༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་སྐབས་ངོས་ཀྱིས་དཀའ་ལས་བརྒྱབ་པའི་རིན་པ་དེ་འཛམ་བུ་གླིང་གི་མི་མང་པོས་དགའ་བོ་བྱེད་ཀྱི་འདུག་ལ་དེ་ཡང་བསམ་པ་རྣམ་དག་གིས་གཞན་ལ་ཕན་ཐོགས་པའི་བྱ་བ་བསྒྲུབ་པ་ལ་བརྟེན་ནས་དགའ་བོ་བྱེད་ཀྱི་ཡོད་པ་ལས་དངུལ་སྤྲད་ནས་དགའ་བོ་བྱེད་ཀྱི་ཡོད་པ་མ་རེད་ཅེས་གསུངས།
དེ་རིང་སྔ་དྲོའི་ཆུ་ཚོད་ ༨ པའི་སྟེང་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་བོད་ཕྲུག་ཁྱིམ་སྡེའི་ལས་སློབ་ངོ་ཟུར་ཡོངས་དང་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་བཅས་ཀྱིས་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་བཙན་བྱོལ་དུ་ཡོད་པའི་བོད་མི་སེར་སྐྱ་རྒན་གཞོན་ཚང་མ་གཅིག་སྒྲིལ་གྱིས་བརྟན་བཞུགས་ཕུལ་བ་རེད། དེ་རིང་བརྟན་བཞུགས་ནང་ལུས་པོ་འཁོད་མེད་པའི་བོད་གངས་ཅན་གྱི་ལྗོངས་སུ་དད་ལྡན་ས་ཡ་ཁ་ཤས་ཡོད་པ་དེ་ཚོ་སྙིང་ཁོངས་རུས་པའི་གཏིང་ནས་དད་པ་དང་དགའ་བ་ཡོད་བསྡད་པ་ཞིག་ཡིན་དུས་སྨོན་ལམ་རྒྱག་གི་ཡིན། འཛམ་གླིང་ས་ཕྱོགས་གང་སར་ཡོད་པའི་ངོས་ལ་དགའ་བོ་བྱེད་མཁན་རྣམས་ཀྱིས་ངོས་རྒྱལ་བ་རིན་པོ་ཆེ་ལ་བརྟན་བཞུགས་འབུལ་གྱི་ཡོད་རེད་ཟེར་ནས་དགའ་སྤྲོ་སྐྱེ་ཡི་ཡོད་པ་རེད། ཚང་མར་ཐུགས་རྗེ་ཆེ་ཟེར་གྱི་ཡིན། བོད་གངས་ཅན་གྱི་ལྗོངས་འདི་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན་པ་ཚང་མས་ཤེས་གསལ་དང་ཡོངས་གྲགས་རེད། སྤྱན་རས་གཟིགས་ཀྱི་ཟག་བཅས་ཉེར་ལེན་གྱི་ཕུང་པོའི་ཐོག་ནས་གདུལ་བྱར་དོན་བྱེད་མཁན་དེ་ལོངས་སྐུ་དང་སྤྲུལ་སྐུའི་རྣམ་པ་བྱས་ནས་མཐོང་རྒྱུ་ཡོད་པ་མ་རེད། འཕགས་པ་སྤྱན་རས་གཟིགས་ཀྱི་བྱིན་གྱིས་རླབས་ཡོད་པའི་ལས་དང་སྨོན་ལམ་གྱི་ཐོག་ནས་འབྲེལ་བ་ཡོང་གི་ཡོད་པ་རེད། ངོས་རང་ལ་ཆ་བཞག་ན། བོད་བྱང་ཤར་གྱི་མཚམས་སུ་སྐྱེས་བསྡད་པའི་ཕྲུ་གུ་ཞིག་ཡིན། ལས་དང་སྨོན་ལམ་གྱི་འབྲེལ་བ་ཤུགས་ཆེན་ཡོད་བསྡད་པ་ཞིག་ཏན་ཏན་རེད། ད་ལྟ་བར་དུ་ངོས་ཀྱིས་བོད་བསྟན་སྲིད་ཀྱི་དོན་དུ་མིག་མཐོང་ལག་ཟིན་གྱི་བྱས་རྗེས་ཞིག་བཞག་ཡོད་པ་རེད། བོད་ཀྱི་ཆོས་དང་རིག་གཞུང་ལབ་དུས་ངོས་ཀྱིས་འཛམ་བུ་གླིང་འདིར་ཚང་མས་མཐོང་རྒྱུ་ཡོད་བསྡད་པའི་བྱས་རྗེས་བཞག་ཡོད་པ་རེད། འདི་ནི་འཕགས་པ་སྤྱན་རས་གཟིགས་སྒྲུབ་པའི་མཆོད་པ་ཡིན། འབྱུང་འགྱུར་ལོ་བཅུ་ཕྲག་གཉིས་ལྷག་འཚོ་བཞུགས་ཐུབ་པ་ཞིག་དང་། ངོས་ཀྱི་རྨི་ལམ་ལའང་ལོ་བརྒྱ་དང་བཅུ་ལྷག་ཡོང་གི་འདུག ངོས་ཀྱིས་མུ་མཐུད་དུ་བོད་བསྟན་སྲིད་ཀྱི་ཆེད་དུ་འཕགས་པ་སྤྱན་རས་གཟིགས་ཀྱི་བྱིན་རླབས་འཁྱེར་ནས་བྱས་རྗེས་འཇོག་གི་ཡིན། ངོས་ཀྱིས་དཀའ་ལས་བརྒྱབ་པའི་རིན་པ་དེ་འཛམ་བུ་གླིང་གི་མི་མང་པོས་དགའ་བོ་བྱེད་ཀྱི་འདུག དངུལ་སྤྲད་ནས་དགའ་བོ་བྱས་པ་མ་རེད། ངོས་ཀྱིས་བསམ་པ་རྣམ་དག་གིས་གཞན་ལ་ཕན་ཐོགས་པའི་བྱ་བ་བྱས་པར་དགའ་བོ་བྱེད་ཀྱི་འདུག འཕགས་པ་སྤྱན་རས་གཟིགས་ཀྱི་སྐུ་ཡི་སྐུ་ཚབ་དང་། གསུང་གི་གསུང་ཚབ། ཐུགས་ཀྱི་ཐུགས་ཚབ་བྱས་ནས་མི་དགེ་བཅད་བཞག་པ་དེ་སྒྲུབ་པའི་མཆོད་པ་ཡིན། དེའི་འབྲས་བུ་ལ་ད་ལྟ་བར་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད་པ་རེད། བྱང་ཆུབ་ཀྱི་སེམས་སྒོམ་པའི་ལེགས་སྐྱེས་ལ་སེམས་སྐྱིད་པ་དང་ལུས་པོ་བདེ་བ་ཏན་ཏན་འདུག ཅེས་གསུངས་སོང་།
ཡང་༧མགོན་པོ་མཆོག་ནས་ཉིན་རེར་ཞོགས་པ་ཡར་ལངས་པ་དང་མཉམ་དུ་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད། དེས་སྙིང་ཁོངས་རུས་པའི་སྟེང་ལ་ཞི་བདེ་དང་སེམས་ལྷོད་ཤིག་གེ་ཡོང་གི་འདུག དེས་སྙིང་སྟོབས་ཀྱང་སླེབ་ཀྱི་འདུག ཞེད་སྣང་དང་དངངས་སྐྲག་སྐྱེས་བ་སོགས་ཁྱོན་ནས་ཡོང་གི་མི་འདུག ངོས་ཀྱིས་སློབ་དཔོན་ཞི་བ་ལྷའི་དགོངས་པ་བཞིན་ཉམས་ལེན་གྱི་མཐིལ་ཕྱིན་པ་བྱེད་ཀྱི་ཡོད། བསམ་པ་གཞན་དོན་བསམ་ནས་གཞན་དོན་རྫོགས་བྱང་གི་བློ་སྒོམ་གྱི་ཡོད་པ་རེད་དེ། ཕན་པ་དེ་ངོས་ཀྱི་ལུས་པོ་དང་སེམས་ཀྱི་ཞི་བདེ་ལ་ཕན་གྱི་འདུག བྱས་ཙང་། ངོས་ཀྱི་གྲོགས་པོ་ཚོས་བྱང་ཆུབ་ཀྱི་སེམས་ལ་དགོངས་པ་ཡག་པོ་ཞིག་བཞེས་དང་། སོ་སོའི་ལུས་བདེ་བ་དང་སེམས་སྐྱིད་པ་རེད། རང་གཞན་དོན་ནི་རབ་སྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི། རང་དོན་འགྲུབ་པར་བྱང་ཆུབ་སེམས་ཀྱི་ཐོག་ནས་རེད་ལ། གཞན་དོན་སྒྲུབ་པའང་བྱང་ཆུབ་སེམས་ཀྱི་ཐོག་ནས་ཡོང་གི་ཡོད་པ་རེད། ཚོགས་བསགས་པའང་བྱང་ཆུབ་ཀྱི་སེམས་ཀྱི་ཐོག་ནས་ཡོང་གི་ཡོད་པ་རེད། སྒྲིབ་པ་སྦྱངས་པའང་བྱང་ཆུབ་ཀྱི་སེམས་ཀྱི་ཐོག་ནས་ཡོང་གི་ཡོད་པ་རེད། ངོས་ཀྱིས་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་སྒོམ་པར་བསམ་བློ་གཏོང་གི་ཡོད་དུས། ཆོས་གྲོགས་ཚོས་ཀྱང་བྱང་ཆུབ་ཀྱི་སེམས་བསྒོམ་པར་དགོངས་པ་བཞེས་ཤོག དངོས་གནས་དྲང་གནས་ལུས་བདེ་བ་དང་སེམས་སྐྱིད་པ་དེ། ཚེ་འདི་ཙམ་མ་ཟད་ཚེ་རབས་ནས་ཚེ་རབས་ཏུ་བདེ་ཞིང་སྐྱིད་པོ་ཡོང་ཐུབ་རྒྱུ་ཏན་ཏན་རེད། བྱས་ཙང་། ཚང་མས་བྱང་ཆུབ་ཀྱི་སེམས་སྒོམ་རྒྱུའི་ཐོག་ཧུར་ཐག་གནང་ཤོག་ཅེས་ཞུ་རྒྱུ་ཡིན། ཞེས་གསུངས་སོང་།
ནང་སེམས་ཀྱི་ཉམས་ལེན་གལ་ཆེ་ཤོས་ཡིན་སྐོར་ལ་༧གོང་ས་མཆོག་གིས། ཕྱི་དངོས་པོའི་མཆོད་རྫས་གལ་ཆེན་པོ་རེད་དེ། གཙོ་བོ་བྱང་ཆུབ་ཀྱི་སེམས་བསྒོམ་ནས། སེམས་ཀྱི་གཏིང་ནས་སྒྲུབ་པའི་མཆོད་པ་ཡག་པོ་བྱུང་བ་ཡིན་ན། དགེ་བ་རྒྱས་པའི་མཆོད་པ་ངོ་མ་དེ་རེད། གཞན་ཕྱི་ལོགས་ལ་མཆོད་རྫས་འདྲ་མི་འདྲ་མཆོད་པ་རྒྱས་པོ་ཞེ་དྲགས་ཡོད་པ་ཡིན་ནའང་། ནང་སེམས་ནས་བྱང་ཆུབ་སེམས་ཀྱི་བསམ་བློ་ཞེ་དྲགས་མེད་ན། དེ་ཙམ་གྱིས་ནུས་པ་ཡོད་པ་མ་རེད། གོང་དུ་ཞུས་པ་ལྟར། གང་ལྟར་བོད་གངས་ཅན་གྱི་ཞིང་འཕགས་པ་སྤྱན་རས་གཟིགས་ཀྱི་གདུལ་བྱ་ཐུན་མོང་མ་ཡིན་པ་དེ་ལ་ངོས་རང་ལས་དང་སྨོན་ལམ་གྱིས་དམིགས་བསལ་གྱི་འབྲེལ་བ་ཤུགས་ཆེན་པོ་ཡོད་བསྡད་པ་ཞིག་དང་། ལྷག་པར་དུ་དཀའ་ངལ་ཅན་གྱི་དུས་སྐབས་སུ་ལས་དང་སྨོན་ལམ་གྱིས་སྐྱེས་པ་ཞིག་རེད། ཅེས་དང་། སེམས་ཤུགས་སྐྱེད་ནས་འཕགས་པ་སྤྱན་རས་གཟིགས་ཀྱི་བྱིན་རླབས་ཀྱི་ནུས་པ་དེ་དག་མུ་མཐུད་དུ་གསལ་ཐུབ་རྒྱུའི་སེམས་ཤུགས་ཡོད་ལ། སྨོན་ལམ་ཡང་འདེབས་ཀྱི་ཡོད། ཁྱེད་ཚོ་ཚང་མ་བློ་བདེ་པོ་བྱས་ནས་བཞུགས་ཨ། ཞེས་གསུངས་སོང་།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་།
