གདོང་ཐོག་ཚེ་རིང་ལགས་ཨ་རིའི་ཕྱི་སྲིད་ལས་ཁུངས་ཀྱི་དྲུང་གཞོན་ལས་རོགས་སུ་བསྐོ་གཞག་གནང་།

གདོང་ཐོག་ཚེ་རིང་ལགས་ཀྱིས་ཨ་རིའི་ཕྱི་སྲིད་ལས་ཁུངས་ཀྱི་དཔལ་འབྱོར་དང་། ནུས་ཁུངས། ཚོང་དོན་ལས་ཁུངས་ཀྱི་ཚོང་དོན་སྲིད་ཇུས་དང་གྲོས་མོལ་གྱི་དྲུང་གཞོན་ལས་རོགས་ཀྱི་འགན་འཁུར་བཞིན་ཡོད་འདུག

ཉེ་ལམ་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། གདོང་ཐོག་ཚེ་རིང་ལགས་ཨ་རིའི་ཕྱི་སྲིད་ལས་ཁུངས་ཀྱི་དཔལ་འབྱོར་དང་། ནུས་ཤུགས། ཚོང་དོན་ལས་ཁུངས་ཀྱི་ཚོང་དོན་སྲིད་ཇུས་དང་གྲོས་མོལ་གྱི་དྲུང་གཞོན་ལས་རོགས་སུ་བསྐོ་གཞག་གནང་ཡོད་ཅིང་། ཁོང་མོས་ཨ་རིའི་ཕྱི་སྲིད་ལས་ཁུངས་ཀྱི་ཕྱོགས་གཉིས་དང་ཕྱོགས་མང་པོའི་ཚོང་དོན་སྲིད་ཇུས་དང་། ཚོང་ལས་འཁོར་རྒྱུག་གི་འབྲེལ་ཐག དེ་བཞིན། རྒྱལ་སྤྱིའི་མཉམ་འབྲེལ་ཚོང་ལས་ཚོགས་པ་དང་འཛམ་གླིང་ཚོང་དོན་སྒྲིག་འཛུགས་ (World Trade Organization) ཚུད་པའི་རྒྱལ་སྤྱིའི་དཔལ་འབྱོར་ཚོགས་པ་ཁག་ཅིག་གི་ནང་སྣེ་ཁྲིད་བྱེད་ཀྱི་ཡོད་པ་རེད།

ཁོང་གིས་ད་ལྟའི་ལས་གནས་མ་བླངས་གོང་དུ། ཚེ་རིང་ལགས་ཀྱིས་ཕོ་བྲང་དཀར་པོའི་ནང་རྒྱལ་ཁབ་དཔལ་འབྱོར་ལྷན་ཚོགས་ཀྱི་རྒྱལ་སྤྱིའི་ཚོང་དོན་གྱི་བློ་འདོན་པ་མཐོ་ཤོས་དང་། རྒྱལ་ཡོངས་བདེ་འཇགས་ལྷན་ཚོགས་ཀྱི་རྒྱལ་སྤྱིའི་དཔལ་འབྱོར་དོ་དམ་ཁང་གི་འགན་འཛིན་གྱི་ལས་འགན་བཞེས། ཚེ་རིང་ལགས་ནི་ཉམས་མྱོང་ཅན་གྱི་ཚོང་དོན་གྲོས་མོལ་བ་ཞིག་ཡིན་པའི་ཆ་ནས་ལོ་དགུའི་རིང་ཨ་རིའི་ཕྱི་སྲིད་ལས་ཁུངས་ཀྱི་ཚོང་དོན་ལས་ཁུངས་སུ་ཞབས་ཞུ་བསྒྲུབས་ཤིང་། དེའི་ནང་ནས་ཀྱང་རྒྱ་ནག་ལས་དོན་གྱི་འགན་འཁུར་བ་གཞོན་པ་གནང་།

འཛམ་གླིང་ཚོང་དོན་སྒྲིག་འཛུགས་དང་མང་ཚོགས་ཀྱི་ལས་དོན་ཁང་། ལྷོ་ཤར་ཨེ་ཤ་ཡ་དང་ཞི་བདེ་རྒྱ་མཚོའི་ལས་དོན་ཁང་། ཐའེ་ཝན་གྱི་ཨ་རིའི་ཚོང་ལས་ལས་ཁུངས་བཅས་ཀྱི་ལས་བྱེད་པ། དེ་བཞིན་ཕྱི་སྲིད་ལས་ཁུངས་ཀྱི་རྒྱ་ནག་མཐུན་སྦྱོར་ཁང་གི་བློ་འདོན་པ་མཐོ་ཤོས་དང་ཕྱི་འབྲེལ་ལས་དོན་གྱི་འགན་འཛིན་གྱི་ལས་འགན་ཁུར། ཨ་རིའི་གཞུང་གི་ནུས་པའི་ལས་དོན་ཚན་པའི་རྒྱལ་སྤྱིའི་ལས་དོན་ཁང་གི་རྒྱ་ནག་དང་། ཉི་ཧོང་། ལྷོ་ཀོ་རི་ཡ་བཅས་ཀྱི་ལས་བྱེད་པ་དང་། ཚོང་དོན་ལས་ཁུངས་ཀྱི་རྒྱལ་སྤྱིའི་ཚོང་དོན་སློབ་སྟོན་པའི་ལས་ཁུངས་སོགས་སུ་ལས་ཀ་བྱས་མྱོང་། ཁོང་མོས་ཨ་རིའི་གཞུང་ཞབས་ནང་མ་ཞུགས་གོང་རྒྱལ་སྤྱིའི་ཁྲིམས་དང་སྲིད་གཞུང་གི་ལས་དོན་ནང་སྒེར་གཉེར་སྡེ་ཚན་དུ་ལས་ཀ་བྱས།

གདོང་ཐོག་ཚེ་རིང་ལགས་ནི་ཨ་རིའི་རྒྱལ་ས་ཝ་ཤིང་ཊོན་གྱི་སེ་ཡ་ཊལ་ (Seattle) གྲོང་ཁྱེར་ནས་ཡིན་ཞིང་། ཨ་རིའི་མི་སེར་ཡིན་པ་དང་། ཁོང་མོ་ཨེ་ཤ་ཡའི་ཁུལ་དུ་འགྲུལ་བཞུད་ཐེངས་མང་རིང་བྱས་ཤིང་དུས་ཡུན་གང་འཚམ་རིང་འཚོ་བའང་སྐྱེལ་མྱོང་ཡོད་ལ། ཁོང་གིས་བོད་སྐད་དང་རྒྱ་སྐད། དབྱིན་ཡིག་སོགས་ཤེས་ཀྱི་ཡོད་པ་རེད། ཁོང་མོས་ཨ་རིའི་ཝ་ཤིང་ཊོན་གཙུག་ལག་སློབ་གཉེར་ཁང་ (University of Washington) ནས་ཆབ་སྲིད་རིག་པ་དང་རྒྱལ་སྤྱིའི་ཞིབ་འཇུག་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན་པ་དང་། ཁོ་ལོམ་བྷི་ཡ་གཙུག་ལག་སློབ་གཉེར་ཁང་ (Columbia University) ནས་རྒྱ་ནག་ཞིབ་འཇུག་ཐོག་གཙུག་ལག་རབ་འབྱམས་པའི་བསླབ་པ་མཐར་སོན། དེ་ནས་མི་ཆི་གྷན་གཙུག་ལག་སློབ་གཉེར་ཁང་གི་ཁྲིམས་ལུགས་སློབ་གྲྭ་ (University of Michigan Law School) ནས་ཁྲིམས་ལུགས་རིག་པའི་འབུམ་རམས་པའི་བསླབ་པ་མཐར་སོན་པ་དང་། སྐབས་དེར་ཁོང་མོར་གཞུང་ཞབས་ཀྱི་ཆེད་དུ་ཧྥི་སི་ཀེ་གཟེངས་རྟགས་ (Fiske Fellowship award) ཐོབ་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།