༧གོང་ས་མཆོག་ནས་དབྱིན་ཡུལ་གྱི་སྲིད་བློན་གསར་པ་སྐུ་ཞབས་རཱི་ཤེ་སོ་ནཱག་ལགས་སུ་འཚམས་འདྲིའི་གསུང་འཕྲིན་སྩལ་ཏེ་མ་འོངས་པར་དབྱིན་ཡུལ་མི་མང་གི་ཕུགས་བསམ་མངོན་འགྱུར་ཡོང་བ་དང་འཛམ་གླིང་ཞི་བདེ་བསྐྲུན་ཐབས་ཀྱི་ཕྱོགས་སུ་བརྩོན་པའི་ཐུགས་སྨོན་མཛད་འདུག
དེ་རིང་ཉིན་རྒྱབ་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་གྱི་རིགས་རྒྱུད་ཡིན་ཞིང་དབྱིན་ཇིའི་སྲིད་བློན་སྐབས་ ༥༧ པར་བདམས་ཐོན་བྱུང་བའི་སྐུ་ཞབས་རཱི་ཤེ་སོ་ནཱག་ལགས་སུ་འཚམས་འདྲིའི་གསུང་འཕྲིན་སྩལ་གནང་འདུག་པ་དང་། གསུང་འཕྲིན་ནང་༧མགོན་པོ་གང་ཉིད་མཆོག་གིས། འདས་ཟིན་པའི་ལོ་ངོ་བཅུ་ཕྲག་ཁ་ཤས་རིང་ངོས་རང་འཆར་ཅན་བཞིན་དབྱིན་ཡུལ་ནང་དུ་འགྲོ་རྒྱུ་བྱུང་། དབྱིན་ཡུལ་མི་མང་གིས་ངོས་ལ་མཛའ་བརྩེ་ཟབ་མོའི་འདུ་ཤེས་བཅངས་པར་སེམས་འགུལ་ཐེབས་སོང་ལ། ཁོང་ཚོས་ངོས་ནས་འགྲོ་བ་མིའི་གཅིག་མཚུངས་ཀྱི་བསམ་བློ་དང་ཆོས་ལུགས་ནང་ཁུལ་མཐུན་སྒྲིལ་གོང་འཕེལ་ལ་འབད་པ་བྱེད་བཞིན་པར་བློ་སྤོབས་སྦྱིན་བྱུང་། དུས་མཚུངས་སུ་ངོས་ཀྱིས་གོ་སྐབས་འདི་བཟུང་ནས་དབྱིན་ཡུལ་མི་མང་ནས་ལྷག་བསམ་རྣམ་དག་གིས་བོད་ཀྱི་རང་དབང་དང་ཆེ་མཐོང་ཆེད་དུ་རྒྱབ་སྐྱོར་གནང་བར་བཀའ་དྲིན་ཆེ་ཞུ།
གསུང་འཕྲིན་གྱི་མཇུག་ཏུ་༧གོང་ས་མཆོག་གིས། ཧ་ཅང་གཉན་འཕྲང་ཅན་གྱི་དུས་སྐབས་འདིར། གཅིག་ཕན་གཅིག་གྲོགས་སུ་གནས་ཡོད་པའི་འཛམ་གླིང་འདིའི་ནང་། ས་ཕྱོགས་གང་ཞིག་ཏུ་གནད་དོན་བྱུང་ཚེ། དེས་ང་ཚོ་ཚང་མར་ཤུགས་རྐྱེན་ཐེབས་ཀྱི་ཡོད། དེར་བརྟེན། ངོས་ནས་དབྱིན་ཡུལ་མི་མང་གི་ཕུགས་བསམ་མངོན་འགྱུར་ཡོང་བ་དང་འཛམ་གླིང་ཞི་བདེ་བསྐྲུན་ཐབས་ཀྱི་ཕྱོགས་སུ་བརྩོན་པའི་ཐུགས་སྨོན་ཡོད་ཅེས་གསུངས།
ད་ལྟའི་ཆར་དབྱིན་ཡུལ་གྱི་དཔལ་འབྱོར་དང་འཕྲོད་བསྟེན་གནས་སྟངས་ཐད་དཀའ་ངལ་འཕྲད་བཞིན་ཡོད་པར་བརྟེན་ནས། ཟླ་འདིའི་ཕྱི་ཚེས་ ༢༠ ཉིན་དབྱིན་ཇིའི་སྲིད་བློན་ལི་ཙི་ཊི་རོ་སི་ཉིན་གྲངས་ ༤༥ རིང་དབྱིན་ཇིའི་སྲིད་བློན་བྱས་རྗེས་དགོངས་པ་ཞུས་ཡོད་པ་ལྟར། ཁ་སང་དབྱིན་ཇིའི་གྲོས་ཚོགས་འཐུས་མི་སྐུ་ཞབས་རཱི་ཤེ་སོ་ནཱག་ལགས་སུ་གྲོས་ཚོགས་ནང་ཁ་གཏད་མེད་པར་ཚད་མཐོའི་རྒྱབ་སྐྱོར་ཐོབ་སྟེ། སྐབས་ ༥༧ པའི་དབྱིན་ཇིའི་སྲིད་བློན་ཆགས་ཡོད་པ་རེད།
དབྱིན་ཇིའི་ལུགས་སྲོལ་ལྟར་རྒྱ་གར་གྱི་རིགས་རྒྱུད་ཡིན་པའི་སྐུ་ཞབས་རཱི་ཤེ་སོ་ནཱག་ལགས་ཀྱིས། དེ་རིང་དབྱིན་ཇིའི་རྒྱལ་པོ་ཆཱར་ལེ་སི་ཡི་མདུན་ནས་དམ་འབུལ་ཞུས་རྗེས་དངོས་སུ་དབྱིན་ཇིའི་སྲིད་བློན་གསར་པ་ཆགས་ཡོད་ཅིང་། སྐབས་དེར་ཁོང་གིས། ད་ལྟ་དབྱིན་ཇིའི་དཔལ་འབྱོར་གྱི་གནས་སྟངས་ཧ་ཅང་ཛ་དྲག་ཆགས་ཡོད། ད་རེས་གྲོས་ཚོགས་ཀྱིས་རང་ཉིད་སྲིད་བློན་ཟུར་བ་ལི་ཙི་ཊི་རེ་སིའི་ཚབ་ཏུ་བསྐོས་ཏེ་མོས་བཟོས་པའི་ནོར་འཁྲུལ་གྱི་དཀའ་ངལ་རིགས་སེལ་རྒྱུ་མ་ཟད། ད་ལྟ་ང་ལ་གྲོས་ཚོགས་ཀྱི་ཡིད་ཆེས་བྱེད་བཞིན་ཡོད་ལ། ངས་ཁྱེད་ཅག་གི་ཡིད་ཆེས་འགུག་ཐུབ་པ་བྱ་རྒྱུ་ཡིན། ཞེས་མི་མང་དང་གསར་འགོད་པར་བརྗོད་ཡོད།
གཞན་ཡང་སྐུ་ཞབས་རཱི་ཤེ་སོ་ནཱག་ལགས་སུ། ཨ་རིའི་སྲིད་འཛིན་བྷའེ་ཌན་ལགས་དང་རྒྱ་གར་སྲིད་བློན་མུ་དྷུ། དེ་བཞིན་ཡུ་རོབ་མཐུན་ཚོགས་ཀྱི་སྲིད་འཛིན། པ་ཀི་སི་ཐན་གྱི་སྲིད་བློན་ཤཱ་རེ་ཧྥི་ (Shehbaz Sharif)། ཡོ་ཁུ་རེན་གྱི་སྲིད་འཛིན་ཛན་ལན་སི་གེ་(Zelensky) དང་ཁན་ཡའི་སྲིད་འཛིན་ (William Ruto) སོགས་ཀྱིས་འཚམས་འདྲི་ཞུས་ཡོད་འདུག
རྙིང་ཞེན་སྲིད་དོན་ཚོགས་པའི་མགོ་ཁྲིད་དང་རྒྱ་གར་པན་ཇབ་ནས་ཡིན་པའི་སྐུ་ཞབས་རཱི་ཤེ་སའོ་ནག་ལགས་ནི་ཕྱི་ལོ་ ༡༩༨༠ ལོར་དབྱིན་ཡུལ་གྱི་སའོ་ཐི་ཨམ་ཊོན་ (Southampton) གྲོང་ཁྱེར་ནང་སྐྱེས་ཤིང་། ཁོང་གིས་དབྱིན་ཡུལ་གྱི་ (Hampshire) རྫོང་དུ་ཡོད་པའི་གཞི་རིམ་དང་མཐོ་རིམ་སློབ་མཐར་ཕྱིན་རྗེས། ཕྱི་ལོ་ ༢༠༠༡ ལོར་དབྱིན་ཡུལ་གྱི་ཨོ་ཁི་སི་ཧྥོར་ཌི་གཙུག་ལག་སློབ་གྲྭ་ཆེན་མོ་ནས་རིག་པའི་གཞུང་ལུགས་དང་ཆབ་སྲིད། དཔལ་འབྱོར་རིག་པའི་ཐོག་སློབ་མཐར་ཕྱིན་པ་དང་། ཕྱི་ལོ་ ༢༠༠༦ ལོར་སི་ཊན་ཧྥོར་ཊི་གཙུག་ལག་སློབ་གཉེར་ཁང་ (Stanford University) ནས་ཚོང་ལས་རིག་པའི་ཐོག་ལ་གཙུག་ལག་འབྱམས་པ་ཐོན། ཕྱི་ལོ་ ༢༠༠༡ ནས་ ༢༠༠༤ བར་ལོ་བཞིའི་རིང་ལ་ (Goldman Sachs) ཟེར་བའི་མ་འཛུགས་དངུལ་ཁང་དུ་དབྱེ་ཞིབ་བྱས་པ་སོགས་ཚོང་ལས་དང་འབྲེལ་བའི་ཕྱག་ལས་གནང་། ཕྱི་ལོ་ ༢༠༡༥ ནས་ད་བར་དབྱིན་ཡུལ་གྱི་གྲོས་ཚོགས་འཐུས་མི་ཆགས་ཡོད་ཅིང་། ཕྱི་ལོ་ ༢༠༡༩ ནས་ ༢༠༢༠ བར་དུ་རྒྱལ་ཁབ་ཀྱི་དཔལ་འབྱོར་ལྷན་ཁང་གི་སྤྱི་ཁྱབ་དྲུང་ཆེའི་ཕྱག་ལས་གནང་ཡོད་པ་རེད་ལ། ཕྱི་ལོ་ ༢༠༢༠ ནས་ ༢༠༢༢ བར་དཔལ་འབྱོར་བློན་ཆེན་བཅས་ཀྱི་ཕྱག་ལས་གནང་མྱོང་བ་རེད།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ།
