བྱང་ཀོ་རི་ཡས་ཉི་ཧོང་དང་ལྷོ་ཀོ་རི་ཡའི་ས་མཚམས་ཁུལ་དུ་ནུས་ཤུགས་འདྲ་མིན་ལྡན་པའི་མེ་ཤུགས་འཕུར་མདའ་འཕེན་གྱི་ཡོད་པར་བརྟེན། ད་ལྟ་ཀོ་རི་ཡའི་མངའ་ཁུལ་གྱི་གནས་སྟངས་ཞི་འཇགས་མེད་པ་རེད།
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་བྱང་ཀོ་རི་ཡས་རྡུལ་ཕྲན་མཚོན་ཆ་འཕེན་བྱེད་ཀྱི་མེ་ཤུགས་འཕུར་མདའ་འཕངས་ཏེ། ཨ་རི་དང་ལྷོ་ཀོ་རི་ཡའི་ཟུང་འབྲེལ་དམག་སྦྱོང་ལ་སྐྱོན་བརྗོད་བྱེད་ཁུལ་བྱས་ཡོད་ཀྱང་། ལྷོ་ཀོ་རི་ཡའི་གཞུང་གིས། བྱང་ཀོ་རི་ཡས་འདི་ལོ་གཅིག་པུར་རྒྱལ་ཕྲན་བརྒལ་ནུས་པའི་གོ་མཚོན་ཐེངས་བདུན་རིང་འཕངས་ཡོད་ཅིང་། མི་འགྱང་བར་རྡུལ་ཕྲན་མཚོན་ཆ་ཚོད་ལྟ་བྱ་རྒྱུ་ཡིན་པའི་ཉེན་ཁ་ཡོད་སྐོར་བརྗོད་འདུག་ལ། བྱང་ཀོ་རི་ཡའི་མེ་ཤུགས་འཕུར་མདའ་འཕངས་རྐྱེན་འོག ཉི་ཧོང་གིས་བྱང་ཕྱོགས་སུ་ཡོད་པའི་མི་མང་རྣམས་རང་ཁྱིམ་དུ་ཉེན་གཡོལ་ཕྱིར་སྡོད་དགོས་པའི་ཛ་དྲག་བཀོད་ཁྱབ་བཏང་ཡོད་པ་རེད།
ཁ་སང་བྱང་ཀོ་རི་ཡས་ལྷོ་ཀོ་རི་ཡའི་གྲོང་ཁྱེར་ (Sokcho) ཕྱོགས་སུ་མེ་ཤུགས་འཕུར་མདའ་ཁྱོན་ ༡༧ འཕངས་ཡོད་པ་དང་། ལྷོ་ཀོ་རི་ཡ་གཞུང་གིས། བྱང་ཀོ་རི་ཡའི་བྱ་སྤྱོད་དེ་ནི་ས་ཁོངས་བཙན་འཛུལ་གྱི་འཇིགས་སྐུལ་ཞིག་ཡིན་པས་ངོས་ལེན་བྱེད་ཐབས་མེད་པའི་སྐྱོན་བརྗོད་བྱས་འདུག་པ་མ་ཟད། ཆུ་ཚོད་གསུམ་གྱི་རྗེས་སུ་བྱང་ཀོ་རི་ཡའི་ཕྱོགས་སུ་མཁའ་ལམ་འཕུར་མདའ་ཐེངས་གསུམ་འཕངས་ཏེ་རྒོལ་ལན་བསློགས་ཡོད་པ་རེད།
བྱང་ཀོ་རི་ཡས་མེ་ཤུགས་འཕུར་མདའ་འཕངས་པ་དང་ལྷོ་ཀོ་རི་ཡས་ཛ་དྲག་ཚོགས་འདུ་བསྐངས་ནས། ས་མཚམས་ཁག་གི་ཡུལ་མི་རྣམས་ཉེན་གཡོལ་ལ་འགྲོ་དགོས་པའི་བཀའ་བཏང་ཡོད་ཅིང་། སྲིད་འཛིན་ཡཱོན་སིག་ཡཱོལ་ (Yoon Suk-yeol) ལགས་ཀྱིས། བྱང་ཀོ་རི་ཡའི་འཇིགས་སྐུལ་གྱི་ཉེན་བརྡར་བརྡ་ལན་ཚ་ཐག་བརྒྱག་དགོས་པའི་བཀའ་བཏང་ཡོད་པ་རེད་ལ། ལྷོ་ཀོ་རི་ཡའི་གཞུང་གིསབྱང་ཀོ་རི་ཡས་ཀོ་རི་ཡ་རྒྱལ་ཁབ་གཉིས་ཀྱི་བར་ཆ་བགོ་བྱས་པའི་ཤར་དང་ནུབ་ཕྱོགས་སུ། ནུས་པ་འདྲ་མིན་ལྡན་པའི་མེ་ཤུགས་འཕུར་མདའ་ཁྱོན་ ༡༧ ལྷག་འཕངས་པ་དང་དེ་དག་ལྷོ་ཀོ་རི་ཡའི་མངའ་ཁོངས་ཀྱི་མཚོའི་ནང་འཕངས་པ་ནི་ཕྱི་ལོ་ ༡༩༤༥ རྗེས་ཀྱི་ཐོག་མ་ཆགས་ཡོད། ཅེས་འགྲེལ་བརྗོད་བྱས་འདུག
དེ་རིང་བྱང་ཀོ་རི་ཡས་ལྷོ་ཀོ་རི་ཡའི་ཕྱོགས་སུ་འཕུར་མདའ་འཕེན་དོན་ནི། ཉེ་སྔོན་ཕྱི་ཚེས་ ༣༡ ཉིན་ནས་བཟུང་ཨ་རིའི་དམག་གི་གྲུ་གཟིངས་ཤིག་ལྷོ་ཀོ་རི་ཡར་འབྱོར་ཏེ། ཨ་རི་དང་ལྷོ་ཀོ་རི་ཡ་གཉིས་ནས་མཉམ་འབྲེལ་དམག་སྦྱོང་བྱེད་བཞིན་པར་རྒོལ་ལན་སློག་གི་ཡོད་ཅིང་། བྱང་ཀོ་རི་ཡས། ཨ་རི་དང་ལྷོ་ཀོ་རི་ཡ་གཉིས་ནས་ལོ་རྒྱུས་ནང་ཆེས་འཇིགས་སུ་རུང་བའི་གོང་མཇལ་དགོས་ཡོད། ད་དུང་ཟུང་འབྲེལ་དམག་སྦྱོང་མུ་མཐུད་བྱས་ཚེ། བྱང་ཀོ་རི་ཡས་རྡུལ་ཕྲན་མཚོན་ཆ་ཡིན་ཡང་བཀོལ་སྤྱོད་བྱ་རྒྱུ་ཡིན་པ་སོགས་ཀྱི་འཇིགས་སྐུལ་བྱས་ཡོད་པ་རེད།
སི་ཨན་ཨན་གསར་ཁང་གི་གནས་ཚུལ་ལྟར་ན། ད་ལན་ནི་འདི་ལོ་ཁོ་ནར་བྱང་ཀོ་རི་ཡས་ཀོ་རི་ཡ་རྒྱལ་ཁབ་གཉིས་ཀྱི་ས་མཚམས་ཁུལ་དུ་མེ་ཤུགས་འཕུར་མདའ་འཕེན་ཐེངས་ ༢༩ པ་དེ་ཆགས་ཀྱི་ཡོད་ཅིང་། བྱང་ཀོ་རི་ཡའི་བྱ་སྤྱོད་དེ་དག་གིས་ཨ་རི་དང་ཉི་ཧོང་། ལྷོ་ཀོ་རི་ཡ་བཅས་ཀྱི་་ཟུང་འབྲེལ་དམག་ཤུགས་རྒྱ་སྐྱེད་དང་སྦྱོང་བརྡར་སོགས་ལ་འགོག་རྐྱེན་བཟོ་ཡི་ཡོད་པ་དང་། ཉི་ཧོང་དང་ཨ་རི། ལྷོ་ཀོ་རི་ཡ་བཅས་ནས་བྱང་ཀོ་རི་ཡར་སྐྱོན་བརྗོད་དང་སྦྲགས། བྱང་ཀོ་རི་ཡས་རྡུལ་ཕྲན་མཚོན་ཆ་ཚོད་ལྟ་བྱེད་བཞིན་ཡོད་མེད་ཐད་ལྟ་སྲུང་ནན་མོ་བྱེད་བཞིན་ཡོད་འདུག
མཉམ་འབྲེལ་རྒྱལ་ཚོགས་ཀྱི་ཐག་གཅོད་གྲོས་ཆོད་ལྟར་ན། བྱང་ཀོ་རི་ཡས་རྡུལ་རྫས་འཁུར་ནུས་པའི་འཕུར་མདའི་རིགས་ཚོད་ལྟ་བྱས་མི་ཆོག་ཀྱང་། བྱང་ཀོ་རི་ཡས་རྒྱལ་ཚོགས་ཀྱི་གྲོས་ཆོད་ཁག་སྣང་མེད་དུ་བཏང་སྟེ། རྡུལ་ཕྲན་མཚོན་ཆ་གཙོས་པའི་གོ་མཚོན་གྱི་རིགས་ཚོད་ལྟ་རིམ་པ་བྱས་པ་བརྒྱུད། ཁྱིམ་མཚེས་རྒྱལ་ཁབ་ཁག་ལ་ཉེན་ཁ་བསྐྲུན་པ་དང་ཐ་ན་ཨ་རིར་གོ་མཚོན་གྱིས་རྙོབ་ཐུབ་ཐབས་སོགས་ཀྱི་དམག་སྦྱོང་བྱེད་བཞིན་ཡོད་འདུག
གསར་འགོད་པ། སྐལ་བཟང་སྦྱིན་པ།
