དེ་རིང་དངོས་གནས་རྒྱ་ནག་གི་མགོ་ཁྲིད་ཟུར་པ་ཅང་ཙི་མེན་འདས་གྲོངས་སུ་གྱུར་ཡོད་འདུག  

དེ་རིང་ཉིན་གུང་པེ་ཅིན་གྱི་ཆུ་ཚོད་ ༡༢ ཡོལ་ཙམ་ལ་རྒྱ་ནག་གི་མགོ་ཁྲིད་ཟུར་པ་ཅང་ཙི་མེན་ཁྲག་ནད་ཀྱི་རྐྱེན་གྱིས་ཧྲང་ཧེ་གྲོང་ཁྱེར་དུ་འདས་གྲོངས་སུ་གྱུར་ཡོད་ལུགས་ཀྱི་གནས་ཚུལ་ཐོན་འདུག

འདས་པའི་ལོ་མང་ནང་ཅང་ཙི་མེན་འཛིན་བཟུང་བཙོན་འཇུག་བྱས་ཟིན་པའི་གནས་ཚུལ་ཐེངས་མང་ཐོན་པ་མ་ཟད། ཅང་ཤི་ཚར་བའི་གནས་ཚུལ་ཐེངས་དུ་མར་གསར་ལམ་དུ་ཐོན་ཡོད་པ་རེད། འོན་ཀྱང་། དེ་རིང་ཉིན་རྒྱབ་རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས་ཅང་གི་པར་ཆེན་པོ་ཞིག་བཞག་སྟེ་བློ་མཐུན་ཅང་ཙི་མེན་རྗེས་དྲན་གྱི་པར་ཞེས་བྲིས་པ་ཞིག་སྤེལ་རྗེས། ཕྱི་ནང་གི་གསར་ལམ་ཁག་ཏུ་ཅང་ཙི་མེན་རང་ལོ་ ༩༦ ཐོག་འདས་གྲོངས་སུ་ཕྱིན་པའི་གནས་ཚུལ་ཚ་ཚ་འུར་འུར་གྱིས་སྤེལ་སོང་།

ཅང་ཙི་མེན་གྱི་དུས་སྐབས་སུ་རྒྱ་ནག་གི་དཔལ་འབྱོར་དང་ཆབ་སྲིད། ཕྱི་འབྲེལ། རྒྱའི་རིག་གནས་རྒྱ་སྐྱེད་སོགས་ཀྱི་ཐོག་འཕེལ་རྒྱས་ཆེན་པོ་ཕྱིན་ཡོད་པར་ངོས་འཛིན་བྱེད་ཀྱི་ཡོད་འདུག་ལ། རྒྱ་ནག་གི་འདས་པའི་མི་ལོ་ཧྲིལ་པོ་བཅུ་ཕྲག་འགའི་ཆབ་སྲིད་ཀྱི་དབང་ཐང་རྩེ་མོར་སོན་པ་ཞིག་ཏུའང་རྩི་ཡི་འདུག  ཡོངས་གྲགས་སུ་ཅང་ཙི་མེན་ལ་དམར་གསོད་དྲག་གནོན་དང་རྒྱལ་ཚོང་གསང་ལས་སོགས་ཀྱི་ནག་ཉེས་ཆེན་པོ་བཅུ་ཞེས་པ་སོགས་རྒྱ་ནག་ཚུད་པའི་རྒྱལ་ཁབ་མང་པོའི་ནང་སྐྱོན་འཛུགས་ཀྱི་མིང་རྟགས་བསྡུ་རུབ་དང་སི་པན་རྒྱལ་སྤྱིའི་ཁྲིམས་ཁང་སོགས་སུ་ཁྲིམས་གཏུག་བྱས་ཡོད་པ་རེད།

ཅང་གི་ནག་ཉེས་གཙོ་བོ་ཞིག་ནི་ཕྱི་ལོ་ ༡༩༨༩ ལོར་གནམ་བདེ་སྒོ་མོ་ཆེའི་མདུན་ཐང་དུ་དམངས་གཙོ་དོན་གཉེར་བ་སྡེབ་གསོད་བྱས་པའི་དོན་རྐྱེན་ཁྲོད་ཅང་གིས་ཆབ་སྲིད་འཁྲབ་སྟོན་གང་ལེགས་བྱས་ཏེ་གོ་དབང་གི་ཁེ་ཕན་ཆེ་ཤོས་བླངས་ཡོད་པ་མ་ཟད། ཕྱི་ལོ་ ༡༩༩༩ ལོར་ཅང་གི་བཀའ་བཀོད་འོག  རྒྱ་ནག་རྒྱལ་ཡོངས་ནང་ཁྱབ་པའི་ཆོས་འཁོར་རྩ་རླུང་ནི་ལོག་ཆོས་ཤིག་ཡིན་ལ། དེས་སྲིད་གཞུང་ལ་འཇིགས་སྐུལ་བྱེད་ཀྱི་ཡོད་པའི་ཉེས་མིང་བསྒྲགས་ཏེ། ཆོས་འཁོར་རྩ་རླུང་ཉམས་ལེན་པ་སྟོང་ཕྲག་མང་པོ་འཛིན་བཟུང་བཙོན་འཇུག་བྱས་ཡོད་པ་མ་ཟད། བཙོན་པ་གྲངས་ལས་འདས་པར་ནང་ཁྲོལ་གསོན་འབྲེག་བྱས་ཏེ་ནག་ཚོང་བརྒྱབ་པ་སོགས་ཀྱི་ནག་ཉེས་ཐེར་འདོན་བྱས་དང་བྱེད་བཞིན་ཡོད་པ་རེད།

 ཕྱི་ལོ ༢༠༠༢ ལོར་ཅང་ཙི་མེན་གྱིས་ཧུའུ་ཅིན་ཐའོ་ལ་ཆབ་སྲིད་ཀྱི་གོ་གནས་བརྒྱུད་སྤྲོད་བྱས་ཡོད་ཀྱང་། ཁོས་མུ་མཐུད་རྒྱ་ནག་གི་དམག་ཕྱོགས་ཀྱི་དབང་ཆ་ཧམ་བཟུང་བྱས་ཡོད་པ་དང་། དེ་བཞིན་ཞི་ཅིན་ཕིང་གི་སྐབས་སུའང་ཅང་གི་དབང་ཤུགས་ཀྱིས་དཀའ་རྙོག་གང་ཙམ་བཟོས་ཡོད་འདུག 

ཅང་ཙི་མེན་ཐེངས་ག་ཚོད་ཅིག་ལ་ཤི་དགོས་པ་རེད།

གསར་འགོད་པ། དཔལ་ལྡན།