གོང་ས་མཆོག་གིས་འབྱུང་འགྱུར་དོན་རྐྱེན་འདི་འདྲའི་རིགས་མི་འབྱུང་བའི་སླད་དུ་ཐབས་ལམ་གང་ཡོད་བསྟེན་དགོས་པའི་རེ་བ་ཞུ་ཡི་ཡོད་ཅེས་གསུངས།
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས། རྒྱ་གར་གྱི་མངའ་སྡེ་གྷོ་ཇཱོ་རེ་ཊིའི་གྲོང་ཁྱེར་མཱོར་བྷེའི་(Morbi)ནང་ཐག་ཟམ་ཞིག་ཆད་པ་ལ་བརྟེན་ནས། མི་མང་ ༡༤༡ རྐྱེན་འདས་སུ་ཕྱིན་པའི་ཐད། འབྲེལ་ཡོད་མངའ་སྡེའི་སྤྱི་ཁྱབ་བློན་ཆེན་བྷོ་པན་དྷི་ར་ (Bhupendra Rajnikant Patel) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་སྩལ་ཏེ། སྟབས་མ་ལེགས་པའི་དོན་རྐྱེན་དེའི་ཁྲོད་འདས་གྲོངས་ཕྱིན་པ་དང་ཁོ་ཚོའི་ཤུལ་ལུས་ནང་མི་ཡོངས་ལ་གདུང་སེམས་མཉམ་སྐྱེད་དང་གསོལ་བ་སྨོན་ལམ་འདེབས་ཀྱི་ཡོད་སྐོར་གསུངས་འདུག
༧མགོན་པོ་གང་ཉིད་མཆོག་གིས་གསུང་འཕྲིན་ནང་། རྒྱ་གར་དང་ལྷོ་ཀོ་རི་ཡའི་ནང་གི་དོན་རྐྱེན་གཉིས་ལས། ང་ཚོ་ཚང་མའི་སྟེང་ཆག་སྒོ་བྱུང་བ་ལྟ་བུ་ཆགས་ཡོད། དེར་བརྟེན། ངོས་ནས་འབྱུང་འགྱུར་དོན་རྐྱེན་འདི་འདྲའི་རིགས་མི་འབྱུང་བའི་སླད་དུ་ཐབས་ལམ་གང་ཡོད་བསྟེན་དགོས་པའི་རེ་བ་ཞུ་ཡི་ཡོད། ཅེས་གསུངས།
རྒྱ་གར་ཨན་ཌི་བརྙན་འཕྲིན་གསར་ཁང་གིས་དེ་འབྲེལ་སྐོར་ལ་སྤེལ་བའི་གནས་ཚུལ་ལྟར་ན། ཁ་སང་ཕྱི་ཚེས་ ༣༠ ཉིན་གྲོང་ཁྱེར་མཱོར་བྷེའི་ནང་གི་ལོ་ངོ་ ༡༥༠ ཡས་མས་ཙམ་ཟིན་པའི་ཐག་སྐུད་ལ་བརྟེན་པའི་ཟམ་པ་དེའི་སྟེང་མི་གྲངས་ ༥༠༠ ཙམ་སྡེབ་གཅིག་ཏུ་འགྲོ་འོང་བྱེད་བཞིན་པའི་སྐབས། ཟམ་པའི་སྟེང་གི་ལྗིད་ཚད་ཆེ་དྲགས་པ་བརྟེན་ནས་ཟམ་པ་གློ་བུར་དུ་ཆད་ཡོད་ཅིང་། དེ་རིང་ཕྱི་ཚེས་ ༣༡ ཉིན་རྒྱབ་བར་དོན་རྐྱེན་དེའི་ཁྲོད་མི་གྲངས་ ༡༤༡ རྐྱེན་འདས་དང་ད་དུང་མང་པོ་ཞིག་བོར་བརླག་ཏུ་སོང་ཡོད་པ་མ་ཟད། ས་གནས་མྱུར་སྐྱོབ་རུ་ཁག་གིས་འཚོལ་ཞིབ་བྱེད་མུས་ཡིན་འདུག
གྷོ་གྷོ་ཇཱོ་རེ་ཊི་གཞུང་གིས། མི་སྣ་ལྔ་ཅན་གྱི་ཞིབ་འཇུག་ཚོགས་ཆུང་ཞིག་བསྐོ་འཛུགས་བྱས་ཏེ། ཟམ་པ་ཆད་པའི་དོན་རྐྱེན་གྱི་མགོ་མཇུག་བར་གསུམ་ཡོངས་ལ་ཞིབ་འཇུག་བྱ་རྒྱུ་ཡིན་པ་དང་། རྒྱ་གར་སྲིད་བློན་མུ་དྷི་མཆོག་གིས། ཁ་སང་ནས་མྱུར་སྐྱོབ་ཀྱི་ལས་དོན་སྒྲུབ་མུས་ཡིན། རྒྱ་གར་དབུས་གཞུང་ནས་གྷོ་ཇཱོ་ར་ཊི་མངའ་སྡེ་གཞུང་ལ་གང་མཁོའི་རོགས་སྐྱོར་བྱ་རྒྱུ་ཡིན། ཞེས་བརྗོད་ཡོད་པ་དང་། མངའ་སྡེ་གཞུང་གིས་རྐྱེན་ངན་གོ་ཆག་དེའི་ཁྲོད་འདས་གྲོངས་ཕྱིན་པའི་ཤུལ་ལུས་མི་ནང་མི་རེར་ཧིན་སྒོར་འབུམ་ ༤ དང་རྨས་སྐྱོན་ཕོག་མཁན་རེར་ཧིན་སྒོར་ཁྲི་ ༥ རེ། དེ་བཞིན། རྒྱ་གར་དབུས་གཞུང་གིས་འདས་གྲོངས་ཕྱིན་པའི་ཤུལ་ལུས་ཁྱིམ་ཚང་རེར་ཧིན་སྒོར་འབུམ་གཉིས་རེ་བཅས་ཀྱི་གུ་གསབ་སྤྲོད་རྒྱུ་ཡིན་པ་རེད།
