བོད་མཚོ་སྔོན་ཞིང་ཆེན་ཁུལ་དུ་ཏོག་དབྱིབས་ཀྱི་ཐེམ་སྤང་བཀག་རྒྱ་ལག་བསྟར་ནན་པོ་བྱས་ཏེ་ཉིན་གསུམ་ནང་དུད་ཚང་གཅིག་གི་མི་གཅིག་བཟའ་བཅས་ཉོ་རུ་གཏོང་གི་འདུག
རྨ་ལྷོ་ཁུལ་ཏོག་དབྱིབས་ནད་ཡམས་འགོག་སྡོམ་ལས་དོན་ཚོགས་ཆུང་ཞེས་པ་དེས། ཁ་སང་ཕྱི་ཚེས ༢༠ ཉིན་རེབ་གོང་གྲོང་ཁྱེར་དུ་མི་གཅིག་དང་། རྩེ་ཁོག་རྫོང་དུ་མི་གྲངས་ ༡༣ ལ་གསར་དུ་ཏོག་དབྱིབས་གཉན་རིམས་འགོས་ཡོད་པའི་གསལ་བསྒྲགས་བྱས་ཡོད་པ་ལྟར། དེ་རིང་ཕྱི་ཚེས་ ༢༡ ནས་བཟུང་རེབ་གོང་གྲོང་ཁྱེར་ཡོངས་སུ་ཤར་ལྷོ་ནུབ་བྱང་གི་དབྱེ་བ་ཕྱེས་ཏེ་ཐེམ་སྤང་བཀག་རྒྱ་ལག་བསྟར་བྱེད་བཞིན་ཡོད་འདུག
ཁ་སང་ཕྱི་ཚེས་ ༢༠ ཉིན་རེབ་གོང་གྲོང་ཁྱེར་ཁྲོམ་ར་ལྟ་སྐུལ་དོ་དམ་ཚོགས་ཆུང་ཟེར་བས་ཐེམ་སྤང་སྐབས་ཀྱི་ཅ་དངོས་ཉོ་སྒྲུབ་སྐོར་གྱི་གསལ་བསྒྲགས་ནང་དུ། རེབ་གོང་གྲོང་ཁྱེར་གྱི་སྒོ་རྩིས་ཚོང་ཁང་ ༢༥ དང་། སྨན་རྫས་ཚོང་ཁང་ ༡༢ ། ཤ་འཚོང་ཁང་ ༨། ཐུག་པ་དང་གོ་རེ་ཚོང་ཁང་ ༡༣ ། ཟ་ཁང་ ༡༠ ། འབྲུ་སྣུམ་ཚོང་ཁང་ ༦ ། སྔོ་ཚལ་ཚོང་ཁང་ ༤༧ ཡི་སྒོ་ཕྱེ་ཡི་ཡོད་པ་དང་། སྐབས་དེར་བྱེད་མི་ཆོག་པ་སོགས་ཀྱི་དོན་ཚན་ ༧ བསྒྲགས་པའི་ནང་དུ། དངོས་རྫས་ཉོ་སྒྲུབ་དཔང་ཡིག་འཁྱེར་ནས་ཉོ་བ་དགོས་པ་མ་ཟད། ཁྱིམ་ཚང་གཅིག་ནས་ཉིན ༣ རེའི་ནང་མི་གཅིག་བཀོད་སྒྲིག་བྱས་ཏེ་ཐེངས་གཅིག་ལ་ཉོ་ཚོང་བྱེད་དུ་སོང་ཆོག་པ་དང་། དངོས་པོ་ཉོས་རྗེས་མྱུར་ཏུ་རང་གི་འདུག་གནས་སུ་འགྲོ་བ་དང་ལམ་བར་ནས་འགོར་འགྱངས་བྱ་མི་ཆོག ཅེས་དང་། གྲོང་ཁྱེར་ཁྲོམ་ར་ལྟ་སྐུལ་དོ་དམ་ཚོགས་ཆུང་ཞེས་པ་དེས་སྒོ་ཕྱེ་དགོས་པའི་ཚོང་ཁང་སྟངས་འཛིན་བྱ་རྒྱུ་ཡིན་སྐོར་སོགས་བརྗོད་འདུག
འདི་གར་ཁུངས་ལྡན་གནས་ཚུལ་འབྱོར་བ་ལྟར་ན། སྒ་སྐྱེ་རྒུ་མདོ་ཡོང་ཤ་སྡེ་བ་ནས་ཡིན་པའི་རང་ལོ་ ༦༠ ལྷག་ཡིན་པའི་གངས་བློ་ཞེས་པའི་སྐྱེས་པ་ཞིག་ཟླ་འདིའི་ཕྱི་ཚེས ༡༨ ཉིན་གློ་བའི་ནད་གཞིའི་རྐྱེན་པས་ཟི་ལིང་གྲོང་ཁྱེར་དུ་སྨན་པར་སྟོན་དུ་ཕྱིན་ཏེ་ཕྱིར་ལོག་ཡོང་སྐབས་ལམ་བར་ནས་འདས་གྲོངས་སུ་ཕྱིན་ཡོད་པ་དང། ཁོང་གི་ནང་མི་ཚོས་ཕུང་པོ་འཁྱེར་ཏེ་ཁྲི་ཀ་རུ་བསླེབས་སྐབས། ས་གནས་ཉེན་རྟོག་པས་མི་དེ་ཏོག་དབྱིབས་གཉན་རིམས་ཀྱིས་གྲོངས་ཡོད་སྐོར་བརྗོད་དེ། ཕུང་པོ་བཙན་འཕྲོག་བྱས་ནས་ཁང་པ་སྟོང་པ་ཞིག་གི་ནང་བཞག་སྟེ་མཐའ་ཚང་མ་ཐག་པས་བསྐོར་ཡོད་པ་མ་ཟད། དེ་རིང་ཕྱི་ཚེས་༢༡ ཉིན་གྱི་སྔ་དྲོར་ཕུང་པོ་གད་སྙིགས་བླུག་སའི་ཁང་པ་ཞིག་ནང་གཡུགས་ཏེ་མེར་སྲེག་ཡོད་སྟབས། འདས་པོའི་ནང་མི་ཚོས་ཏོག་དབྱིབས་ཀྱིས་གྲོངས་བ་མིན་པའི་འགྲེལ་བཤད་ག་ཚོད་བྱས་ཀྱང་ཕན་ཐོགས་བྱུང་མེད་འདུག
འདི་ལོའི་ཕྱི་ཟླ་ ༡༠ ཚེས་ ༢༡ ཙམ་ནས་བཟུང་བོད་མཚོ་སྔོན་ཞིང་ཆེན་གྱི་ལྟེ་གནས་གྲོང་ཁྱེར་ཟི་ལིང་སོགས་སུ་བསྐྱར་དུ་ཏོག་དབྱིབས་གཉན་རིམས་འགོས་ཁྱབ་བྱུང་སྟེ་སྐུ་འབུམ་དང་། གསེར་ཁོག་རྫོང་། སྟོང་སྐོར་རྫོང་སོགས་སུ་ཐེམ་སྤང་བཀག་རྒྱ་ལག་བསྟར་བྱེད་བཞིན་ཡོད་ཅིང་། ཟུར་བཀག་ཁང་དུ་འཚོ་བ་དང་སྨན་བཅོས་ཀྱི་མཐུན་རྐྱེན་ཞན་པའི་རྐྱེན་གྱིས་མི་མང་པོ་མཚན་མོར་བྲོས་བྱོལ་དུ་འགྲོ་བཞིན་ཡོད་སྐོར་གྱི་བརྙན་ཐུང་ཁག་ཅིག་ཀྱང་དྲ་ལམ་དུ་བསླེབས་སོང་། ཟླ་འདིའི་ཕྱི་ཚེས་ ༡༨ ཉིན་གྱི་གནས་ཚུལ་ལྟར་ན། ཉིན་དེར་ནད་པ་གསར་པ་ ༥༤༩ དང་། ཟི་ལིང་གྲོང་ཁྱེར་ཡོངས་སུ་ཏོག་དབྱིབས་འགོས་པའི་མི་གྲངས་ ༤༤༣༩ ཡོད་སྐོར་བསྒྲགས་འདུག
