རྒྱ་ནག་གཞུང་གིས་བོད་གཞིས་ཀ་རྩེ་ངམ་རིང་རྫོང་ཁོངས་སུ་བར་རྩེ་ཆུ་མཛོད་གློག་ཁང་ཆེན་མོ་དང་དེའི་ཆུ་འདྲེན་ཡན་ལག་ལས་གྲྭ་ཟེར་བའི་གཞི་རྒྱ་ཆེ་བའི་ཆུ་མཛོད་ཆེན་མོ་ཞིག་དངོས་སུ་ལས་མགོ་བརྩམས་ཡོད་འདུག
ཟླ་འདིའི་ཕྱི་ཚེས་ ༢༨ ཉིན་རྒྱ་ནག་གཞུང་གིས་བོད་གཞིས་ཀ་རྩེ་ངམ་རིང་རྫོང་བར་རྩེ་ཆུ་མཛོད་གློག་ཁང་ཆེན་མོ་དང་དེའི་ཆུ་འདྲེན་ཡན་ལག་ལས་གྲྭ་ཟེར་བ་ཞིག་གི་ལས་མགོ་བཙུགས་ཡོད་ཅིང་། འཛུགས་སྐྲུན་ལས་གཞི་དེ་མ་འོངས་ལོ་ལྔ་དང་ལོ་ཕྱེད་ཙམ་ནང་ཚར་བ་བྱ་རྒྱུ་ཡིན་འདུག རྒྱ་ནག་རྒྱལ་སྲིད་སྤྱི་ཁྱབ་ཁང་ཟེར་བས་ལས་གཞི་དེ་རྒྱལ་ཡོངས་ཆུ་མཛོད་ལས་གྲྭ་གལ་ཆེན་ ༡༥༠ ཞེས་པའི་གྲས་སུ་བཅུག་ཡོད་འདུག་ལ། ཁྱོན་མ་དངུལ་སྒོར་དུང་ཕྱུར་ ༢༩ ལྷག་ཅིག་དང། ཆུ་གསོག་ཚད་སྨི་ ༤༣༢༥ ཟིན་རྒྱུ་ཡིན་སྐོར་བསྒྲགས་འདུག
རྒྱ་ནག་གཞུང་གིས་འཛུགས་སྐྲུན་ལས་གཞི་ཚང་མ་མི་མང་གི་ཆེད་དུ་ཡིན་ཚུལ་བརྗོད་དེ་ས་གནས་མི་མང་གི་ཁ་འགོག་ཐབས་བྱེད་བཞིན་ཡོད་པ་ལྟར། ཆུ་མཛོད་གློག་ཁང་དེ་ལེགས་འགྲུབ་བྱུང་ཚེ་བོད་ཀྱི་ནུབ་བྱང་ས་ཁུལ་གྱི་རྫོང་ཁག་ ༥ ཡི་དགུན་དུས་གློག་དཀོན་པའི་དཀའ་ངལ་དང་། ཞིང་ཆུ་དཀོན་པའི་དཀའ་ངལ་སེལ་ཐུབ་ཚུལ་དང་། ས་ཁུལ་དེའི་དཔལ་འབྱོར་གྱི་རྨང་གཞི་ཇེ་བརྟན་དང་། འབྱུང་ཁམས་ཁོར་ཡུག་ལེགས་སུ་གཏོང་བ། མཐའ་མཚམས་ཀྱི་བརྟན་ལྷིང་སྲུང་སྐྱོང་བྱེད་པ་སོགས་ཀྱི་ཐད་ནུས་པ་གལ་ཆེན་འཐོན་རྒྱུ་རེད། ཅེས་དྲིལ་བསྒྲགས་ཤུགས་ཆེན་བྱེད་བཞིན་འདུག
ཕྱི་ལོ་ ༢༠༢༠ ཟླ་ ༡༠ པའི་ནང་རྒྱ་ནག་གཞུང་ནས་སྤེལ་བའི་གནས་ཚུལ་ནང་། ཡར་ཀླུང་གཙང་པོའི་སྨད་རྒྱུད་དུ་ཆུ་མཛོད་ཅིག་གསར་རྒྱག་བྱ་རྒྱུ་ཡིན་ལ། ལས་གཞི་དེ་ནི་རྒྱ་ནག་དབུས་གཞུང་གི་ཕྱི་ལོ་ ༢༠༢༡ ནས་ ༢༠༢༥ ལོ་བར་གྱི་ལྔ་ཚན་ ༡༤ པའི་ལས་གཞི་ཡི་ཆ་ཤས་ཤིག་དང་། རྒྱལ་ཡོངས་ཀྱི་དཔལ་འབྱོར་དང་སྤྱི་ཚོགས་ཡར་རྒྱས་ཀྱི་ཆ་ཤས་ཤིག་ཡིན་པ་མ་ཟད། དེ་ནི་རྒྱ་ནག་དམར་ཤོག་ཚོགས་པའི་དབུས་རྒྱུན་གྱི་ཕྱི་ལོ་ ༢༠༣༥ བར་ཀྱི་ཕུགས་རྒྱང་རིང་བའི་ལས་འཆར་ཞིག་ཡིན་སྐོར་བསྒྲགས་ཡོད་པ་རེད། རྒྱ་གར་གྱི་དེ་རིང་ (India Today) གསར་ཁང་གིས་སྤེལ་བའི་དེ་འབྲེལ་གནས་ཚུལ་ནང་། འདས་པའི་ལོ་ངོ་ ༡༠ ཙམ་གྱི་ནང་རྒྱ་ནག་གཞུང་གིས་ས་ཁུལ་དེའི་སྤྱི་ལེ་ ༢༤ ཙམ་གྱི་ནང་ཆུ་མཛོད་གསུམ་གསར་རྒྱག་བྱས་ཡོད་པ་དང་། དུས་ཡུན་ཐུང་ངུ་ཞིག་གི་ནང་ཆུ་མཛོད་ཀྱི་ལས་གཞི་ཤུགས་ཆེན་འགྲོ་བཞིན་པའི་དམིགས་ཡུལ་ནི། རྒྱ་ནག་གཞུང་གིས་རྒྱ་གར་དུ་བཞུར་བཞིན་པའི་ཆུ་བོར་སྟངས་འཛིན་བྱེད་ཐུབ་ཆེད་དང་། ཆུ་བོའི་ཁ་ཕྱོགས་རྒྱ་ནག་སྐམ་སར་བསྒྱུར་ཆེད་ཡིན་སྐོར་བརྗོད་ཡོད་པ་རེད།
དེ་བཞིན་ཕྱི་ལོ་ ༢༠༢༠ ལོའི་ཞིབ་འཇུག་སྙན་ཐོ་ལྟར་ན། བོད་ནི་ཨེ་ཤ་ཡའི་ཆུ་བོ་ཆེན་པོ་ཁག་གི་འབྱུང་ཁུངས་ཡིན་ཞིང་། བོད་ཀྱི་ཆུ་གློག་གི་ཐོན་ཁུངས་ནི་རྒྱ་ནག་རྒྱལ་ཡོངས་ཀྱི་གློག་གི་ཐོན་ཁུངས་ཀྱི་སུམ་ཆའི་གཅིག་ཙམ་ཟིན་གྱི་ཡོད་པ་དང་། ད་ལྟ་བོད་ཁུལ་དུ་ཉུང་མཐར་ཆུ་མཛོད་གསར་རྒྱག་གི་ལས་གཞི་ ༡༡ ཙམ་ལ་འཆར་གཞི་སྒྲིག་གི་ཡོད་འདུག རྒྱ་ནག་གཞུང་གིས་བོད་ཀྱི་ཆུ་བོ་ཁག་གི་རྒྱུད་དུ་ཆུ་མཛོད་མང་པོ་བརྒྱབས་དང་རྒྱག་བཞིན་ཡོད་པའི་རྐྱེན་གྱིས། བོད་ནང་ཆུ་ལོག་དང་རི་ཉུལ་བྱུང་བའི་དོན་རྐྱེན་བསྟུད་མར་འབྱུང་གི་ཡོད་ལ། ཕྱི་ལོ་ ༢༠༡༨ ལོར་ཡར་ཀླུང་གཙང་པོའི་རྒྱུད་ཀྱི་བོད་རང་སྐྱོང་ལྗོངས་སྨན་གླིང་རྫོང་ཕད་གྲོང་རྡལ་རྒྱ་ལ་ཡུལ་ཚོའི་ཉེ་འགྲམ་གྱི་ཡར་ཀླུང་གཙང་པོའི་གྲོག་རོང་དུ། བདུན་ཕྲག་གཅིག་གི་ནང་རི་ཉིལ་ཐེངས་གཉིས་བྱུང་ནས་ཆུ་བོའི་བཞུར་རྒྱུན་འགག་སྟེ་འགྲམ་རྒྱུད་ཀྱི་མི་མང་ལ་ཛ་དྲག་དཀའ་ངལ་ཆེན་པོ་འཕྲད་ཡོད་པ་རེད།
བྱམས་པ་ཚེ་རིང་།
