བལ་ཡུལ་དུ་ཚད་རིམ་ ༦.༣ ཅན་གྱི་ས་ཡོམ་བརྒྱབ་འདུག 

མདང་དགོང་མཚན་གུང་ཡོལ་ནས་ཆུ་ཚོད་ ༢ མ་ཟིན་ཙམ་ལ་བལ་ཡུལ་གྱི་ཏོ་ཐི་རྫོང་(Doti district)ཞེས་པའི་ནང་དུ་ཚད་རིམ་ ༦.༣ ཅན་གྱི་ས་ཡོམ་བརྒྱབ་སྟེ་ཉུང་མཐར་མི་གྲངས་ ༦ རྐྱེན་འདས་སུ་ཕྱིན་ཡོད་པ་དང་མི་གྲངས་ ༥ ལྷག་ལ་རྨས་སྐྱོན་ཕོག་ཡོད་འདུག

ཐེངས་འདིའི་ས་ཡོམ་གྱི་གནོད་འཚེ་ཐེབས་སའི་ས་ཁུལ་གཙོ་བོ་ནི་ཏོ་ཐི་རྫོང་ཁོངས་ཀྱི་ཀཱབ་ཏཱ་ཌ་རྒྱལ་ཡོངས་གླིང་ཀ་(Khaptad National Park )ཁུལ་ཡིན་འདུག་ལ། མི་མང་ལ་གནོད་འཚེ་དང་སྡོད་ཁང་མང་པོར་གཏོར་སྐྱོན་བྱུང་ཡོད་པ་མ་ཟད། རྒྱ་གར་གྱི་རྒྱལ་ས་ལྡི་ལི་ནང་དང་། ཨུ་ཏར་ཁན་ཌི་མངའ་སྡེ་སོགས་ཀྱི་ས་ཁུལ་ཁག་ཅིག་ནང་དུའང་ཤུགས་རྐྱེན་བསླེབས་ཡོད་འདུག

བལ་ཡུལ་ཏོ་ཐི་རྫོང་དཔོན་ཁཱལ་པཱ་ནཱ་ཤྲི་སི་ཐཱ་(Kalpana Shrestha)ལགས་ཀྱིས། ད་ལྟའི་ཆར་མི་གྲངས་ ༦ རྐྱེན་འདས་སུ་ཕྱིན་ཡོད་པ་དང་། མི་གྲངས་ ༥ ་ལྷག་སྨན་ཁང་དུ་སྨན་བཅོས་བྱེད་མུས་ཡིན་པ་མ་ཟད། ས་ཡོམ་ཤུགས་ཆེན་བརྒྱབ་པའི་རྐྱེན་གྱིས་ས་གནས་མང་པོར་ས་རུད་བྱུང་སྟེ་གཞུང་ལམ་དང་། སྡོད་ཁང་སོགས་ལ་གཏོར་སྐྱོན་བྱུང་ཡོད་སྐོར་བརྗོད་འདུག

བལ་ཡུལ་སྲིད་བློན་ཤྲ་བྷ་ཧཱ་དུར་ཌུ་བྷ(Sher Bahadur Deuba)ལགས་ཀྱིས་སྒེར་གྱི་ཊི་ཝེ་ཊུར་སྟེང་དུ། ཐེངས་འདིའི་ས་ཡོམ་ཁྲོད་དུ་རྐྱེན་འདས་ཕྱིན་པ་རྣམས་ཀྱི་ཤུལ་ལུས་ཁྱིམ་མི་ཚང་མར་སེམས་གཏིང་ནས་གདུང་སེམས་མཉམ་སྐྱེད་དང་། གནོད་འཚེ་བྱུང་སའི་ས་ཁུལ་དུ་མགྱོགས་མྱུར་སྨན་བཅོས་སོགས་ཀྱི་མཐུན་རྐྱེན་སྦྱོར་རྒྱུ་ཡིན་སྐོར་བརྗོད་འདུག དེ་བཞིན་བལ་ཡུལ་དམག་མིའི་མགྲིན་ཚབ་པ་ནཱ་རཱ་ཡཱན་སིལ་ཝལ་( Narayan Silwal)ལགས་ཀྱིས་བལ་ཡུལ་དམག་མིའི་ཐད་འཕུར་གནམ་གྲུ་གཉིས་ཀྱིས་ས་ཡོམ་བརྒྱབ་སའི་ཉེ་འགྲམ་སུར་ཁི་ཐི་(Surkhet )དང་ནེ་པལ་གུ་ཇི་(Nepalgunj)གྲོང་གསེབ་ཏུ་མྱུར་སྐྱོབ་བྱེད་མུས་ཡིན་སྐོར་བརྗོད་འདུག

མདང་དགོང་བལ་ཡུལ་དུ་བྱུང་བའི་ས་ཡོམ་ཚད་རིམ་དང་བྱུང་ཐེངས་སོགས་ཀྱི་གནས་ཚུལ་ཐད་མི་འདྲ་བ་ཅུང་ཙམ་ཡོང་གི་འདུག་ཀྱང་། བལ་ཡུལ་ས་ཡོམ་བརྟག་དཔྱད་ཁང་གིས་ཐེངས་འདིའི་ས་ཡོམ་ཚད་རིམ་མཐོ་ཤོས་ ༦.༦ དང་། ཁ་སང་དགོང་མོའི་ཆུ་ཚོད་ ༨:༥༢ ཐོག་ཚད་རིམ་ ༤.༩ ཅན་ཞིག་བརྒྱབ་ཡོད་སྐོར་བསྒྲགས་འདུག

བལ་ཡུལ་དུ་ས་ཡོམ་བསྟུད་མར་འབྱུང་གི་ཡོད་པ་ལྟར། འདི་ལོའི་ཕྱི་ཟླ་ ༧ ཚེས་ ༣༡ ཉིན་ཀ་ཐ་མན་ཌུ་རུ་ཚད་རིམ་ ༦ ཅན་གྱི་ས་ཡོམ་ཞིག་བྱུང་ཡོད་པ་དང་། ཕྱི་ལོ་ ༢༠༡༥ ལོར་ཚད་རིམ་ ༧.༨ཅན་གྱི་ས་ཡོམ་བརྒྱབ་སྟེ་མི་གྲངས་ ༩༠༠༠ ཙམ་རྐྱེན་འདས་དང་། མི་གྲངས་ ༢༢༠༠༠ ལ་རྨས་སྐྱོན་ཕོག་པ་སོགས་མི་རྒྱུ་གཉིས་ལ་གོད་ཆག་ཚབས་ཆེན་བྱུང་ཡོད་པ་རེད།

བྱམས་པ་ཚེ་རིང་།