ཟླ་འདིའི་ཕྱི་ཚེས ༡༣ ཉིན་རྒྱ་ནག་པེ་ཅིན་གྱི་ཧའེ་ཏིན་ཁུལ་གྱི་སི་ཐོང་ཟམ་པའི་ཐོག་ཏུ་སྙིང་སྟོབས་ཆེན་པོས་ཞི་ཅིན་ཕིང་དང་དམར་ཤོག་གཞུང་ལ་ངོ་རྒོལ་གྱི་ལས་འགུལ་སྤེལ་མཁན་དེ་ནི་ཕིན་ལིས་ཧྥ་ཞེས་པའི་སྐྱེས་པ་ཞིག་ཡིན་འདུག
དཔའ་བོ་ཁེར་རྒྱུག་དེའི་དྲ་མིང་ལ་ཕིང་ཙེ་ཀྲུག་( 彭栽舟) དང་དངོས་མིང་ལ་ཕིན་ལིས་ཧྥ་ (彭立发) ཟེར་གྱི་ཡོད་ཅིང་། ད་ལྟ་རང་ལོ་ ༤༨ དང་། རྒྱ་ནག་ཧེ་ལུང་ཅང་ཞིང་ཆེན་(黑龙江省) གྱི་ཐེ་ལོ་རྫོང་(泰来县) ཁོངས་ནས་ཡིན་འདུག་ལ། ཁོང་ནི་རང་དབང་དང་ཚན་རིག་ལ་དགའ་མོས་ཡོད་མཁན་ཞིག་དང་། པེ་ཅིན་ཐེང་ཀ་དྲ་ལམ་ཚད་ཡོད་ཚོང་གཉེར་ཁང་དུ་ལས་གནས་གཉེར་གྱི་ཡོད་འདུག་པས། སྒེར་གྱི་ཊུ་ཝེ་ཊར་གྱི་མཆན་ཁོངས་སུ་ཁོང་གིས། ང་ནི་རང་དབང་ལ་དགའ་ཞེན་དང་། ཚན་རིག་དང་། ཚད་མ་རིག་པར་དགའ་པོ་ཡོད་མཁན་གྱི་བཟོ་བ་ཞིག་ཡིན། ཞེས་ཆེས་གུ་དོག་པའི་སྤྱི་ཚོགས་ཀྱི་སྨག་རུམ་དབུས་ནས་བདེན་དོན་གྱི་མེ་ལྕེ་ཞིག་སྤར་འདུག
རྒྱལ་སྤྱིའི་ཁྱོན་ཡོངས་ནས་ཁོང་ནི་བདེན་དོན་གྱི་སྙིང་རྩ་འདར་མ་མྱོང་བའི་དཔའ་བོ་ཁེར་རྒྱུག་ཅིག་དང་། ད་ལྟ་རྐང་རྡུམ་ལག་རྡུམ་དུ་གྱུར་བའི་གཅིག་སྡུད་རིང་ལུགས་ཀྱི་སུན་གཙེར་འོག་ནས། འདྲ་མཉམ་གྱི་མིག་ཟུང་ཞར་ཡང་། དྲང་བདེན་གྱི་ཁྲག་རྩ་འགག་མ་མྱོང་བའི་མི་འབོར་དུང་ཕྱུར་དུ་མའི་རྟོགས་སད་དང་རེ་སྙེག་གི་ཟབ་ས་ནས་འཚེར་བའི་ལྕགས་ཁྲབ་འཁོར་ལོའི་མདུན་འགོག་མཁན་གསར་པ་ (New Tank man) ཞིག་ཏུ་ངོས་འཛིན་བྱེད་ཀྱིན་འདུག
ཟླ་འདིའི་ཕྱི་ཚེས ༡༣ ཉིན་ཕིན་ལིས་ཧྥ་ཡིས། རྒྱ་ནག་གི་རྒྱལ་ས་པེ་ཅིན་གྱི་ཆེས་འགྲུལ་བཞུད་དང་འདུ་འཛི་རྒོད་པའི་སི་ཐོང་ཟམ་ཆེན་དུ་འཕྲད་དར་བཞི་དཔྱངས་ནས་ཞི་རྒོལ་བྱས་རྗེས། རྒྱ་ནག་གཞུང་གི་ཉེན་རྟོག་པ་སོགས་ཀྱིས་ཁོང་ཉིད་འཛིན་བཟུང་བཙན་ཁྲིད་བྱས་པ་དང་། ཁོང་གིས་དཔྱངས་པའི་འཕྲེད་དར་རྣམས་བསྡུས་ཡོད་ཀྱང་། གནད་དོན་དབྱེ་ཞིབ་པ་ཁག་ཅིག་གིས། ད་ལྟ་སི་ཐོང་ཟམ་ཆེན་ནས་བཞུད་པའི་ལམ་འགྲོ་བ་མང་པོ་ཞིག་གིས། དཔའ་བོ་ཁེར་རྒྱུག་ཅིག་གིས་འཛད་མཐའ་བྲལ་བའི་སྙིང་སྟོབས་ལ་མོས་གུས་བྱ་ངེས་རེད་ལ། ཁོང་གིས་རང་དབང་དང་འདྲ་མཉམ་གྱི་སླད་དུ་མདུན་རྒོལ་བྱས་པའི་རྔམ་བརྗིད་ཀྱི་གཟི་མདངས་མིག་ཟུང་དུ་རྒྱུ་ཞོར། ཡ་བྲལ་བའི་གཅིག་སྡུད་རིང་ལུགས་ཀྱི་འགོག་གནོན་ལ་ན་ཟུག་གི་ཨམ་གཙིགས་སྡོམ་བཞིན་པའི་ཚོད་དཔག་བྱེད་ཀྱིན་འདུག
ཕིན་ལིས་ཧྥ་ཡིས། ང་ཚོར་ནད་དུག་བརྟག་དཔྱད་མི་དགོས་ཁ་ཟས་དགོས། ཐེམ་སྤང་བཀག་རྒྱ་མི་དགོས་རང་དབང་དགོས། རིག་གནས་གསར་བརྗེ་མི་དགོས་བསྒྱུར་བཅོས་དགོས། མགོ་ཁྲིད་མི་དགོས་འོས་ཤོག་དགོས། བྲན་གཡོག་མ་བྱེད། མི་མང་བྱོས། ཞེས་བྲིས་ནས་ཡོད་པ་དང་། ཡང་འཕྲེད་དར་གཞན་དེའི་ནང་སློབ་མཚམས་འཇོག ལས་མཚམས་འཇོག སྲིད་དབང་སྒེར་གཅོད་པ་ཞི་ཅིན་ཕིང་མེད་པ་བཟོ་དགོས། ཞེས་བྲིས་ཡོད་པ་མ་ཟད། མི་བུ་གང་མང་ཞིག་གི་ཡ་ཁོག་ཏུ་ཡུན་རིང་སྦས་མྱོང་བའི་མཐའ་ཚིག་དེ་སྒྲོག་སྦྱངས་བྱས་ཏེ། མི་ལོ་སུམ་ཅུ་ལྷག་གི་རྗེས་སླར་ཡང་རྒྱ་རིགས་མི་གྲངས་དུང་ཕྱུར་དུ་མའི་རེ་བས་འཚོལ་བའི་མང་གཙོའི་ལམ་བུ་རུ་བདེན་དོན་གྱི་འབོད་སྒྲ་ཞིག་བསྒྲགས་འདུག
ཁོང་གིས་རྒྱ་ནག་པེ་ཅིན་དུ་རང་དབང་གི་འབོད་སྒྲ་ཞིག་བསྒྲགས་རྗེས། ཤུལ་ལུས་མང་ཚོགས་ལ་རེ་བ་གསར་པ་ཞིག་གནང་ནས། རང་དབང་གི་ཁ་ཡིག་མང་པོ་བཞག་ཡོད་ཀྱང་། ད་ལྟ་རྒྱལ་སྤྱིའི་ཁྱོན་ཡོངས་ནས་མགྲིན་གཅིག་གྲགས་ཀྱིས་ལྕགས་འཁྲབ་འཁོར་ལོའི་མདུན་འགོག་མཁན་གསར་པ་ཞེས་འབོད་པའི་ཕིན་ལིས་ཧྥ་བོར་བརླག་ཏུ་གྱུར་ནས་ཉིན་གྲངས་བཞི་འགྲོ་མུས་ཡིན་འདུག་ལ། རྒྱ་ནང་གི་དྲ་ལམ་ཁག་ནས་ཟམ་ཆེན་དང་། དཔའ་བོ། ཕོ་ཁྱོ་ག་སོགས་ཁོང་གི་ཞི་རྒོལ་དང་འབྲེལ་བའི་ཐ་སྙད་དེ་དག་ཀྱང་ནག་བསུབས་སུ་བཏང་ཡོད་ནའང་། རྒྱལ་སྤྱིའི་སྤྱི་ཚོགས་དང་རྒྱ་རིགས་མང་གཙོ་དོན་གཉེར་བ་རྣམས་ཀྱིས། ལྕགས་ཁྲབ་འཁོར་ལོའི་མདུན་འགོག་མཁན་གསར་པ་ཕིན་ལིས་ཧྥ་ཡིས་བདེན་དོན་གྱི་སླད་དུ་འཆི་བ་མགོ་ཐོག་ཏུ་ལྷུང་ཡང་གཉའ་མ་ཞུམ་པའི་བློས་བཏང་ལ་ཡིད་སྨོན་སྐྱེ་བཞིན་འདུག
གསར་འགོད་པ། དཔལ་ལྡན།
ཀུན་དགའ་བཀྲིས་དཔྱད་གཏམ་འདྲ་བཤུས་བྱས་པ་མ་གཏོགས་གསལ་བ་གང་ཡང་མིན་འདུག དེ་ཡང་དུས་ཚོད་ཆུ་ཚོད་༢༤བརྗེས་སུ་བཀོད་བྱུང།