མེག་སི་ཀོའི་ནང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་།

བྱང་ཨ་རིའི་རྒྱལ་ཁབ་མེག་སི་ཀོའི་ནང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་བྱས་ཏེ་བོད་དང་བོད་མིའི་རྩ་དོན་འཐབ་རྩོད་ཐོག་རྒྱབ་སྐྱོར་སྔར་ལྷག་བྱ་རྒྱུ་ཡིན་འདུག

ཟླ་འདིའི་ཕྱི་ཚེས་ ༨ ཉིན་མེག་སི་ཀོའི་རྒྱལ་ཁབ་ཀྱི་གྲོས་ཚོགས་འོག་མའི་ཚོགས་གཞོན་སྐུ་ཞབས་སལ་ཝ་ཌོར་ཁེ་རོ་ཁེ་བྷི་རི་རཱ་ (Salvador Caro Cabrera) ལགས་ཀྱིས་སྣེ་འཁྲིད་པའི་མེག་སི་ཀོའི་གྲོས་ཚོགས་འཐུས་མི་ཁག་ཅིག་གིས། རྒྱལ་ཁབ་དེའི་གྲོས་ཚོགས་ནང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་ཡོད་ཅིང་། སྐབས་དེར་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཆེད་དུ་མཛད་སྒོར་མཉམ་ཞུགས་ཀྱིས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱི་དགའ་བསུའི་འཚམས་འཕྲིན་བསྒྲགས་སྦྱངས་གནང་ཡོད་པ་རེད།

དེ་ཡང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་འཚམས་འཕྲིན་ནང་། མེག་སི་ཁོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བ་ཐོས་མ་ཐག་ང་ཚོ་ཚང་མར་དགའ་ཚོར་ཆེན་པོ་བྱུང་། ངས་བོད་མི་མང་སྤྱི་འཐུས་ལྷན་ཚོགས་དང་བོད་གཞིས་བྱེས་གཉིས་ཀྱི་བོད་མི་ཚང་མའི་ཚབ་ཞུས་ཏེ་སྐུ་ཉིད་དང་མེག་སི་ཀོའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།

ཚོགས་པ་འདི་བརྒྱུད་ལྷོ་ཨ་མི་རི་ཀའི་ནང་བོད་ཀྱི་བདེན་པའི་འཐབ་རྩོད་ཐོག་ང་ཚོ་མཉམ་རུབ་ཀྱིས་ལས་འགུལ་སྤེལ་རྒྱུར་ཕན་རླབས་ཆེན་པོ་ཡོད། ཁྱེད་རྣམ་པའི་རྒྱབ་སྐྱོར་ནི་ང་ཚོར་དགོས་མཁོ་ཤིན་ཏུ་ཆེན་པོ་ཆགས་ཀྱི་ཡོད་པ་དང་། སྤྱིར་མེག་སི་ཁོ་རྒྱལ་ཁབ་ནང་ང་ཚོར་དུས་ཡུན་རིང་པོར་གང་ཟག་སྒེར་གྱི་ཐོག་ནས་རྒྱབ་སྐྱོར་གནང་མཁན་མང་པོ་ཡོད་ཅིང་། ངས་ད་རེས་གོ་སྐབས་འདི་བརྒྱུད་ཁོང་རྣམས་ལའང་་ཐུགས་རྗེ་ཆེ་ཞུ་རྒྱུ་ཡིན། འབྱུང་འགྱུར་ཁྱེད་རྣམས་དང་ལྷན་ཕྱག་ལས་གནང་རྒྱུ་དང་དངོས་སུ་མཇལ་རྒྱུའི་རེ་བ་ཆེན་པོ་ཡོད། ངས་སླར་ཡང་ཁྱེད་རྣམ་པར་ཐུགས་རྗེ་ཆེ་ཞུ་རྒྱུ་དང་། ཁྱེད་རྣམ་པའི་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་ཡོད་འདུག

ཡང་དེ་རིང་ཉིན་རྒྱབ་བོད་མིའི་སྒྲིག་འཛུགས་ཀྱི་དྲ་ཐོག་ཏུ་སྤེལ་བའི་སྲིད་སྐྱོང་སྤེན་པ་ཚེ་རིང་མཆོག་གི་འཚམས་འཕྲིན་ནང་། མེག་སི་ཀོའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བའི་གནས་ཚུལ་གོ་ཐོས་བྱུང་བས་ཧ་ཅང་དགའ་པོ་བྱུང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་མེག་སི་ཀོའི་གྲོས་ཚོགས་འཐུས་མི་རྣམ་པས་དུས་ཐོག་མེག་སི་ཁོའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བར་ཐུགས་རྗེ་ཆེ་ཞུ་བ་དང་ཆབས་ཅིག་མེག་སི་ཁོའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཡོངས་ལ་འཚམས་འདྲི་ཞུ་རྒྱུ་ཡིན།

ལོ་སུམ་ཅུའི་གོང་༸གོང་ས་རྒྱལ་བ་རིན་པོ་ཆེ་མཆོག་ཐེངས་དང་པོ་མེག་སི་ཀོ་ཚུད་པའི་ལཱ་ཊིན་ཨ་མི་རི་ཀའི་ཁུལ་དུ་ཆིབས་སྒྱུར་བསྐྱངས་གནང་མཛད་པར་བརྟེན་མེག་སི་ཀོ་དང་བོད་མིའི་དབར་དམིགས་བསལ་གྱི་འབྲེལ་བ་འཕེལ་འགོ་བཙུགས་པ་དང་། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མེག་སི་ཀོ་ཚུད་པའི་ལཱ་ཊིན་ཨ་མི་རི་ཀའི་ཁུལ་དུ་ཐེངས་འགའ་ཆིབས་སྒྱུར་བསྐྱངས་གནང་མཛད་ཡོད། སྐབས་དེར་མེག་སི་ཀོའི་གྲོས་ཚོགས་འཐུས་མི་རྣམ་པ་དང་། མེག་སི་ཀོའི་བོད་དོན་རྒྱབ་སྐྱོར་ཚོགས་པ་ཁག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་ཐད་མཐུན་འགྱུར་རོགས་རམ་དང་བོད་མིའི་བདེན་པའི་འཐབ་རྩོད་ཆེད་དུ་མུ་མཐུད་ཞུ་གཏུག་གནང་དང་གནང་བཞིན་པ་བཅས་ལ་ང་ཚོས་བཀའ་དྲིན་བླ་ལྷག་ཏུ་ཆེ་ཞེས་ཞུ་རྒྱུ་ཡིན།

དེ་རིང་ཁ་སང་རྒྱ་ནག་གཞུང་གིས་བོད་ནང་བོད་མིའི་ངོ་བོ་དང་བཅས་པ་རྩ་གཏོར་གཏོང་རྒྱུའི་སྲིད་བྱུས་ལག་བསྟར་བྱས་དང་བྱེད་བཞིན་ཡོད་སྟབས། བོད་ནང་གི་གནས་སྟངས་ད་ལྟའི་ཆར་ཛ་དྲག་ཅན་དུ་གྱུར་ཡོད། འདི་འདྲའི་དུས་ཚོད་གཉན་འཕྲང་ཅན་གྱི་སྐབས་འདིར་མེག་སི་ཀོའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གཞུང་འབྲེལ་ཐོག་གསར་འཛུགས་གནང་བའི་གཏམ་བཟང་གི་གནས་ཚུལ་ལ་རྗེས་ཡི་རང་ཞུ་རྒྱུ་ཡིན། སླར་ཡང་ངས་མེག་སི་ཀོའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཅག་གི་མ་འོངས་པའི་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་དང་། མ་འོངས་པར་རྣམ་པ་ཚོ་དང་ལྷན་མཇལ་འཕྲད་ཞུ་རྒྱུའི་རེ་ལྟོས་བྱེད་ཀྱི་ཡོད། ཅེས་གསུངས་ཡོད།

མེག་སི་ཁོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་ཀྱི་མཛད་སྒོའི་དེའི་སྟེང་། བོད་དོན་རྒྱབ་སྐྱོར་གནང་མཁན་གྱི་མེག་སི་ཁོའི་གྲོས་ཚོགས་འཐུས་མི་རྣམས་ངོ་སྤྲོད་བྱས་རྗེས། ཚོགས་པའི་འགན་འཛིན་ལྷན་ཚོགས་བསྐོ་གཞག་དང་མ་འོངས་པའི་ལས་དོན་གནང་ཕྱོགས་སོགས་ངོ་སྤྲོད་བྱས་ཡོད་པ་རེད། ད་སྔ་བར་བོད་མིའི་སྒྲིག་འཛུགས་ལ་ལྡི་ལི་སྐུ་ཚབ་དོན་གཅོད་དང་སུད་སི། བྱང་ཨ་རི། ཉི་ཧོང་། སྦེལ་ཇམ། ཨོ་སི་ཀྲོ་ལི་ཡ། ཨ་ཧྥི་རི་ཁ། ཨུ་རུ་སུ། མེག་སི་ཁོ་བཅས་ཁྱོན་དོན་གཅོད་ལས་ཁང་དགུ་ཡོད་འདུག

གསར་འགོད་པ། སྐལ་བཟང་སྦྱིན་པ།