ཉི་ཧོང་གྲོས་ཚོགས་ཀྱི་འཐུས་མི་ཁག་ཅིག་ལྷན་འཛོམས་ཐོག་རྒྱ་ནག་དམར་ཤོག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ལ་ལྟ་ཞིབ་བྱེད་མཁན་ཇུས་སྟོན་ཚོགས་ཆུང་ཞིག་གསར་འཛུགས་གནང་ཡོད་འདུག
ཟླ་འདིའི་ཕྱི་ཚེས་ ༥ ཉིན་ཉི་ཧོང་གྲོས་ཚོགས་ཀྱི་ཚོགས་ཁང་དུ། བོད་དང་ཡུ་གུར། ལྷོ་སོག་བཅས་ཀྱི་གནད་དོན་ལ་རྒྱབ་སྐྱོར་བྱེད་མཁན་ཉི་ཧོང་གྲོས་ཚོགས་འཐུས་མི་ཁག་གཅིག་ལྷན་འཛོམས་ཐོག་རྒྱ་ནག་དམར་ཤོག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ལ་ལྟ་ཞིབ་བྱེད་མཁན་ཇུས་སྟོན་ཚོགས་ཆུང་ཞིག་གསར་འཛུགས་གནང་ཡོད་པ་དང་། ཇུས་སྟོན་ཚོགས་ཆུང་གི་ཚོགས་གཙོར་གུ་ཡངས་མང་གཙོ་ཚོགས་པའི་ཀི་ཇི་ཕུ་རུ་ཡ་ (Keiji Furuya) ལགས་དང་། དྲུང་ཆེར་གུ་ཡངས་མང་གཙོ་ཚོགས་པའི་ཧི་རོ་མི་མིཊ་ཚུ་བ་ཡ་ཤི་ལགས་ (Hiromi Mitsuybayashi) ལགས་བསྐོ་བཞག་གནང་ཡོད་པ་མ་ཟད། ཚོགས་ཆུང་གི་སློབ་སྟོན་པར་ཉི་འོང་གི་བསམ་མཛོད་བསྟི་གནས་ (Japan Institute for National Fundamentals) ཞེས་པའི་ཡོ་ཤི་ཀོ་ས་ཀུ་རི་ (Yoshiko Sakurai) ལགས་བསྐོ་བཞག་གནང་ཡོད་འདུག
སྐབས་དེར་གྲོས་ཚོགས་འཐུས་མི་ཀི་ཇི་ཕུ་རུ་ཡ་ལགས་དང་། བློན་ཆེན་ཏ་ཀའི་ཆི་ས་ནེ་ (Takaichi Sanae) ལགས། བསམ་མཛོད་བསྟི་གནས་ཁང་གི་ངེས་སྟོན་པ་ཡོ་ཤི་ཀོ་ས་ཀུ་རི་ (Yoshiko Sakurai) ལགས་ཀྱིས་རྒྱལ་སྤྱིའི་ཐོག་ནས་མུ་མཐུད་ཁ་ཁུ་སིམ་པོར་བསྡད་པའི་རྐྱེན་གྱིས་རྒྱ་ནག་གཞུང་གིས་རང་གི་མི་སེར་དང་བཙན་འཛུལ་བྱས་པའི་ས་ཁུལ་གྱི་མི་མང་ལ་སྡུག་སྦྱོང་མནར་གཅོད་མུ་མཐུད་གཏོང་གི་ཡོད་སྐོར་དང་། ད་ཆ་ཚང་མས་རྒྱལ་སྤྱིའི་ཁྲིམས་སྒྲིག་སྲུང་སྐྱོབ་དང་རྒྱ་ནག་གི་དབང་ཤེད་དང་དྲག་རྩུབ་ཆེ་བའི་སྲིད་བྱུས་ཀྱི་ཁ་གཏད་དུ་སྐད་ཆ་ཤོད་དགོས་ཞེས་གསུངས་ཡོད་འདུག
ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཤི་མོ་མུ་ར་ཧ་ཀུ་བུན་ (Shimomura Hakubun) ལགས་ཀྱིས་ཇུས་སྟོན་ཚོགས་ཆུང་དེ་ལྟ་བུ་ཞིག་གསར་འཛུགས་གནང་བར་དགའ་བསུའི་བསྔགས་བརྗོད་གནང་བ་དང་འབྲེལ། བོད་ནང་རྒྱ་གཞུང་གིས་རིག་གཞུང་རྩ་གཏོར་གཏོང་བཞིན་པའི་སྐོར་དང་། བོད་རྒྱའི་དཀའ་རྙོག་སེལ་བར་༸གོང་ས་མཆོག་དང་བོད་མིའི་སྒྲིག་འཛུགས་ནས་གཉིས་སྨན་གྱི་ཞི་བའི་ཐབས་ལམ་བསྟེན་གནང་བའི་སྐོར་སོགས་ངོ་སྤྲོད་གནང་ཡོད།
དེ་བཞིན་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གྲོས་ཚོགས་འཐུས་མི་རྣམས་ལ་ཐུགས་རྗེ་ལེགས་འབུལ་ཞུས་པ་དང་ཆབས་ཅིག་འདི་ལོའི་ཕྱི་ཟླ་ ༠༦ ནང་ཨ་རི་ཝ་ཤིང་ཀྲོན་དུ་ཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པའི་སྐབས། རྒྱལ་སྤྱིའི་གྲོས་ཚོགས་བོད་དོན་འབྲེལ་མཐུད་ཚོགས་པ་སླར་གསོ་གནང་བའི་སྐོར་ངོ་སྤྲོད་དང་། ཉི་ཧོང་སྐད་དུ་བསྒྱུར་བའི་རྒྱལ་སྤྱིའི་གྲོས་ཚོགས་བོད་དོན་འབྲེལ་མཐུད་ཚོགས་པའི་དམིགས་ཡུལ་འགྲེམས་སྤེལ་གནང་བ་དང་སྦྲགས་གྲོས་ཚོགས་འཐུས་མི་རྣམས་དེར་འཛུལ་ཞུགས་ཡོང་བའི་འབོད་སྐུལ་ཞུས་ཡོད་འདུག
ཚོགས་འདུའི་དམིགས་བསལ་གསུང་བཤད་པའི་ཁོངས་སྲིད་ཟུར་བློ་བཟང་སེངྒེ་ལགས་དང་། རྒྱལ་སྤྱིའི་ཡུ་གུར་མཐུན་ཚོགས་ཀྱི་ཊོལ་ཀུན་ཨི་ས་ (Dolkun Isa) ལགས། ཤི་ཛོ་ཀ་གཙུག་ལག་སློབ་གཉེར་ཁང་གི་གཙུག་ལག་སློབ་དཔོན་ཨོ་ནོ་ཨ་ཀི་ར་ (Ohno Akira) ལགས། ལྷོ་སོག་མཐུན་ཚོགས་ཀྱི་དའི་ཆིན་ཨོལ་ཧུ་ནུ་ (Daichin Olhunud) ལགས་ཡོད་ཅིང་། ཁོང་རྣམས་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་གཏོང་བཞིན་པའི་སྐོར་གསུང་བཤད་གནང་ཡོད་འདུག
བོད་མིའི་སྒྲིག་འཛུགས་ཀྱི་དྲ་བ་ལས་འདིར་དྲངས།
