ད་ལོའི་ཨ་རིའི་བར་མའི་འོས་བསྡུའི་སྐབས་འདས་པའི་ལོ་ངོ་ལྔ་བཅུའི་རིང་ཆ་ཤས་ལེན་མཁན་མི་གྲངས་མང་ཤོས་གཉིས་པ་ཆགས་ཏེ། བར་མའི་འོས་བསྡུ་ལོ་རྒྱུས་ཁྲོད་ཡུན་རིང་བྱུང་མ་མྱོང་བའི་འོས་བསྡུ་ཞིག་ཆགས་ཡོད་འདུག
ཟླ་འདིའི་ཕྱི་ཚེས་ ༩ ཉིན་ཨ་རི་རྒྱལ་ཡོངས་སུ་བར་མའི་འོས་བསྡུ་བྱས་ཏེ། དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་བར་མའི་འོས་བསྡུའི་གྲུབ་འབྲས་ཐོན་པ་ལྟར་ན། ཨ་རིའི་གྲོས་ཚོགས་གོང་མའི་ནང་དམངས་གཙོ་ཚོགས་པར་སྲིད་སྟེགས་ ༤༨ དང་སྤྱི་མཐུན་ཚོགས་པར་སྲིད་སྟེགས་ ༤༩ ཐོབ་ཡོད་ཅིང་། གྲོས་ཚོགས་འོག་མའི་ནང་སྤྱི་མཐུན་ཚོགས་པར་སྲིད་སྟེགས་ ༢༡༡ དང་དམངས་གཙོ་ཚོགས་པར་སྲིད་སྟེགས་་༡༩༧ བཅས་ཆགས་ཡོད་འདུག་ལ། དབྱེ་ཞིབ་པ་མང་པོ་ཞིག་གིས་ཐེངས་འདིའི་ཨ་རིའི་བར་མའི་འོས་བསྡུ་ཡི་གྲུབ་འབྲས་དམངས་གཙོ་དང་སྤྱི་མཐུན་ཚོགས་པ་གཉིས་བར་འདྲ་མཚུངས་ལྟ་བུ་བྱུང་ཡོད་སྐོར་བརྗོད་འདུག་ཀྱང་། ད་ལྟ་ད་དུང་ཨ་རིའི་མངའ་སྡེ་ཁག་ཅིག་གི་འོས་བསྡུའི་མཇུག་འབྲས་རྩིས་བརྒྱབ་ཚར་མེད་སྟབས། ཨ་རིའི་གྲོས་ཚོགས་འོག་མའི་དབང་ཆ་དེ་ཆབ་སྲིད་ཚོགས་པ་སུ་ལ་འཐོབ་མིན་བཤད་ཚོད་ཐིག་མི་ཐུབ་པ་ཡིན་འདུག་ལ། གྲོས་ཚོད་འོག་མའི་དབང་ཆ་འཐོབ་པར་མང་མོས་སྲིད་སྟེགས་ ༢༡༨ འཐོབ་དགོས་པ་ཡིན་པ་རེད།
ད་སྔ་བར་གྱི་འོས་བསྡུའི་མཇུག་འབྲས་དང་འབྲེལ་ཨ་རིའི་ལས་ཐོག་སྲིད་འཛིན་ཇཱོ་བྷའེ་ཌན་ལགས་ཀྱིས། ང་ཚོ་ཡང་དག་པའི་ལམ་དུ་ཡོད། དམངས་གཙོ་ཚོགས་པས་འོས་བསྡུའི་ཁྲོད་རེ་འདོད་བྱས་པ་ལྷག་གིས་རྒྱལ་ཁ་བླངས་བར་དགའ་ཚོར་ཆེན་པོ་བྱུང་ཡོད། ང་ཚོས་ཨ་རིའི་ཟས་རིགས་སོགས་འཚོ་བའི་འགྲོ་གྲོན་ཇེ་དམའ་རུ་གཏོང་ཐབས་བྱ་རྒྱུ་ཡིན། ཞེས་དམངས་གཙོ་ཚོགས་པས་འོས་བསྡུའི་ཁྲོད་རྒྱལ་ཁ་བླངས་ཡོད་པའི་གདེང་འཇོག་བྱས་ཡོད་འདུག
དེ་འབྲེལ་བྷི་བྷི་སི་གསར་ཁང་གི་གནས་ཚུལ་ནང་། ཐེངས་འདིའི་ཨ་རིའི་བར་མའི་འོས་བསྡུའི་ཁྲོད། ཨ་རིའི་མི་མང་གིས་གཙོ་བཟུང་བྱས་པའི་མངོན་འདོད་ཆེན་པོ་ལྔ་སྟེ། ཉིན་རེའི་འཚོ་བའི་འགྲོ་གྲོན་ཇེ་མཐོར་འགྲོ་བཞིན་པའི་ཐད་སེམས་ཚབས་དང་། མངལ་སྦྲུམ་མེད་པར་བཟོ་བའི་སྲིད་ཇུས། མེ་མདའ་དང་། རྐུ་ཇག་འཕྲོག་གསུམ་གྱི་ནག་ཉེས་དོན་རྐྱེན། གནས་སྤོ་སྲིད་ཇུས་བཅས་ཡིན་ཞིང་། དེའི་ནང་ནས་ཀྱང་འོས་འཕེན་མཁན་ཚོའི་སེམས་ནང་གཙོ་འཛིན་བྱས་ཡོད་པ་ནི་ཁྲོམ་རའི་མ་གནས་ཇེ་མཐོར་དང་མངའ་སྦྲུམ་མེད་པར་བཟོ་བའི་སྲིད་གཉིས་ཡིན་སྐོར་བརྗོད་འདུག
གོང་བརྗོད་དོན་ཚན་ལྔ་ལས་སྤྱི་མཐུན་ཚོགས་པར་ཁྲོམ་རའི་ས་གནས་དང་དཔལ་འབྱོར་དང་འབྲེལ་བའི་ཐོག་ནས་རྒྱབ་སྐྱོར་བྱེད་མཁན་མི་མང་བརྒྱ་ཆ་ ༤༥ ཡོད་པ་དང་དམངས་གཙོ་ཚོགས་པར་བརྒྱ་ཆ་ ༡༨ ལས་མེད་པ་ཡིན་འདུག་ལ། མངའ་སྦྲུམ་མེད་པར་བཟོ་བའི་སྲིད་ཇུས་ཐད་དམངས་གཙོ་ཚོགས་པར་མི་མང་བརྒྱ་ཆ་ ༤༣ གྱིས་རྒྱབ་སྐྱོར་དང་སྤྱི་མཐུན་ཚོགས་པར་བརྒྱ་ཆ་ ༡༢ ལས་མེད་འདུག དེ་བཞིན། མེ་མདའི་སྲིད་ཇུས་དམངས་གཙོ་ཚོགས་པར་བརྒྱ་ཆ་ ༡༤ དང་སྤྱི་མཐུན་ཚོགས་པར་བརྒྱ་ཆ་ ༨ ། གནས་སྦོ་སྲིད་ཇུས་ཐད་སྤྱི་མཐུན་ཚོགས་པར་བརྒྱ་ཆ་ ༡༥ དང་དམངས་གཙོ་ཚོགས་པར་བརྒྱ་ཆ་ ༥་དང་། རྐུན་ཇག་འཕྲོག་གསུམ་གྱི་ནག་ཉེས་རིགས་ཀྱི་ཐད་སྤྱི་མཐུན་ཚོགས་པར་བརྒྱ་ཆ་ ༡༣ དང་དམངས་གཙོ་ཚོགས་པར་བརྒྱ་ཆ་ ༡༠ བཅས་ཡིན་པ་ཨ་རིའི་རྒྱལ་ཡོངས་བསམ་འཆར་བསྡུ་རུབ་ལས་ཁུངས་ཀྱིས་བསྟན་ཡོད་འདུག
ད་དུང་ད་རེས་ཀྱི་བསམ་འཆར་བསྡུ་རུབ་དེའི་ནང་ཨ་རིའི་དམངས་གཙོའི་གནས་སྟངས་ག་འདྲ་ཡོད་མེད་ཐད་བསམ་འཆར་བསྡུས་པའི་ཁྲོད། མི་མང་བརྒྱ་ཆ་ ༣༦ གིས་ཨ་རིའི་དམངས་གཙོ་ཧ་ཅང་ཉེན་ཁའི་གནས་སུ་ལྷུང་ཡོད་པ་དང་། མི་མང་བརྒྱ་ཆ་་༣༢ ཀྱིས་ཉེན་ཁའི་གནས་སྟངས་འོག་ཡོད་པ། དེ་བཞིན་མི་མང་བརྒྱ་ཆ་ ༢༡ ཉེན་ཁ་མེད་པ་དང་བརྒྱ་ཆ་ ༩ ཡིས་ཨ་རིའི་དམངས་གཙོ་ཧ་ཅང་བརྟན་རླིང་ཡིན་པའི་བསམ་ཚུལ་བསྟན་ཡོད་སྐོར་སོགས་བརྗོད་འདུག
ཨ་རིའི་བར་མའི་འོས་བསྡུ་ཁག་གི་བརྒྱུད་རིམ་ལ་ཕྱིར་མིག་བལྟས་ན། ད་སྔ་བར་ཨ་རིའི་བར་མའི་འོས་བསྡུ་ཕལ་ཆེ་བའི་སྐབས་སུ་འོས་འཕེན་མཁན་གྱི་མི་གྲངས་ཅུང་ཉུང་ཉུང་ཡིན་ཡང་། ད་ལན་གྱི་བར་མའི་འོས་བསྡུར་ཆ་ཤས་ལེན་མཁན་མི་གྲངས་ས་ཡ་ ༡༡༦ ལྷག་བྱུང་ཡོད་ཅིང་། དེ་ནི་ཕྱི་ལོ་ ༢༠༡༨ ལོ་ཕུད་པའི་ཨ་རིའི་འདས་པའི་ལོ་ངོ་ ༥༠ ནང་གི་འོས་འཕེན་པའི་མི་གྲངས་མཐོ་ཤོས་ཡིན་པ་རེད་ལ། ཡང་ཕྱི་ལོ་ ༡༩༣༤ ནས་ ༢༠༡༨ བར་གྱི་བར་མའི་འོས་བསྡུ་རིམ་པའི་ཁྲོད། ལས་ཐོག་སྲིད་འཛིན་གྱི་ཚོགས་པས་ད་བར་ཚོགས་འོག་མའི་སྲིད་སྟེགས་ ༢༨ དང་གོང་མའི་སྲིད་སྟེགས་ ༤ བཅས་ཆ་སྙོམས་ཐོག་ཤོར་ཡོད་པ་ཨ་རིའི་ཁ་ལི་ཧྥོ་ནེ་ཡ་གཙུག་ལག་སློབ་གྲྭ་ཆེན་མོའི་ཞིབ་འཇུག་སྙན་ཐོ་ལས་བསྟན་ཡོད་པ་རེད།
ཡང་བྷི་བྷི་སིའི་གནས་ཚུལ་ནང་། ད་ལོའི་ཨ་རིའི་བར་མའི་འོས་བསྡུ་འདི་ནི་སྲིད་འཛིན་ཟུར་པ་ཊི་རུམ་ཕུའི་བྱས་རྗེས་དང་སྤྱི་མཐུན་ཚོགས་པ་སྣེ་འཁྲིད་པའི་ཤུགས་རྐྱེན་སོགས་ལ་ཉམས་ཚོད་ལེན་བྱེད་ཀྱི་འོས་བསྡུ་ཞིག་ཡིན་པ་དང་། ཨ་རིའི་ཊག་སཱ་སི་གཙུག་ལག་སློབ་ཆེན་གྱི་སློབ་དཔོན་ཇོན་ཊའེ་ལཱོར་ (Jon Taylor) ལགས་ཀྱིས། ཐེངས་འདིར་འོས་འཕེན་མཁན་མང་པོ་ཞིག་གིས་དམངས་གཙོ་ཚོགས་པར་འོས་བླུགས་ཏེ་ཆེད་དུ་ཊི་རུམ་ཕུའི་སྤྱི་མཐུན་ཚོགས་པའི་ནང་གི་ཤུགས་རྐྱེན་ལ་ཁྱད་གསོད་བྱེད་པར་དམིགས་ཡོད། ཅེས་བརྗོད་ཡོད་པ་དང་། ད་ལོའི་ཨ་རིའི་བར་མའི་འོས་བསྡུར་ཆ་ཤས་ལེན་མཁན་ལོ་རྒྱུས་རང་བཞིན་གྱི་ཚད་མཐོ་བོ་ཆགས་ཡོད་ཅིང་། དམིགས་བསལ་དམངས་གཙོའི་སྒུལ་ཤུགས་གསར་བའི་གཞོན་སྐྱེས་གང་མང་མཉམ་ཞུགས་བྱས་ཏེ། འོས་བསྡུའི་མཇུག་འབྲས་ལ་ཁྱད་པར་ཆེན་པོ་བཟོས་ཡོད་འདུག
གཞན་ཡང་། ད་ལོའི་ཨ་རིའི་བར་མའི་འོས་བསྡུའི་ནང་བུད་མེད་འོས་ལངས་བྱེད་མཁན་མང་ཤོས་བྱུང་ཡོད་ཅིང་། གྲོས་ཚོགས་གོང་མའི་ནང་བུད་མེད་ཁྱོན་ ༢༠ དང་འོག་མའི་ནང་བུད་མེད་༢༥༩། དེ་བཞིན་མངའ་སྡེའི་སྤྱི་ཁྱབ་ཀྱི་འོས་མིར་བུད་མེད་ ༢༥ བཅས་ཨ་རི་ཁྱོན་ཡོངས་སུ་བུད་མེད་ཁྲིམས་བཟོ་བ་དང་མངའ་སྡེ་སྤྱི་ཁྱབ་སོགས་མི་གྲངས་ ༣༦༡༤ ཡོད་པ་ཡིན་འདུག
གསར་འགོད་པ། སྐལ་བཟང་སྦྱིན་པ།
