བོད་རིགས་མགོ་འཁྲིད་ཅིག་འཛིན་བཟུང་བྱས་ཡོད་འདུག

རྒྱ་ནག་དམར་ཤོག་ཚོགས་པའི་གཏན་འབེབས་དོན་ཚན་བརྒྱད་ཀྱི་དགོངས་དོན་ཟེར་བ་དང་འགལ་ཡོད་པའི་ཉེས་མིང་འོག་བོད་རིགས་ལས་བྱེད་ཉི་བརྟན་འཛིན་བཟུང་བྱས་ཡོད་འདུག

རྒྱ་ནག་གཞུང་ཕྱོགས་ཀྱི་གསར་ལམ་ཁག་ཏུ་ཐོན་པའི་གནས་ཚུལ་ནང་། བོད་རང་སྐྱོང་ལྗོངས་ཟེར་བའི་ཁོངས་གཏོགས་ཉིང་ཁྲིའི་ས་ཁུལ་གྱི་རྫ་ཡུལ་རྫོང་གི་ཏོག་དབྱིབས་རིམས་ནད་སྔོན་འགོག་ཚོད་འཛིན་ལྟེ་གནས་ཀྱི་འགན་འཛིན་ཉི་བརྟན་གྱིས། ལས་ཀའི་སྟབས་བདེ་སྤྱད་ནས་ཏོག་དབྱིབས་གཉན་རིམས་དང་འབྲེལ་བའི་དོ་དམ་དང་ཚོད་འཛིན་སོགས་ཀྱི་མ་དངུལ་ལྐོག་ཟ་བྱས་ཏེ། རྒྱ་དམར་ཤོག་ཚོགས་པའི་གཏན་འབེབས་དོན་ཚན་བརྒྱད་ཀྱི་དགོངས་དོན་ཟེར་བ་དང་འགལ་ཡོད་པས། དམར་ཤོག་དང་གོ་གནས་ནས་ཕྱིར་ཕུད་བཏང་བའི་ནག་ཉེས་བསྒྲགས་འདུག

དེ་འབྲེལ་གནས་ཚུལ་ནང་། ཉི་བརྟན་གྱིས་སྒྲིག་འགལ་ངང་ཕོགས་སྣོན་དང་དོ་དམ་དང་ཞབས་ཞུ་བྱ་ཡུལ་གྱི་སྐྱེས་དངུལ་བླངས་པ། རྒྱ་ནག་གི་ཁྲིམས་སྲོལ་ལས་འགལ་ཏེ་དངུལ་མཛོད་ཁང་ཆུང་ངུ་བཙུགས་ཏེ་བེད་སྤྱོད་བྱས་པ་དང་། སྡེ་ཚན་གྱི་གཞུང་དངུལ་བཀོལ་བ་དང་ནད་ཡམས་སྔོན་འགོག་ཚོད་འཛིན་གྱི་མ་དངུལ་ཁྲིམས་འགལ་ངང་ལྐོག་ཟ་བྱས་ཡོད་སྟབས། སྒྲིག་ཁྲིམས་ཞིབ་དཔྱོད་ཁང་གི་ཐག་གཅོད་གཞིར་བཟུང་། ཉི་བརྟན་དམར་ཤོག་ཚོགས་པ་དང་ལས་གནས་ནས་ཕྱིར་ཕུད་དང་ད་སྔ་བར་གྱོད་གཞི་ཁག་དང་འབྲེལ་བའི་རྒྱུ་ནོར་ཕྱིར་རྩིས་སྤྲོད་དང་མཉམ་དུ་སྐྱེལ་ཀའང་སྤྲོད་དགོས་པའི་ཉེས་ཆད་བཏང་ཡོད་སྐོར་བསྒྲགས་འདུག

དམར་ཤོག་ཚོགས་པའི་གཏན་འབེབས་དོན་ཚན་བརྒྱད་ཀྱི་དགོངས་དོན་ཟེར་བའི་ནང་། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དོན་འཁྱིལ་གཏིང་ཟབ་བྱེད་པ་དང་། སྤྱོད་གཙང་རང་གཅུན་གྱི་གཏན་འབེབ་ཁག་ལག་བསྟར་ནན་པོ་བྱེད་པ། མུ་མཐུད་སྤྱོད་ཚུལ་ངན་པ་བཞིར་ངོ་རྒོལ་གཏིང་ཟབ་བྱེད་པ། ནན་པོ་མེད་པ་དང་དྲང་པོ་མེད་པའི་གནད་དོན་ཐག་གཅོད་ཤུགས་ཆེན་བྱེད་པ། ཀྲུང་གོ་གུང་ཁྲན་ཏང་གི་སྤྱོད་གཙང་རང་གཅུན་གྱི་རྩ་འཛིན་ཞེས་པ་དང་། ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག་སློབ་སྦྱོང་དང་དྲིལ་བསྒྲགས་གཏིང་ཟབ་བྱས་ནས། ཏང་ཡོན་ལས་བྱེད་པས་རང་རྟོག་ངང་སྤྱོད་གཙང་རང་གཅུན་ཐོག་ཚད་གཞི་མཐོན་པོ་བརྩོན་ལེན་བྱེད་པ་དང་། ཏང་གི་སྒྲིག་ཁྲིམས་སྲུང་བའི་ཐད་སྒྲིག་འགལ་གྱི་དམར་ཐིག་ལས་མི་བརྒལ་བ་བྱ་རྒྱུར་ཁྲིད་སྟོན་བྱེད་པ། ཏང་ཡོན་ལས་བྱེད་པ་པས་གཙང་བཀུར་རུལ་འགོག་ཀྱི་སྣེ་མང་ཙམ་ཁྲིད་པ། ཁྱིམ་སྲོལ་ཡག་པོ་འཛུགས་པ། དུས་ཆེན་གྱི་རུལ་སུངས་མཐའ་གཅིག་ཏུ་བཀག་འགོག་བཅས་བྱ་དགོས། ཞེས་བཀོད་འདུག

ཏང་ཡོན་ལས་བྱེད་པས་ལོ་གསར་སྐབས་བྱེད་མི་ཆོག་པ་བརྒྱད་ནི། གཅིག སྒྲིག་སྲོལ་ལས་འགལ་ཏེ་གཞུང་དངུལ་སྤྱད་ནས་བཟའ་བཏུང་དང་། ཡུལ་སྐོར། མཐོ་རིམ་འཛད་སྤྱོད་རོལ་རྩེད་ལུས་སྦྱོང་བྱེད་སྒོར་ཞུགས་གཏན་ནས་མི་ཆོག་པ་དང་། གཉིས། གཞུང་དངུལ་སྤྱད་ནས་ལོ་གསར་རྟེན་འབྲེལ་གཱ་ཤོག་དང་ཤོག་སྦག་སོགས་ལོ་ཟོག་གཏན་ནས་ཉོས་མི་ཆོག་པ། གསུམ། གཞུང་དངུལ་སྤྱད་ནས་སྣེ་ལེན་འཚམས་འདྲི་དང་ཡུལ་སྐོར་སོགས་གཞུང་དོན་མ་ཡིན་པའི་བྱེད་སྒོ་གཏན་ནས་སྤེལ་མི་ཆོག་པ། བཞི།གཞུང་འཁོར་སྒེར་སྤྱོད་དམ་ཡང་སྒེར་འཁོར་གཞུང་གསོའི་རིགས་གཏན་ནས་བྱས་མི་ཆོག་པ། སྒྲིག་སྲོལ་ལས་འགལ་ནས་ལག་རྟགས་དངོས་པོ་དང་། དངུལ། འཛད་སྤྱོད་གཱ་ཤོག་སོགས་གཏན་ནས་ལེན་མི་ཆོག་པ། དྲུག སྒེར་གྱི་སྤྲོ་རྩེད་འདུ་ཁང་ནང་གཏན་ནས་འཛུལ་མི་ཆོག་པ། བདུན། སྒྲིག་སྲོལ་ལས་འགལ་བའི་ཐོག་ནས་གཉེན་སྟོན་དང་འདས་མཆོད་སོགས་ལ་ཁ་གཡར་ནས་རྒྱུ་ནོར་ལེན་ཐབས་གཏན་ནས་བྱས་མི་ཆོག་པ། བརྒྱད། ཡུལ་གྲོགས་འདུ་ཚོགས་དང་། སློབ་གྲོགས་འདུ་ཚོགས། འཐབ་གྲོགས་འདུ་ཚོགས་ལ་གཏན་ནས་ཞུགས་མི་ཆོག་པ་བཅས་རེད་འདུག

འདས་ལོའི་ཕྱི་ཟླ་ ༥ ནང་ལྷོ་ཁ་གྲོང་ཁྱེར་ལྷུན་རྩེ་རྫོང་ལྷུན་རྩེ་གྲོང་རྡལ་མི་དམངས་སྲིད་གཞུང་གི་རྩིས་པ་བཀྲ་ཤིས་ནོར་བུ་ཡིས། རྒྱ་སྒོར་ཁྲི་ ༦༢༠ ཙམ་ཧམ་བཟུང་བྱས་པའི་ནག་ཉེས་འོག བོད་རང་སྐྱོང་ལྗོངས་ལྷོ་ཁ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། བོད་རིགས་མགོ་ཁྲིད་བཀྲ་ཤིས་ནོར་བུར་ལོ་ ༡༢ བཙོན་འཇུག་ཁྲིམས་ཐག་དང་། རྒྱ་སྒོར་ཁྲི་ ༡༨༠ ཆད་པ་བཅད་ཡོད་སྐོར་བསྒྲགས། ཕྱི་ལོ་ ༢༠༢༠ ཟླ་ ༨ པའི་ནང་རྒྱ་ནག་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་མཇུག་བསྒྲིལ་རྗེས། བོད་རང་ལྗོངས་ཟེར་བའི་ནང་རྒྱ་རིགས་མགོ་འཁྲིད་ཇེ་མང་དུ་བཏང་སྟེ་བོད་རིགས་མགོ་འཁྲིད་ཀྱི་གྲངས་འབོར་ཧ་ཅང་ཉུང་དུ་བཏང་ཡོད།