༧གོང་ས་མཆོག་གིས་རྒྱུད་སྟོད་གྲྭ་ཚང་གི་དགེ་བཤེས་གྲངས་ ༥༧ བཀའ་སློབ་སྩལ།

༧གོང་ས་རྒྱལ་བ་རིན་པོ་ཆེ་མཆོག་ནས་རྒྱུད་སྟོད་གྲྭ་ཚང་གི་དགེ་བཤེས་གྲངས་ ༥༧ ལ་མཇལ་ཁ་སྩལ་སྐབས། བོད་ལ་བསམ་གྱི་མི་ཁྱབ་པའི་ནང་ཆོས་ཡོད་པ་དང་དེ་ལ་བདག་པོ་རྒྱག་མཁན་དགེ་བཤེས་ཚོ་ཡིན་སྟབས། དགེ་བཤེས་ཚོ་གལ་ཆེན་པོ་ཆགས་ཡོད་པའི་བཀའ་སློབ་སྩལ་འདུག

དེ་རིང་ཕྱི་ཚེས་ ༥ ཉིན་བཞུགས་སྒར་རྒྱལ་བའི་ཕོ་བྲང་དུ་༸གོང་ས་རྒྱལ་བ་རིན་པོ་ཆེ་མཆོག་གིས་རྒྱུད་སྟོད་གྲྭ་ཚང་དུ་ཆོས་ཐོག་འགྲིམ་བཞིན་པའི་དགེ་བཤེས་གྲངས་ ༥༧ ཙམ་ལ་མཇལ་ཁ་དང་བཀའ་སློབ་སྩལ་ཡོད་པ་དང་། སྐབས་དེར་༧མགོན་པོ་གང་ཉིད་མཆོག་གིས། ང་ཚོའི་གནས་སྟངས་བཙན་བྱོལ་བ་ཆགས་ནས་བསྡད་ཡོད་ཀྱང་། གདན་ས་གསུམ་སློབ་གཉེར་མུ་མཐུད་རྒྱག་གི་ཡོད། ང་ཚོའི་གཞིས་ཆགས་ཆེ་ཁག་ཚུགས་སྐབས། གདན་ས་གསུམ་མར་ལྷོ་ཕྱོགས་སུ་བཙུགས་པ་དང་། ཁྱེད་རང་ཚོས་ད་ལྟ་བར་དུ་སློབ་གཉེར་ཧུར་ཐག་བྱས་པ་རེད། ཞེ་དྲགས་ཡག་པོ་རེད།

ང་ཚོ་བོད་ལ་ངོམ་རྒྱུ་ཡོད་པ་ནི་ནང་ཆོས་ཀྱི་ཤེས་ཚད་ཆགས་ཡོད། དེ་ཡང་འདོན་པ་དང་སྨོན་ལམ་བརྒྱབ་པ་ཙམ་མ་ཡིན་པར་གཞུང་ཆེན་བཀའ་པོད་ལྔ་ལ་སློབ་གཉེར་བྱས་པ་དང་། དེའི་ནང་གི་གཙོ་བོ་ཞིག་ཚད་མ་རིག་པར་སློབ་སྦྱོང་བྱས་ཏེ། གནས་ཚུལ་གང་ཡིན་ཡང་། བཅོམ་ལྡན་འདས་ཁོང་ཉིད་ནས། དགེ་སློང་དག་གམ་མཁས་རྣམས་ཀྱིས།། བསྲེག་བཅད་བརྡར་བའི་གསེར་བཞིན་དུ།། ལེགས་པར་བརྟག་པ་ང་ཡི་བཀའ།། བླང་བར་བྱ་ཡི་གུས་ཕྱིར་མིན། ཞེས་གསུངས་པ་ལྟར། བཅོམ་ལྡན་འདས་ཀྱི་བཀའ་ལ་བསྲེག་བཅད་བརྡར་གསུམ་གྱིས་ཏེ་ཞིབ་འཇུག་བྱ་དགོས་པ་ལས། བཅོམ་ལྡན་འདས་ཀྱི་བཀའ་རེད་ཟེར་ནས་རྨོངས་དད་ཀྱི་ཚུལ་བྱ་རྒྱུ་མེད་གསུངས་ཡོད། དེ་ནས་ཀླུ་སྒྲུབ་ཡབ་སྲས་ལ་སོགས་པའི་ནཱ་ལནྡཱའི་མཁས་པའི་དབང་པོ་དག་གིས་བཅོམ་ལྡན་འདས་ཀྱི་བཀའ་ལ་བསྲེག་བཅད་བརྡར་གསུམ་གྱི་ཞིབ་འཇུག་བྱས་ཏེ། ཚད་མའི་ལམ་ནས་ངེས་པ་འདྲེན་ཐུབ་པ་བྱུང་ཡོད། ངོས་ལ་ཆ་བཞག་ན་ཆོས་ལུགས་ཚང་མར་གུས་ཞབས་བྱེད་བཞིན་ཡོད། ཆོས་ལུགས་ཚང་མའི་ལྟ་གྲུབ་མི་འདྲ་ནའང་སེམས་པ་བཟང་པོ་དང་རྙིང་རྗེའི་བློ་བསྐྱེད་དེ་མིར་ཕན་གྱི་ཡོད་སྟབས་གུས་ཞབས་བྱེད་བཞིན་ཡོད། སངས་རྒྱས་པའི་ཆོས་དང་ལྷག་པར་དུ་ནཱ་ལནྡཱའི་ཆོས་བརྒྱུད་དེ་བསྲེག་བཅད་བརྡར་གསུམ་བྱས་ནས་མར་གསུངས་པ་རེད།

ང་ཚོའི་ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་འཁྲུངས་ས་བསྐྱོན་པ་རེད་དེ། བོད་ཡིག་གསར་དུ་བཟོས་ཏེ་རྒྱ་ཡིག་ལ་དཔེ་ལྟ་བ་དང་སློབ་སྦྱོང་བྱེད་མི་དགོས་པར་བཟོས་ཡོད། རྒྱ་གར་གྱི་སྡེ་བ་ནག་རིའི་ཡིག་གེར་དཔེར་བལྟས་ནས་ང་ཚོའི་དབྱངས་དང་གསལ་བྱེད་བཟོས་པ་ཡིན་དུས། ཧ་ཅང་གྲུང་པོ་དང་ཡག་པོ་ཞེ་དྲགས་རེད། མཁན་ཆེན་ཞི་བ་འཚོ་བོད་ལ་གདན་ཞུ་གནང་སྟེ་བོད་ལ་ཕེབས་དུས། མཁན་ཆེན་ཞི་བ་འཚོས། ཁྱེད་རང་ཚོར་བོད་ཡིག་རང་བཙན་པ་ཞིག་ཡོད་སྟབས། ལེགས་སྦྱར་དང་པ་ལིའི་སྐད་བསླབ་དགོས་ཀྱི་མི་འདུག བོད་ཡིག་ལ་སློབ་སྦྱོང་བྱས་ཏེ། ལེགས་སྦྱར་དང་པ་ལིའི་སྐད་དུ་ཡོད་པའི་བཅོམ་ལྡན་འདས་དང་རྒྱ་གར་མཁས་པའི་གསུང་དག་བོད་ཡིག་ནང་བསྒྱུར་རྒྱུ་གལ་ཆེན་པོ་འདུག་གསུངས་པ་རེད། དེ་དག་བསམ་བློ་བཏང་དུས་ང་ཚོ་བོད་པར་སྤོབས་པ་སྐྱེས་དགོས་པ་ཡོད། ང་ཚོ་བོད་པ་ལ་སྐད་ཡིག་ཡོད་པ་དང་མཁན་ཆེན་ཞི་བ་འཚོས་བོད་པའི་སྐད་ཡིག་དེ་ཕྱུག་པོ་ཡོད་པར་གཟིགས་ཏེ། ཁྱེད་རང་ཚོར་པ་ལི་དང་ལེགས་སྦྱར་སྐད་ཡིག་བསླབ་མི་དགོས་པར། བོད་ཡིག་ནང་བཀའ་བསྟན་བཅོས་བསྒྱུར་ཏེ། སོ་སོའི་སྐད་ཡིག་རང་གི་ཐོག་ནས་རང་མགོ་ཐོན་པར་བྱས་ན་ཡག་པོ་ཡོང་གི་རེད་ཅེས་གསུངས་པ་རེད།

ཕྱེད་ཀ་སྒྲུང་ལྟ་བུ་རེད་དེ། དེ་སྔོན་ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་བལ་བཟའ་གཉིས་ལ་འཁྲུངས་ས་བསྐྱོན་ཡོད་སྟབས། ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་སུ་བོད་རྒྱ་ནག་དང་བལ་ཡུལ་གཉིས་ལ་འབྲེལ་བ་ཧ་ཅང་ཉེ་བོ་ཡོད། སྐབས་དེར་ཆོས་རྒྱལ་ཁྲི་སྲོང་ལྡེའུ་བཙན་དབུས་ལ་བཞུགས་པ་དང་། ཕྱོགས་གཅིག་ལ་རྒྱ་ཡི་མཁན་པོ་རྣམས་དང་ཕྱོགས་གཅིག་ལ་སློབ་དཔོན་ཀ་མ་ལ་ཤཱི་ལགས་ཀྱི་རྗེས་འབྲང་བ་ཚོ་བཞུགས་ཏེ། ཆོས་རྒྱལ་གྱིས་གཟིགས་བཞིན་པའི་སྐབས་སུ་རྒྱ་ཡི་མཁན་པོ་རྣམས་སྒོམ་རྒྱག་རྒྱུ་མ་གཏོགས་བཤད་རྒྱུ་ཞེ་དྲགས་མེད་པ་དང་སློབ་དཔོན་ཀ་མ་ལ་ཤཱི་ལགས་ཀྱི་རྗེས་འབྲང་བ་བཤད་རྒྱུ་ཞེ་དྲགས་ཡོད་སྟབས། ཆོས་རྒྱལ་གྱིས་སྐབས་རྒྱ་ཡི་སློབ་དཔོན་ཚོ་མར་རྒྱ་ནག་ཏུ་ཕྱིན་ན་འགྲིག་གི་འདུག་གསུངས་པ་རེད། དེ་ཚོའི་གྲས་དེ་ལོ་རྒྱུས་རེད་དེ་གོ་རྒྱུ་ཆེན་པོ་འདུག ང་རང་ཚོ་བོད་པས་སྒོམ་རྒྱག་པ་དང་འདོན་པ་བཏོན་པ་ཙམ་མ་ཡིན་པར་ལོ་ངོ་སྟོང་ཕྲག་རིང་གཞུང་ཆེན་ལ་སྤྱངས་པ་དང་སློབ་གཉེར་བྱས་ཏེ་སངས་རྒྱས་ཀྱི་ཆོས་ལ་བདག་པོ་བརྒྱབ་པ་མངོན་གསལ་ཆགས་ཡོད། ཅེས་གསུངས།

དེ་རིང་ཁ་སང་ནུབ་ཕྱོགས་སུ་ནང་ཆོས་ལ་དོ་སྣང་བྱེད་མཁན་མང་ནས་མང་དུ་འགྲོ་བཞིན་འདུག ཁོ་ཚོས་བརྟག་དཔྱད་བྱས་ཡོང་དུས། ང་ཚོས་འདིར་བཅོམ་ལྡན་འདས་ཀྱི་བཀའ་རེད་ཟེར་བ་དང་མདོ་ཡི་ཚིག་དོན་ལུང་འདྲེན་བྱས་པ་ཙམ་མ་ཡིན་པར་རྒྱུ་མཚན་གྱི་ཐོག་ནས་ནང་ཆོས་བཤད་ཡོང་དུས། དེ་སྔ་ནང་ཆོས་ལ་རྒྱུས་མངའ་མེད་པའི་ནུབ་ཕྱོགས་པའི་གྲས་མང་པོ་ཞིག་གིས་ནང་ཆོས་ལ་དམིགས་བསལ་གྱི་དོ་སྣང་སྤྲོད་ཀྱི་འདུག དེར་བརྟེན། ཁྱེད་རང་ཚོ་གལ་ཆེན་པོ་ཞེ་དྲགས་རེད། བོད་གངས་ཅན་གྱི་ལྗོངས་ལ་ཡོད་པའི་སངས་རྒྱས་ཀྱི་ཆོས་དེ་ཐེག་པ་ཐམས་ཅན་གྱི་གནས་འདུས་ཡོད་པ་དང་མདོ་སྔགས་སོགས་ཚང་མ་ཡོད་པས་ཞེ་དྲགས་རྒྱ་ཆེ་ཞིང་གཏིང་ཟབ་པ་ཡོད། ཉམས་ལེན་གྱི་ཐོག་ནས་ལེའུ་དང་པོ་བའི་གནས་སྐབས་ནས་བཟུང་རིམ་པའི་གསང་སྔགས་ཀྱི་གཞུང་དང་འབྲེལ་ཡོང་དུས། སེམས་ཕྲ་རགས་དབྱེ་བ་ཕྱེས་ཏེ་རགས་པ་གློ་བུ་བའི་སེམས་ཕར་འཇོག་པ་དང་ཕྲ་བ་སྙི་མའི་སེམས་ལམ་གྱི་ངོ་བོར་བསྐྱེད་ནས་ཉམས་ལེན་བྱ་རྒྱུ་ཡོད་པ་ཞེ་དྲགས་ཟབ་པོ་རེད། དེ་འདྲ་བའི་ཆོས་བསམ་གྱི་མི་ཁྱབ་པ་ཞིག་ང་ཚོ་བོད་ལ་ཡོད་པ་དང་ད་ལྟའི་དུས་ཚོད་འདིའི་སྐབས་སུ་དེ་ལ་བདག་པོ་རྒྱག་མཁན་ང་ཚོ་ཆགས་བསྡད་ཡོད། ཅེས་གསུངས།

གསར་འགོད་པ། སྐལ་བཟང་སྦྱིན་པ།