ལྷ་སའི་ཏོག་དབྱིབས་ཞི་རྒོལ་ལ་སྣེ་འཁྲིད་བྱས་པའི་ཉེས་མིང་འོག་མི་གྲངས་ ༢༠༠ ལྷག་བཀག་ཉར་བྱེད་མུས་རེད་འདུག

བོད་ཀྱི་རྒྱལ་ས་ལྷ་སར་ཏོག་དབྱིབས་བཀག་སྡོམ་ཤུགས་ཆེན་བྱས་ཏེ་ཟླ་ ༣ ཡས་མས་འགྲོ་བཞིན་ཡོད་པའི་རྐྱེན་གྱིས་ཕྱི་ནས་ཡོང་བའི་ཞོར་ལས་བ་སོགས་རྒྱ་མི་གཙོ་བོར་གྱུར་བའི་མི་མང་ནས་ཞི་བའི་ངོ་རྒོལ་བྱས་རྐྱེན་མདུན་ཐོན་པ་དང་སྣེ་འཁྲིད་པ་ཡིན་པའི་ཉེས་མིང་འོག་མི་གྲངས་ ༢༠༠ ལྷག་ཙམ་ཐོག་ཁང་ཆེན་མོ་ཞིག་ཏུ་བཀག་ཉར་བྱེད་མུས་རེད་འདུག

ཉེ་སྔོན་ཕྱི་ཟླ་ ༡༠ ཚེས་ ༢༦ ཉིན་བོད་ཀྱི་རྒྱལ་ས་ལྷ་སར་གནས་སྡོད་བྱེད་མཁན་མི་མང་བརྒྱ་ཕྲག་མང་པོ་འདུ་འཛོམས་ཀྱིས་ས་གནས་མི་འདྲ་བར་ཏོག་དབྱིབས་བཀག་སྡོམ་ལ་ངོ་རྒོལ་སྐད་འབོད་བྱས་ཡོད་པའི་བརྙན་ཐུང་ཁག་ཅིག་སྤྱི་ཚོགས་བརྒྱུད་ལམ་དུ་ཤུགས་ཆེན་ཁྱབ་ཡོད་པ་དང་། ཞི་རྒོལ་བྱེད་མཁན་མང་ཆེ་བ་ལྷ་ས་གྲོང་ཁྱེར་བརྒྱད་གཅིག་ལམ་ཟེར་བ་དང་ལྕགས་རོང་སྡེ་ཁུལ་སོགས་སུ་གནས་སྡོད་བྱེད་བཞིན་པའི་ཕྱི་ནས་ཡོང་བའི་རྒྱ་མི་ཡིན་འདུག་ལ། བོད་ས་གཞན་ནས་ཡོང་མཁན་ཡང་ཡོད་འདུག སྤྱི་ཚོགས་བརྒྱུད་ལམ་དུ་ཁྱབ་པའི་བརྙན་ཐུང་ཁག་གི་ནང་དུ་དྲག་ཆས་སྤྲས་པའི་ཉེན་རྟོག་དམག་མི་མང་པོ་འགྲེམས་འཇོག་བྱས་ཏེ་བཀག་འགོག་བྱེད་བཞིན་པ་མཐོང་རྒྱུ་ཡོད་པ་ལས། ཞི་རྒོལ་བར་གཅར་རྡུང་འཛིན་བཟུང་བྱས་ཡོད་མེད་གསལ་ཁ་བྱུང་མེད་ནའང་། འདི་ག་བོད་ཀྱི་དུས་བབ་གསར་ཁང་ནས་ལྷ་སར་གནས་སྡོད་བྱེད་མཁན་ཁག་ཅིག་བརྒྱུད་ཤེས་རྟོགས་བྱུང་བ་ལྟར་ན། ཕྱི་ཚེས་ ༢༧ ཉིན་འབྲེལ་ཡོད་སྡེ་ཁག་ནས་ཕྱིར་ཕ་ཡུལ་དུ་ལོག་འདོད་ཡོད་མཁན་ཚོ་མིང་ཐོ་འགོད་དུ་ཤོག་ཅེས་བརྡ་ཐོ་ཞིག་འབྱོར་ཡོད་སྟབས་ཐོ་འགོད་བྱེད་དུ་ཕྱིན་སྐབས། ངོ་རྒོལ་ལ་སྣེ་འཁྲིད་དང་མདུན་ཐོན་པ་ཡིན་པའི་ཉེས་མིང་འོག་ལྷ་སའི་དོག་སྡེ་ཁྲོམ་གཞུང་དང་རྔ་ཆེན་ཁྲོམ་དུ་སྡོད་མཁན་མི་མང་ ༢༠༠ ལྷག་ཙམ་བོད་རང་སྐྱོང་ལྗོངས་སྡོད་ཁང་འཛུགསས་སྐྲུན་ཐིང་ཟེར་བའི་ཐོག་ཁང་ཆེན་མོ་ཞིག་གི་ནང་བཀག་ཉར་བྱས་ཏེ་ད་ལྟའང་ཀློད་མི་འདུག

འདི་གའི་གནས་ཚུལ་མཁོ་སྤྲོད་པ་ཞིག་གིས། ད་ལན་གྱི་ངོ་རྒོལ་དེ་སྡེ་ཁུལ་ཁག་ཅིག་ཏུ་བྱུང་ཡོད་པ་དང་། མི་མང་གིས་རྒྱ་ནག་གཞུང་གི་ཏོག་དབྱིབས་ནད་ཡམས་དང་འབྲེལ་བའི་དམ་དྲག་སྲིད་ཇུས་ལ་ངོ་རྒོལ་དང་། ཕྱི་ནས་ལྷ་སར་ལས་ཀ་བྱེད་པར་ཡོང་བ་རྣམས་རང་གི་ཕ་ཡུལ་དུ་ཕྱིར་གཏོང་དགོས་པའི་དགོས་འདུན་བཏོན་ཏེ་ངོ་རྒོལ་ཤུགས་ཆེན་བྱས་ཡོད་པ་དང་། སྐབས་དེར་སྒྲིག་ཆས་གྱོན་པ་དང་མ་གྱོན་པའི་ཉེན་རྟོག་པ་མང་པོ་འབྱོར་ཡོད་ཀྱང་དྲག་གནོན་དང་འཛིན་བཟུང་བྱས་པའི་གནས་ཚུལ་བྱུང་མེད་སྐོར་བརྗོད་བྱུང་།

སྤྱི་ཚོགས་དྲ་ལམ་དུ་ཁྱབ་པའི་བརྙན་ཐུང་ཞིག་གི་ནང་དུ། ལྷ་སར་གནས་སྡོད་བྱེད་བཞིན་པའི་བོད་རིགས་བུ་མོ་ཞིག་གིས། གོང་རིམ་ནས་ཕྱི་ཟླ་ ༡༠ ཚེས་ ༧ ཉིན་བཀག་སྡོམ་ཀློད་རྒྱུ་ཡིན་སྐོར་བཤད་ཡོད་ཀྱང་མ་ཀློད་པར་ཕྱི་ཚེས་ ༡༦ ཉིན་ཀློད་རྒྱུ་ཡིན་སྐོར་བཤད་ཡོད། དེ་ནས་ཡང་ཕྱི་ཚེས་ ༢༦ ཉིན་ཀློད་རྒྱུ་ཡིན་སྐོར་བཤད་ཡོད་ཀྱང་གུ་ཡངས་ཀློད་གྲོལ་བཏང་བའི་གནས་སྟངས་གང་ཡང་མཐོང་རྒྱུ་མེད་ལ། ཉིན་གྲངས་ ༣ ཕྱིན་ན་བཀག་སྡོམ་བྱས་ནས་ཟླ་ ༣ ལོན་གྱི་ཡོད་སྐོར་དང་། ཉིན་རེར་རྒྱ་སྒོར་ ༨༠ རེ་གཏོང་དགོས་ཀྱི་ཡོད་དུས་འགྲོ་སོང་གཏོང་ཐུབ་ཀྱི་མེད་པ་དང་། ད་ལྟའི་ཆར་མང་པོ་ཞིག་མགྲོན་ཁང་དུ་བསྡད་ཡོད་དུས་དངུལ་ཡང་རྫོགས་ཚར་ཡོད་སྐོར་དང་། ཁོང་མོ་ཕ་ཡུལ་ནས་བདེ་ཐང་ངང་ལྷ་སར་ཞོར་ལས་སུ་ཡོང་བ་ཡིན་ཡང་། ཕྱིར་ལོག་སྐབས་ནད་པར་གྱུར་ཏེ་འཁར་རྒྱུག་འཁུར་ནས་འགྲོ་དགོས་ཚོད་ཡོད་སྐོར་བརྗོད་འདུག

ཡང་བརྙན་ཐུང་གཞན་ཞིག་གི་ནང་དུ་ཞོར་ལས་བ་ཞིག་གིས། ང་ཚོར་འདས་པའི་ཟླ་ ༣ རིང་ཡོང་འབབ་མེད་ཀྱང་། འགྲོ་གྲོན་ཐད་སྐར་མ་གང་ཡང་ཆག་ཡང་མེད་སྟབས། ད་ལྟ་ཞོར་ལས་བྱས་པའི་དངུལ་ཚང་མ་རྫོགས་སོང་ཞེས་བརྗོད་འདུག་ལ། ངོ་རྒོལ་གྱི་བརྙན་ཐུང་ནང་མང་པོ་ཞིག་གིས་ང་ཚོ་རང་ཡུལ་དུ་ལོག་གཏང་རོགས་ཞེས་སྐད་འབོད་བྱེད་བཞིན་འདུག ལྷ་ས་གྲོང་ཁྱེར་ཉེན་རྟོག་ཁང་ནས་དེའི་ཐད་གསར་འགོད་པར་འགྲེལ་བརྗོད་བྱེད་སྐབས། ངོ་རྒོལ་སྐད་འབོད་བྱུང་བ་གསང་ཐབས་བྱས་ཡོད་ཀྱང་། འདུ་འཛོམས་བྱེད་མཁན་མི་མང་ནས་ཕྱིར་ཕ་ཡུལ་དུ་ལོག་འགྲོ་རྒྱུ་ཡིན་སྐོར་རྗོད་ཀྱི་ཡོད་པ་ལྟར། ཏོག་དབྱིབས་བཀག་སྡོམ་གྱི་སྒྲིག་སྲོལ་བཞིན་འགྲོ་ལུགས་བསྒྲུབ་དགོས་ཀྱི་ཡོད་པ་དང་། ཆ་རྐྱེན་ཚང་བ་ཡིན་ན་ལོག་ཕྱིན་ན་འགྲིག་སྐོར་བརྗོད་འདུག

ལྷ་སར་གནས་སྡོད་བྱེད་མཁན་ཞིག་གིས་འདི་ག་བོད་ཀྱི་དུས་བབ་གསར་འགོད་པར། མི་མང་ནས་ཞུ་གཏུག་བྱས་རྗེས་བཀག་སྡོམ་ཅུང་ལྷོད་དུ་བཏང་ཡོད་པ་དང་། ཏོག་དབྱིབས་གཉན་རིམས་བརྟག་དཔྱད་ཐེངས་གསུམ་བྱས་ཏེ་འགོས་མེད་པ་ཡིན་ན། ཉིན་ལྟར་ཕྱི་ནས་ཡོང་མཁན་གྱི་ཁྱིམ་ཚང་རེ་ནས་མི་གཅིག་ཕྱིར་རང་ཡུལ་དུ་ལོག་ཆོག་གི་ཡོད་སྐོར་བརྗོད་བྱུང་། ཡིན་ནའང་། འགྲོ་ལུགས་དེའི་ཞིབ་ཕྲའི་གནས་ཚུལ་ཤེས་རྟོགས་བྱུང་མི་འདུག་སྟབས་ཁྱིམ་ཚང་རེ་ནས་མི་གཅིག་གཏོང་སྟངས་དེ་ག་འདྲ་ཡིན་མིན་ཤེས་ཀྱི་མི་འདུག དེ་བཞིན་རྒྱ་ནག་གཞུང་ཕྱོགས་ནས་ཏོག་དབྱིབས་བཀག་སྡོམ་ཀློད་རྒྱུ་ཡིན་སྐོར་ཡང་ནས་ཡང་དུ་རྗོད་ཀྱི་ཡོད་ནའང་། ད་ལྟའང་བོད་ཀྱི་རྒྱལ་ས་ལྷ་ས་ཙམ་མིན་པར་བོད་ཡུལ་སྤྱི་དང་རྒྱ་ཡུལ་གྲོང་ཁྱེར་ཁག་ཏུའང་ཏོག་དབྱིབས་བཀག་སྡོམ་བྱས་དང་བྱེད་མུས་རེད་འདུག་ལ། གུ་ཡངས་ཀྱི་གནས་སྟངས་ག་འདྲ་ཆགས་ཡོད་མེད་གསལ་ཁ་གང་ཡང་མི་འདུག