ཨ་རིའི་གྲོང་ཁྱེར་སྤྱི་ཁྱབ་པ་ཁག་ཅིག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས།

ཨ་རིའི་ཨོ་ཧའོ་ཡི་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པ་ཨབ་ཊབ་ཀརྨ་སིང་པུ་རི་ཝལ་ལགས་སོགས་མངའ་སྡེ་ཁག་ལྔ་ཡི་གྲོང་ཁྱེར་སྤྱི་ཁྱབ་པ་བདུན་ནས་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་འདུག

དེ་རིང་སྔ་དྲོ་བཞུགས་སྒར་ཕོ་བྲང་དུ་། ཨ་རིའི་་ཨོ་ཧའོ་མངའ་སྡེའི་(Ohio)སིན་སིན་ན་ཊི་(Cincinnati) གྲོང་ཁྱེར་སྤྱི་ཁྱབ་པ་ཨབ་ཊབ་ཀརྨ་སིང་པུ་རི་ཝལ་ལགས་དང་། ཀེན་ཊོར་ཀེ་མངའ་སྡེའི་གྲོང་ཁྱེར་ལོའུ་སི་ཝེལ་ (Louisville) གྱི་སྤྱི་ཁྱབ་པ་གྷི་རིག་ཧྥེ་ཤིར་(Greg Fischer)ལགས་སོགས་ཝ་ཤིང་ཊོན་མངའ་སྡེའི་ཊ་ཁོ་མཱ་ (Tacoma)དང་། ཁ་ལེ་ཧྥོར་ནེ་ཡའི་གྲོང་ཁྱེར་ཨོ་ཀ་ལན་ཌི་ (Oakland)དང་སེན་ལིན་ཌོའོ་(San Leandro)། ཊག་སེ་སི་མངའ་སྡེའི་སེན་ཨེན་ཐོ་ནེའོ་ (San Antonio)། པེན་སིལ་ཝེ་ནི་ཡ་མངའ་སྡེའི་པེཊ་སི་བྷག་ (Pittsburgh)བཅས་གྲོང་ཁྱེར་ཁག་བདུན་གྱི་སྤྱི་ཁྱབ་པ་དྷ་རམ་ས་ལར་ཆེད་བཅར་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་འདུག དེའི་རྗེས་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པ་བོད་རིགས་ཨབ་ཊབ་ཀརྨ་སིང་པུ་རི་ཝལ་ལགས་ཀྱིས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་དབུས་པའི་བཀའ་བློན་རྣམ་པ་དང་། བོད་མི་མང་སྤྱི་འཐུས་ལྷན་ཁང་ནང་ལྟ་སྐོར་དུ་ཕེབས་ཏེ་ཚོགས་གཙོ་སྦྲེལ་པོ་དང་རྒྱུན་ལས་རྣམ་པར་ཐུག་འཕྲད་གནང་ཡོད་པ་དང་། དེ་བཞིན་བོད་ཀྱི་འགྲེམས་སྟོན་ཁང་དང་། གངས་སྐྱིད་མེས་དབོན་གཙུག་ལག་དཔེ་སྟོན་སློབ་གྲྭ་སོགས་སུ་ལྟ་སྐོར་དུ་ཕེབས་ཡོད་འདུག

༧གོང་ས་རྒྱལ་བ་རིན་པོ་ཆེ་མཆོག་ནས་གྲོང་ཁྱེར་སྤྱི་ཁྱབ་པ་བདུན་ལ་བཀའ་སློབ་སྩལ་སྐབས། ང་ཚོ་ཐེར་འབུམ་ ༧ ནས་ ༨ བར་ཡོད་པའི་འགྲོ་བ་མི་ཞིག་ཡིན་པ་དུས་རྒྱུན་དུ་ནས་ཤེས་དགོས་ཤིང་། ང་ཚོ་མཆེད་གྲོགས་ཕོ་མོ་ཡོངས་རྫོགས་འགྲོ་བ་མི་ཡིན་པ་གཅིག་མཚུངས་ཡིན་པ་རེད།  ང་ཚོ་ཚང་མ་མཉམ་དུ་འཚོ་གནས་བྱེད་དགོས་ཀྱི་ཡོད་པ་རེད། ཕན་ཚུན་གསོད་རེས་དང་དབང་ཡོད་ཤོད་རེས་བྱེད་པ་ནི་རྩ་བ་ནས་ནོར་གྱི་ཡོད་པ་རེད། ང་ཚོ་མཆེད་གྲོགས་གཅིག་པ་ཡིན་པའི་ཆ་ནས་ཕན་ཚུན་རོགས་པ་བྱེད་དགོས་པ་རེད། ང་ཚོས་འཛམ་གླིང་ཚ་དྲོད་རྒྱས་བཞིན་པ་དེ་མཐོང་གི་རེད། ངོས་ནས་དུས་རྟག་ཏུ་ཆོས་ལུགས་དང་མ་འབྲེལ་བའི་བཟང་སྤྱོད་(Secular Ethics) ཀྱི་སྐོར་ལ་ཞུ་ཡི་ཡོད། སྒེར་ངོས་ནས་ཆོས་ལུགས་ལ་ཡིད་ཆེས་བྱེད་པ་དེ་ཡག་པོ་རེད་དེ། མེད་དུ་མི་རུང་བ་མ་རེད། འོན་ཀྱང་། བྱམས་སྙིང་རྗེ་དང་འགྲོ་བ་མི་ཚང་མ་མཆེད་གྲོགས་ཕོ་མོ་ཡིན་པའི་ཆ་ནས་ཚང་མ་མཉམ་དུ་སེམས་ཞི་བདེའི་ངང་ནས་འཚོ་གནས་ཐུབ་ཀྱི་རེད། ཅེས་སོགས་བཀའ་སློབ་སྩལ་འདུག

གྲོང་ཁྱེར་སྤྱི་ཁྱབ་པ་ཨབ་ཊབ་ཀརྨ་སིང་པུ་ར་ཝལ་ (Aftab Karma Singh Pureval) ལགས་ཀྱིས་མཇལ་བཅར་ཞུས་རྗེས་གསར་འགོད་པར། ང་རང་ཁ་འཐོར་བཙན་བྱོལ་དུ་གནས་པའི་བོད་མི་ཞིག་ཡིན་པ་དང་། དེ་རིང་ང་རང་བཞུགས་སྒར་དྷ་རམ་ས་ལར་བསླེབས་ཏེ། ༧གོང་ས་རྒྱལ་བ་རིན་པོ་ཆེ་མཆོག་དང་མཇལ་ཁ་ཞུ་རྒྱུའི་གོ་སྐབས་བྱུང་བར་ཧ་ཅང་གི་སྐལ་བ་བཟང་པོ་ཡིན་བསམ་གྱི་འདུག རྒྱུ་མཚན་ནི། ང་རང་དེ་རིང་༧གོང་ས་རྒྱལ་བ་རིན་པོ་ཆེ་མཆོག་དང་དངོས་སུ་མཇལ་རྒྱུ་བྱུང་བ་ཐོག་མ་དེ་ཡིན་ཞིང་། ༧མགོན་པ་གང་ཉིད་མཆོག་དང་དངོས་སུ་མཇལ་སྐབས། ང་རང་གིས་དྲི་བ་མང་པོ་འདྲི་རྒྱུའི་གོ་སྐབས་བྱུང་སོང་ལ། སྐབས་དེ་དུས་ངས་༧མགོན་པོ་གང་ཉིད་མཆོག་ལ། ང་རང་ཨ་རིར་གནས་སྡོད་བོད་མི་ཞིག་ཡིན་པའི་ཆ་ནས། བོད་པ་དང་བོད་དོན་སླད་ག་རེ་བྱ་ཐུབ་ཀྱི་ཡོད་སྐོར་འདྲི་སྐབས། ༧གོང་ས་རྒྱལ་བ་རིན་པོ་ཆེ་མཆོག་གིས། སྤྱི་ཚོགས་ལ་ཞབས་ཕྱི་ཞུ་བའི་སྐབས་བོད་པ་གཅིག་པོའི་བསམ་བློ་མི་བཏང་བར་འགྲོ་བ་མི་སྤྱིའི་བདེ་རྩར་ཕན་པའི་བྱ་བ་བསྒྲུབ་དགོས་པའི་བཀའ་སློབ་ལམ་སྟོན་གནང་སོང་། ཞེས་དང་། ཁོང་གི་ཨ་མ་ལགས་རང་ཡུལ་བཞག་ནས་བཙན་བྱོལ་དུ་ཡོང་མཁན་ཞིག་ཡིན་ལ། བཙན་བྱོལ་ནང་གི་དཀའ་སྡུག་ཚོར་ཐུབ་ཀྱི་ཡོད་སྐོར་དང་། བོད་ཀྱི་ཆོས་དང་རིག་གཞུང་སྐད་ཡིག་བཅས་བདག་ཉར་བྱ་རྒྱུ་དེ་བོད་ནང་ཙམ་མིན་པར་བཙན་བྱོལ་ནང་གི་བོད་མི་ཚོ་ལའང་འགན་ཡོད་སྐོར་གསུངས་འདུག

ད་ལན་གྱི་ཨ་རིའི་གྲོང་ཁྱེར་སྤྱི་ཁྱབ་པའི་ཚོགས་ཆུང་དེས་བདུན་ཕྲག་གཅིག་ཙམ་རིང་རྒྱ་གར་གྱི་རྒྱལ་ས་ལྡི་ལི་དང་ (Agra)དང་། པན་ཇབ་ཀྱི་ཨམ་རི་སར་(Amritsar) སོགས་གྲོང་ཁྱེར་ཁག་ཅིག་ཏུ་གཟིགས་སྐོར་གནང་ཡོད་འདུག་ལ། ཟླ་འདིའི་ཕྱི་ཚེས་ ༩ ཉིན་ཕྱིར་ཨ་རིར་ཕེབས་འཆར་ཡོད་འདུག

ཀརྨ་ལགས་དེ་སྔོན་ཨ་རིའི་ཨོ་ཧའོ་མངའ་སྡེའི་ཧ་མིལ་ཊོན་ (Hamilton County) རྫོང་ཁྲིམས་ཁང་གི་ཁྲིམས་དྲུང་ཆེན་མོ་དང་། ཕྱི་ལོ་ ༢༠༡༨ ལོར་ཁོང་ཨ་རིའི་གྲོས་ཚོགས་འོག་མའི་འཐུས་མིར་ལངས་ཏེ་བོད་མི་ཨ་རི་བ་ཞིག་ཨ་རིའི་གྲོས་ཚོགས་འཐུས་མིར་ལངས་པ་ཐེངས་དང་པོ་ཆགས། འདས་ལོའི་ཕྱི་ཟླ་ ༡༡ པའི་ནང་ཨབ་ཊབ་ཀརྨ་སིང་པུ་རི་ཝལ་ (Aftab Karma Singh Pureval) ལགས་ཨ་རིའི་ཨོ་ཧའོ་ (Ohio) མངའ་སྡེ་ནང་གི་གྲོང་ཁྱེར་སིན་སིན་ན་ཊི་ (Cincinnati) ཡི་སྤྱི་ཁྱབ་པར་འོས་འདེམས་བྱུང་ཡོད་ཅིང་།  ཨ་རིའི་གྲོང་ཁྱེར་དེའི་ལོ་རྒྱུས་ནང་གི་ཨེ་ཤ་ཡའི་སྤྱི་ཁྱབ་པ་ཐོག་མ་དེའང་ཆགས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།