སཾ་བྷོ་ཊ་བོད་སློབ་ཚོགས་པའི་འགན་འཛིན་ཚོགས་འདུ་ཐེངས ༡༥ པའི་ཐོག་བོད་པའི་སློབ་གྲྭ་ཁག་གི་སློབ་མའི་ཤེས་ཡོན་དང་སློབ་ཁྲིད་སྤུས་ཚད་ཡར་རྒྱས་གཏོང་ཐབས། དེ་བཞིན་འཛིན་སྐྱོང་ཐད་སྔར་ལས་ཤུགས་གནོན་ཡོང་ཐབས་སོགས་ཀྱི་སྐོར་ལ་གོ་བསྡུར་གནང་བཞིན་འདུག
སཾ་བྷོ་ཊའི་ཁྱབ་ཁོངས་བོད་སློབ་ཁག་གི་ལོ་འཁོར་འགན་འཛིན་ཚོགས་འདུ་ ༡༥ པ་བསྡུས། ༢༠༢༢།༡༡།༢༨ དུས་བབ་ཀྱི་པར།
དེ་རིང་ཕྱི་ཚེས་ ༢༨ ཉིན་གྱི་ཞོགས་པའི་ཆུ་ཚོད་ ༩།༠༠ ཐོག་སཾ་བྷོ་ཊ་སྤྱི་ཁྱབ་ཡིག་ཚང་གི་གོ་སྒྲིག་འོག དྷ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་ཉིན་གཉིས་རིང་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་ཁག་གི་ལོ་འཁོར་འགན་འཛིན་ཚོགས་འདུ་ཐེངས་བཅོ་ལྔ་པ་མགོ་འཛུགས་གནང་སོང་བ་དང་། མཛད་སྒོའི་ཐོག་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་དང་། སཾ་བྷོ་ཊ་སྤྱི་ཁྱབ་འགན་འཛིན་ཚེ་རིང་དངོས་གྲུབ་ལགས་རྣམ་གཉིས་གཙོ་བོར་གྱུར་བའི་སློབ་ཁག་གི་འགན་འཛིན་མི་གྲངས ༣༢ མཉམ་ཞུགས་གནང་འདུག་ལ། སཾ་བྷོ་ཊ་སྤྱི་ཁྱབ་འགན་འཛིན་ཚེ་རིང་དངོས་གྲུབ་ལགས་ཀྱིས་ཐེངས་འདིའི་ཚོགས་འདུ་དང་འབྲེལ་བའི་ངོ་སྤྲོད་གནང་སྐབས། ཏོག་དབྱིབས་གཉན་རིམས་ཀྱི་སྐབས་སཾ་བྷོ་ཊ་ཁྱབ་ཁོངས་ཀྱི་འབྲེལ་ཡོད་དགེ་སློབ་ཡོངས་དང་ཕ་མ་རྣམས་ཀྱི་འཕྱར་གྲུ་མཉམ་འདེགས་དང་། ནུས་པ་མཉམ་སྤུངས་ལ་བརྟེན་ནས་དྲ་ལམ་འཛིན་གྲྭ་ཡག་པོ་འཚོགས་ཐུབ་ཡོད། ལོ་གཉིས་རིང་དྲ་ལམ་ནས་འཛིན་གྲྭ་འཚོགས་པ་དང་དངོས་སུ་འཛིན་གྲྭ་འཚོགས་པ་གཉིས་ལ་ཁྱད་པར་ཏན་ཏན་ཡོད་པ་རེད། ཏོག་དབྱིབས་རིམས་ནད་སྐབས་སློབ་སྦྱོང་ལ་འཐུས་ཤོར་ཡོད་པའི་སེམས་ཁྲལ་བསླེབས་ཀྱི་འདུག ཐེངས་འདིའི་ཚོགས་འདུའི་ཐོག་ཕལ་ཆེ་བ་སློབ་མའི་ཤེས་ཡོན་དང་འཛིན་གྲྭའི་ནང་གི་སློབ་ཁྲིད་བྱེད་ཕྱོགས་ཐོག་བགྲོ་གླེང་ལྷུག་པོ་གནང་རྒྱུ་ཡིན་ལ། སློབ་མའི་ཤེས་ཡོན་དང་སློབ་ཁྲིད་སྤུས་ཚད་ཡར་རྒྱས་གཏོང་རྒྱུ་ནི་སཾ་བྷོ་ཊའི་ལངས་ཕྱོགས་དང་པོ་ཡིན་པ་དང་། དེ་ནས་སློབ་མའི་འཕྲོད་བསྟེན་དང་བཟང་སྤྱོད་ཡར་རྒྱས་གཏོང་རྒྱུ་ནི་ལངས་ཕྱོགས་གཉིས་པ་ཡིན་སྐོར་དང་། སཾ་བྷོ་ཊ་དབུས་ས་གཉིས་ནས་འཛིན་སྐྱོང་ཚགས་ཚུད་ཡོང་བར་འབད་བརྩོན་བྱེད་རྒྱུ་ཡིན་སྐོར་སོགས་བརྗོད་སོང་།
མཛད་སྒོའི་ཐོག་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། ཕྱི་ལོ་ ༢༠༡༣ ནས་ཕྱི་ལོ ༢༠༢༡ བར་རིམ་པ་བཞིན་དབུས་བོད་སློབ་འཛིན་ཚོགས་ཀྱི་ཁྱབ་ཁོངས་སུ་ཡོད་པའི་སློབ་གྲྭ་དག་སཾ་བྷོ་ཊའི་བོད་སློབ་ཁོངས་སུ་བཞེས་པ་རེད། ཕྱི་ལོ ༢༠༠༣ ལོར་སློབ་གྲྭ་དེ་དག་ང་ཚོའི་ཁོངས་སུ་བཞེས་པའི་བཀའ་མོལ་བྱུང་སྐབས། བོད་སློབ་འཛིན་ཚོགས་ཀྱི་ཤེས་ཡོན་སྐྱོང་སྟངས་ཞན་པོ་ཡོད་པའི་ནང་མོལ་བྱུང་ཡོད་ཀྱང་། སློབ་གྲྭ་དེ་དག་ང་ཚོས་བླངས་པ་ཡིན་ན་དགེ་མཚན་ཆེ་བ་འདུག་ཟེར་གྱི་ཡོད། ད་ལྟའི་ཆར་ང་ཚོའི་ཁོངས་སུ་རྩིས་བཞེས་ཚར་བ་ཡིན་དུས་ད་དུང་མུ་མཐུད་དུ་ཡར་རྒྱས་མ་ཕྱིན་པར་བསྡད་པ་ཡིན་ན། ང་ཚོའི་དགོས་པ་དམིགས་ཡུལ་མ་འགྲུབ་པ་ཞིག་མཐོང་གི་ཡོད། སློབ་གསོའི་སྤུས་ཚད་ཐོག་ཤུགས་རྒྱག་གི་འདུག སྔོན་མ་འཛིན་གྲྭ་གཅིག་ལ་སློབ་ཕྲུག་ ༦༠ ཙམ་ཡོད་དུས། སློབ་སྦྱོང་གི་ཆ་རྐྱེན་དང་བཅས་པའི་མ་སྙོབས་པ་ཡོང་གི་རེད། ད་ཆ་འཛིན་གྲྭ་གཅིག་ནང་དུ་སློབ་ཕྲུག་ལྔ་དྲུག་མ་གཏོགས་མེད་པ་དེ་འདྲ་ཡང་ཡོད། འདི་འདྲའི་དུས་ཚོད་ལ་ང་ཚོའི་སློབ་གསོའི་ནུས་པ་སྤུངས་ས་ཚད་དང་ལྡན་པ་ཞིག་ཏུ་བཟོ་ཐུབ་པའི་ཆ་རྐྱེན་ཡོད་དུས། དགེ་རྒན་རྣམས་ཀྱི་སློབ་གསོའི་མ་དཔེ་ཡག་པོ་དེ་བླངས་ནས་སློབ་སྦྱོང་གི་སྤུས་ཚད་ཡག་ཏུ་གཏོང་དགོས་པ་གལ་ཆེན་རེད། ཞེས་དང་། ཤེས་རིག་ལས་ཁུངས་ཀྱི་ངོས་ནས་སློབ་གྲྭ་ཁག་གི་ཤེས་ཡོན་ཡར་རྒྱས་གཏོང་བའི་ལས་འཆར་ཐད་མཐུན་རྐྱེན་སྦྱོར་གྱི་ཡོད། བར་ལམ་ཤེས་རིག་ལས་ཁུངས་སུ་ཕུལ་བའི་ལས་འཆར་ཁག་འབྱོར་སྐབས། ཤེས་ཡོན་ཡར་རྒྱས་གཏོང་བའི་ལས་འཆར་རིགས་མེད་པའི་བཟོ་འདྲ་བོ་འདུག ང་ཚོའི་ངོས་ནས་སློབ་གྲྭ་ཁག་ལ་ཤེས་ཡོན་ཡར་རྒྱས་དང་འབྲེལ་བའི་ལས་འཆར་ཡོད་ན་འབུལ་བའི་རེ་བ་ཞུས་ཡོད། གཞི་རིམ་བར་མ་ནས་གོང་མ་བར་དགེ་རྒན་གྱིས་སློབ་ཁྲིད་བྱེད་སྐབས་ཕྱོགས་གཅིག་གཙོ་བོར་མི་འཛིན་པར་སློབ་ཕྲུག་རང་ཉིད་ཀྱི་རིག་པས་དཔྱད་པ་གཏོང་ཐུབ་པའི་ཁོར་ཡུག་ཅིག་བསྐྲུན་ཐུབ་པ་ཡིན་ན། འཛིན་གྲྭ་མཐོ་རུ་ཕྱིན་ཡང་བརྒྱ་ཆ་ལེན་པར་ཐུགས་ཁྲལ་གནང་དགོས་ཀྱི་མ་རེད། དགེ་རྒན་རྣམ་པས་གསར་གཏོད་ཀྱི་རྣམ་པའི་ཐོག་ནས་སློབ་སྦྱོང་ཡར་རྒྱས་གཏོང་བའི་ཐབས་ལམ་ཡོད་ཚེ་བེད་སྤྱོད་གཏོང་དགོས་པ་དང་། དཔེ་དེབ་ཀློག་པའི་གོམས་གཤིས་འཇགས་པར་ཁོར་ཡུག་ཅིག་བསྐྲུན་དགོས་ཀྱི་འདུག ཅེས་གསུངས་སོང་།
ཡང་ཁོང་གིས། ཤེས་ཡོན་སྲིད་ཇུས་ནང་གཞི་རིམ་འོག་མ་ནས་གཞི་རིམ་གོང་མ་བར་བོད་ཀྱི་སྐད་ཡིག་གི་བརྒྱུད་ལམ་བྱེད་དགོས་པ་གཏན་འབེབ་གནང་ཡོད་པ་བཞིན་འགྲུབ་ཐུབ་པ་ཞིག་བཟོ་དགོས་ཀྱི་ཡོད་པ་རེད། གཞི་རིམ་འོག་མའི་ནང་དུ་བོད་ཡིག་ཐོག་སློབ་ཁྲིད་བྱེད་མུས་ཡིན། གཞི་རིམ་བར་མ་དང་གོང་མ་གཉིས་ཀྱི་ནང་དུ་སྤྱི་ཚོགས་ཚན་རིག་བོད་ཡིག་ཐོག་ཏུ་སློབ་ཁྲིད་བྱེད་རྒྱུ་དགེ་རྒན་དང་འབྲེལ་ཡོད་ལས་བྱེད་ལ་དཀའ་ངལ་འཕྲད་ཡོད་འདུག ཕྱི་ལོ་ ༢༠༢༣ ནང་སྤྱི་ཚོགས་ཚན་རིག་སློབ་ཁྲིད་བྱེད་པའི་སློབ་གྲྭ་འགའ་འདེམས་སྒྲུག་གནང་སྟེ་མགོ་བརྩམ་པའི་འཆར་གཞི་ཡོད། སྤྱི་ཚོགས་ཚན་རིག་གི་སློབ་ཚན་ནང་དོན་དང་བོད་ཡིག་གཉིས་ཡག་པོ་ཡོད་ན་སློབ་ཁྲིད་བྱེད་པར་སྟབས་བདེ་བོ་འདུག སྤྱི་ཚོགས་ཚན་རིག་བོད་ཡིག་ཐོག་ཏུ་མ་འཁྲིད་ཚེ། བོད་ཀྱི་སྐད་ཡིག་སློབ་ཚན་གྱི་ནང་དུ་སྐད་ཡིག་མ་གཏོགས། རྒྱལ་རབས་དང་ཆོས་འབྱུང་འཁྲིད་པའི་གོ་སྐབས་མེད་ཙང་། སྤྱི་ཚོགས་ཚན་རིག་གང་མགྱོགས་སློབ་ཁྲིད་བྱེད་པའི་འཆར་གཞི་ཡོད་པ་དང་། མ་འོངས་གཞིས་ཆགས་ཁག་ཏུ་ཕྲུ་གུ་རྣམས་ཕ་མ་མཉམ་དུ་འཇོག་པར་འབད་བརྩོན་བྱ་རྒྱུ་དང་། ཕྲུ་གུ་ཕ་མ་མཉམ་དུ་འཚར་ལོངས་བྱུང་དགོས་པ་གལ་ཆེན་ཡིན་པ་མ་ཟད། གཞིས་ཆགས་ཁག་གི་མ་འོངས་བའི་སྲ་བརྟན་དང་བོད་དོན་འཐབ་རྩོད་སོགས་ཉམས་ཆག་མི་འགྲོ་བར་ཕན་ཐོགས་ཀྱི་འདུག ཅེས་གསུངས་སོང་།
ཐེངས་འདིའི་སཾ་བྷོ་ཊ་བོད་སློབ་ཚོགས་པའི་ལོ་འཁོར་འགན་འཛིན་ཚོགས་འདུའི་སྟེང་དུ། བཙན་བྱོལ་བོད་མིའི་ཤེས་ཡོན་སྲིད་བྱུས་(BEP)ལག་བསྟར་དང་འབྲེལ་བའི་གནད་དོན་དང་རྒྱ་གར་དབུས་གཞུང་ནས་གཏན་འབེབས་ཟིན་པའི་རྒྱ་གར་རྒྱལ་ཡོངས་ཀྱི་སློབ་ཁག་གི་ཤེས་ཡོན་སྲིད་བྱུས་(NEP-2020)ལག་བསྟར་གནང་ཐབས་ཅི་དགོས་སྐོར་དང་། ཁྱབ་ཁོངས་སློབ་ཁག་སོ་སོའི་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཁོངས་སུ་དེབ་སྐྱེལ་(CBSE registration)་གནང་ཕྱོགས་དང་། ས་གནས་སོ་སོའི་སློབ་ཁག་གི་མིང་འགྱུར་དང་འབྲེལ་བའི་གནད་དོན་སྐོར། དེ་བཞིན་འགན་འཛིན་དང་སློབ་དགེ་རྣམ་པའི་ཉིན་རེའི་ཚོགས་ཐེངས་ལེན་ཕྱོགས་དང་ཚོགས་ཐེངས་ཚད་གཞི་དེ་ཁྱབ་ཁོངས་སློབ་ཁག་ནང་གཅིག་མཚུངས་གཏན་འབེབས་སོགས་ཀྱི་བརྗོད་གཞིའི་ཐོག་གོ་བསྡུར་གནང་གི་ཡོད་འདུག
གསར་འགོད་པ། བྱམས་པ་ཚེ་རིང་།
