ཚེ་བཙོན་གྱི་ཁྲིམས་ཆད་འཁུར་བཞིན་པའི་བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་འབྲིང་རིམ་མི་མང་ཁྲིམས་ཁང་ཟེར་བར་ཉེས་མེད་ཉེས་འཛུགས་ཀྱི་ཁྲིམས་ཆད་དེ་འདྲ་གུང་ཁྲན་ཏང་གི་ཁྲིམས་སུ་ཡོད་མེད་འདྲི་རྩད་ཞུ་གཏུག་གི་ལས་འགུལ་སྤེལ་ཡོད་འདུག
ཉེ་སྔོན་ཕྱི་ཕྱོགས་ཀྱི་སྤྱི་ཚོགས་དྲ་ལམ་དུ་བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་མི་མང་ཁྲིམས་ཁང་ཟེར་བ་དེས་རྡོ་རྗེ་བཀྲ་ཤིས་ལགས་ལ་ཚེ་བཙོན་གྱི་ཁྲིམས་ཐག་བཅད་པའི་གནད་དོན་དེ་རྒྱ་ནག་གཞུང་གི་ཁྲིམས་དང་འགལ་ཡོད་སྐོར་འདྲི་རྩད་ནན་པོ་བྱས་ཡོད་སྐོར་ངོ་སྤྲོད་གནང་བའི་བརྙན་ཐུང་ཞིག་ཁྱབ་བཞིན་འདུག་ལ། མགོན་པོ་སྐྱིད་ལགས་ནས་འདྲི་རྩད་དེ་ག་དུས་གནང་བ་ཡིན་ཁ་གསལ་མི་འདུག་ཀྱང་། ཟླ་འདིའི་ཕྱི་ཚེས་ ༡༨ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་མགོན་པོ་སྐྱིད་ལགས་ནས་འདི་ལོའི་ཕྱི་ཟླ་ ༦ པའི་ནང་ཁྲིམས་ཁང་གི་མདུན་དུ་འདྲི་རྩད་ཞུ་གཏུག་གི་ལས་འགུལ་དེ་སྤེལ་ཡོད་སྐོར་གནས་ཚུལ་སྤེལ་འདུག
སྤྱི་ཚོགས་དྲ་ལམ་དུ་ཁྱབ་པའི་བརྙན་ཐུང་དེའི་ནང་དུ་མགོན་པོ་སྐྱིད་ལགས་ཀྱིས། ངའི་མིང་པོ་རྡོ་རྗེ་ཚེ་བརྟན་ལ་སྐྱོན་ཆ་གང་ཡང་མེད་པར་ལོ་དྲུག་ལ་བཙོན་ཁང་དུ་བཅུག་ཡོད་པ་དང་། ངའི་མིང་པོ་རྡོ་རྗེ་བཀྲིས་སྒོར་མོ་ཁྲི་བརྒྱ་དང་ལྔ་བཅུར་ཁ་གཡར་ནས་ཚེ་བཙོན་དུ་བཅུག་སོང་། སྒོར་མོ་ཁྲི ༡༥༠ དེ་འཇལ་ཚར་བ་མ་ཟད། སྐྱེད་ཀ་སྒོར་མོ་ཁྲི ༥༠ བསྣན་ནས་རྒྱ་སྒོར་ཁྲི ༢༠༠ འཇལ་བ་ཡིན་ཡང་། རྡོ་རྗེ་བཀྲ་ཤིས་ལགས་སུ་ཚེ་བཙོན་གྱི་ཁྲིམས་ཐག་བཅད་ཡོད་པ་མ་ཟད། ང་ཚོར་贷款诈骗(དངུལ་བུན་གཡོ་ལེན་)བྱས་པའི་མིང་ཞིག་ཀྱང་བཏགས་སོང་། རང་སྐྱོང་ལྗོངས་མི་མང་ཁྲིམས་ཁང་གི་དཔོན་པོ་པ་སངས་ཟེར་བ་དེས་ང་ཚོར་གུང་ཁྲན་ཏང་གི་ཁྲིམས་སུ་མེད་པའི་ནག་ཉེས་ཤིག་བཙུགས་སོང་། དེའི་ཕྱིར་ངས་གུང་ཁྲན་ཏང་གི་ཁྲིམས་ལ་སྒོར་མོ་བསྐྱིས་ཚད་ཚང་མར་贷款诈骗་(དངུལ་བུན་གཡོ་ལེན)ཟེར་བ་དེ་ཡོད་པ་རེད་དམ། སྒོར་མོ་ཡི་སྐྱིན་པ་བྱིན་ཚར་ནའང་གུང་ཁྲན་ཏང་གི་ཁྲིམས་སུ་མ་དངུལ་བུན་གཡོ་ལེན་ཟེར་བ་ཞིག་ཡོད་པ་རེད་དམ། ཞེས་བརྗོད་འདུག
ཁོང་མོས་མུ་མཐུད། གལ་སྲིད་གུང་ཁྲན་ཏང་གི་ཁྲིམས་སུ་ངོ་མ་དེ་འདྲ་ཞིག་ཡོད་པ་ཡིན་ན། ངས་ཁྲིམས་དེ་ཁུར་རྒྱུ་ཡིན་ལ། བརྩི་སྲུང་ཡང་བྱ་ངེས་ཡིན། གུང་ཁྲན་ཏང་གི་ཁྲིམས་སུ་དངུལ་ལ་སྐྱིན་པ་སྤྲད་བཞག་པ་ཡིན་ནའང་བུ་ལོན་གཡར་མཁན་ཚང་མར་དངུལ་བུན་གཡོ་ལེན་ཞེས་པ་དེ་འདྲ་ཞིག་ཡོད་པ་རེད་ཅེས་་ཁྱོད་ཚོས་དག་མཆན་ཞིག་རྒྱག་རོགས། ཞེས་མི་མང་ཁྲིམས་ཁང་ལ་བཤད་ཡོད་ཀྱང་། ང་རང་ཉིད་ཀྱི་མི་ལ་སྐྱོན་ཆ་མེད་ནའང་མེད་ཟེར་བའི་ཐོབ་ཐང་དེ་མི་འདུག གུང་ཁྲན་ཏང་གི་ཁྲིམས་ཀྱི་ཐོག་ཏུ་རང་ཉིད་ལ་སྐྱོན་ཆ་མེད་ན་མེད་ཟེར་བའི་ཐོབ་ཐང་དེ་ཡོད་པ་རེད། ཡིན་ནའང་། འདི་མེད་དུ་འཇུག་མཁན་ནི་རང་སྐྱོང་ལྗོངས་ཀྱི་དཔོན་པོ་ཚོ་རེད། ཕྱི་ལོ་ ༢༠༠༨ ཀྱི་དཔོན་པོ་ཚོ་རེད། ངས་སྐྱོན་ཆ་མེད་ན་མེད་ཟེར་བའི་དབང་ཆ་དང་ཐོབ་ཐང་དེ་གུང་ཁྲན་ཏང་གི་ཁྲིམས་ཀྱི་ཐོག་ཏུ་མེད་ཟེར་བ་དང་། དངུལ་བུན་གཡོ་ལེན་ཟེར་བ་དེ་གཉིས་ལ་དག་མཆན་ཞིག་བྱོས་དང་། དེ་ནས་བཟུང་སྟེ་ང་ཁྱོད་ཚོ་ཁྲིམས་ཁང་གི་སྒོ་ཁར་མི་ཡོང་ཞེས་བཤད་པ་ཡིན། ཞེས་སོགས་བརྗོད་འདུག
བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ནས་ཁྲིམས་ཁང་གི་ཉེས་འཛུགས་དེ་གཏན་ནས་ཁས་ལེན་བྱས་མེད་ལ། ཕྱི་ལོ་ ༢༠༢༠ ལོར་ཁོང་བཙོན་འཇུག་བྱས་ཏེ་ལོ་ ༡༠ ཕྱིན་པའི་སྐབས་དེར་ཁོང་གི་ཁྲིམས་རྩོད་པ་དང་ནང་མི་ཚོས་ཐེངས་མང་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་དགོས་པའི་རེ་བ་བཏོན་ཡོད་ཀྱང་དོན་འབྲས་ཐོན་མེད་པ་རེད། རྡོ་རྗེ་བཀྲ་ཤིས་ལགས་ནི་ལྷ་སའི་གཡག་མགྲོན་ཁང་གི་སྦྱིན་བདག་ཡིན་ཞིང་། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་བྱུང་བའི་ཟླ་བ་འགའི་རྗེས་སུ་རྒྱ་ནག་གཞུང་གིས་ངོ་རྒོལ་བར་མཐུན་འགྱུར་བསྐྲུན་པ་དང་༧གོང་ས་རྒྱལ་བ་རིན་པོ་ཆེ་མཆོག་ལ་སྐྱབས་རྟེན་ཕུལ་ཡོད་ལུགས་སོགས་བརྗོད་དེ་འཛིན་བཟུང་བྱས་ནས་ཟླ་ ༨ ཙམ་རིང་གར་སོང་ཆ་མེད་དུ་གྱུར་ཡོད་པ་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ཀྱང་འཛིན་བཟུང་བྱས་ནས་ལོ་གཉིས་ཙམ་རིང་བཀག་ཉར་བྱས་རྗེས། ཕྱི་ལོ་ ༢༠༡༠ ཟླ་ ༥ ཚེས་ ༡༧ ཉིན་ལྷ་ས་འབྲིང་རིམ་མི་མང་ཁྲིམས་ཁང་ཟེར་བ་དེས་ཁུངས་སྐྱེལ་ར་སྤྲོད་གང་ཡང་མེད་པར་རྒྱ་སྒོར་ཁྲི་ ༡༥༠ ཙམ་གྱི་དངུལ་བུན་གཡོ་ལེན་བྱས་ཚུལ་བརྗོད་དེ། རྡོ་རྗེ་བཀྲ་ཤིས་ལགས་ལ་ཚེ་བཙོན་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ལ་ལོ་དྲུག་གི་ཁྲིམས་ཐག་བཅད་དེ། བོད་རང་སྐྱོང་ལྗོངས་ཟེར་བའི་བཙོན་ཁང་ཆེ་ཤོས་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བ་ཟེར་བའི་ཉེས་མིང་ཕོག་པའི་བཙོན་པ་བཅུག་སའི་གྲྭ་བཞི་བཙོན་ཁང་དུ་བཅུག་ཡོད་འདུག
རྡོ་རྗེ་བཀྲ་ཤིས་ལགས་ཀྱིས་དེ་སྔོན་བོད་ཁུལ་གྱི་དབུལ་ཕོངས་དཀའ་ངལ་ཅན་མང་པོར་རོགས་རམ་གནང་ཡོད་པ་སོགས་སྤྱི་ཕན་གྱི་ལས་དོན་གང་མང་གནང་ཡོད་སྟབས། མི་མང་པོས་དགའ་མོས་ཆེན་པོ་ཐོབ་པའི་བོད་རིགས་ཕྱུག་བདག་ཅིག་ཡིན་འདུག་ལ། བོད་རང་སྐྱོང་ལྗོངས་ཟེར་བས་འགྲོ་ཕན་སྒྲུབ་པའི་བྱ་དགའ་དང་ཚོང་ལས་རྩེར་སོན་གྱི་བྱ་དགའ་སོགས་ཀྱང་ཐོབ་ཡོད་འདུག
གསར་འགོད་པ། དཔལ་ལྡན།
