རྒྱ་ནག་ནང་ཏོག་དབྱིབས་བཀག་སྡོམ་ལ་ངོ་རྒོལ་བྱས་ཏེ་ཉེན་རྟོག་པ་དྲུག་བསད།

མདང་དགོང་རྒྱ་ནག་ཧའེ་པའེ་ཞིང་ཆེན་པོ་ཏིན་གྲོང་ཁྱེར་གྱི་ས་གནས་ཉེན་རྟོག་ཁང་གི་ཉེ་འགྲམ་དུ་སྐྱེས་པ་ཞིག་གིས་སྒེར་འཁོར་ཞིག་བསྐོར་ནས་འཛེམས་ཟོན་མེད་པར་ཉེན་རྟོག་པ་ཁག་ཅིག་ལ་བརྡུངས་ཏེ་དམར་གསོད་བཏང་ཡོད་འདུག

འདི་ག་བོད་ཀྱི་དུས་བབ་གསར་འགོད་པར་ས་གནས་ཀྱི་མི་ཞིག་གིས་བརྙན་ཐུང་བཅས་བཏང་སྟེ་འགྲེལ་བརྗོད་བྱས་པ་ལྟར་ན། ཧའེ་པའེ་ཞིང་ཆེན་པོ་ཏིན་གྲོང་ཁྱེར(河北省保定)་དུ་ཏོག་དབྱིབས་བཀག་སྡོམ་བྱས་ཏེ་ཉིན་གྲངས་ ༢༠ ལྷག་འགྲོ་བཞིན་ཡོད་པ་དང་། མི་མང་ནས་བཟའ་བཏུང་དང་དངུལ་སོགས་རྫོགས་ནས་དཀའ་ངལ་ཆེན་པོ་འཕྲད་ཀྱི་ཡོད་པའི་རེ་སྐུལ་མང་པོ་བྱེད་བཞིན་ཡོད་ཀྱང་། མུ་མཐུད་ནས་འགྲོ་སྐྱོད་བཀག་སྡོམ་ཤུགས་ཆེན་བྱེད་བཞིན་ཡོད་པར་བརྟེན། མདང་དགོང་གྲོང་ཁྱེར་དེའི་ནང་གནས་སྡོད་བྱེད་མཁན་སྐྱེས་པ་ཞིག་ཕྱི་རོལ་དུ་སྒེར་འཁོར་བསྐོར་ནས་ཕྱིན་སྐབས། ས་གནས་ཉེན་རྟོག་ཁང་གི་ཉེ་འགྲམ་དུ་བསླེབས་སྐབས་ཉེན་རྟོག་པ་ཁག་ཅིག་ནས་བཀག་ཡོད་པ་དང་། མི་དེས་སྐད་ཤུགས་ཆེན་པོས་ངའི་ཁྱིམ་མི་ཚང་མར་ཟ་རྒྱུ་མི་འདུག སྲིད་གཞུང་གིས་ང་ཚོ་ལྟོགས་ཤི་ཐེབས་འཇུག་རྒྱུ་ཡིན་པས་ཟེར་ནས་སྐད་བརྒྱབ་སྟེ། ཡུན་རིང་ཙམ་ལ་ཕན་ཚུན་ཁ་རྩོད་ཤུགས་ཆེན་ཤོར་རྗེས། མི་དེས་གློ་བུར་དུ་སྒེར་འཁོར་བསྐོར་ཡོང་ནས་གང་བྱུང་ཉེན་རྟོག་པ་ཚོར་བརྡུངས་ཏེ་ཡུལ་དངོས་རང་ནས་ཉེན་རྟོག་པ་དྲུག་བསད་པ་དང་། ཉེན་རྟོག་པ་གཅིག་ལ་རྨས་སྐྱོན་ཚབས་ཆེན་ཕོག་སྟེ་སྨན་ཁང་དུ་ཛ་དྲག་སྨན་བཅོས་བྱེད་བཞིན་ཡོད་འདུག

དོན་རྐྱེན་བྱུང་རྗེས་སྐྱེས་པ་དེ་བཙན་འཁྲིད་བྱས་ཡོད་པ་དང་ས་གནས་སུ་དམ་དྲག་ཧ་ཅང་ཤུགས་ཆེ་རུ་ཕྱིན་ཡོད་འདུག་ལ། གྲོང་ཁྱེར་དེར་གནས་སྡོད་རྒྱ་མི་ཞིག་གིས་སྤྱི་ཚོགས་དྲ་ལམ་དུ། རྒྱ་ནག་གཞུང་གི་བྱེད་སྟངས་ངན་པ་ལ་བརྟེན་ནས་སྲིད་གཞུང་ལ་མི་དགའ་བ་ཞིག་ཏུ་གྱུར་ཡོད་པ་དང་། རང་དབང་ཡོད་པའི་རྒྱལ་ཁབ་ཅིག་གི་ནང་དུ་འཚོ་བ་བསྐྱལ་འདོད་ཡོད་སྐོར་དང་། སྔོན་མ་དང་མི་འདྲ་བར་རྒྱ་ནག་ནང་དཀའ་ངལ་ཆེན་པོ་ཞིག་འཕྲད་ཀྱི་ཡོད་ཀྱང་། རྒྱལ་ནང་དུ་གསང་བ་ཆེན་པོ་ཞིག་ཡིན་སྐོར་དང་། ས་གནས་ཤིག་ཏུ་ཏོག་དབྱིབས་ནད་པ་གཅིག་ཐོན་ན་གྲོང་ཚོ་ཡོངས་རྫོགས་སྒོ་རྒྱག་ཏུ་འཇུག་གི་ཡོད་པ་དང་། ས་གནས་དེར་སྡོད་མཁན་མང་ཆེ་བ་ཁང་གླ་བྱས་ནས་སྡོད་མཁན་ཡིན་ལ། དེའི་ཐོག་ནང་མི་རྒན་འཁོགས་དང་། བུ་ཕྲུག་བཅས་གསོ་དགོས་ཀྱི་ཡོད་དུས་སེམས་ཁྲལ་གྱིས་སྨྱོ་གྲབས་ཡོད་སྐོར་བརྗོད་འདུག

ཡང་འདི་གར་བཏང་བའི་བརྙན་ཐུང་ཞིག་གི་ནང་དུ་གྲོང་ཁྱེར་དེའི་གྲོང་ཁུལ་ཞིག་ཏུ་ལྕགས་ཤོག་གིས་བསྐོར་ཏེ་འགྲོ་སྐྱོད་བཀག་སྡོམ་བྱེད་བཞིན་ཡོད་ཀྱང་། མི་མང་པོ་འདུ་འཛོམས་བྱས་ཏེ་སྐད་འབོད་ཤུགས་ཆེན་བྱེད་ཀྱི་ཡོད་པ་མ་ཟད། ལྕགས་ཤོག་རྣམས་རེ་རེ་བཞིན་གཏོར་ཏེ་བཀག་སྡོམ་ལ་ངོ་རྒོལ་ཤུགས་ཆེན་བྱེད་བཞིན་འདུག

དེ་རིང་ཧའེ་པའེ་ཞིང་ཆེན་གྱི་ཏོག་དབྱིབས་གཉན་རིམས་སྐོར་གྱི་གནས་ཚུལ་ནང་། ཁ་སང་ཞིང་ཆེན་དེའི་ནང་ཏོག་དབྱིབས་འགོས་པའི་མི་ ༤༧ གསར་དུ་བྱུང་ཡོད་པ་དང་། དེའི་ཁྲོད་ནས་ ༡༦ ཧྲི་ཅཱ་ཀྲང་ནས་ཡིན་པ་དང་། པོ་ཏིན་གྲོང་ཁྱེར་ནང་མི་ ༤ བྱུང་ཡོད་སྐོར་བསྒྲགས་འདུག་ལ། ད་ལྟའི་ཆར་རྒྱ་ནག་གཞུང་གིས་ཏོག་དབྱིབས་གཙང་སེལ་ཟེར་བའི་སྲིད་ཇུས་འོག་གྲོང་དང་གྲོང་ཁྱེར་མང་པོའི་ནང་མི་གྲངས་ས་ཡ་མང་པོར་ཁྱིམ་སྡོད་བཀའ་རྒྱ་ལག་བསྟར་དང་། འགྲོ་སྐྱོད་ལ་བཀག་སྡོམ་ཤུགས་ཆེན་བྱེད་བཞིན་ཡོད་སྟབས། མི་མང་འ་ཆད་འུ་ཐུག་གིས་ངོ་རྒོལ་མང་པོ་བྱེད་བཞིན་ཡོད་འདུག