ཨ་རྒྱའི་སྲིད་འཛིན་གཉིས་དངོས་སུ་ཐུག་འཆར་ཡོད་པ་རེད།

ཨ་རིའི་སྲིད་འཛིན་རྗོ་བྷའེ་ཌིན་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིང་གཉིས་དངོས་སུ་ཐུག་འཕྲད་བྱུང་མེད་ཀྱང་འཚོག་ལ་ཉེ་བའི་སྟོབས་ཆེན་རྒྱལ་ཁབ་ ༢༠ ཡི་ལྷན་ཚོགས་ཐེངས་ ༡༧ པའི་ཐོག་ཁོང་གཉིས་ཐུག་འཆར་ཡོད་འདུག

ཟླ་འདིའི་ཕྱི་ཚེས་ ༡༥ ནས་ ༡༦ བར་ཉིན་གཉིས་རིང་ཨིན་ཌོ་ནེ་ཤི་ཡཱ་ (Indonesia) ཡི་ཞིང་ཆེན་བྷ་ལི་ (Bali) རུ་ཨ་རི་དང་རྒྱ་ནག་ཚུད་པའི་སྟོབས་ཆེན་རྒྱལ་ཁབ་ ༢༠ ཡི་ལྷན་ཚོགས་ཐེངས་ ༡༧ པ་ (G20) འཚོག་འཆར་ཡོད་པ་དང་། ཏོག་དབྱིབས་གཉན་རིམས་རྐྱེན་གྱིས་འཛམ་གླིང་གི་ས་ཕྱོགས་གང་སར་འཕྲོད་བསྟེན་དང་དཔལ་འབྱོར་ཉམས་དམས་སུ་ཕྱིན་པ། དེ་བཞིན་ཤེས་ཡོན་དང་ཚོང་འབྲེལ་ཐོག་ལ་དཀའ་ངལ་ཤུགས་ཆེན་འཕྲད་བཞིན་ཡོད་པས། འཛམ་གླིང་གི་དཀའ་རྙོག་དེ་དག་སེལ་ཏེ་དཔལ་འབྱོར་དང་ཤེས་ཡོན་སོགས་ཡར་རྒྱས་གོང་འཕེལ་གཏོང་རྒྱུའི་བརྗོད་གཞིའི་ཐོག་གླེང་སློང་བྱ་རྒྱུ་ཡིན་འདུག སྐབས་དེར་ཨ་རི་དང་རྒྱ་ནག རྒྱ་གར། ཁེ་ན་ཌ་སོགས་ཚུད་པའི་སྟོབས་ཆེན་རྒྱལ་ཁབ་ ༢༠ ཡི་ཚོགས་མི་ཚོས་མཉམ་ཞུགས་བྱ་རྒྱུ་ཡིན་ཡང་། ཉེ་ལམ་རྒྱལ་སྤྱིའི་གསར་འགྱུར་བརྒྱུད་ལམ་ཁག་གི་ནང་ཨིན་ཌོ་ནེ་ཤི་ཡཱ་ལ་ཡོད་པའི་ཨུ་རུ་སུའི་གཞུང་ཚབ་ཁང་གིས། ཨུ་རུ་སུའི་སྲིད་འཛིན་པུ་ཊེན་ (Vladimir Putin) ཚོགས་འདུའི་སྟེང་དངོས་སུ་མཉམ་ཞུགས་མི་ཐུབ་ཀྱང་། དྲ་ལམ་བརྒྱུད་མཉམ་ཞུགས་བྱ་རྒྱུ་ཡིན་ཚུལ་བརྗོད་ཡོད་པ་རེད།

གསར་འགྱུར་བརྒྱུད་ལམ་ཁག་ཏུ་ཨ་རྒྱ་གཉིས་བར་ཚོང་འབྲེལ་དང་ཆབ་སྲིད་སོགས་ཀྱི་ཐོག་ནས་དཀའ་རྙོག་ཆེན་པོ་འབྱུང་གི་ཡོད་པའི་སྐབས་འདིར། རྗོ་བྷའེ་ཌིན་མཆོག་དང་ཞི་ཅིན་ཕིང་དངོས་སུ་ཐུག་འཕྲད་གནང་འཆར་ཡོད་པའི་སྐོར་གྱི་གནས་ཚུལ་ཐོན་ཡོད་པ་དང་། ཟླ་འདིའི་ཕྱི་ཚེས་ ༩ ཉིན་ཨ་རིའི་སྲིད་འཛིན་བྷའེ་ཌིན་མཆོག་གིས། རྒྱ་ནག་གི་མགོ་ཁྲིད་དང་ཐུག་འཕྲད་མ་གནང་གོང་ཉི་ཧོང་གི་སྲིད་བློན་དང་ལྷོ་ཀོ་རི་ཡའི་སྲིད་འཛིན་སོགས་དང་ཐུག་འཕྲད་ཀྱིས་རྒྱལ་ཁབ་ཀྱི་བདེ་འཇགས་ཐད་གླེང་སློང་གནང་རྒྱུ་ཡིན་སྐོར་དང་། དེའི་རྗེས་རྒྱ་ནག་གི་མགོ་ཁྲིད་དང་ཐུག་འཕྲད་ཀྱིས་རྒྱལ་ཁབ་ཀྱི་བདེ་འཇགས་དང་དཀའ་རྙོག་ཐད་གླེང་སློང་གནང་འཆར་ཡོད་ལ། སྐབས་དེར་རྒྱལ་ཁབ་ཕན་ཚུན་བར་རྩོད་རྙོག་ག་རེ་ཡོད་མེད་ཁ་གསལ་ཤེས་པའི་ཐོག་ནས་དཀའ་རྙོག་ཡོད་པ་རྣམས་སེལ་ཐབས་གནང་རྒྱུ་ཡིན་སྐོར་དང་། ཐུག་འཕྲད་བྱུང་རྗེས་ཡོངས་ཁྱབ་ཐོག་ཟུང་སྦྲེལ་བསྒྲགས་གཏམ་སྤེལ་འཆར་མེད་སྐོར་སོགས་གསུངས་འདུག

སྟོབས་ཆེན་རྒྱལ་ཁབ་ ༢༠ ཡི་ཚོགས་འདུ་མ་འཚོག་གོང་སྟེ། ཕྱི་ཚེས་ ༡༤ ཉིན་ཨིན་ཌོ་ནེ་ཤི་ཡཱའི་གྲོང་ཁྱེར་ (Yogyakarta) རུ་སྟོབས་ཆེན་རྒྱལ་ཁབ་ ༢༠ (G20 Sherpa meeting) ཡི་ཤར་པའི་ཚོགས་འདུ་འཚོག་འཆར་ཡོད་འདུག་ལ། དེའི་ཐད་ཕྱི་ཟླ་ ༩ ཚེས་ ༢༧ ཉིན་ཨིན་ཌོ་ནེ་ཤི་ཡཱའི་བློན་ཆེན་གཞོན་པ་དང་ (Co-Sherpa G20) སྟོབས་ཆེན་རྒྱལ་ཁབ་ ༢༠ ཡི་ཤར་པའི་ཚོགས་འདུའི་ལས་བྱེད་ (Edi Prio Pambudi) ལགས་ཀྱིས། ད་ལན་གྱི་སྟོབས་ཆེན་རྒྱལ་ཁབ་ ༢༠ ཡི་ཚོགས་འདུ་དེ་གལ་ཆེན་པོ་ཡིན་པ་དང་། ཚོགས་འདུའི་སྟེང་བགྲོ་གླེང་ལྷུག་པོ་བྱས་ཏེ་རྒྱལ་ཁབ་ཡོངས་ཀྱི་རྒྱབ་སྐྱོར་དང་མོས་མཐུན་ཡོད་པའི་ཐོག་ནས་མགོ་ཁྲིད་ཀྱི་ལས་འཆར་གསལ་བསྒྲགས་ (Leaders’ Declaration draft) བྱ་དགོས་ལ། ཚོགས་འདུ་བརྒྱུད་ནས་ཐུན་མོང་གི་དམིགས་ཡུལ་སྒྲུབ་དགོས་པ་ལས། སྒེར་གྱི་དམིགས་ཡུལ་དང་རྒྱལ་ཁབ་བྱེ་བྲག་གི་དམིགས་ཡུལ་བསྒྲུབ་རྒྱུ་མིན་སྐོར་དང་། དཔལ་འབྱོར་གྱི་གནས་སྟངས་ཉམས་རྒུད་ཤུགས་ཆེན་འགྲོ་བཞིན་ཡོད་པས། དེ་སྔ་ལག་ལེན་བསྟར་བྱེད་བཞིན་པའི་ལམ་ལུགས་ལ་སྐྱོན་ཆ་ཡོད་པ་རྣམས་བཅོས་ཐབས་བྱ་དགོས་སྐོར་སོགས་བརྗོད་ཡོད་འདུག

ཕྱི་ལོ་ ༢༠༢༠ རྗེས་སུ་ཨ་རིའི་སྲིད་འཛིན་བྷའེ་ཌིན་དང་ཞི་ཅིན་ཕིན་དབར་ལ་དངོས་སུ་ཐུག་འཕྲད་བྱུང་མེད་ཅིང་། སྲིད་འཛིན་གཉིས་དབར་ཁ་པར་བརྒྱུད་ནས་འབྲེལ་བ་ཐོག་མ་དེ་འདི་ལོའི་རྒྱ་ནག་གི་ལོ་གསར་གྱི་སྔ་ནུབ་དེར་བྱུང་ཡོད་ནའང་། ད་ལྟའི་ཆར་ཨ་རྒྱའི་འབྲེལ་ལམ་དེ་སྔར་གྱི་སྲིད་འཛིན་ཊོམ་ཕུའི་དུས་སྐབས་ལྟར་ཛ་དྲག་མིན་ནའང་། གནས་ཚུལ་ཡར་རྒྱས་ཕྱིན་མེད་པར་མུ་མཐུད་ཚོང་འབྲེལ་དང་། འཕྲུལ་རིག་བརྐུ་འཁྱེར། འགྲོ་བ་མིའི་ཐོབ་ཐང་། དྲ་ལམ་འཇབ་རྒོལ། ལྷོ་རྒྱ་ནག་རྒྱ་མཚོ་དང་རྒྱ་གར་ཞི་བདེ་རྒྱ་མཚོའི་ཁུལ་གྱི་བདེ་འཇགས་སོགས་ཀྱི་གནད་དོན་ཐད་ལ་འགལ་ཟླ་དང་གདོང་ཐུག་འབྱུང་མུས་ཡིན་ཞིང་། ཉེ་ཆར་བྷའེ་ཌིན་སྲིད་གཞུང་གིས་སྲིད་འཛིན་གཞོན་པ་ལྕམ་སྐུ་ཀ་མ་ལ་ཧ་རི་སི་ (Kamala Harris) ཡིས་མཚོན་པའི་ཆེས་མཐོའི་མགོ་ཁྲིད་རྣམས་ཨེ་ཤ་ཡའི་ཁུལ་དུ་མངག་གཏོང་གནང་བ་མ་ཟད། རྒྱ་ནག་གི་གནོན་ཤུགས་ལ་མ་ལྟོས་པར་ཐའེ་ཝན་ལ་གོ་མཚོན་བཙོང་བ་དང་། ལྕམ་ནན་སི་པེ་ལི་སི་མཆོག་གིས་དབུ་འཁྲིད་པའི་གནད་ཡོད་མི་སྣ་ཐའེ་ཝན་ནང་ཕེབས་པ་སོགས་ཀྱི་གནད་དོན་ཐོག་རྣོ་ངར་ཅན་གྱི་འགལ་ཟླ་བྱུང་དང་འབྱུང་བཞིན་ཡོད་པ་རེད།

གསར་འགོད་པ། བསྟན་འཛིན་ཕུར་བུ།