བོད་འབྲི་རུ་རྫོང་ཁོངས་ནས་བོད་མི་གཉིས་འཛིན་བཟུང་བྱས།

བོད་ནག་ཆུ་ས་ཁུལ་འབྲི་རུ་རྫོང་གཡང་ཤོད་སྐྱིད་བརྡ་གྲོང་ཚོ་ནས་ཡིན་པའི་གཞོན་སྐྱེས་རིན་ཆེན་དར་རྒྱས་དང་བསམ་གཏན་གཉིས་རྒྱ་ནག་ཉེན་རྟོག་པས་བཙན་འཁྲིད་བྱས་ཏེ་བདུན་ཕྲག་གཅིག་ཙམ་འགྲོ་བཞིན་ཡོད་ཀྱང་གང་དུ་ཡོད་མེད་ཙམ་ཡང་གསལ་ཁ་བྱུང་མེད་འདུག

འདི་གར་བོད་ནས་གནས་ཚུལ་ཁུངས་ལྡན་འབྱོར་བ་ལྟར་ན། ཉེ་སྔོན་ཕྱི་ཟླ་ ༡༠ ཚེས་ ༢༦ ཡས་མས་སུ་བོད་རང་སྐྱོང་ལྗོངས་ཟེར་བའི་ནག་ཆུ་ས་ཁུལ་འབྲི་རུ་རྫོང་གཡང་ཤོད་སྐྱིད་བརྡ་གྲོང་ཚོ་ནས་ཡིན་པའི་བོད་མི་རིན་ཆེན་དར་རྒྱས་དང་། བསམ་གཏན་གཉིས་འཛིན་བཟུང་བཙན་འཁྲིད་བྱས་ཡོད་པ་དང་། ད་ལྟ་བར་དུ་བདུན་ཕྲག་གཅིག་ཙམ་འགྲོ་བཞིན་ཡོད་ནའང་ཀློད་གྲོལ་བཏང་མེད་འདུག

འདི་གའི་གནས་ཚུལ་མཁོ་སྤྲོད་པས་བརྗོད་ན། ཁོང་གཉིས་ཡུལ་ཚོ་ནས་རྫོང་ཐོག་ཏུ་ཅ་དངོས་ཉོ་བར་ཕྱིན་ཡོད་པ་དང་། ལམ་བར་དུ་གྲོགས་པོ་ཁག་ཅིག་དང་ཐུག་སྟེ་ཁ་བརྡ་བྱས་ནས་བསྡད་ཡོད་སྐབས། ཉེན་རྟོག་པ་བསླེབས་ཏེ་གང་བྱུང་འགྲོ་སྐྱོད་བྱེད་ཀྱི་ཡོད་པ་མ་ཟད། དོན་མེད་འདུ་འཛོམས་བྱས་པའི་ཉེས་མིང་འོག་བཙན་འཁྲིད་བྱས་ཡོད་པ་དང་། ཁྱིམ་མི་ཚོས་གནས་ཚུལ་དེ་ཤེས་རྟོགས་བྱུང་རྗེས་རྩད་གཅོད་བཏང་ཡོད་ཀྱང་ཁོང་གཉིས་ག་བར་འཁྲིད་ཡོད་མེད་ཙམ་ཡང་གསལ་ཁ་བྱུང་མེད་འདུག

ཁོང་གཉིས་ཁྱིམ་གཅིག་གི་བུ་སྤུན་ཡིན་ཞིང་། པ་ལགས་སྔ་མོ་ནས་འདས་གྲོངས་སུ་ཕྱིན་ཡོད་པ་དང་། ཨ་མ་ལགས་ཡོད་འདུག ཁྱིམ་ཚང་གི་ཆ་རྐྱེན་སྐྱོ་བོ་ཡིན་པས་ཁོང་གཉིས་ཆུང་དུས་ནས་སློབ་གྲྭར་མ་ཕྱིན་པར་ཞོར་ལས་བྱས་ཏེ་བསྡད་ཡོད་འདུག་ལ། རིན་ཆེན་དར་རྒྱས་རང་ལོ་ ༢༧ དང་། བསམ་གཏན་རང་ལོ་ ༢༢ ཡིན་ཞིང་། རིན་ཆེན་དར་རྒྱས་ལགས་ལ་ཤུལ་དུ་བཟའ་ཟླ་ཞིག་ཀྱང་ཡོད་འདུག

རྒྱ་ནག་གཞུང་གིས་ཏོག་དབྱིབས་གཉན་རིམས་ལ་ཁ་གཡར་ནས་ཡུལ་མིའི་འགྲོ་སྐྱོད་ལ་བཀག་སྡོམ་དང་། གོང་རིམ་གྱི་བཀོད་འདོམས་ལ་མ་ཉན་པའི་ཉེས་མིང་འོག་བོད་མི་མང་པོ་འཛིན་བཟུང་བཀག་ཉར་བྱས་པ་དང་། དངུལ་ཆད་བཅད་པའི་གནས་ཚུལ་མང་པོ་ཐོན་གྱི་ཡོད་པ་ལྟར། ཁོང་གཉིས་ལའང་དང་ཐོག་ཏོག་དབྱིབས་བཀག་སྡོམ་ལ་མ་རྩིས་པའི་ཉེས་མིང་གཡོགས་ཡོད་འདུག