བོད་ནང་ཤེས་ཡོན་སོགས་ཀྱི་ཐོག་ཕྱག་ལས་རླབས་ཆེན་གནང་མཁན་འཇམ་དབྱངས་གླིང་བསོད་ནམས་བསྟན་འཛིན་ལགས་ཀྱི་མི་ཚེ་ལོ་རྒྱུས་ཀྱི་དཔེ་དེབ་ཅིག་དབུ་འབྱེད་གནང་།
དེ་རིང་ཞོགས་པའི་ཆུ་ཚོད་ ༩ པ་ཐོག་ངྷ་ས་ས་གནས་མགོ་འཛིན་གྱི་ཕུན་ཚོགས་ཁང་གསར་ཚོགས་ཁང་དུ། དབུས་གཙང་གི་དབུས་རྒྱུན་ལས་ཁང་དང་རྡ་ས་ས་གནས་དབུས་གཙང་རྒྱུན་ལས་གཉིས་ཀྱི་གོ་སྒྲིག་འོག སྐུ་ཞབས་འཇམ་དབྱངས་གླིང་བསོད་ནམས་བསྟན་འཛིན་ལགས་ཀྱི་མི་ཚེའི་ལོ་རྒྱུས་ “ངའི་བུ། སེམས་ཤུགས་མ་ཆག བོད་མ་བརྗེད།” ཞེས་པའི་དཔེ་དེབ་ཅིག་དབུ་འབྱེད་བྱས་ཡོད་པ་དང་། མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། བཀའ་ཟུར་ཐུབ་བསྟན་ལུང་རིགས་ལགས། རྡ་ས་ས་གནས་མགོ་འཛིན་དཀོན་མཆོག་མིག་དམར་ལགས། དགེ་བཤེས་བློ་བཟང་གྲགས་པ་ལགས། སྤྱི་འཐུས་དང་སྤྱི་ཟུར་ཁག་ཅིག དེ་བཞིན་ཚོགས་པ་ཁག་གི་སྐུ་ཚབ་སོགས་འཛོམས་ཡོད་འདུག མཛད་སྒོའི་ཐོག་འཇམ་དབྱངས་གླིང་བསོད་ནམས་བསྟན་འཛིན་ལགས་ཀྱི་མི་ཚེ་ཧྲིལ་བོར་༧གོང་ས་མཆོག་གི་བཀའ་དགོངས་ལམ་སྟོན་བཞིན་བོད་མི་རིགས་ཀྱི་བསྟན་སྲིད་ཆེད་དུ་ཕྱག་ལས་རླབས་ཆེན་གནང་བར་བཀའ་དྲིན་རྗེས་དྲན་ཆེད་མི་ཚེ་དོན་ལྡན་གྱི་གཟེངས་རྟགས་ཕུལ་སོང་།
དཔེ་དེབ་དབུ་འབྱེད་སྐབས་སྤྱི་འཐུས་ཟླ་བ་ཚེ་རིང་ལགས་ཀྱིས་སྐུ་ཞབས་འཇམ་དབྱངས་གླིང་བསོད་ནམས་བསྟན་འཛིན་ལགས་ངོ་སྤྲོད་གནང་སྐབས། བསོད་ནམས་བསྟན་འཛིན་ལགས་མ་སུ་རི་སློབ་གྲྭ་ནས་བསླབ་པ་མཐར་སོན་རྗེས་དགེ་རྒན་གྱི་ཕྱག་ལས་གནང་ཞིང་། ཕྱི་ལོ་༡༩༩༤ ལོར་ནས་ ༧ གོང་ས་མཆོག་གི་དགོངས་པ་དང་། ཕ་མའི་ཞལ་ཆེམས་གཞིར་བཟུང་བོད་ནང་དུ་ཕེབས་ཏེ་ཤེས་ཡོན་གནས་སྟངས་ཐད་ཞིབ་འཇུག་བྱས་ཡོད་པ་མ་ཟད། ལོ་མང་པོར་བོད་མདོ་དབུས་ཁམས་གསུམ་དུ་ཁྱོན་ཡོངས་སུ་སློབ་གྲྭ་ཁག་ ༡༠༨ དང་དཔེ་མཛོད་ཁང་ ༡༠༨ འཛུགས་སྐྲུན་བྱས་ཡོད་པ་དང་། དེ་བཞིན་ཁོར་ཡུག་ལས་གཞི་དང་། འཐུང་ཆུའི་ལས་གཞི། ཨེ་ཙི་ནད་གཞིའི་སྐོར་ལ་གོ་རྟོགས་སྤེལ་བ་སོགས་ཀྱིས་མཚོན་པའི་བོད་ནང་དུ་ལས་གཞི་མང་པོ་སྤེལ་གནང་ཡོད་པ་དང་། རྒྱ་བལ་འབྲུག་གསུམ་ནང་གི་དགོན་སྡེ་སོགས་ལའང་རོགས་སྐྱོར་མང་པོ་གནང་ཡོད་སྐོར་བརྗོད་འདུག
མཛད་སྒོའི་ཐོག་འཇམ་དབྱངས་གླིང་བསོད་ནམས་བསྟན་འཛིན་ལགས་ཀྱིས། ང་ཚོ་བོད་མི་རིགས་ཀྱིས་རྡོག་རྩ་གཅིག་སྒྲིལ་བྱ་རྒྱུ་གལ་ཆེན་པོ་རེད། རང་ཉིད་ཀྱི་ཅི་ཡང་བྱེད་ཐུབ་རྒྱུ་མ་རེད་སྙམ་ནས་འདུག་རྒྱུ་ཡོད་པ་མ་རེད། ང་ལ་མཚོན་ན་བོད་ནང་དུ་ལས་ཀ་གང་ཡང་བྱེད་ཐུབ་མ་རེད་སྙམ་ནས་རྒྱ་ནག་ལ་ཞེད་སྣང་སྐྱེས་ནས་བསྡད་པ་རེད། ཡིན་ནའང་། རིག་པ་སྒྲིམ་སྟེ་ཕྱི་རྒྱལ་དུ་སློབ་སྦྱོང་བྱས། ༧གོང་ས་མཆོག་གི་བཀའ་དགོངས་བཞིན་འབད་པ་བྱས་ནས་ལག་ལེན་བསྟར་ན་འགྲུབ་རྒྱུ་འདུག བོད་ནང་དུ་ཕྲུ་གུ་ཁྲི་ ༢ ལྷག་ལ་རོགས་པ་བྱེད་ཐུབ་པ་བྱུང་། ལག་པ་གཉིས་ཐལ་མོ་སྦྱར་ནས་སྒུག་བསྡད་ན་འགྲུབ་ཀྱི་མ་རེད། ལས་ཀ་ག་རེ་ཡིན་ཡང་འཆར་གཞི་བཟོ་དགོས་ཀྱི་འདུག ཞེས་བརྗོད་སོང་།
སྐུ་མགྲོན་གཙོ་བོ་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། ངའི་བུ། སེམས་ཤུགས་མ་ཆག། བོད་མ་བརྗེད། ཞེས་པའི་ཕྱག་དཔེ་བརྒྱུད་ནས་རང་ཉིད་ཀྱི་ཕ་མའི་དྲིན་ཆེན་གྱི་ཁ་ཆེམས་བརྒྱུད་ནས་མི་ཚེའི་ནང་གི་ལས་ཀ་གང་ཡིན་ཡང་གདོང་ལེན་བྱེད་པའི་སྙིང་སྟོབས་སྐྱེས་བ་རེད། དེས་ཕ་མ་ཚོས་སོ་སོའི་ཕྲུ་གུར་ཁ་ཏ་བསླབ་བྱ་ཡག་པོ་གནང་དགོས་པ་གལ་ཆེན་པོ་ཡིན་པ་གསལ་བོ་སྟོན་གྱི་ཡོད། ཕ་མའི་གང་ཤེས་པ་དེ་ཕྲུ་གུའི་མ་འོངས་མི་ཚེའི་ནང་གི་བསམ་དོན་འགྲུབ་པའི་རྒྱུ་རུ་འགྱུར་རྒྱུ་ཡིན་པས། ཕ་མ་ཚོས་རང་མི་རིགས་ཀྱི་སྤྲོ་བ་དང། སྡུག་བསྔལ། ཁྱད་ཆོས་སོགས་ཕྲུ་གུའི་སེམས་ཁམས་སུ་འཇོག་དགོས། ཕ་མ་ནི་ཕྲུ་གུའི་དགེ་རྒན་དང་པོ་ཡིན་པའི་ཆ་ནས་གལ་ཆེན་ཆགས་ཡོད། ཅེས་གསུངས་སོང་།
ཡང་ཚོགས་གཞོན་མཆོག་གིས། འཇམ་དབྱངས་གླིང་བསོད་ནམས་བསྟན་འཛིན་ལགས་མི་གཅིག་གིས་གཞིས་བཞུགས་བོད་མི་ཁྲི་ཁ་ཤས་ལ་ཤེས་ཡོན་གྱི་གོ་སྐབས་སྤྲད་ཡོད་ན།རང་དབང་ལུང་པར་སྐྱེས་པའི་ཕ་མ་ཚོས་དངུལ་བསགས་ཏེ། རང་ཉིད་ཀྱི་ཕྲུ་གུའི་མ་འོངས་བའི་སློབ་སྦྱོང་ཐད་འགྲོ་གྲོན་ག་ཚོད་གཏོང་དགོས་ནའང་གསོག་འཇོག་ཐུབ་དགོས་པ་ཞིག་རེད། དེང་སང་སློབ་ཡོན་མཐོ་རུ་སོང་ཡོད་པ་དང་། དམིགས་བསལ་རིགས་གཅིག་རྐང་འཛིན་གྱི་སློབ་སྦྱོང་གི་འགྲོ་སོང་ཆེན་པོ་ཆགས་ཡོད། བཙན་བྱོལ་དུ་དཔལ་འབྱོར་ཆེན་པོ་ཡོད་མཁན་མང་པོ་ཡོད་ཀྱང་། ཁོང་ནང་བཞིན་བོད་ནང་གི་རྗེས་ལུས་ཀྱི་རྣམ་པ་མཐོང་ནས་ལ་རྒྱ་དང་བརྩེ་སེམས་བཅངས་ནས་ལག་ལེན་བྱེད་མཁན་ཉུང་ཉུང་རེད། ཁོང་གི་མི་ཚེའི་ལོ་རྒྱུས་ལ་བལྟས་ནས་མཐུན་རྐྱེན་བསྐྲུན་མཁན་ཚོས་ཁོང་ལ་མིག་དཔེ་བལྟས་པ་ཡིན་ན། དེ་རིང་ཁོང་ལ་གཟེེངས་བསྟོད་བྱས་པ་ཙམ་མིན་པར་ཁོང་གི་རྗེས་ཤུལ་གྱི་བསམ་དོན་འགྲུབ་པ་རེད། ཅེས་གསུངས་སོང་།
བྱམས་པ་ཚེ་རིང་།