འབྲས་སྤུངས་སྒོ་མང་གྲྭ་ཚང་དང་དགེ་ལྡན་ཆོ་འཕྲུལ་སྨོན་ལམ་ཆེན་མོའི་ཚོགས་པ་གཉིས་ཐུན་མོང་ནས་༧གོང་ས་མཆོག་ལ་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་ཚེ་སྲུང་དང་འབྲེལ་བའི་ཐོག་ནས་བརྟན་བཞུགས་བསྟར་འབུལ་ཞུས་སོང་།
དེ་རིང་སྔ་དྲོའི་ཆུ་ཚོད་ ༨ པའི་ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། འབྲས་སྤུངས་སྒོ་མང་གྲྭ་ཚང་དང་དགེ་ལྡན་ཆོ་འཕྲུལ་སྨོན་ལམ་ཆེན་མོའི་ཚོགས་པ་གཉིས་ཐུན་མོང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་སོང་བ་དང་། བརྟན་བཞུགས་བསྟར་འབུལ་མ་ཞུས་གོང་དུ་༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་རྟེན་འབྲེལ་གྱི་རྩ་བ་གསལ་བྱེད་དེ་ཝ་ཏི་བཟང་པོའི་འདྲ་པར་ཞིག་འདི་ལ་བསྒྲིགས་པ་ཡིན། བྱས་ཙང་ཁྱེད་རང་ཚོས་ངོས་ལ་རེ་བ་བརྒྱབ་ནས་རྦད་དེ་ཚེ་རིང་པོ་ཡོང་བའི་ཆེད་དུ་བརྟན་བཞུགས་གསུང་གི་ཡོད་རེད། ཡིན་ནའང་ངོས་རང་གི་མགོན་དང་སྐྱབས་དང་དཔུང་གཉེན་མཆོག་ཏུ་གྱུར་བ་དེ་ཝ་ཏི་བཟང་པོ་རེད། འཕགས་པ་སྤྱན་རས་གཟིགས་རེད། གང་ལྟར་ངོས་རང་གང་འདྲ་ཞིག་ལ་བཞག་དང་མ་བཞག་ཟེར་བ་དེ་འཕགས་པ་སྤྱན་རས་གཟིགས་ཀྱི་ཕྱག་ལ་ཡོད་པའི་ཟོལ་ཞིག་རེད། ཝ་ཏི་བཟང་པོ་དེ་ལྷ་སའི་ལོ་ཀི་ཤྭ་ར་ལྷ་སར་བཞུགས་ཡོད་རེད། ཝ་ཏི་བཟང་པོ་དེ་ཕར་ཚུར་རྟེན་འབྲེལ་ལྟོས་གྲུབ་ཅིག་གི་ཐོག་ནས་གང་ལྟར་ངོས་རང་གི་སྡོད་སར་བཞུགས་པ་ཞིག་ཆགས་པ་རེད། བྱས་ཙང་ངོས་ཀྱིས་ཉིན་ལྟར་ཝ་ཏི་བཟང་པོའི་སྐུ་མཇལ་ནས་སྨོན་ལམ་བརྒྱབ་བསྡད་ཀྱི་ཡོད། ངོས་ནས་ཝ་ཏི་བཟང་པོའི་ཞལ་མཇལ་དུས་ཞལ་འཛུམ་ཤིག་ཤིག་བྱས་ནས་ཡོད་བསྡད་པ་ཞིག་ཉིན་ལྟར་རེ་ཞིག་མཇལ་གྱི་འདུག དེར་བརྟེན། ཁྱེད་རང་ཚོས་ངོས་ལ་རེ་བ་བརྒྱག་གི་ཡོད་རེད་དེ། གཙོ་བོ་ཝ་ཏི་བཟང་པོའི་ཕྱག་ལ་ཡོད་བསྡད་པ་ཞིག་རེད། ང་རང་གི་ངོས་ནས་ཆ་བཞག་ནའང་། དངོས་གནས་དྲང་གནས་ཀྱིས་འཕགས་པ་སྤྱན་རས་གཟིགས་སྐབས་སུ་བབ་པ་ཝ་ཏི་བཟང་པོའི་དགོངས་པ་གང་ཡོད་པ་ནང་བཞིན་ངོས་ཀྱིས་ད་ལྟ་བར་དུ་བསྒྲུབས་པ་ཡིན། སླད་ཀྱང་ལོ་བཅུ་ཕྲག་གཉིས་གསུམ་དེ་འདྲའི་རིང་ལ་ཝ་ཏི་བཟང་པོའི་དགོངས་པ་ནང་བཞིན་ངོས་ཀྱིས་ཧུར་ཐག་འབད་ཐག་གིས་བསྒྲུབ་ཀྱི་རེད། བྱས་ཙང་ཝ་ཏི་བཟང་པོའི་གསུང་བྱོན་རྒྱུ་དང་གོམ་པ་སྤོ་རྒྱུ་ཡོད་མ་རེད། ཝ་ཏི་བཟང་པོའི་བྱིན་རླབས་ངོས་ལ་གནང་སྟེ། ཝ་ཏི་བཟང་པོའི་སྐུ་གསུང་ཐུགས་ཀྱི་སྐུ་ཚབ་དེ་ངོས་ཀྱིས་བྱེད་ཀྱི་ཡོད་རེད། ད་ལྟ་བར་དུ་འཕགས་པ་སྤྱན་རས་གཟིགས་ཀྱི་དགོངས་པ་དང་མཐུན་པ་ཞིག་དང་མ་འོངས་པ་ལ་ཡིན་ནའང་འཕགས་པ་སྤྱན་རས་གཟིགས་ཀྱི་ཐུགས་རེ་ག་རེ་ཡོད་པ་ནང་བཞིན་ངོས་ཀྱིས་བསྒྲུབ་བསམ་པ་ཞིག་བློ་ཐག་བཅད་སྡོད་ཀྱི་ཡོད། ཅེས་གསུངས་སོང་།
ཡང་༧གོང་ས་མཆོག་གིས། དེ་རིང་ཁྱེད་རང་ཚོ་བོད་སེར་སྐྱ་མི་མང་སྤྱི་དང་། ལྷག་པར་གདན་གསུམ་སྨོན་ལམ་ཆེན་མོའི་དགེ་རྩ་ཚོགས་པ་དང་འབྲས་སྤུངས་སྒོ་མང་གྲྭ་ཚང་ཐུན་མོང་ནས་ཇི་ལྟར་གསོལ་བ་བཏབ་པ་ནང་བཞིན། སྒྲོལ་དཀར་ཡིད་བཞིན་འཁོར་ལོའི་ཚེ་སྲུང་དང་འབྲེལ་བའི་ཐོག་ནས་བརྟན་བཞུགས་གནང་གི་ཡོད་པ་རེད། འདིར་དངོས་སུ་འཁོད་མེད་པ་དཔལ་ལྡན་འབྲས་དཀར་སྤུངས་པའི་སྒོ་མང་གྲྭ་ཚང་གི་དགེ་འདུན་པ་ཚོ་ལའང་དམིགས་བསལ་གྱིས་འཚམས་འདྲི་ཞུ་ཡི་ཡིན། ང་ཚོ་བཙན་བྱོལ་བ་ཆགས་པ་དེ་ཐབས་སྐྱོ་བོ་རེད། ཡིན་ནའང་། བཙན་བྱོལ་བའི་གོ་སྐབས་འདིའི་ཐོག་ནས་འཛམ་བུ་གླིང་སྤྱི་ལ་བོད་ཀྱི་སངས་རྒྱས་པའི་ཆོས་འདི་དངོས་གནས་མཐོང་བསླེབ་པ་ཞིག་དང་དགའ་མོས་བྱེད་ཀྱི་ཡོད་རེད། དེར་བརྟེན། གཙོ་ཆེ་ཤོས་ང་ཚོ་སེར་འབྲས་དགའ་གསུམ་བཙན་བྱོལ་དུ་ཡོད་བསྡད་པ་ཚོས་ད་ལྟ་བར་དུ་ཧུར་ཐག་བྱས་པ་རེད། ད་དུང་ཡང་ཚང་མས་ཧུར་ཐག་གནང་ཤོག་ཨ། ཕྱོགས་གཅིག་ནས་བསླབ་པ་སློབ་གཉེར་དང་དཔེ་ཆ་བལྟ་རྒྱུ། གཉིས་ནས་ཐོས་དོན་སྒྲུབ་ལ་གཞོལ་ནས་ཉིན་རེ་བཞིན་དུ་བྱམས་སྙིང་རྗེ། བྱང་ཆུབ་སེམས་ཀྱི་ཉམས་མྱོང་སྟོན་ཐུབ་པ་དང་། སྟོང་ཉིད་ཀྱི་ལྟ་བར་བསམ་བློ་གཏང་ཐུབ་དགོས། དེ་རིང་སྦྱིན་བདག་གི་གྲས་སུ་འབྲས་སྤུངས་སྒོ་མང་གྲྭ་ཚང་ཡོད་རེད། དེ་རིང་གོ་སྐབས་འདི་བརྒྱུད་ནས་སེར་འབྲས་དགའ་གསུམ་དང་ལྷག་པར་སྒོ་མང་གྲྭ་ཚང་གི་ཕྱག་དཔེ་གཟིགས་མཁན་ཚོས་ཐོས་བསམ་སྒོམ་པ་ཡ་མ་བྲལ་བ་སྤུས་དག་པོ་ཡོང་རྒྱུར་ཚང་མས་ཐུགས་ཁུར་སྐྱེད་ཤོག་ཨ། ཞེས་བཀའ་སྩལ།
ཡང་མགོན་པོ་མཆོག་ནས་སྐུ་རྩེད་དང་སྦྲགས། ངོས་རང་ཆུང་ཆུང་སྐབས་སུ་ཨ་མདོ་རེད། སྐུ་འབུམ་གྱི་གྲྭ་རྒྱུན་ཆགས་ཀྱི་ཡོད་པར་བརྟེན། སྒོ་མང་གྲྭ་ཚང་ལ་འབྲེལ་བ་འདྲ་བོ་ཡོད་པ་རེད། བློ་གསལ་གླིང་དང་སེ་ར་བྱེས་ལ་འབྲེལ་བ་དམིགས་བསལ་ཡོད་མ་རེད། ངོས་རང་གི་བསམ་བློའི་ནང་ལ་སྒོ་མང་གྲྭ་ཚང་ལབ་དུས་སེམས་ཐག་ཉེ་པོ་འདྲ་པོ་ཡོད། དུས་ཚོད་གཉན་འཕྲང་དེ་འདྲའི་སྐབས་སུ་ཚང་མས་ཧུར་ཐག་གནང་སོང་། ཐུགས་རྗེ་ཆེ་ཞུ་ཡི་ཡིན། ད་དུང་ཡང་ལོ་བཅུ་ཕྲག་གཅིག་གཉིས་རིང་ལ་ངོས་ཀྱིས་མགོ་ཁྲིད་ནས་སྡོད་ཀྱི་རེད་ལ། ཁྱེད་རང་ཚོས་དངོས་གནས་དྲང་གནས་ཀྱིས་ཐོས་བསམ་སྒོམ་གསུམ་དེ་དག་བཤད་སྒྲུབ་ཟུང་འབྲེལ་གྱི་ཐོག་ནས་བསྟན་པ་འཛིན་སྐྱོང་སྤེལ་གསུམ་ཡག་པོ་ཡོང་རྒྱུར་ཚང་མས་ཐུགས་ཁུར་སྐྱེད་ཤོག་ཨ། ད་ལྟ་ཡག་ཐག་ཆོད་རེད། སེར་འབྲས་དགའ་གསུམ་དང་བཀྲ་ཤིས་ལྷུན་པོ་ཚང་མ་ཡག་ཐག་ཆོད་རེད། ད་དུང་ཡང་ཚང་མས་ལྷོད་གཡེང་མ་སོང་བར་གཟབ་གཟབ་གནང་ཤོག དེ་ཙམ་དུ་མ་ཟད་ཧི་མ་ལ་ཡའི་རི་རྒྱུད་ལ་ཡོད་བསྡད་པའི་ས་དགེ་བཀའ་རྙིང་རིས་སུ་མ་ཆད་པའི་ཆོས་པ་ཚོས། ངོས་ཀྱིས་ཐོག་མཐའ་བར་གསུམ་ལ་དཔེ་ཆ་ལྟ་དགོས་རེད་གདའ་ཟེར་ནས་གཞེན་སྐུལ་ཞུ་ཡི་ཡོད་ལ། གཞེན་སྐུལ་ཞུས་པ་དེ་དང་དུ་བླངས་ནས་ཧི་མ་ལ་ཡའི་རི་རྒྱུད་ཀྱི་དགོན་སྡེ་ཁག་གིས་འཆད་རྩོད་རྩོམ་གསུམ་གྱི་ཆོས་ཀྱི་བྱ་བ་ག་ཚོད་ཐུབ་ཐུབ་ཀྱིས་བསྒྲུབ་ཀྱི་འདུག་བཱ། ཡག་པོ་ཞེ་དྲགས་རེད། ཐུགས་རྗེ་ཆེ་ཞུ་ཡི་ཡིན། ད་དུང་ཡང་ཚང་མས་ལྷོད་གཡེང་མ་སོང་བར་ཧུར་ཐག་གནང་རོགས། ཞེས་གསུངས་སོང་།
བསླབ་པ་སློབ་གཉེར་ཐོག་སྔར་ལས་ཤུགས་སྣོན་དགོས་པའི་སྐོར་ལ་༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོ་བཅོམ་ལྡན་འདས་ཀྱི་ན་བཟའ་བཞེས་མཁན་ཚོས་ག་ཚོད་ཐུབ་ཐུབ་ཀྱིས་ཐོས་བསམ་སྒོམ་པ་ཡ་མ་བྲལ་བ་བྱས་ནས་ཉམས་ལེན་གནང་རྒྱུ་ཧ་ཅང་གི་གལ་ཆེན་པོ་རེད་འདུག གདན་ས་ཚོས་ད་ལྟ་བར་དུ་ཧུར་ཐག་གནང་གི་ཡོད་རེད་ལ། ད་དུང་ཡང་ཧུར་ཐག་གནང་ཤོག་ཨ། ཚང་མས་ཕྱག་དཔེ་གཟིགས་རྒྱུ་གལ་ཆེན་པོ་ཞེ་དྲགས་རེད། འཛམ་བུ་གླིང་འདིའི་སྒང་ལ་ཕལ་ཆེར་ནང་པ་སངས་རྒྱས་པའི་ཆོས་ཀྱི་སློབ་གཉེར་གྱི་ཐོག་ལ་བོད་པ་ལས་ལྷག་མེད་བསྡད་པ་ཞིག་གསལ་པོ་ཞེ་དྲགས་རེད། བོད་ནང་ལ་ཆ་བཞག་ན་རང་དབང་ཡོད་མ་རེད། ང་ཚོ་རང་དབང་ལུང་པའི་ནང་ཡོད་བསྡད་པ་དེ་དག་གིས་སེམས་ཤུགས་སྒྲིལ་ནས་ཧུར་ཐག་བྱོས་དང་། བོད་ནང་ལོགས་ལ་ཤུགས་རྐྱེན་ཏན་ཏན་ཐེབས་ཀྱི་ཡོད་པ་རེད། ད་དུང་བོད་ཙམ་དུ་མ་ཟད་ཆེན་པོ་ཧོར་གྱི་སོག་པོའི་ཡུལ་ཁག་དེ་དག་ཀྱང་སྔ་མོ་ནང་པ་སངས་རྒྱས་པའི་བོད་ཀྱི་ཆོས་ལ་འབྲེལ་བ་ཡོད་བསྡད་པ་རེད། ཁ་སང་ངོས་རང་སོག་པོ་ཚོ་དང་ཐུག་པ་ཡིན། འཛམ་གླིང་འདིའི་སྒང་གི་སངས་རྒྱས་བསྟན་པ་ཆ་ཚང་བ་དང་སྤུས་དག་པོ་ཞིག་ཕལ་ཆེར་བོད་པ་གཅིག་པུ་རེད་འདུག གཞན་ཝེ་ཊི་ནམ་དང་འབར་མ། ཤྲི་ལངྒ་སོགས་ལ་ནང་པའི་ཆོས་ཡོད་རེད་དེ། དེ་འདྲའི་ཞིབ་ཚགས་པོའི་ཐོག་ལ་སློབ་སྦྱོང་བྱས་ནས་སེམས་ཀྱི་གཏིང་ནས་རྒྱུ་མཚན་མཐོང་བའི་སྒོ་ནས་དད་པ་བརྟན་པོ་ཐོབ་ནས་ཉམས་ལེན་བྱེད་མཁན་དེ་ཕལ་ཆེར་བོད་པ་ཡག་ཤོས་རེད་འདུག དེར་བརྟེན། ད་ལྟ་བར་དུ་ཚང་མས་ཧུར་ཐག་འབད་ཐག་བྱས་པ་རེད། ད་དུང་ཡང་ཧུར་ཐག་གནང་རོགས་གནང་ཞེས་ཞུ་འདོད་བྱུང་། ལུས་པོའི་ཆ་ནས་ངོས་རང་བྱང་ཕྱོགས་ལ་བསྡད། གདན་ས་ཚོ་རྒྱ་གར་ལྷོ་ཕྱོགས་སུ་ཡོད་པ་རེད། ལུས་པོའི་སྟེང་ནས་ང་ཚོ་ཕར་ཚུར་ཐག་རིང་པོ་ཡོད་རེད་དེ། དེང་སང་འཕྲུལ་ཆས་དེ་ཚོའི་གྲས་ཀྱིས་བརྙན་འཕྲིན་ (television) དང་ཁ་པར་ (mobile) བརྒྱུད་ནས་སྐད་ཆ་བཤད་རྒྱུ་ཡོད་པ་རེད། གང་ལྟར་ལུས་པོ་ཐག་རིང་ལུགས་ཀྱི་སྐད་ཆ་གང་ཡང་མི་འདུག ང་ཚོ་སེམས་ཐག་ཉེ་པོའི་ཐོག་ནས་སྐད་ཆ་བཤད་ནས་བགྲོ་གླེང་བྱ་རྒྱུ་ཡོད་རེད། དེར་བརྟེན་ཚང་མས་ཐུགས་བདེ་པོ་བྱོས། སློབ་གཉེར་མུ་མཐུད་དུ་གནང་རོགས་ཞེས་བཀའ་སློབ་སྩལ།
བརྟན་བཞུགས་འདེགས་འབུལ་གྲུབ་རྗེས་༧གོང་ས་མཆོག་གིས། ངོས་རང་ད་ཅི་གངས་རི་ར་
གསར་འགོད་པ། བསྟན་འཛིན་ཕུར་བུ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
