བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༢ འཁོར་བའི་དུས་ཆེན་སྲུང་གཙི་སྐབས། ཨ་མ་རྗེ་བཙུན་པདྨ་མཆོག་གིས་མ་འོངས་པར་བོད་ཕྲུག་ཁྱིམ་སྡེ་རོགས་ཚོགས་གཞན་ལ་རེ་མ་དགོས་པར་ང་རང་ཚོའི་སྤྱི་ཚོགས་ནང་དཔལ་འབྱོར་གང་འཚམས་ཡོད་པ་ཚོས་ཐུགས་འགན་བཞེས་ནས་རོགས་པ་གནང་རྒྱུ་གལ་ཆེན་པོ་ཡིན་ལུགས་གསུངས་གནང་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཐོག་རྡ་སྟེང་བོད་ཁྱིམ་རྐང་རྩེད་སྤོ་ལོའི་རྩེད་ཐང་དུ་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༢ འཁོར་བའི་དུས་ཆེན་དང་སྟབས་བསྟུན། དམིགས་བསལ་བཀའ་ཟུར་ཨ་མ་རྗེ་བཙུན་པདྨ་མཆོག་གིས་སྐུ་ཚེ་ཧྲིལ་པོར་བོད་ཕྲུག་ཚོའི་ཤེས་རིག་གི་ཆེད་དུ་བློས་གཏོང་གནང་བར་བཀའ་དྲིན་རྗེས་དྲན་གྱི་མཛད་སྒོ་ཞིག་འཚོགས་གནང་སོང་། མཛད་སྒོའི་ཐོག་མགྲོན་གྱི་གཙོ་བོ་༸སྐྱབས་རྗེ་ཡོངས་འཛིན་གླིང་རིན་པོ་ཆེའི་མཆོག་སྤྲུལ་མཆོག་དང་། བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་ལས་ཚབ། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བཀའ་བློན་རྣམ་པ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་སྤྱི་འཐུས་རྒྱུན་ལས་རྣམ་པ། གཞུང་དང་གཞུང་འབྲེལ་མ་ཡིན་པའི་འགན་འཛིན་རྣམ་པ། དགའ་ལྡན་ཕོ་བྲང་དང་བྱང་ཨ་རིའི་སྐུ་ཚབ་དོན་གཅོད་ཀྱི་དྲུང་ཆེ། བོད་ཕྲུག་ཁྱིམ་སྡེའི་སྦྱིན་བདག་ཁག་ཅིག་དང་དགེ་སློབ་ངོ་ཟུར་རྣམ་པ། དེ་བཞིན་བཞུགས་སྒར་རྡ་རམ་ས་ལའི་ཉེ་འཁོར་གྱི་བོད་མི་སེར་སྐྱ་ཕོ་མོ་མང་པོ་ཞིག་ཀྱང་ཕེབས་འདུག
བོད་ཁྱིམ་སྤྱི་ཁྱབ་གཙོ་འཛིན་རྒན་བསོད་ནམས་སྲི་གཅོད་ལགས་ནས་བོད་ཕྲུག་ཁྱིམ་སྡེའི་ལས་བསྡོམས་སྙིང་བསྡུས་སྙན་སྒྲོན་ཞུས་རྗེས། བཀའ་ཟུར་ཨ་མ་རྗེ་བཙུན་པདྨ་མཆོག་གིས་སྐུ་ཚེ་ཧྲིལ་པོར་སྐུ་ངལ་འཛེམས་མེད་ངང་མིག་དཔེ་བཟང་པོ་དང་བཅས་ཏེ། བཙན་བྱོལ་བོད་ཕྲུག་ཚོའི་ཤེས་རིག་གི་ཆེད་དུ་བློས་གཏོང་གནང་བར་བརྟེན། བོད་ཕྲུག་ཁྱིམ་སྡེའི་ལས་སློབ་ངོ་ཟུར་གྱིས་བཀའ་དྲིན་རྗེས་དྲན་མཚོན་ཕྱིར། དངུལ་ལས་གྲུབ་པའི་སྒྲོལ་མའི་སྐུ་ཞིག་མགྲོན་གྱི་གཙོ་བོ་༸སྐྱབས་རྗེ་གླིང་རིན་པོ་ཆེ་མཆོག་ནས་གསོལ་སྩལ་གནང་སོང་། དེ་བཞིན་ཨ་མ་རྗེ་བཙུན་པདྨ་མཆོག་གི་སྐུ་ཚེའི་ལོ་རྒྱུས་དང་འབྲེལ་བའི་གློག་བརྙན་ “Ama La” ཞེས་པ་དང་། ལོ་རྒྱུས་སྙིང་བསྡུས་ཀྱི་ཕྱག་དཔེ་གངས་ཅན་བོད་ཀྱི་ཨ་མ་ལགས་ཞེས་པ་གཉིས་དབུ་འབྱེད་གནང་སོང་བ་མ་ཟད། ཨ་མ་ལགས་སྐུ་ཉིད་ནས་དབྱིན་ཡིག་ནང་བརྩམས་གནང་བའི་ “Tibet: My Story” ཞེས་པའི་ཕྱག་དཔེ་དེའི་བོད་སྒྱུར་ཡང་དབུ་འབྱེད་གནང་སོང་།
ཨ་མ་རྗེ་བཙུན་པདྨ་ལགས་ཀྱིས་དེ་རིང་གི་མཛད་སྒོ་དང་འབྲེལ་ནས་དགེ་ལས་སློབ་ཕྲུག་ཡོངས་ལ། ཕྱོགས་ཡོངས་ནས་ང་ཚོས་གང་ཡོང་ཡོང་བྱེད། གཙོ་བོ་དེ་༸རྒྱལ་བ་རིན་པོ་ཆེའི་བཀའ་སློབ་སྙིང་ལ་བཅངས་ནས་དེའི་ཐོག་ལག་ལེན་བསྟར་བ་ཡིན་ན། ལས་ཀ་ག་རེ་བྱེད་པ་ཡིན་ན་ཡང་གྲུབ་འབྲས་ཡག་པོ་ཞིག་ཏན་ཏན་ཏིག་ཏིག་འཐོན་གྱི་འདུག ང་ཚོས་སྒྲིག་འཛུགས་བཟོས་པ་དེ་༸རྒྱལ་བ་རིན་པོ་ཆེའི་ཐུགས་རྗེ་བཀའ་དྲིན་ལ་བརྟེན་ནས་ཡག་པོ་ཞེ་དྲགས་ཆགས་ཡོད། དེ་ནས་མར་ཕྱག་ལས་གནང་མཁན་ལོ་ན་གཞོན་གཞོན་མང་པོ་བང་སྒྲིག་ནས་ཡོད་པ་རེད། ཁོང་ཚོས་ངོས་ནས་ཧུར་ཐག་འབད་ཐག་གནང་གི་འདུག ང་རང་མགོ་དཀར་པོ་ལོ་ ༨༢ ལ་སླེབས་ཡོད་རེད། ང་རང་གིས་ཕར་ལྟ་དུས་དངོས་གནས་འགྲིག་ཤག་དྲན་གྱི་འདུག ལས་ཀ་ག་རེ་བྱས་ན་ཡང་༸རྒྱལ་བ་རིན་པོ་ཆེའི་བཀའ་སློབ་སེམས་ལ་བཞག་ན་ཡག་པོ་ཞིག་བསྒྲུབ་ཐུབ་ཀྱི་འདུག བྱས་ཙང་ང་ཚོའི་འོག་ལ་ཕྱག་ལས་གནང་མཁན་ཚོས་མུ་མཐུད་དེ་འདྲའི་དགོངས་པ་བཞེངས་ཏེ་ཕྱག་ལས་གནང་གི་རེད་བསམ་གྱི་འདུག ང་ཚོའི་པུ་གུ་དེ་ཚོ་མ་འོངས་བོད་ཀྱི་སོན་རྩ་རེད། སོན་རྩ་དེ་ཚོ་ཧྲ་ཐག་ཐག་བྱུང་བ་ཡིན་ན། ང་ཚོར་སོ་སོའི་རྒྱལ་ཁབ་མེད་ན་ཡང་ང་ཚོ་ལ་གཅིག་སྟོན་རྒྱུ་ཡོད། བྱས་ཙང་དེ་འདྲའི་སྐུ་ལས་མུ་མཐུད་ནས་བཀྱོན་རོགས་གནང་། ང་རང་གི་རེ་འདུན་ཞུ་གི་ཡོད། ཅེས་གསུངས་གནང་སོང་།
ཡང་ཁོང་གིས་ང་ཚོ་རྟག་པར་ཕྱིའི་རོགས་ཚོགས་ལ་ལག་པ་བསྐྱངས་ནས་བསྡད་རྒྱུ་ཁག་པོ་རེད། དེ་འདྲ་ཡིན་དུས་ང་ཚོའི་སློབ་ཟུར་ག་བ་ག་ས་ལ་སླེབས་ཡོད། ཁ་སང་གོ་ཡ་བྱས་ན་རོགས་ཚོགས་ཀྱི་དངུལ་བརྒྱ་ཆ་ ༢༠ སློབ་ཟུར་ཚོགས་པ་ནས་རེད་འདུག དེ་དཔེ་ཡག་པོ་རེད། ད་དུང་ཨང་ཀི་དེ་མཐོ་རུ་བཏང་ནས་མི་གཞན་དག་ལ་རེ་མ་དགོས་པར་ང་རང་ཚོའི་སྤྱི་ཚོགས་ནང་དཔལ་འབྱོར་གང་འཚམས་ཡོད་པ་ཚོས་ཐུགས་འགན་བཞེས་ནས་རོགས་པ་གནང་རྒྱུ་གལ་ཆེན་པོ་འདུག དེ་རེ་འདུན་ཞུ་གི་ཡིན། ཞེས་གསུངས་གནང་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བཀའ་ཤག་གི་གསུང་འཕྲིན་སྒྲོག་སྦྱང་གནང་སྐབས། དེང་སང་བོད་ནང་རང་ལོ་ ༦ ནས་ ༡༨ བར་གྱི་སློབ་ཕྲུག་རྣམས་གཏན་འཇགས་སློབ་གྲྭའི་ནང་བཅུགས་ཏེ། སོ་སོའི་སྐད་ཡིག་དང་རིག་གཞུང་། ཕ་མ་སོགས་དང་ཁ་བྲལ་བཏང་ནས་ཚུར་རང་ཁྱིམ་དུ་ལོག་པར་བོད་སྐད་རྒྱག་མི་ཤེས་པའི་གནས་སྟངས་ཛ་དྲག་ལ་འགྱུར་གྱི་ཡོད་པའི་སྐོར་གསུངས་གནང་སོང་།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོག་བྱང་གནང་སྐབས། དེང་སང་རང་རེའི་སློབ་གྲྭ་ཁག་གི་ནང་དུ་སློབ་ཕྲུག་ཇེ་ཉུང་འགྲོ་གི་ཡོད་ན་ཡང་། ཐབ་ཆུང་ཆུང་ལ་མེ་ཚ་བོ་ཞེས་པའི་དཔེ་ལྟར་འབྲེལ་ཡོད་དགེ་ལས་ཡོངས་ནས་ཤེས་རིག་བཟང་སྤྱོད་སྔར་ལྷག་ཡོང་བར་འབད་བརྩོན་གང་ཐུབ་གནང་སྐྱོང་ཡོང་བའི་རེ་འདུན་འདོན་གནང་སོང་།
མགྲོན་གྱི་གཙོ་བོ་༸སྐྱབས་རྗེ་གླིང་རིན་པོ་ཆེ་མཆོག་ནས། ང་ཚོ་བོད་མི་རྣམས་བཙན་བྱོལ་ལ་ཐོག་མར་ཕེབས་སྐབས་༸སྐུ་མདུན་གྱིས་ཕྱག་ལས་མང་པོ་ཡོད་པ་ནང་ནས་གལ་ཆེ་ཤོས་དེ། བོད་མི་རིགས་བསྟན་སྲིད་དང་བཅས་པ་གནས་ཐུབ་པ་དེ་ཡིན་པ་དང་། དེ་ཡང་མི་རབས་གསར་པ་སོན་རྩ་རྣམས་ལ་རགས་ལས་བསྡད་ཡོད་པ་དགོངས་པར་བཅངས་ཏེ་ཤེས་ཡོན་ཐོག་ལ་ཐུགས་འཁུར་རྒྱ་ཆེན་པོ་བཞེས་ཡོད། དེར་བརྟེན་ང་ཚོའི་སློབ་གྲྭ་དེ་བྱུང་བ་རེད། སློབ་གྲྭ་དེའི་འགན་འཁུར་ལྷ་ལྕམ་སྐུ་གཞོགས་ལགས་ཀྱིས་ཐུགས་འགན་བཞེས་ཏེ་གྲུབ་འབྲས་གང་བྱུང་ཡོད་པ་དེ་ཚོ་ནི་བཤད་ཐུབ་པ་དེ་འདྲ་ཡོད་པ་མ་རེད། བོད་ཕྲུག་ཁྱིམ་སྡེ་ནས་ཐོན་པའི་སློབ་ཕྲུག་ཁག་གཞུང་དང་གཞང་འབྲེལ་མ་ཡིན་པའི་ལས་ཁུངས་དང་སྒྲིག་འཛུགས་གང་སར་ཞབས་འདེབས་ཞུ་ཐུབ་མཁན་མང་པོ་ཞིག་ཐོན་བསྡད་ཡོད། དེ་འདྲའི་གྲུབ་འབྲས་ཐོན་པ་དེ་གཙོ་བོ་ལྷ་ལྕམ་སྐུ་གཞོགས་གཙོས་སྐབས་དེ་དུས་ཀྱི་དགེ་ལས་ཚང་མའི་མཉམ་རུབ་ཀྱི་ནུས་པ་ལ་བརྟེན་ནས་བྱུང་བ་ནི་དངོས་ཡོད་གནས་ཚུལ་རེད། དེར་བརྟེན་ལྷ་ལྕམ་སྐུ་གཞོགས་མཆོག་གི་བཀའ་དྲིན་རྗེས་སུ་དྲན་པ་དང་། ༸གོང་ས་མཆོག་བཀའ་སློབ་ལམ་སྟོན་སྙིང་ལ་བཅངས་ནས་མི་ཚེ་ཆོས་དང་མཐུན་ཞིང་བཟང་རྟགས་འཁྱོལ་བ་ཞིག་ཡོང་བ་ནི་ང་ཚོས་བསྒྲུབ་ཐུབ་པ་དང་ཁ་ཡོད་ལག་ཡོད་ཀྱི་ལས་འགན་ཡང་ཆགས་བསྡད་འདུག་དྲན་གྱི་ཡོད་ཚུལ་གསུངས་གནང་སོང་།
དེ་རིང་མཛད་སྒོའི་སྟེང་ནས་བོད་ཕྲུག་ཁྱིམ་སྡེའི་ནང་ཞབས་ལོ་ ༢༠ འཁོར་བའི་ཞབས་ཞུ་བ་རྣམས་ལ་ཐུགས་རྗེ་ལེགས་འབུལ་གྱི་གཟེངས་རྟགས་དང་། སློབ་ཕྲུག་ཁག་ཅིག་ལ་ཤེས་ཡོན་གྱི་བྱ་དགའ། སློབ་ཕྲུག་རྩེ་ཕུད་གཉིས་ལ་ཤེས་རིག་ལས་ཁུངས་ཀྱི་བྱ་དགའ་སོགས་སྩལ་གནང་སོང་བ་མ་ཟད། གཞན་ཡང་རྒྱལ་སྤྱིའི་བོད་ཁྱིམ་སློབ་ཟུར་བརྟན་བཞུགས་ཚོགས་མི་རྣམས་ལ་ཐུགས་རྗེ་ལེགས་འབུལ་གཟེངས་རྟགས་ཕུལ་གནང་སོང་།
ལྡི་ལི་གསར་འགོད་པ། ཉི་མ་ཚེ་རིང་།
