ད་ལྟ་རྒྱ་གར་བྱང་ཕྱོགས་ཨུ་ཊར་ཁཱན་གྱི་ཧིན་བོད་མཐའ་མཚམས་ཀྱི་རི་ཁུག་ཅིག་ཏུ་ཨ་རི་དང་རྒྱ་གར་གཉིས་ནས་མཉམ་འབྲེལ་དམག་སྦྱོང་བྱེད་མུས་ཡིན་འདུག
རྒྱ་ནག་གཞུང་གིས་ས་མཚོ་གནམ་གསུམ་གྱི་དམག་ཤུགས་རྒྱ་སྐྱེད་ནས། ཞི་བདེ་རྒྱ་མཚོ་དང་ཨེ་ཤ་ཡའི་རྒྱལ་ཁབ་ཁག་གི་མཐའ་མཚམས་སུ་རྩོད་རྙོག་ཡང་ཡང་སློང་གི་ཡོད་པས། ཁྱིམ་མཚེས་རྒྱལ་ཁབ་ཁག་གིས་ཀྱང་ཨ་རི་སོགས་དང་མཉམ་འབྲེལ་གྱི་ཐོག་ནས་རྒྱལ་ཁབ་སོ་སོའི་དམག་སྟོབས་ཤུགས་ཇེ་ཆེར་བཏང་དང་གཏོང་བཞིན་ཡོད་པ་ལྟར། ཕྱི་ཟླ ༡༡ ཚེས ༢༨ ནས་ཕྱི་ཟླ་ ༡༢ པའི་བདུན་ཕྲག་དང་པོའི་གཟའ་མཇུག་བར་རྒྱ་གར་དང་ཨ་རི་གཉིས་ཀྱིས་རྒྱ་གར་བྱང་ཕྱོགས་ཨུ་ཊར་ཁཱན་གྱི་ཅ་མོ་ལི་རྫོང་ (Chamoli District) གི་ཨའོ་ལི་ (Auli) ཞེས་པའི་བོད་ཧིན་ས་མཚམས་ཀྱི་རི་ཁུག་ཅིག་ཏུ་མཉམ་འབྲེལ་དམག་སྦྱོང་བྱེད་ཀྱིན་ཡོད་ཅིང་། དེ་ནི་ཨ་རྒྱ་གཉིས་ཀྱི་མཉམ་འབྲེལ་དམག་སྦྱོང་ཐེངས་ ༡༨ པ་དེ་ཡིན་འདུག
རྒྱ་གར་གཞུང་ཕྱོགས་ཀྱི་གསལ་བསྒྲགས་ལ་གཞིགས་ན། ད་ལན་གྱི་ཨ་རྒྱ་གཉིས་ཀྱི་མཉམ་འབྲེལ་དམག་སྦྱོང་སྐབས་རྒྱ་གར་གྱིས་ས་མཐོའི་འཐབ་ཇུས་ངོ་སྤྲོད་དང་ཨ་རིས་དམག་འཁྲུག་སྐབས་འཕྲུལ་རིག་བཀོལ་སྤྱོད་བྱེད་ཐབས་སོགས་ཕྱོགས་གཉིས་ཀྱི་དམག་དཔུང་གིས་དམག་སྦྱོང་མཉམ་དུ་བྱེད་ཀྱིན་ཡོད་ཅིང་། ཕྱོགས་གཉིས་ཀྱི་དམག་མིས་ཧིན་བོད་མཐའ་མཚམས་སུ་ཨུ་རུ་སུས་བཟོས་པའི་ Mi-17V5 རྟགས་ཅན་གྱི་ཐད་འཕུར་གནམ་གྲུའི་ནང་དམག་སྦྱོང་བྱས་པའི་བརྙན་རིས་ཀྱང་མང་པོ་ཞིག་ཁྱབ་མུས་ཡིན་འདུག
ཨ་རྒྱ་གཉིས་ཀྱིས་དམག་མིས་ཐེངས་མང་རིང་དམག་སྦྱོང་བྱས་ཏེ། ཕྱོགས་གཉིས་ཀྱི་དམག་དོན་ཐབས་ཇུས་སོགས་ཀྱི་ཐད་ནས་ནུས་པ་མཐོ་འདེགས་གཏོང་ཐབས་བྱེད་ཀྱིན་ཡོད་པ་ལྟར། ཕྱི་ལོ་ ༢༠༠༢ ནས་རྒྱལ་ཁབ་གཉིས་ཀྱི་དམག་དོན་འབྲེལ་ལམ་ཡར་རྒྱས་དང་། འཐབ་ཇུས་མཉམ་སྤྱོད་སླད་དམག་སྦྱོང་བྱས་ཡོད་ཅིང་། འདས་ལོའི་ཕྱི་ཟླ་ ༡༠ ཚེས་ ༡༥ ནས་ ༣༠ བར་ཨ་རི་དང་རྒྱ་གར་གཉིས་ཀྱིས་ཨ་རིའི་མངའ་སྡེ་ཨ་ལ་སི་ཀ་ (Alaska) ནང་ཡོད་པའི་དམག་སྒར་དང་། འདས་ལོའི་ཕྱི་ཟླ་ ༢ ཚེས་ ༨ ནས་ ༢༡ བར་རྒྱ་གར་གྱི་རཱ་ཇི་སི་ཐན་ (Rajasthan) ནང་གི་མེ་མདའ་སྦྱོང་བརྡར་བྱ་སའི་ཁུལ་དུ་དམག་སྦྱོང་བྱས་ཡོད་འདུག དེ་བཞིན་འདས་ལོའི་ཕྱི་ཟླ་ ༣ པའི་ནང་དྷ་རམ་ས་ལའི་བྷག་ལོ་ (Bakloh) ཞེས་པའི་རི་ཁུལ་དང་། ཕྱི་ལོ་ ༢༠༡༩ ཟླ ༡༠ ཚེས་ ༡༣ ནས་ ༢༨ བར་ཨ་རིའི་སའེ་ཊལ་ (Seattle) དུ་ཡོད་པའི་དམག་སྒར་དུ་དམག་སྦྱོང་བྱས་ཡོད་པ་རེད།
རྒྱ་ནག་གིས་མཚོ་དམག་སྟོབས་ཤུགས་ཇེ་ཆེར་བཏང་དང་གཏོང་བཞིན་ཡོད་པའི་རྐྱེན་གྱིས། ཨེ་ཤ་ཡའི་བདེ་འཇགས་ལ་ཉེན་ཁ་བཟོ་ཡི་ཡོད་པར་བརྟེན། འདས་ལོའི་ཕྱི་ཟླ་ ༡ པའི་ནང་རྒྱ་མཚོའི་མཐའ་མཚམས་སྲུང་སྐྱོབ་སླད་མཚོ་དམག་སྦྱོང་བརྡར་བྱས། དེ་བཞིན་འདས་ལོའི་ཕྱི་ཟླ་ ༨ པའི་ནང་ནུབ་ཞི་བདེ་རྒྱ་མཚོའི་ཁུལ་དང་། ཕྱི་ལོ་ ༢༠༢༠ ཟླ་ ༡༡ པའི་ནང་རྒྱ་གར་དང་ཉི་ཧོང་། ཨོ་གླིང་། ཨ་རི་བཅས་ཀྱིས་རྒྱ་གར་གྱི་བྷན་གྷལ་ (Bay of Bengal) མཚོ་ཁུལ་དུ་མཚོ་དམག་སྦྱོང་བརྡར་བྱས། གཞན་ཡང་། ཕྱི་ལོ་ ༢༠༡༧ ཟླ་ ༧ ཚེས་ ༡༠ ཉིན་ནས་བདུན་ཕྲག་གཅིག་གི་རིང་རྒྱ་གར་དང་ཨ་རི། ཉི་ཧོང་གསུམ་གྱིས་རྒྱ་གར་རྒྱ་མཚོའི་ཁུལ་དུ་མཚོ་དམག་གི་སྦྱོང་བརྡར་བྱས་ཡོད་པ་རེད།
གསར་འགོད་པ། དཔལ་ལྡན།
