ཁྲི་ཟུར་ཟམ་གདོང་རིན་པོ་ཆེ་མཆོག་ལ་མདོ་ལུགས་ཀྱི་སྒོ་ནས་བརྟན་བཞུགས་འབུལ་རྒྱུ་ཡིན་འདུག

ཁྲི་ཟུར་ཟམ་གདོང་རིན་པོ་ཆེ་མཆོག་ནས་ང་ཚོས་སྔོན་གྱི་མཁས་པ་ཚོའི་སློབ་སྦྱོང་གི་སྙིང་པོ་མདོར་བསྡུས་ནས་ནང་དོན་ལག་ལེན་དུ་བསྟར་ཆོག་པ་བརྒྱུད་ནས་ཐོས་བསམ་བྱེད་རྒྱུ་གལ་ཆེན་ཡིན་ལ་དེ་ལྟར་བྱས་ན་དུས་ཚོད་ཐུང་ཐུང་དང་། དཀའ་ཚགས་ཉུང་ཉུང་ཞིག་གི་ནང་དུ་གསུང་རབ་རབ་འབྱམས་མིག་གིས་ལྟ་ཐུབ་པ་ཞིག་ཆགས་ཀྱི་རེད་ཅེས་གསུངས།

དེ་རིང་ཕྱི་ཚེས་ ༤ ཉིན་གྱི་ཞོགས་པའི་ཆུ་ཚོད་དགུ་བའི་སྟེང་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་དཔལ་ཨ་ཏི་ཤ་ཚོགས་ཁང་དུ། ཁྲི་ཟུར་ཟམ་གདོང་རིན་པོ་ཆེ་མཆོག་གི་འཁྲུངས་སྐར་དང་བསྟུན་གཙུག་ལག་སློབ་གཉེར་ཁང་དང་ཝཱ་ཎའི་སློབ་ཟུར་ཚོགས་པ་ཟུང་འབྲེལ་གྱི་གོ་སྒྲིག་འོག སློབ་དཔོན་ཟམ་གདོང་རིན་པོ་མཆོག་ནས་བྱང་ཆུབ་ལམ་གྱི་སྒྲོན་མེ་ལས་བསྟན་པའི་སྐྱེས་བུ་གསུམ་གྱི་ལམ་གྱི་རིམ་པ་ཉམས་སུ་ལེན་ཚུལ་གྱི་གསུང་ཆོས་སྩལ་གནང་ཡོད་པ་རེད། གསུང་ཆོས་སྐབས་༧སྐྱབས་རྗེ་ཟམ་གདོང་རིན་པོ་ཆེ་མཆོག་གིས། དེ་རིང་འདིར་སཱ་ར་ནཱ་ཐ་དབུས་བོད་ཀྱི་གཙུག་ལག་སློབ་གཉེར་ཁང་གི་སློབ་ཟུར་ཚོགས་པས་སྔོན་མ་བཞིན་རེ་བསྐུལ་གནང་སྟེ། བྱང་ཆུབ་ལམ་གྱི་སྒྲོན་མེ་ལས་བསྟན་པའི་སྐྱེས་བུ་གསུམ་གྱི་ལམ་གྱི་རིམ་པ་ཉམས་སུ་ལེན་ཚུལ་གྱི་ཐོག་ཤོད་གསུངས་པ་རེད། དེ་དུས་ནས་ངས་བཤད་ཡིན་བསམ་སོང་། འདི་གསུང་ཆོས་ཚུལ་གྱི་མིན་པར་འཛིན་གྲྭའི་ནང་གི་སློབ་ཁྲིད་ཀྱི་རྣམ་པ་བྱས་ན་འགྲིག་གི་མ་རེད་དམ་ཞེས་ཞུས་ཀྱང་། ཁོང་ཚོས་གྲ་སྒྲིག་བྱས་ཚར་ཡིན། ཡིན་གཅིག་མིན་གཅིག་གསུང་ཆོས་ཀྱི་རྣམ་པ་བྱས་ནས་བྱེད་དགོས་ཀྱི་འདུག་གསུངས་པ་རེད། སྔོན་མ་ངས་ཞུས་ཚར་ཡིན་བསམ་སོང་། སློབ་གྲྭ་དང་སྒྲིག་འཛུགས་ཀྱི་ངོས་ནས་གསུང་ཆོས་གོ་སྒྲིག་ཞུ་དུས། དེའི་ནང་དུ་ཡོད་པའི་མི་རྣམས་ཀྱིས་ཆོས་ཞུ་འདོད་ཡོད་མེད་ལ་མ་ལྟོས་པར་མ་མཁྱེན་པ་ཡིན་ན་སྟབས་མི་བདེ་བ་ཡོད་ཙང་། དེ་ཡང་བླ་སློབ་ཀྱི་འབྲེལ་བ་ཟེར་བའང་གནད་འགག་ཅིག་ཆགས་ཡོད་པ་རེད། བྱས་ཙང་། ང་རང་ཁྲིའི་སྟེང་དུ་བསྡད་ནས་ཆོས་བཤད་ཀྱི་ཡོད་པ་རེད་དེ། སྔོན་མ་ནས་ཆོས་འབྲེལ་ཡོད་པ་དང་། ཆོས་ལ་གསན་མཁན་གྱི་ངོ་བོ་བྱས་ན་དེ་ག་རང་འགྲིག་བསྡད་ཡོད་རེད། དེ་མིན་པར་སྒྲིག་འཛུགས་ཀྱི་ངོས་ནས་ཡོང་བསྡད་པ་ཡིན་ན་གཏམ་བཤད་ལ་ཉན་བཞིན་ཡོད་དྲན་པ་མ་གཏོགས། བླ་སློབ་བར་གྱི་འབྲེལ་བ་བཞག་ནས་ཆོས་ཞུ་བཞིན་ཡོད་མ་དྲན་ན་འགྲིག་གི་ཡོད་པ་རེད། དེས་ཁྱད་པར་ཅི་ཡང་བཟོ་ཡི་མ་རེད། དེ་ཡང་སྔོན་ལ་གསལ་བཤད་བྱས་ན་བསམ་སོང་། ཞེས་གསུངས་སོང་།

ཡང་༧ སློབ་དཔོན་ཟམ་གདོང་རིན་པོ་ཆེ་མཆོག་ནས། ང་ཚོས་ཧོབ་ཏེ་བལྟས་པ་ཡིན་ན། སངས་རྒྱས་ཀྱི་བཀའ་སྡེ་སྣོད་གསུམ་བོད་ཡིག་ཏུ་ཡོངས་སུ་རྫོགས་པ་བསྒྱུར་ཡོད་དམ་ཞེ་ན་བསྒྱུར་ཡོད་པ་མ་རེད། བོད་འགྱུར་དུ་མདོ་སྔགས་བསྡོམས་ན་བརྒྱ་ལྷག་ཙམ་ཡོད་པ་རེད། ཆོས་ལུགས་གཞན་གྱི་རྩ་བའི་གཞུང་ལ་བལྟས་པ་ཡིན་ན་ནང་པའི་གཞུང་ལུགས་ནང་བཞིན་རྒྱ་ཆེན་པོ་ཞེ་དྲགས་དཀོན་པོ་རེད། རྒྱ་ཆེ་ལ་གཏིང་ཟབ་པའི་གཞུང་ལུགས་ང་ཚོའི་མི་ཚེ་གཅིག་ལ་སྦྱང་ཐུབ་རྒྱུ་ཁག་པོ་རེད། ཇོ་བོ་རྗེས་རྒྱ་གར་གྱི་ལུང་རྙིང་པ་ཞིག་དྲངས་ཡོད།  ཚེ་ནི་ཡུན་ཐུང་ཤེས་བྱའི་རྣམ་པ་མང་།། ཚེ་ཡི་ཚེ་ཚད་ཇི་ཙམ་མི་ཤེས་པས།། ངང་པས་ཆུ་ལས་འོ་མ་ལེན་པ་ལྟར།། རང་གི་འདོད་པ་དང་པོ་བླངས་པར་བྱ།། ཞེས་མི་ཚེ་ཐུང་ཐུང་ལ་ཤེས་བྱ་རྣམ་པ་མང་པོ་ཡོད་པས། སངས་རྒྱས་ཀྱི་གསུང་རབ་ལ་སློབ་སྦྱོང་བྱེད་པའི་འདུན་པ་ཡོད་པ་ཞིག་ཡིན་ཡང་། ང་ཚོས་བཀའ་འགྱུར་སློབ་སྦྱོང་བྱེད་པའི་སྐད་ཆ་འདྲི་དུས། མི་ཚེ་གང་བོར་སློབ་སྦྱོང་བྱེད་པའི་སྐད་ཆ་བཤད་པ་མ་གཏོགས། ཞག་དང་ཉིན་མ་ལོ་ག་ཚོད་འགོར་བའི་སྐད་ཆ་མ་རེེད། བཀའ་འགྱུར་ཀློག་དགོས་བྱུང་ནའང་། ཀློག་བདེ་བོ་ཡོད་ན་ཟླ་བ་ཁ་ཤས་འགོར་གྱི་རེད། ཀློག་བདེ་བོ་མེད་ན་ལོ་འགོར་བའི་གནས་སྟངས་དེ་འདྲ་རེད། གང་ལྟར་ང་ཚོའི་སློབ་སྦྱོང་བྱེད་སྟངས་དེ་སྔོན་གྱི་མཁས་པ་ཚོའི་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་སྙིང་པོ་མདོར་བསྡུས་ནས་དོན་དག་ལག་ལེན་བྱེད་ཆོག་པ་བྱས་པ་བརྒྱུད་ནས་སློབ་སྦྱོང་བྱེད་རྒྱུ་གལ་ཆེན་པོ་རེད། འབྲོང་སྟོན་པས། ངོ་མཚར་བཀའ་ནི་སྡེ་སྣོད་གསུམ་ཡིན་ཏེ། ། གདམས་པ་སྐྱེས་བུ་གསུམ་གྱིས་མཛེས་པ་ཡི། །བཀའ་གདམས་རིན་ཆེན་གསེར་གྱི་ཕྲེང་བ་ལ། ། འགྲོ་བ་གང་གིས་བགྲངས་ཀྱང་དོན་ཡོད་འགྱུར། ། རྒྱལ་བའི་གསུང་རབ་བརྗོད་བྱའི་ཆ་ནས་མདོར་བསྡུས་པ་ཡིན་ན་སྡེ་སྣོད་གསུམ་གྱི་ནང་དུ་འདུ་ཡི་ཡོད་པ་རེད། སྡེ་སྣོད་གསུམ་གྱི་བརྗོད་བྱ་བསྡུས་པ་ཡིན་ན་སྐྱེས་བུ་གསུམ་གྱི་ལམ་གྱི་རིམ་པའི་ནང་དུ་འདུ་ཡི་ཡོད་པ་རེད།  སྐྱེས་བུ་གསུམ་གྱི་ལམ་གྱི་རིམ་པ་དེ་བསྡུས་པ་ཡིན་ན། ཉམ་མེད་ཇོ་བོ་རྗེའི་ལམ་སྒྲོན་ནང་དུ་ཤོ་ལོ་ཀ་ཁ་ཤས་ཀྱི་ནང་དུ་གསུངས་ཡོད་པ་རེད། དེ་ལྟ་བུའི་ཆོས་ཐོས་བསམ་བྱས་པ་ཡིན་ན། དུས་ཚོད་ཐུང་ཐུང་ཞིག་དང་། དཀའ་ཚགས་ཉུང་ཉུང་ཞིག་གི་ཐོག་ནས་རང་གི་འདོད་པ་དང་པོ་བླངས་ཐུབ་པ་ཞིག་དང་། གསུང་རབ་རབ་འབྱམས་ལ་མིག་གིས་ལྟ་ཐུབ་པ་ཆགས་ཀྱི་ཡོད་པ་རེད། ཞེས་སོགས་གསུངས་སོང་།

དེ་བཞིན་དུ་ཝཱ་ཎ་སློབ་ཟུར་ཚོགས་ཆུང་གི་གོ་སྒྲིག་འོག་ཏུ་སང་ཉིན་ཞོགས་པ་ཆུ་ཚོད་དགུ་པར་སློབ་དཔོན་ཟམ་གདོང་རིན་པོ་ཆེ་མཆོག་གི་སྐུའི་འཁྲུངས་སྐར་གཙི་སྲུང་ཞུ་སླད་མདོ་ལུགས་ཀྱི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་པ་དང་། ཕྱོགས་མཐའ་ཁག་ནས་རིན་པོ་ཆེ་མཆོག་གི་གྲོགས་པོ་རྙིང་པ་དང་སློབ་ཚོགས་སོགས་འཛོམས་ཀྱི་ཡོད་འདུག ཕྱི་ཚེས་ ༦ ཉིན་ཝཱ་ཎ་སློབ་ཟུར་ཚོགས་པའི་གོ་སྒྲིག་འོག བོད་དང་ཧི་མཱ་ཡ་ལའི་ཆོས་དང་། ལེགས་བྱང་། སྐད་ཡིག ལོ་རྒྱུས་ཞིབ་འཇུག་ཐོག་ཝཱ་ཎ་སློབ་ཟུར་རྣམས་ཀྱི་རྒྱལ་སྤྱིའི་བགྲོ་གླེང་ཚོགས་འདུ་ཐེངས་གཉིས་པ་འཚོག་རྒྱུ་ཡིན་འདུག་ལ།  བགྲོ་གླེང་ཚོགས་འདུའི་ཐོག་ནང་དོན་རིག་པ་དང་། བསྒྱུར་དང་བྱུང་རབས། རིག་གནས་སྤྱིའི་རྣམ་བཞག་གི་སྡེ་ཚན་གསུམ་གྱི་ནང་དུ་བརྗོད་གཞི་མ་འདྲ་བའི་ཐོག་གཏམ་བཤད་པ་སུམ་ཅུ་ཙམ་གྱིས་གཏམ་བཤད་དང་བགྲོ་གླེང་གནང་རྒྱུ་ཡིན་འདུག

བྱམས་པ་ཚེ་རིང་།