས་ཅན་གྱི་འོ་མ་བསྐོལ་དང་མ་བསྐོལ་གང་ཡིན་ཡང་དེ་འཐུང་ན་མི་ལ་འགོས་ཀྱི་མེད་སྐོར་བརྗོད་འདུག ཡིན་ནའང་། ཉམས་ཞིབ་ཁང་དེའི་ཚན་རིག་པ་ཞིག་གིས་བེའུ་ཡིས་འབྲུམ་ནད་འགོས་པའི་བ་འོ་འཐུང་ན་ནད་ཡམས་འགོས་སྲིད་པ་རེད་ཅེས་བརྗོད་འདུག
རྒྱ་གར་གྱི་གསར་འགྱུར་བརྒྱུད་ལམ་དུ་ད་ལྟའི་ཆར་རྒྱ་གར་ནང་བ་གླང་། མ་ཧེ། ར་མ། ལུག་སོགས་སྒོ་ཕྱུགས་ཁྱོན་བསྡོམས་ས་ཡ་ ༡༩༠ ལྷག་ཡོད་པའི་ཁྲོད་ནས། སྒོ་ཕྱུགས་གྲངས་ས་ཡ་ ༡༠ ལྷག་ཅིག་ལ་འགོག་ཁབ་བརྒྱབ་ཟིན་ཡོད་པའི་གནས་ཚུལ་སྤེལ་འདུག་ལ། རྒྱ་གར་གྱི་ཕྱུགས་རིགས་གསོ་སྐྱོང་ལྷན་ཁང་(Department of Animal Husbandry and Dairying)གི་དྲུང་ཡིག་ཇཱ་ཏིན་རྡི་རཱ་སཱ་ཐ་སི་ཝིན་(Jatindra Nath Swain)་ལགས་ཀྱིས། ད་ལྟ་བར་ར་མའི་འབྲུམ་ནད་(goat pox)སྔོན་འགོག་སྨན་ཁབ་བེད་སྤྱོད་བྱས་ཏེ་འབྲུམ་ནད་འདི་སྟངས་འཛིན་བྱེད་ཐབས་གནང་གི་ཡོད་པ་དང་། མ་འོངས་བའི་ཟླ་བ་གསུམ་དང་བཞིའི་ནང་དུ་རྒྱ་གར་ཞིང་ལས་ཞིབ་འཇུག་ཁང་(ICAR)་དང་མཉམ་འབྲེལ་སྒོས་བཟོ་སྐྲུན་བྱས་པའི་སྒོ་ཕྱུགས་པགས་ནད་གཉན་རིམས་(Lumpi-ProVscLnd) ཀྱི་སྔོན་འགོག་སྨན་ཁབ་བེད་སྤྱོད་ཀྱིས་རྒྱ་གར་རྒྱལ་ཡོངས་སུ་སྔོན་འགོག་བྱ་བ་བསྒྲུབ་རྒྱུ་ཡིན་སྐོར་བརྗོད་འདུག
སྒོ་ཕྱུགས་སེམས་ཅན་གྱི་པགས་པའི་འབྲུམ་ནད་དེ་ཐོག་མར་ཕྱི་ལོ་ ༡༩༢༩ ལོར་ཨ་ཧྥེ་རི་ཁའི་ཟིན་བྷབ་ཝེ་རྫོང་ཁོངས་ནས་ངོས་འཛིན་བྱུང་ཡོད་པ་དང་། དེ་ནས་ཕྱི་ལོ་ ༢༠༡༩ ལོའི་ཟླ་ ༩ པའི་ནང་རྒྱ་གར་ཨོ་ཌི་ཤ་མངའ་སྡེའི་ནང་ཤེས་རྟོགས་བྱུང་ཡོད་པ་དང་། ཕྱི་ལོ་ ༢༠༢༠ ལོའི་ཟླ་ ༨ བར་དུ་ཀེ་རཱ་ལ་དང་ཨ་སཱམ་མངའ་སྡེའི་ནང་དུ་འབྲུམ་ནད་དེ་འགོས་པའི་སེམས་ཅན་ ༤༠ ཙམ་བྱུང་ཡོད་ཀྱང་། སྐབས་དེར་མངའ་སྡེ་གཞན་དུ་འགོས་ཁྱབ་ཕྱིན་མེད་འདུག
བྱམས་པ་ཚེ་རིང་།
