༧གོང་ས་མཆོག་ནས་ཨི་ཊ་ལིའི་སྲིད་བློན་གསར་པར་འཚམས་འདྲི་མཛད།

ཁ་སང་ཕྱི་ཚེས་ ༢༣ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་ཨི་ཊ་ལིའི་སྲིད་བློན་གསར་པ་ལྕམ་ཇོར་ཇི་ཡ་མེ་ལོ་ནི་(Giorgia Meloni)མཆོག་ཡུལ་དེའི་ལོ་རྒྱུས་ཁྲོད་ཀྱི་བུད་མེད་སྲིད་བློན་དང་པོར་བདམས་ཐོན་བྱུང་བར་ཐུགས་སྨོན་དང་བཅས་འཚམས་འདྲི་མཛད་འདུག

Tibetan spiritual leader the Dalai Lama greets devotees at the Buddha Park in Bomdila, Arunachal Pradesh, India, Wednesday, April 5, 2017.

དེ་ཡང་གསུང་འཕྲིན་ནང་༧གོང་ས་རྒྱལ་བ་རིན་པོ་ཆེ་མཆོག་གིས། འདས་ཟིན་པའི་ལོ་ངོ་འདི་དག་རིང་ངོས་རང་ཐེངས་མང་པོར་ཁྱེད་ཀྱི་རྒྱལ་ཁབ་ནང་དུ་འགྲོ་རྒྱུ་བྱུང་བར་དགའ་བོ་བྱུང་། ཨི་ཊ་ལིའི་མི་མང་གིས་ངོས་ལ་མཛའ་བརྩེ་ཟབ་མོ་བསྟན་པར་སེམས་འགུལ་ཐེབས་སོང་། ངོས་ཀྱིས་ཀྱང་ཨེ་ཊི་ལི་མི་མང་ཡོངས་ནས་ལྷག་བསམ་རྣམ་དག་གིས་བོད་མི་མང་གི་རང་དབང་དང་ཆེ་མཐོང་གི་ཆེད་དུ་རྒྱབ་སྐྱོར་བྱས་པར་བཀའ་དྲིན་ཆེ་ཞུ་ཞེས་གསུངས་འདུག

ཡང་༧གོང་ས་མཆོག་ནས་ཨི་ཊ་ལིའི་སྲིད་བློན་གསར་པ་ནི་བུད་མེད་ཞིག་ཡིན་པར་དགའ་བོ་བྱུང་ཞེས་ཞུ་འདོད་བྱུང་། རྒྱུ་མཚན་ནི་བུད་མེད་རྣམས་ཀྱིས་གཞན་གྱི་བདེ་སྡུག་ཚོར་བ་རྣོ་བོའི་ཐོག་ནས་དྭང་ལེན་བྱེད་ཀྱི་ཡོད་པ་ཚན་རིག་དང་མཐུན་པའི་སྒོ་ནས་ར་འཕྲོད་བྱུང་ཡོད། གཞན་གྱི་བདེ་སྡུག་གི་ཆེད་དུ་བྱམས་བརྩེ་ཆེ་བ་སྟོན་གྱི་ཡོད་པ་ངོས་ཀྱིས་ཡིད་ཆེས་བྱེད་ཀྱི་ཡོད། ད་ལྟའི་དུས་འདི་ནི་ཨི་ཊ་ལི་དང་འགྲོ་བ་མིའི་རིགས་ཡོངས་ཀྱི་ཆེད་དུ་གདོང་ལེན་བྱེད་དགོས་པའི་དུས་ཚོད་ཞིག་ཏུ་འཁེལ་ཡོད། འཛམ་གླིང་གཅིག་ཕན་གཅིག་གྲོགས་སུ་གནས་ཡོད་པའི་སྐབས་འདིར། མི་སྒེར་བ་དང་རྒྱལ་ཁབ་གཅིག་པོས་ང་ཚོ་འཕྲད་བཞིན་པའི་དཀའ་ངལ་གཙང་སེལ་གཏན་ནས་བྱེད་ཐུབ་ཐབས་མེད། ང་ཚོ་ཡིད་ཆེས་བློས་འཁེལ་གྱི་ཐོག་ནས་སྤྱི་ཚོགས་ཆེན་པོ་འདིའི་ནང་དུ་འཚོ་གནས་བྱེད་དགོས་པར་བརྟེན། ང་ཚོས་ཕན་ཚུན་ལ་བྱམས་བརྩེ་དང་སྙིང་རྗེ་ལག་བསྟར་བྱེད་དགོས། ཞེས་གསུངས་འདུག

གསུང་འཕྲིན་གྱི་མཇུག་ཏུ་༧གོང་ས་མཆོག་གིས། ལྕམ་སྐུ་ཇོར་ཇི་ཡ་མེ་ལོ་ནི་མཆོག་གིས་འཛམ་བུ་གླིང་དང་ཨི་ཊ་ལིའི་མི་མང་ལ་འཕྲད་བཞིན་པའི་དཀའ་ངལ་རྣམས་ལ་གདོང་ལེན་དང་། གོ་སྐབས་རྣམས་དམ་འཛིན་གྱིས་ཕུགས་བསམ་ལེགས་པར་འགྲུབ་ཐུབ་པའི་ཐུགས་སྨོན་མཛད་འདུག

The first Female PM of Italy Giorgia Meloni

ལྕམ་ཇོར་ཇི་ཡ་མེ་ལོ་ནི་མཆོག་ནི་ཕྱི་ལོ་ ༡༩༧༧ ལོའི་ཟླ་ ༡ ཚེས ༡༥ ཉིན་ཨི་ཊ་ལིའི་རྒྱལ་ས་རོམ་དུ་སྐྱེས་ཞིང་། གྷར་བྷ་ཌེ་ལཱ་(Garbatella)་རྗོང་དུ་འཚར་ལོངས་བྱུང་། ཕྱི་ལོ་ ༡༩༩༢ ལོར་དགུང་ལོ་ ༡༥ ཐོག་ཏུ་ཨི་ཊ་ལིའི་(Neo -fascism) སྲིད་དོན་ཚོགས་པས་བཙུགས་པའི་སྤྱི་ཚོགས་ལས་འགུལ་ཀྱི་ཡན་ལག་ན་གཞོན་ལས་འགུལ་དུ་ཞུགས། ཕྱི་ལོ་ ༡༩༩༦ ལོར་རྒྱལ་སྤྱིའི་སློབ་མའི་ལས་འགུལ་ཚོགས་པའི་མགོ་ཁྲིད་(National leader of student Action) བྱས། རོམ་མཐོ་སློབ་(Rome’s Amerigo Vespocci Institute) ཏུ་དམིགས་བསལ་སྐད་ཡིག་སློབ་གཉེར་བྱས་ཏེ་གྲུབ་འབྲས་བཟང་པོ་ཐོབ། ཕྱི་ལོ་ ༢༠༠༦ ལོར་འོས་འདེམས་ཀྱི་ལམ་ནས་ཨི་ཊ་ལིའི་གྲོས་ཚོགས་འཐུས་མིར་འདེམས་ཐོན་བྱུང་ཞིང་དུས་མཚུངས་གསར་འགོད་ལས་རིགས་ཀྱང་གཉེར།

ཕྱི་ལོ་ ༢༠༠༨ ལོར་ཨི་ཊ་ལིའི་ལོ་རྒྱུས་ནང་གི་ལོ་ན་ཆུང་ཤོས་ཀྱི་བློན་ཆེན་དུ་བདམས་ཡོད་པ་དང་། རྒྱ་ནག་གཞུང་ནས་བོད་སོགས་ཀྱི་ཐོག་བཟུང་བའི་གདུག་རྩུབ་ཅན་གྱི་སྲིད་ཇུས་ལ་ངོ་རྒོལ་ཆེད་ལོ་དེའི་པེ་ཅིན་ཨོ་རྩལ་འགྲན་ཕྱིར་བསྡུ་དགོས་པའི་འབོད་སྐུལ་ཡང་གནང་ཡོད་འདུག ཕྱི་ལོ་༢༠༡༤ ལོར་ཡུ་རོབ་གྲོས་ཚོགས་ཀྱི་ཨི་ཊ་ལིའི་འཐུས་མིའི་འོས་ཁོངས་སུའང་བསླེབས་ཡོད་འདུག་ལ། ཕྱི་ལོ་ ༢༠༢༠ ཟླ་ ༨ ཙམ་ནས་ཡུ་རོབ་སྲུང་སྐྱོབ་དང་གསར་བརྗེ་ཚོགས་པ་(European Conservatives and Reformists Party)ཡི་ཚོགས་གཙོ་གནང་ཡོད་པ་དང་། དེ་བཞིན་ཨི་ཊ་ལིའི་བུ་སྤུན་སྲིད་དོན་ཚོགས་པ་(Brothers of Italy)ཚོགས་གཙོ་སོགས་གནང་མྱོང་ཡོད་འདུག

བྱམས་པ་ཚེ་རིང་།