ཝེ་ལཱ་ཌོ་མི་རོ་སེ་ཝེ་ཁི་མཆོག་ཅི་ལི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་འཚམས་འདྲི་ཞུས།

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་ཅི་ལི་རྒྱལ་ཁབ་ཀྱི་གྲོས་ཚོགས་ཝེ་ལཱ་ཌོ་མི་རོ་སེ་ཝེ་ཁི་མཆོག་ཡུལ་དེའི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་འཚམས་འདྲི་ཞུས་བ་དང་སྦྲགས་བོད་དོན་བདེན་མཐའ་མ་གསལ་བར་དུ་མུ་མཐུད་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཅི་ལི་གྲོས་ཚོགས་འོག་མའི་ཚོགས་གཙོ་གསར་པ་མཆོག

ཟླ་འདིའི་ཕྱི་ཚེས་ ༩ ཉིན་ལྷོ་ཨ་མེ་རི་ཁའི་གྲོས་ཚོགས་འཐུས་མི་སྐུ་ཞབས་ཝེ་ལཱ་ཌོ་མི་རོ་སེ་ཝེ་ཁི་མཆོག་(Vlado Mirosevic) ཅི་ལི་རྒྱལ་ཁབ་ཀྱི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་ཡོད་པ་ལྟར། ཟླ་འདིའི་ཕྱི་ཚེས་ ༡༤ ཉིན་སྲིད་སྐྱོང་མཆོག་གི་འཚམས་འདྲིའི་ནང་དུ། ངས་བོད་མིའི་སྒྲིག་འཛུགས་དང་བོད་མི་མང་གི་ཚབ་བྱས་ཏེ་སྐུ་ཉིད་འོས་འཚམ་ཀྱི་ཐོག་ནས་ཅི་ལི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་སྙིང་ཁོངས་ནས་རྟེན་འབྲེལ་ཞུ། ད་ལོའི་ཨ་རིའི་རྒྱལ་ས་ཝ་ཤིན་ཌོན་དུ་འཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་སྐབས་སུ་སྐུ་ཉིད་དང་མཇལ་འཕྲད་བྱུང་བར་དགའ་སྤྲོ་བྱུང་། ནམ་རྒྱུན་སྐུ་ཉིད་ཀྱིས་ཅི་ལི་གྲོས་ཚོགས་ནང་དུ་བོད་དོན་རྒྱབ་སྐྱོར་དང་གདུང་སེམས་མཉམ་བསྐྱེད་གནང་གི་ཡོད་པ་མ་ཟད། ཁྱེད་ཀྱི་སྣེ་ཁྲིད་འོག་ཅི་ལི་བོད་དོན་རྒྱབ་སྐྱོར་ཚོགས་པས་ལོ་མང་པོའི་རིང་བོད་དོན་འཐབ་རྩོད་ལ་རྒྱབ་སྐྱོར་གནང་བར་བཀའ་དྲིན་ཆེ་ཞུ་རྒྱུ་ཡིན། སྐུ་ཉིད་ཅི་ལི་གྲོས་ཚོགས་འོག་མའི་ཚོགས་གཙོ་ཡིན་པའི་ཆ་ནས་མུ་མཐུད་དུ་ཅི་ལི་དང་བོད་དབར་གྱི་མཛའ་འབྲེལ་གོང་སྤེལ་དུ་གཏང་ནས་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་ཤུགས་ཆེ་གནང་རྒྱུའི་རེ་བ་ཡོད། སྐུ་ཉིད་དང་གང་མགྱོགས་མཇལ་འཕྲད་ཀྱི་གོ་སྐབས་ཤིག་འཐོབ་རྒྱུར་རེ་ལྟོས་བྱེད་ཀྱི་ཡོད་ལ། ཁྱེད་ཀྱི་ལས་ཡུན་རིང་ལས་དོན་ཐམས་ཅད་ལེགས་འགྲུབ་འབྱུང་བའི་སྨོན་འདུན་ཞུ། ཞེས་གསུངས་འདུག

དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་འཚམས་འཕྲིན་ནང་དུ།ངས་སྐུ་ཉིད་ཅི་ལི་གྲོས་ཚོགས་འོག་མའི་ཚོགས་གཙོ་འདེམས་ཐོན་བྱུང་བར་བོད་མི་ཡོངས་ཀྱི་ཚབ་བྱས་ཏེ་དགའ་སྤྲོའི་ངང་རྟེན་འབྲེལ་ཞུ། སྐུ་ཉིད་ཀྱིས་ད་ལོའི་ཨ་རིའི་རྒྱལ་ས་ཝ་ཤིན་ཌོན་གྱི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་སྐབས་སུ་གདུང་སེམས་མཉམ་བསྐྱེད་ཀྱི་གཏམ་བཤད་གནང་པར་བཀའ་དྲིན་ཤིན་ཏུ་ཆེ། སྐུ་ཉིད་ཀྱིས་དྲང་བདེན་དང་བོད་དོན་ཆེད་དུ་རྒྱབ་སྐྱོར་གནང་བཞིན་པར་ཐུགས་རྗེ་ཆེ་ཞུ། འབྱུང་འགྱུར་མུ་མཐུད་དུ་བོད་དོན་བདེན་མཐའ་གསལ་བར་རྒྱབ་སྐྱོར་དང་། ང་ཚོ་ཐུན་མོང་གི་ཆེད་དུ་མཉམ་ལས་བྱེད་པར་རེ་བ་བྱེད་བཞིན་ཡོད། སྐུ་ཉིད་ཀྱི་ལྷག་བསམ་རྣམ་དག་དང་སྐུ་ངལ་འཛེམ་མེད་ཐོག་ཅི་ལི་མི་མང་གི་རེ་འདོད་སྐོང་བའི་ཡིད་ཆེས་ཡོད་ལ། ཁྱེད་ཀྱི་སྐུ་གཟུགས་གསལ་ཐང་ཐོག་ལས་དོན་རེ་འདོད་བཞིན་འགྲུབ་པའི་སྨོན་འདུན་ཡོད། ཅེས་གསུངས་འདུག

Speaker Khenpo Sonam Tenphel presenting a souvenir to Chilean Diputado Vlado Mirosevic at the 8th World Parliamentarians Convention on Tibet.

སྐུ་ཞབས་ཝེ་ལཱ་ཌོ་མི་རོ་སེ་ཝེ་ཁི་མཆོག་ནི་ཕྱི་ལོ་༡༩༨༧ ལོའི་ཟླ ༥ ཚེས་ ༢༣ ་ཉིན་ལྷོ་ཨ་མེ་རི་ཁའི་ཅི་ལི་རྒྱལ་ཁབ་ཀྱི་ཨ་རི་ཁཱ་རུ་སྐྱེས་ཤིང་། ཁོང་གིས་ཅི་ལི་གཙུག་ལག་སློབ་གླིང་དུ་ཆབ་སྲིད་ཚན་རིག་ཐོག་སློབ་སྦྱོང་གནང་། མཱ་ཡོར་གཙུག་ལག་སློབ་གླིང་(the University Mayor)་དུ་གསར་འགོད་རིག་པའི་གཙུག་ལག་རབ་འབྱམས་ཀྱི་བསླབ་པ་མཐར་སོན། ཕྱི་ལོ་ ༢༠༡༣ ལོར་ཁོང་གིས་ཅི་ལི་གུ་ཡངས་སྲིད་དོན་ཚོགས་པ(liberal Party of Chile)གསར་འཛུགས་གནང་སྟེ། ཕྱི་ལོ་ ༢༠༡༦ བར་དུ་ཚོགས་གཙོའི་འགན་འཁུར་བ་དང་། ཕྱི་ལོ་ ༢༠༡༣ ལོར་ཅི་ལི་གྲོས་ཚོགས་འཐུས་མི་རུ་འདེམས་ཐོན་བྱུང་ཡོད་འདུག་ལ། ཁོང་ནི་ཡུན་རིང་ནས་བོད་མིར་གདུང་སེམས་མཉམ་སྐྱེད་དང་བོད་དོན་ཐོག་རྒྱབ་སྐྱོར་གནང་མཁན་ཞིག་ཡིན་འདུག་ལ། ཕྱི་ལོ་ ༢༠༡༥ ཙམ་ལ་བཞུགས་སྒར་དྷ་རམ་ས་ལ་རུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་འདུག

བྱམས་པ་ཚེ་རིང་།