ཨོ་གླིང་གཞུང་ནས་རྒྱ་ནག་གཞུང་ལ་༧གོང་ས་མཆོག་གི་མ་འོངས་ཡང་སྲིད་སྐོར་ལ་ཐེ་གཏོགས་བྱེད་པའི་འགན་དབང་ཅི་ཡང་མེད་པའི་སྲིད་ཇུས་གཏན་འབེབ་གནང་བའི་འབོད་སྐུལ་ཞུས་འདུག
ཟླ་འདིའི་ཕྱི་ཚེས་ ༢༡ ཉིན་ཨོ་གླིང་གི་རྒྱལ་ས་ཁཱན་བྷེ་རཱ་(Canberra)ནང་དུ་བོད་དོན་ལྷན་ཚོགས་(Tibet council) དང་ས་གནས་བོད་མིའི་མཉམ་འབྲེལ་གྱི་གོ་སྒྲིག་འོག་ཏུ། ཨོ་གླིང་ནང་དུ་ཐེངས་ ༡༡ པའི་བོད་དོན་ཞུ་གཏུག་གི་ཉིན་མོར་འདུ་འཛོམས་ཀྱིས་ལས་འགུལ་སྤེལ་ཡོད་ཅིང་། ཐེངས་འདིར་ཨོ་གླིང་གྲོས་ཚོགས་གོང་འོག་གི་འཐུས་མི་ ༣༠ ཙམ་དང་། སྲིད་དོན་ཚོགས་པ་ཁག་ཏུ་༧གོང་ས་མཆོག་གི་མ་འོངས་བའི་ཡང་སྲིད་སྐོར་ལ་རྒྱ་ནག་གཞུང་གིས་ཐེ་གཏོགས་ཅི་ཡང་མི་བྱེད་པའི་སྲིད་ཇུས་གཏན་འབེབ་གནང་བའི་རེ་སྐུལ་ཞུས་ཡོད་ཅིང་། ཐེངས་འདིའི་བོད་དོན་ཞུ་གཏུག་ལས་འགུལ་ནང་དུ་ཨོ་གླིང་སྐུ་ཚབ་དོན་གཅོད་ཀརྨ་སེངྒེ་ལགས་དང་། བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་བཅས་བོད་མི་གྲངས་ ༡༥ མཉམ་ཞུགས་གནང་ཡོད་འདུག
བོད་དོན་ཞུ་གཏུག་གི་ལས་འགུལ་སྐབས་ཨོ་གླིང་གི་གྲོས་ཚོགས་གོང་མའི་འཐུས་མི་ལྕམ་སྐུ་ཇེ་ནེ་ཌ་རི་སི་(Janet Rice) ལགས་ཀྱིས། བོད་མིའི་སྐུ་ཚབ་རྣམས་ཀྱིས་ཆབ་སྲིད་ཚོགས་པ་རིས་མེད་ཀྱི་གྲོས་ཚོགས་འཐུས་མི་དང་མཇལ་འཕྲད་གནང་སྟེ་བོད་ནང་གི་ཞི་བདེ་དང་རང་དབང་། འགྲོ་བ་མིའི་ཐོབ་ཐང་གི་ཆེད་དུ་ཞུ་གཏུག་གནང་ཡོད་པས། བོད་དོན་ཞུ་གཏུག་གི་ཉིན་མོ་འདི་ནི་ཧ་ཅང་གལ་གནད་ཆེ་བའི་ཉིན་མོ་ཆགས་ཡོད་ཅེས་གསུངས་ཡོད་པ་དང་། བོད་མིའི་སྐུ་ཚབ་རྣམས་ཀྱི་ཞུས་དོན་ལྟར་ཁོང་མོས་ཀྱང་བོར་བརླག་སོང་བའི་༸པཎ་ཆེན་སྐུ་ཕྲེང་བཅུ་གཅིག་པའི་གནས་སྟངས་ལ་ཐུགས་འཚབ་བསྟན་པ་མ་ཟད། ༸གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་ཐོག་རྒྱ་ནག་གཞུང་གིས་ཐེ་གཏོགས་བྱེད་སྲིད་སྐོར་བརྗོད་ཡོད་འདུག
དེ་བཞིན་ལྕམ་ཇེ་ནེ་ཌ་རི་སི་ལགས་ཀྱིས། དེང་སྐབས་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༠ ལྷག་སོན་ཡོད་པ་རེད། བོད་མི་རིགས་ཀྱི་ཡུལ་སྲོལ་གོམས་གཤིས་དང་། རིག་གཞུང་། ནང་བསྟན་རིག་པ་བཅས་གཉན་འཕྲེང་གི་ནང་དུ་ཡོད། བོད་ནང་དུ་༧གོང་ས་མཆོག་རྒྱལ་བ་རིན་པོ་ཆེ་མཆོག་གི་སྐུ་པར་བཏགས་པའམ། ཁྱིམ་དུ་ཉར་འཇོག་བྱས་པ་ཙམ་གྱིས་སྡིག་རྩུབ་མནར་གཅོད་དང་བཙོན་འཇུག་གི་ཉེས་ཆད་གཅོད་ཀྱི་ཡོད། ཅེས་དང་། ཁོང་མོའི་སྲིད་དོན་ཚོགས་པ་དང་ཨོ་གླིང་གཞུང་གིས་དྲང་བདེན་གྱིས་གང་ཞིག་ཏུ་འགྲོ་བ་མིའི་ཐོབ་ཐང་རྩིས་མེད་རྡོག་རུལ་གཏོང་བཞིན་ཡོད་ན་དེ་སྲུང་སྐྱོབ་བྱེད་པའི་འགན་ལེན་ཤུགས་ཆེན་བྱེད་ཀྱི་ཡོད། ཨོ་གླིང་གཞུང་ནས་རྒྱ་གཞུང་གིས་བོད་བརྒྱུད་ནང་བསྟན་གྱི་ལུགས་སྲོལ་ལ་ཐེ་གཏོགས་ཀྱི་ཤུགས་རྐྱེན་སྤྲོད་བཞིན་པར་དགག་པ་རྒྱག་དགོས་པ་དང་། བོད་བརྒྱུད་ནང་བསྟན་གྱི་ལུགས་སྲོལ་ལྟར་ངོས་འཛིན་ཞུས་པའི་༧གོང་ས་མཆོག་གི་ཡང་སྲིད་གཅིག་པོར་ངོས་འཛིན་གནང་དགོས་པའི་འབོད་སྐུལ་ཞུ་རྒྱུ་ཡིན། དེ་དང་འབྲེལ་ནས་དེ་རིང་ངས་གྲོས་གཞི་ཞིག་བཏོན་ཡོད་པ་དང་། གྲོས་གཞི་འདི་ངས་མུ་མཐུད་ཨོ་གླིང་གྲོས་ཚོགས་ནང་ཐབས་ལམ་ཡོད་རྒུ་ཐོག་ནས་གླེང་སློང་ཞུ་རྒྱུ་ཡིན། ཞེས་གསུངས་འདུག
ཐེངས་འདིའི་བོད་དོན་ཞུ་གཏུག་ཉིན་མོ་དང་བསྟུན་ནས་བོད་དོན་ལྷན་ཁང་གིས་ཨོ་གླིང་མི་མང་གྲངས་ ༡༠༠༠ ལྷག་གིས་ཁས་ལེན་དམ་འབུལ་གྱི་ཐོག་ནས་མཚན་རྟགས་བསྡུ་རུབ་པར་རིས་དང་། ༧གོང་ས་མཆོག་གི་མ་འོངས་ཡང་སྲིད་ནི་བོད་བརྒྱུད་ནང་བསྟན་གྱི་ལུགས་སྲོལ་ལྟར་ངོས་འཛིན་ཞུ་རྒྱུ་ཁོ་ན་ལས། རྒྱ་གཞུང་གིས་ཐེ་གཏོགས་ཅི་ཡང་མི་བྱེད་པའི་འབོད་སྐུལ་གྱིས་ཏེ་ལས་འགུལ་སྤེལ་ཡོད་འདུག་ལ། འབོད་སྐུལ་ཞུ་ཡིག་ནང་དུ། རྒྱ་ནག་གཞུང་གིས་ཐབས་བརྒྱ་ཇུས་སྟོང་གིས་བོད་བརྒྱུད་ནང་བསྟན་གྱི་ཡང་སྲིད་ལུགས་སྲོལ་སྐོར་ལ་སྟངས་འཛིན་གྱིས་ཁྲིམས་མཐུན་ཡིན་པའི་ཆེད་དུ་འབད་བརྩོན་བྱེད་བཞིན་ཡོད་པ་རེད། དེ་ནི་༧གོང་ས་མཆོག་གི་མ་འོངས་བའི་ཡང་སྲིད་སྟངས་འཛིན་བྱེད་པའི་འཆར་གཞི་ཞིག་ཡིན་པས། ང་ཚོས་ངོས་ལེན་བྱེད་རྒྱུ་མིན། ཨ་རིའི་གཞུང་གིས་༧གོང་ས་མཆོག་གི་ཡང་སྲིད་ནི་བོད་པ་གཅིག་པོས་ངོས་འཛིན་བྱེད་དགོས་པའི་སྲིད་ཇུས་གཏན་འབེབས་བྱས་ཡོད་པ་བཞིན་དུ། ཨོ་གླིང་གཞུང་གིས་ཀྱང་གཅིག་མཚུངས་ངོས་ལེན་ཞུ་དགོས་ཀྱི་འདུག ཅེས་འཁོད་འདུག
བོད་དོན་ཞུ་གཏུག་གི་ཉིན་མོ་ནི་ཨོ་གླིང་གི་རྒྱལ་ས་ཁཱན་བྷེ་ར་རུ་ལོ་ལྟར་བོད་དོན་ལྷན་ཁང་དང་ས་གནས་བོད་རིགས་མི་མང་གིས་གོ་སྒྲིག་བྱེད་བཞིན་པའི་གལ་གནད་ཅན་གྱི་འདུ་འཛོམས་ལས་འགུལ་ཞིག་ཡིན་འདུག་ལ། ལོ་ལྟར་ཉིན་དེར་རྒྱ་ནག་གཞུང་གིས་བོད་ནང་དུ་མནར་གཅོད་གཏོང་མུས་ཡིན་པའི་ཛ་དྲག་གི་གནས་སྟངས་དང་བོད་ཀྱི་གནད་དོན་དེ་ཨོ་གླིང་གྲོས་ཚོགས་དང་སྲིད་དོན་ཚོགས་པ་བཅས་སུ་ཞུ་གཏུག་བྱེད་ཀྱི་ཡོད་འདུག
བྱམས་པ་ཚེ་རིང་།
