༧གོང་ས་རྒྱལ་བ་རིན་པོ་ཆེ་མཆོག་གིས་མཱ་ལེ་ཤི་ཡའི་སྲིད་བློན་གསར་པ་ཨན་ཝར་ཨིབ་ར་ཧིམ་ལགས་སུ་འཚམས་འཕྲིན་སྩལ།
ཁ་སང་ཕྱི་ཚེས་ ༢༤ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ཞབས་ཨན་ཝར་ཨིབ་ར་ཧིམ་ (Anwar Ibrahim) ལགས་མཱ་ལེ་ཤི་ཡའི་ (Malaysia) སྲིད་བློན་དུ་འོས་འདེམས་བྱུང་བར་འཚམས་འཕྲིན་སྩལ་ཏེ། མཱ་ལེ་ཤི་ཡའི་ཡར་རྒྱས་མུ་མཐུད་ཕུན་སུམ་ཚོགས་པ་ཡོང་བའི་སྨོན་འདུན་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གིས་འཚམས་འཕྲིན་སྩལ་བའི་ནང་། ཕྱི་ལོ་ ༡༩༨༢ ལོར་ངོས་ལ་ཞི་བདེ་དང་འཛམ་གླིང་སྤྱི་ཡོངས་ཀྱི་འགན་འཁྲིའི་སྐོར་གཏམ་བཤད་གནང་རྒྱུའི་མགྲོན་འབོད་གནང་བ་ལྟར། ངོས་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ནང་བསྐྱོད་རྒྱུའི་གོ་སྐབས་བྱུང་བར་དགའ་ཚོར་ཆེན་པོ་བྱུང་ལ། ད་དུང་སྲིད་བློན་དམ་པ་སྐུ་ཞབས་ཊན་ཀུ་ཨབ་དྷུལ་རེ་མན་ (Tunku Abdul Rahman) ལགས་གཙོས་པའི་ཡུལ་དེའི་གནད་ཡོད་མི་སྣ་གཞན་ཁག་དང་ལྷན་དུ་བསམ་ཚུལ་བརྗེ་ལེན་བྱ་རྒྱུའི་གོ་སྐབས་བྱུང་བར་དགའ་ཚོར་ཆེན་པོ་བྱུང་། ཅེས་གསུངས།
ཡང་༧མགོན་པོ་མཆོག་གིས། ད་ལྟའི་དཀའ་ཚེགས་ཆེ་བའི་དུས་སྐབས་འདིར། མཱ་ལེ་ཤི་ཡ་མུ་མཐུད་ཡར་རྒྱས་ཕུན་སུམ་ཚོགས་པ་དང་། ཕན་ཚུན་གཅིག་ལ་གཅིག་རྟེན་གྱི་འདུ་ཤེས་ཇེ་ཟབ་ཏུ་འགྲོ་བཞིན་པའི་འཛམ་གླིང་ཞི་བདེ་དང་སྲ་བརྟན་ཡོང་བར་ཞབས་འདེགས་རླབས་ཆེན་བསྒྲུབ་ཐུབ་པར་ངོས་ནས་རེ་བ་བྱེད་ཀྱི་ཡོད། སྐུ་ཉིད་ཀྱིས་འབྱུང་འགྱུར་མཱ་ལེ་ཤི་ཡའི་མི་མང་གི་རེ་བ་དང་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་གདོང་ལེན་གནང་ཐུབ་པའི་སྨོན་འདུན་ཡོད། ཅེས་གསུངས།
ཕྱི་ལོ་ ༡༩༤༧ ཟླ་ ༨ ཚེས་ ༡༠ ཉིན་ཨན་ཝར་ཨིབ་ར་ཧིམ་ (Anwar bin Ibrahim) ལགས་མཱ་ལེ་ཤི་ཡའི་མངའ་སྡེ་པེ་ནང་ (Penang) གི་གྲོང་སྡེ་ (Cherok Tok Kun) དུ་སྐྱེས་ཤིང་། མཱ་ལེ་མཐོ་རིམ་སློབ་གྲྭ་ (Malay College Kuala Kangsar) ནས་འབྲིང་རིམ་སློབ་སྦྱོང་སྦྱངས་པ་དང་། མཱ་ལ་ཡ་གཙུག་ལག་སློབ་གཉེར་ཁང་ (University of Malaya) ནས་མཱ་ལའི་སྐད་ཡིག་གི་ཉེ་བའི་གཙུག་ལག་རབ་འབྱམས་པ་ཐོན། ཕྱི་ལོ་ ༡༩༧༤ ནས་ ༡༩༧༥ བར་བཙོན་ཁང་དུ་ཡོད་བཞིན་དུ་ཁོང་གིས་མཱ་ལེ་ཤི་ཡའི་མཐོ་རིམ་སློབ་གཉེར་ཁང་ (National University of Malaysia) ནས་གཙུག་ལག་རབ་འབྱམས་པའི་སློབ་མཐར་སོན། ཕྱི་ལོ་ ༡༩༨༢ ནས་ ༡༩༩༨ བར་ (Barisan Nasional) སྲིད་གཞུང་འོག་སྲིད་བློན་ཟུར་པ་ (Mahathir Mohamad) འོག་ནས་སྲིད་བློན་གཞོན་པ་དང་དཔལ་འབྱོར་བློན་ཆེན་ལ་སོགས་པའི་ཕྱག་ལས་གནང་བ་མ་ཟད། ཕྱི་ལོ་ ༢༠༠༨ ནས་ ༢༠༡༥ བར་དང་ཕྱི་ལོ་ ༢༠༢༠ ནས་ ༢༠༢༢ བར་དུ་ཁ་གཏད་ཚོགས་པའི་ཚོགས་གཙོ་ཐེངས་ ༡༢ པ་དང་ཐེངས་ ༡༦ པའི་ཕྱག་ལས་གནང་མྱོང་ཡོད་པ་རེད། ཁ་སང་ཕྱི་ཚེས་ ༢༤ ཉིན་ཨན་ཝར་ཨིབ་ར་ཧིམ་ལགས་མཱ་ལེ་ཤི་ཡའི་སྲིད་བློན་གསར་པ་ཆགས་ཏེ་སྲིད་བློན་གྱི་དམ་འབུལ་ཞུས་ཟིན་འདུག
གསར་འགོད་པ། བསྟན་འཛིན་ཕུར་བུ།
