དེ་རིང་ཕྱི་ཚེས་ ༢༠ དང་ ༢༡ བཅས་ཉིན་གཉིས་རིང་གངས་ཅན་སྐྱིད་གཤོངས་ཀྱི་བཀའ་ཤག་ཚོགས་ཁང་དུ་བོད་མིའི་སྒྲིག་འཛུགས་ཀྱི་བརྡ་འཕྲིན་ཐབས་བྱུས་གོང་སྤེལ་གྱི་ཚོགས་འདུ་ཐེངས་དང་པོ་འཚོག་བཞིན་འདུག
མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་མཛད་སྒོ་དབུ་འབྱེད་ཀྱི་གསུང་བཤད་གནང་སྐབས་གཙོ་བོ་བོད་མིའི་སྒྲིག་འཛུགས་ཀྱི་འབྱུང་འགྱུར་ལོ་གསུམ་བཞིའི་ལས་དོན་རྣམས་ཀྱི་ཆེད་བཀོལ་སྤྱོད་མཉེན་ཆས་ཁག་གསར་བཟོ་གནང་དགོས་སྟབས། ཆེད་མཁས་པ་གདན་འདྲེན་ཞུས་ཏེ་གོ་བསྡུར་གནང་དགོས་པའི་གལ་གནད་དང་། ཕྱི་དྲིལ་ཀམ་པུ་ཊར་སྡེ་ཚན་གྱི་ལས་བྱེད་རྣམ་པས་སྤྱན་བསྟར་གནང་སྐབས་ཆེད་མཁས་པ་རྣམ་པས་ལེགས་སྤེལ་ཉེས་འགོག་གི་དགོངས་ཚུལ་གསུང་དགོས་པ། བརྡ་འཕྲིན་ཐབས་བྱུས་གོང་སྤེལ་གཏོང་བར་ཕྱི་དྲིལ་ཀམ་པུ་ཊར་སྡེ་ཚན་གྱི་ལས་བྱེད་དང་ཀམ་པུ་ཊར་ཐོག་སློབ་ཐོན་བོད་པའི་གཞོན་སྐྱེས་རྣམས་མཉམ་རུབ་ཀྱིས་ཕྱག་ལས་གནང་དགོས་པའི་གལ་གནད་སོགས་ཀྱི་སྐོར་གསུངས་ཡོད་འདུག
ཚོགས་ཐོག་ཏུ་ཀམ་པུ་ཊར་སྡེ་ཚན་གྱི་འབྲེལ་ཡོད་ལས་བྱེད་དང་ཆེད་མཁས་པ་ཚོས་དགོངས་ཚུལ་བརྗེ་ལེན་གནང་གི་ཡོད་འདུག་ལ། བརྡ་འཕྲིན་ཐབས་བྱུས་གོང་སྤེལ་ཚོགས་འདུ་ཐེངས་དང་པོ་འདི་དེ་རིང་དང་སང་ཉིན་ཕྱི་ཚེས་ ༢༡ བཅས་ཉིན་གཉིས་རིང་འཚོག་བཞིན་ཡོད་འདུག
བོད་མིའི་སྒྲིག་འཛུགས་ཀྱི་དྲ་བ་ལས་དྲངས།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
