རྒྱ་ནག་དམར་ཤོག་ཚོགས་ཆེན་ཐེངས་ཉུ་ཤུ་བའི་སྟེང་འདེམས་སྒྲུག་བྱས་པའི་དཔོན་རིགས་ཚང་མ་ཞི་ཅིན་ཕིན་ལ་བློ་དཀར་གཞུང་དྲང་རྐྱང་ཡིན་པ་ལས། དམར་ཤོག་ཚོགས་པའི་རྩ་ཁྲིམས་དང་མ་འོངས་པའི་རྒྱ་ནག་གི་ཕུགས་བསམ་སོགས་ལ་བསམ་བློ་ཞེ་དྲགས་བཏང་མེད་སྐོར་བརྗོད་འདུག
ཁ་སང་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ཉུ་ཤུ་བའི་སྟེང་འདེམས་ཐོན་བྱུང་བའི་དབུས་རྒྱུན་ལས་བདུན་དང་དབུས་ཆབ་སྲིད་སྲིད་གྲོས་ཀྱི་འཐུས་མི་ཉེར་ལྔ་ཡོངས་བསྒྲགས་བྱས་པའི་ནང་དབུས་རྒྱུན་ལས་བདུན་ནི། ཞི་ཅིན་ཕིན་མུ་མཐུད་རྒྱ་ནག་དམར་ཤོག་ཚོགས་པའི་མགོ་ཁྲིད་སྐབས་གསུམ་པར་སྡོད་རྒྱུ་ཙམ་དུ་མ་ཟད། འདས་པའི་ལོ་ངོ་ ༧༠ རིང་མའོ་ཙེ་ཏུང་གི་རྗེས་ཀྱི་རྒྱ་ནག་གི་སྲིད་འཛིན་ཆེས་དབང་ཐང་ཅན་ཞིག་ཡིན་པའི་ཁྱབ་བསྒྲགས་དང་། ཀྲོ་ལི་ཅི་དང་ཝང་ཧོན་ནིན་༼སྐབས་སྔོན་མའི་ནང་ཡོད༽། ལི་ཆང་དང་ཏིན་ཞའེ་ཞཱ། ཚའེ་ཆི། ལི་ཞི་བཅས་ཡིན་པ་རེད་ལ། ད་རེས་འདེམས་ཐོན་བྱུང་བའི་དབུས་རྒྱུན་ལས་བདུན་ནི་ཞི་ཅིན་ཕིན་གྱི་བློས་མཐུན་དཔོན་རིགས་རྐྱང་ཡིན་ཡང་། ཞི་ཡི་མ་འོངས་པའི་རྒྱུན་འཛིན་པ་རེད་བསམ་པ་གཅིག་ཀྱང་མེད་སྟབས། དབྱེ་ཞིབ་པ་ཚོས་ཞི་ཅིན་ཕིན་འབྱུང་འགྱུར་ལོ་ལྔའི་རྗེས་ནས་བསྐྱར་དུ་རྒྱ་ནག་གི་སྲིད་འཛིན་བྱས་ནས་སྡོད་རྒྱུ་ཡིན་པའི་ཚོད་དཔག་བྱས་འདུག
ད་ལན་དམར་ཤོག་ཚོགས་ཆེན་ཐེངས་ཉུ་ཤུ་བ་དང་འབྲེལ་ནས། རྒྱ་ནག་ཤིན་ཧ་གསར་ཁང་གི་གནས་ཚུལ་ནང་། ཞི་ཅིན་ཕིན་དངོས་སུ་དབུས་ཆབ་སྲིད་སྲིད་གྲོས་ཀྱི་འཐུས་མི་དང་དབུས་རྒྱུན་བདུན་འདེམས་སྒྲུག་གི་ལས་དོན་ནང་ཞུགས་ཏེ། རང་ཉིད་ཀྱི་མཐུན་གྲོགས་འདེམས་སྒྲུག་དང་དཔུང་རོགས་ཕྱོགས་སྒྲིག་བྱས་པའི་གནས་ཚུལ་སྤེལ་འདུག་ལ། ཕྱོགས་གཞན་ཞིག་ནས་འདི་ལོའི་ཚོགས་ཆེན་སྟེང་དབུས་ཆབ་སྲིད་ལྷན་ཁང་ལ་འཐུས་མི་ཁྱོན་ ༢༥ ཡོད་པའི་སྲོལ་རྒྱུན་སྒྲིག་གཞི་བཅོས་སྒྱུར་བཏང་སྟེ་འཐུས་མི་ཁྱོན་ ༢༤ ལས་མེད་པར་བཟོས་ཡོད། སྤྱིར་རྒྱ་ནག་དམར་ཤོག་ཚོགས་ཁོངས་སུ་བུད་མེད་དཔོན་རིགས་ཉུང་ཉུང་ཡིན་པ་དང་ད་རེས་ཚོགས་ཆེན་ཐོག་དམར་ཤོག་བུད་མེད་དཔོན་རིགས་མཐའ་མ་སོན་ཁྲན་ལན་(Sun Chunlan)རྒས་གཡོལ་ཞུས་ཡོད་སྟབས། ད་ལྟ་དམར་ཤོག་ཚོགས་པའི་མཐོ་རིམ་དཔོན་རིགས་ཀྱི་གྲས་སུ་བུད་མེད་གཅིག་ཀྱང་མེད་པ་རེད། ད་དུང་ཚོགས་ཆེན་ཐོག་ཐོག་གཅོད་ཁེ་མཚར་རྐྱང་བླངས་ཡོད་པའི་ཁྲོད། རྒྱ་ནག་གི་སྲིད་འཛིན་ཟུར་བ་ཧུའུ་ཅི་ཐོ་གློ་བུར་དུ་ཚོགས་ཐོག་ནས་བཙན་གྱིས་ཕྱི་རུ་འཁྲིད་ཡོད་པ་དང་། ཉམས་ཞིབ་པ་མང་པོས་དབུས་དམར་ཤོག་དཔོན་རིགས་མཐོ་ཤོས་བདུན་གྱི་གྲས་སུ་ཡོང་སྲིད་པར་ཚོད་དཔག་བྱེད་བཞིན་པའི་ཧུའུ་ཁྲན་ཧྥ་ཡི་གོ་གནས་འཕར་མེད་སྟབས། ཁོས་མགོ་བོ་དམའ་ས་ཞིག་ནས་བྱ་བ་བསྒྲུབ་དགོས་ཀྱི་ཡོད་པ་རེད། སྤྱིར་ཧུའུ་ཁྲན་ཧྥ་(Hu Chunhua) ནི་ཞི་ཅིན་ཕིན་གྱི་དབུལ་གྲོལ་དགག་གཏོར་སྲིད་ཇུས་རྒྱབ་ཀྱི་མི་སྣ་གཙོ་བོའི་གྲས་ཡིན་པ་དང་། ཁོས་བོད་ནང་འདས་པའི་ལོ་ངོ་ ༢༠ མ་ཟིན་ཙམ་གྱི་རིང་གདུག་རྩུབ་ཀྱི་དྲག་གནོན་སྲིད་ཇུས་རྐྱང་ལག་བསྟར་བྱས་པ་ནི་དམར་ཤོག་ཚོགས་པའི་དཔོན་རིགས་ཁྲོད་བྱས་རྗེས་ཤིག་ལ་བརྩི་ཡི་ཡོད་སྟབས། བར་སྐབས་ཤིག་ལ་ཁོ་མ་འོངས་པའི་ཞི་ཅིན་ཕིན་གྱི་རྗེས་འཛིན་པ་ཡིན་པའི་གླེང་སློང་ཀྱང་ཤུགས་ཆེན་བྱུང་ཡོད།
དམར་ཤོག་ཚོགས་པའི་དབུས་རྒྱུན་ལས་གསར་པ་བཞི།
ལི་ཆང་ (Li Qiang)ད་ལྟ་རང་ལོ་ ༦༣ ཡིན་པ་དང་། ཞི་ཅིན་ཕིན་ཀྲའེ་ཅང་དུ་ཡོད་སྐབས་ལོ་གསུམ་གྱི་རིང་ཞི་ཡི་དྲུང་ཡིག་དང་རྒྱབ་སྐྱོར་བ་གལ་ཆེན་ཞིག་ཀྱང་ཡིན་པ་རེད། ཁོས་འདས་པའི་ལོ་ངོ་ ༣༠ ལྷག་གི་རིང་རྒྱ་ནག་དམར་ཤོག་ཚོགས་པ་དང་གཞུང་། དམག་བཅས་ཀྱི་ས་ཁུལ་གལ་ཆེན་ཞིག་ཏུ་བརྩི་བཞིན་པའི་ཀྲའེ་ཅང་དུ་བྱ་བ་བསྒྲུབས་མྱོང་ཡོད་པ་མ་ཟད། ལི་ཆང་ནི་ཞི་ཡི་དཔལ་འབྱོར་སྒྱུར་བཅོས་སྲིད་ཇུས་ལ་རྒྱབ་སྐྱོར་བྱེད་མཁན་གཙོ་གྲས་ཤིག་ཡིན་པ་དང་། འདས་ལོའི་ཕྱི་ཟླ་ ༦ པའི་ནང་ཁོ་རྒྱ་ནག་རྒྱལ་ཡོངས་ཀྱི་ཐོན་སྐྱེད་སྤྱི་འབོར་ཆེ་ཤོས་ཨང་གཉིས་པ་ཡིན་པའི་ཅང་སོའུ་ཞིང་ཆེན་གྱི་དམར་ཤོག་དྲུང་ཆེ་རུ་བསྐོ་གཞག་བྱས་ཏེ། རྒྱ་ནག་གི་དཔལ་འབྱོར་འཕེལ་རྒྱས་དང་འབྲེལ་བའི་འགན་ཤུགས་ཆེན་འཁུར་བཅུག་ཡོད་ལ། ཁ་སང་ཏང་གི་ཚོགས་ཆེན་ཐོག་ལི་ཆང་དབུས་དམར་ཤོག་རྒྱུན་ལས་བདུན་གྲས་ཀྱི་གོ་གནས་ཨང་རིམ་གཉིས་པ་དང་། ཁོ་ལི་ཁུ་ཆང་གི་ཚབ་ཏུ་མ་འོངས་པའི་རྒྱ་ནག་གི་སྲིད་བློན་དུ་བསྐོ་གཞག་བྱ་སྲིད་པའི་ཚོད་དཔག་ཀྱང་བྱེད་ཀྱིན་འདུག
ཚའེ་ཆི་ (Cai Qi)དང་ཞི་ཅིན་ཕིན་བར་གྱི་འབྲེལ་བ་ཧ་ཅང་བཟང་། ཞི་ཅིན་ཕིན་ཧྥོ་ཇིན་དང་ཀྲའེ་ཅང་དུ་ཡོད་སྐབས། ཚའེ་ཆི་ཡིས་ཞི་ཅིན་ཕིན་འོག་ལས་ཀ་བྱེད་མྱོང་ལ། ཁོ་གཉིས་ལ་འདས་པའི་ལོ་ངོ་ ༢༠ རིང་ལས་ཀ་མཉམ་ལས་བྱས་པའི་འགྲོག་འདྲིས་ཟབ། ཕྱི་ལོ་ ༢༠༡༧ ལོར་ཚའེ་ཆི་པེ་ཅིན་གྱི་དམར་ཤོག་དྲུང་ཆེར་བསྐོས། ཁོས་པེ་ཅིན་དང་ཧུ་བྷེ། ཀྲའེ་ཅང་ཁུལ་དུ་གནས་སྦོ་བྱས་ཏེ་ཁྲིམས་འགལ་ངང་འཛུགས་སྐྲུན་བྱེད་བཞིན་པ་དག་མཚམས་འཇོག་གིས། ས་ཁུལ་དེ་དག་ནང་གི་མཁའ་རླངས་དུ་བའི་དཀའ་ངལ་རིགས་མེད་པར་བཟོ་ཐབས་བྱེད་སྐབས། མི་མང་འབོར་ཆེན་གྱིས་ཚའེ་ཆི་ལ་ངོ་རྒོལ་ཤུགས་ཆེན་བྱས་ཡོད། འོན་ཀྱང་། ཚའེ་ཆི་ནི་དམར་ཤོག་དཔོན་རིགས་གཞན་དང་མི་འདྲ་བར་རང་གི་བསམ་འདུན་དག་ཐད་ཀར་བཤད་ཕོད་པ་དང་། ཕྱི་ལོ་ ༢༠༡༡ ལོར་ཁོས་རྒྱ་ནག་ནང་ཕྱི་གསལ་ནང་གསལ་དགོས་པ་དང་མི་མང་གི་བསམ་ཚུལ་ལ་དགའ་བསུ་ཡོད་པའི་རྩོམ་ཡིག་སྤེལ་ཡོད་ལ། ལོ་དེར་ཨ་རིའི་སྤྱི་ཚོགས་བརྒྱུད་ལམ་ངོ་དེབ་ཀྱི་སྦྱིན་བདག་མཱག་རྫཱ་ཁར་བྷག་རྒྱ་ནག་ཏུ་བསྐྱོད་སྐབས། ཚའེ་ཡིས་རྒྱ་ནག་ནང་ངོ་དེབ་དང་ཊུ་ཝེ་ཊར། ཡོ་ཊུབ་སོགས་བཀག་སྡོམ་བྱས་ཡོད་པ་ནི་ངོ་གནོང་དགོས་པ་ཞིག་ཡིན་པའི་སྐྱོན་བརྗོད་ཀྱང་བྱེད་མྱོང་། ཕྱི་ལོ་ ༢༠༡༢ ལོར་ཁོས་རྒྱ་ནག་ནང་དྲ་རྒྱ་བདེ་འཇགས་ཀྱི་སྒྲིག་ཁྲིམས་དགོས་པའི་བསམ་ཚུལ་བཏོན་པ་ཡོད། དེ་ནས་ཡུན་རིང་མ་འགོར་བར་ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པ་དང་དྲ་རྒྱའི་བདེ་འཇགས་ནི་ཞི་ཡི་དོ་ཁུར་བྱེད་ཡུལ་གལ་ཆེན་དུ་གྱུར་བ་རེད་ལ། ཕྱི་ལོ་༢༠༡༤ ལོ་ནས་ཚའེ་ཆི་ཡི་གོ་གནས་ཀྱང་ཀྲའེ་ཅང་གི་འཛིན་སྐྱོང་མགོ་ཁྲིད་གཞོན་པ་ཞིག་ནས་དབུས་བློན་ཆེན་རིམ་པའི་གོ་གནས་ཐོག་འཕར་ཡོད། པེ་ཅིན་གྱི་མགོ་ཁྲིད་རྒན་གྲས་མང་པོ་ཞིག་ལ་མཚོན་ན་ཚའེ་ཆི་ཡི་གོ་གནས་གློ་བུར་དུ་འགྱུར་ལྡོག་བྱུང་བར་དོགས་འདྲིའི་གཞི་རུ་གྱུར་ཡོད་པ་རེད། ད་ལྟ་རང་ལོ་ ༦༦ ཡིན་པའི་ཚའེ་ཆི་རྒྱ་ནག་དམར་ཤོག་ཚོགས་པའི་དབུས་སྤྱི་ཁྱབ་དྲུང་ཆེར་བསྐོས་ཡོད་འདུག
ཏིན་ཞའེ་ཞཱ་ (Ding Xuexiang)ནི་ད་ལྟ་རང་ལོ་ ༦༠ དང་ཞི་ཅིན་ཕིན་གྱི་ཆེས་ཉེ་བའི་བློ་མཐུན་གྲོགས་པོ་ཞིག་ཀྱང་ཡིན། ཁོས་ཧྲང་ཧེ་ནས་དམར་ཤོག་ཚོགས་པའི་དཔོན་རིགས་ཀྱི་ཐེམ་སྐས་རིམ་འཛེགས་བྱེད་བཞིན་ཧྲང་ཧེའི་དམར་ཤོག་དྲུང་ཆེའི་བར་བྱ་བ་བསྒྲུབས་ཡོད་ཅིང་། ཕྱི་ལོ་ ༢༠༡༢ ལོར་ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པ་དང་ཏིན་ཞའེ་ཞཱ་པི་ཅིན་དུ་གནས་སྤོ་བྱས་ཏེ། དབུས་དམར་ཤོག་རྒྱུན་ལས་ཁང་དང་སྲིད་འཛིན་ལས་ཁུངས་སོགས་ལས་གྲུབ་པའི་ཞི་ཅིན་ཕིན་གྱི་སྲིད་དབང་འོག་གི་ལས་བྱེད་བཀོད་འདོམས་ལྷན་ཁང་གི་སྤྱི་ཁྱབ་འགན་འཛིན་ཐོག་མ་ཆགས། འདས་པའི་ལོ་ཤས་རིང་ཏིན་ཞའེ་ཞཱ་ཡིས་སྲུང་སྐྱོབ་གཉིས་ཞེས་༼ཞི་ཅིན་ཕིན་སྲོག་ཤིང་ཡིན་པ་དང་དམར་ཤོག་ཚོགས་པའི་དབུས་དབང་ཆ་༽ལ་སྣང་མེད་གཏོང་མཁན་གྱི་དམར་ཤོག་མགོ་ཁྲིད་འགའ་དམིགས་འབེན་དུ་བཟུང་སྟེ། ཞི་ཅིན་ཕིན་ལ་ཡིད་ཆེས་བློ་དཀར་དགོས་པའི་སྲིད་ཇུས་ཤིག་ལག་བསྟར་བྱས་ཡོད། ཕྱི་ལོ་ ༢༠༡༢ རྗེས་ནས་ཞི་ཅིན་ཕིན་གང་དུ་སོང་ན་དེར་ཏིན་ཞའེ་ཞཱ་ཡོད་སྟབས། ཁོ་ནི་ཞི་ཅིན་ཕིན་གྱི་ལོ་བཅུའི་སྲིད་དབང་སྐབས་ངོ་ལྐོག་གཉིས་ནས་ཞི་ལ་སྐྱོར་མ་བྱེད་མཁན་གྱི་བློ་མཐུན་གྲོགས་པོ་ཞིག་ཡིན་པ་རེད།
ལི་ཞི་ (Li Xi)ནི་ད་ལྟ་རང་ལོ་ ༦༡ ཡིན་ཞིང་། ཚོགས་ཆེན་ཐེངས་ཉུ་ཤུ་བའི་སྟེང་དབུས་དམར་ཤོག་རྒྱུན་ལས་བདུན་ནང་འདེམས་ཡོད་པ་མ་ཟད། ཧུའུ་ཁྲན་ཧྥ་ (Hu Chunhua) ཚབ་ཏུ་རྒྱ་ནག་ཀུང་ཏུང་ཞིང་ཆེན་གྱི་དམར་ཤོག་དྲུང་ཆེར་བསྐོས་ཡོད། ལི་ཞི་དང་ཞི་ཡི་འབྲེལ་བ་ནི། ལི་ཞི་ཡིས་ཕྱི་ལོ་ ༡༩༨༠ ནང་ཞི་ཡི་ཨ་ཕ་ཞི་ཀྲའོ་ཞོན་གྱི་བློ་མཐུན་གྲོགས་པོ་ལི་ཀྲི་ཆི་ (Li Ziqi) ཡི་དྲུང་ཆེ་བྱེད་མྱོང་བ་དང་། ཁོས་འདས་པའི་ལོ་ངོ་ ༢༢ རིང་གཙོ་ཆེ་བ་ཀན་སུའུ་ཞིང་ཆེན་ནང་དམར་ཤོག་གི་ལས་དོན་བསྒྲུབས། ལི་ཞི་ཀུང་ཏུང་ཞིང་ཆེན་གྱི་དམར་ཤོག་དྲུང་ཆེར་བསྐོས་དོན་ནི། ཀུང་ཏུང་ནི་རྒྱ་ནག་གི་ཚོང་ཟོག་འཛུགས་སྐྲུན་གྱི་སྙིང་ལྟ་བུ་སྟེ། འདས་པའི་ལོ་ངོ་ ༢༨ རིང་རྒྱ་ནག་གི་ཞིང་ཆེན་ཡོངས་ཀྱི་གྲས་ནས་ཐོན་སྐྱེད་སྤྱི་འབོར་ཆེས་མང་ཡུལ་ཡིན་པ་དང་། ཧོང་ཀོང་དང་ཁྱིམ་མཚེས་ཡིན་སྟབས་རྒྱ་ནག་གི་དཔལ་འབྱོར་བཅོས་སྒྱུར་དང་འབྲེལ་བ་ཧ་ཅང་གལ་ཆེན་ཡིན་པས་རེད་འདུག་ལ། ལི་ཞི་ད་དུང་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་ཁྲིད་དུ་བསྐོས་ཡོད་པ་ཤི་ཧྥ་གསར་ཁང་གིས་བརྗོད་འདུག
གསར་འགོད་པ། སྐལ་བཟང་སྦྱིན་པ།
