སྤྱི་ཚོགས་དྲ་ལམ་དུ་སྲིད་གཞུང་གི་མགོ་འཁྲིད་དང་ལས་བྱེད་ཚོར་སྐྱོན་བརྗོད་བྱས་པའི་ཉེས་མིང་འོག་བོད་འདམ་གཞུང་རྫོང་ཁོངས་ནས་དབྱངས་སྒྲོན་ཞེས་པའི་བོད་རིགས་བུད་མེད་ཅིག་གློ་བུར་དུ་འཛིན་བཟུང་བྱས་ཏེ་གང་དུ་ཡོད་མེད་ཙམ་ཡང་ཤེས་རྟོགས་མ་ཐུབ་པར་ལྷག་འདུག
ཟླ་འདིའི་ཕྱི་ཚེས་ ༡༥ ཙམ་ལ་དབྱངས་སྒྲོན་ལགས་འདམ་གཞུང་རྫོང་ཐོག་ཏུ་ཅ་དངོས་ཉོ་བར་ཕྱིན་སྐབས། རྫོང་ཐོག་ནས་གློ་བུར་དུ་འཛིན་བཟུང་ཉེན་རྟོག་པ་འགས་བཀག་སྟེ་འཛིན་བཟུང་བྱས་ཡོད་པ་དང་། འབྲེལ་ཡོད་ནས་བརྗོད་པ་ལྟར་ན། དབྱངས་སྒྲོན་ལགས་ནས་སྤྱི་ཚོགས་དྲ་ལམ་དུ་དེང་སྐབས་རྒྱ་ནག་གཞུང་གི་མགོ་འཁྲིད་དང་ལས་བྱེད་ཚོས་དབང་ཆ་བེད་སྤྱོད་བྱས་ནས་བོད་མི་ཚོ་ལ་དཀའ་ངལ་འཕར་མ་བཟོ་བཞིན་ཡོད་པའི་སྐོར་གྱི་གནས་ཚུལ་སྤེལ་ཡོད་པའི་ཉེས་མིང་གཡོགས་ཡོད་འདུག
ཁོང་མོ་འཛིན་བཟུང་བྱས་ནས་བདུན་ཕྲག་གཅིག་ཙམ་འགྲོ་བཞིན་ཡོད་ཀྱང་གང་དུ་ཡོད་མེད་ཙམ་ཡང་ཤེས་རྟོགས་ཐུབ་ཀྱི་མེད་སྟབས། ཁོང་མོའི་བཟའ་ཟླ་དང་ནང་མི་རྣམས་རྫོང་ཉེན་རྟོག་ཁང་དུ་ཐེངས་མང་ཕྱིན་ཏེ་སྐད་ཆ་འདྲི་སྐབས་བརྡ་ལན་གང་ཡང་སྤྲད་མེད་པ་མ་ཟད། ཡང་ནས་ཡང་དུ་ཉེན་རྟོག་ཁང་ལ་ཡོང་ནས་སུན་པོ་བཟོ་མི་ཆོག་པའི་ཉེན་བརྡ་བཏང་ཡོད་འདུག
ཡང་འདི་གའི་གནས་ཚུལ་མཁོ་སྤྲོད་པས། སྤྱི་ཚོགས་དྲ་ལམ་དུ་མི་མང་གིས་བསམ་ཚུལ་བཤད་པ་ལ་བརྟེན་ནས་མང་པོ་ཞིག་འཛིན་བཟུང་དང་བཀག་ཉར། ཉེས་ཆད་བཅད་ཡོད་པ་རེད། ང་རང་གིས་ཤེས་པ་དེ་ཚོ་རེ་རེ་བཞིན་བཤད་ན་སྟབས་བདེ་མི་འདུག་ཀྱང་། དཔེར་ན། དགེ་རྒན་དང་སྨན་ཞབས་པ་སོགས་མང་པོ་བཟུང་ཚར་རེད། དེ་ཚོའི་རིགས་ཀྱིས་སྲིད་གཞུང་གི་འགན་འཁུར་སྟངས་དང་ལས་ཀ་བྱེད་སྟངས་རྣམས་དངོས་སུ་མཐོང་གི་ཡོད་པ་རེད་ལ། དངོས་སུ་མཐོང་དུས་སེམས་ཀྱིས་མ་བཟོད་པར་ཕྱི་ལ་བཤད་ཡོང་གི་ཡོད་པ་རེད།ཅེས་བརྗོད་བྱུང་།
དབྱངས་སྒྲོན་ལགས་ཀྱིས་སྲིད་གཞུང་གི་མགོ་འཁྲིད་དང་ལས་བྱེད་ཚོས་ས་གནས་བོད་མི་ཚོར་དཀའ་ངལ་འཕར་མ་བཟོ་བཞིན་ཡོད་སྐོར་གྱི་གནས་ཚུལ་དེ་སྤྱི་ཚོགས་དྲ་ལམ་དུ་སྤེལ་རྗེས། མི་མང་མང་པོས་ཁོང་མོས་བཤད་པ་དེ་དངོས་ཡོད་གནས་ཚུལ་ཡིན་ལུགས་བརྗོད་དེ་རྒྱབ་སྐྱོར་བྱས་ཡོད་འདུག་ལ། དེ་སྔོན་ཁྱིམ་སྡོད་བཀའ་རྒྱའི་སྐབས་སུ་དབྱངས་སྒྲོན་ལགས་དང་ཁོང་གི་བཟའ་ཟླ་རིན་ཆེན་བཀྲ་ཤིས་གཉིས་ཀྱིས་རང་ཉིད་ཀྱི་བདེ་འཇགས་ལ་མ་འཛམས་པར་ས་གནས་མི་མང་ལ་བཟའ་འབྲུ་སོགས་ཀྱིས་རོགས་རམ་མང་པོ་བྱས་ཡོད་འདུག
དབྱངས་སྒྲོན་ལགས་ཀྱིས་འདམ་གཞུང་རྫོང་དམའ་འབྲིང་དུ་སློབ་སྦྱོང་བྱས་ཡོད་པ་དང་། དེ་ནས་བོད་ལྗོངས་མི་རིགས་དགེ་ཐོན་སློབ་གྲྭ་ཆེན་མོ་ནས་སློབ་མཐར་ཕྱིན་ཡོད་འདུག ད་ལྟ་བོད་རང་སྐྱོང་ལྗོངས་ཟེར་བའི་འདམ་གཞུང་རྫོང་དུ་ཉི་འོད་ཟ་ཁང་ཞེས་པ་ཞིག་སྒོ་ཕྱེ་ནས་ལོ་གཅིག་ལྷག་འགྲོ་བཞིན་ཡོད་པ་དང་། ཁོང་གི་བཟའ་ཟླ་རིན་ཆེན་བཀྲ་ཤིས་ལགས་ནི་འདམ་གཞུང་རྫོང་ཁོངས་ཀྱི་སློབ་གྲྭ་ཞིག་གི་དགེ་རྒན་ཡིན་ཞིང་། ཁོང་གཉིས་ལ་ཕྲུ་གུ་གཉིས་ཡོད་འདུག
གཞན་ཡང་། ཉེ་སྔོན་དཀར་མཛེས་དཔལ་ཡུལ་རྫོང་ནས་ཡིན་པའི་བོད་མི་གཉིས་ཀྱིས། དཔལ་ཡུལ་རྫོང་གི་ལས་བྱེད་ཚོས་ལས་དོན་ཡག་པོ་སྒྲུབ་ཀྱི་མེད་པའི་སྐྱོན་བརྗོད་བྱས་པའི་རྐྱེན་གྱིས། བོད་མི་དེ་གཉིས་ལ་རྒྱ་སྒོར་ ༡༠༠༠ རེས་ཉེས་ཆད་བཅད་ཡོད་འདུག གནས་ཚུལ་མཁོ་སྤྲོད་པས་བརྗོད་ན། དཔལ་ཡུལ་རྫོང་གིས་ལས་བྱེད་མི་སྣ་ཆེད་གཏོང་བྱས་ཏེ་ས་གནས་ཀྱི་ཁྱིམ་ཚང་རེ་རེ་བཞིན་སྒོ་རྡུང་ནས་ཏོག་དབྱིབས་ནད་ཡམས་དང་འབྲེལ་བའི་ལས་དོན་བྱེད་ཕྱོགས་འགྲིག་གི་ཡོད་མེད་སྐོར་འདྲི་རྩད་བྱེད་བཞིན་ཡོད་པ་དང་། སྐབས་དེར་ངེས་པར་དུ་ལས་དོན་ཡག་པོ་བྱེད་ཀྱི་འདུག་ཅེས་བརྗོད་དགོས་ཀྱི་ཡོད་སྐོར་དང་། གོང་བརྗོད་བོད་མི་དེ་གཉིས་ནས་ལས་བྱེད་པས་ལས་ཀ་ཡག་པོ་བྱེད་ཀྱི་མེད་པའི་སྐྱོན་བརྗོད་བྱས་རྐྱེན་ཉེས་ཆད་བཅད་ཡོད་སྐོར་བརྗོད་བྱུང་།
