ཟླ་འདིའི་ཚེས་ ༡༥ ཉིན་ནས་བཟུང་བོད་ཁུལ་གྱི་སློབ་གྲྭ་ཆུང་འབྲིང་གི་སློབ་མར་སྤྱི་སྐད་ཚད་ལེན་གྱི་སྲིད་ཇུས་ལག་བསྟར་བྱ་རྒྱུ་རེད།

ཟླ་འདིའི་ཕྱི་ཚེས་ ༡༥ ཉིན་ནས་བཟུང་རྒྱ་ནག་གཞུང་གིས་རྒྱལ་ཡོངས་ཀྱི་སློབ་གྲྭ་ཆུང་འབྲིང་གི་སློབ་མ་ལའང་རྒྱའི་སྐད་ཡིག་གི་གནས་ཚད་རིམ་པ་ ༦ དུ་དབྱེ་བའི་ཚད་ལེན་སྲིད་ཇུས་ཤིག་གཟབ་ནན་དང་སྐུལ་འདེད་ཀྱི་ནུས་པ་ལྡན་པའི་ཐོག་ནས་ལག་བསྟར་བྱ་རྒྱུ་ཡིན་སྐོར་བསྒྲགས་འདུག

རྒྱ་ནག་གཞུང་གིས་སྔོན་ཆད་ནས་སློབ་ཆེན་ཁག་གི་སློབ་མ་ཚོ་སློབ་མཐར་ཕྱིན་སྐབས་རྒྱུན་ལྡན་གྱི་སློབ་ཚན་ཁག་ཕུད་པའི་རྒྱའི་སྐད་ཡིག་གི་གནས་ཚད་ཐད་ལོགས་སུ་ཡིག་ཚད་གཏོང་གི་ཡོད་ཀྱང་། འདི་ལོའི་ཕྱི་ཟླ ༣ ཚེས་ ༢༨ ཉིན་རྒྱ་ནག་པེ་ཅིང་དུ། རྒྱ་ནག་རྒྱལ་ཡོངས་སྐད་ཡིག་འཛིན་སྐྱོང་ལྷན་ཁང་ཟེར་བའི་གོ་སྒྲིག་འོག སྐད་ཡིག་ཚད་ལྡན་ཞིབ་བཤེར་གཏན་འབེབ་ཀྱི་ཚོགས་འདུ་ཟེར་བ་ཞིག་བསྡུས་ཡོད་པ་དང་། ཚོགས་འདུ་དེའི་ཐོག་རྒྱལ་ཡོངས་སྐད་ཡིག་འཛིན་སྐྱོང་ལྷན་ཁང་གི་ལོ་ལྔ་ཚན་བཅུ་བཞི་པའི་སྐད་ཡིག་ཚད་ལྡན་འཛུགས་སྐྲུན་འཆར་འགོད་ཟེར་བའི་ཁོངས་སུ། སློབ་གྲྭ་ཆུང་འབྲིང་གི་སློབ་མའི་སྤྱི་སྐད་ཆུ་ཚད་ཀྱི་ཚད་རིམ་རྒྱུགས་གཞིའི་ཚད་གཞི་དང་རྒྱུགས་གཞིའི་རྩ་གནད་ཟེར་བ་ཞིག་གཏན་འབེབ་བྱས་ཏེ། རྒྱལ་ཡོངས་ཀྱི་ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར་ཁག་གི་སློབ་གསོ་སྡེ་ཁག་ནང་དུ་བཀྲམ་ཟིན་ཡོད་འདུག་ལ། ཡོངས་ཁྱབ་གསལ་བསྒྲགས་ནང་དུ་འདི་ལོའི་ཕྱི་ཟླ་ ༡༢ ཚེས་ ༡༥ ཉིན་ནས་བཟུང་ཡོངས་ཁྱབ་ཐོག་ལག་བསྟར་བྱ་རྒྱུ་ཡིན་པ་བྲིས་འདུག དེ་ནི་ཕྱི་ལོ་ ༢༠༠༩ ལོར་རྒྱ་ནག་ཤེས་རིག་ལྷན་ཁང་དང་སྐད་ཡིག་འཛིན་སྐྱོང་ལྷན་ཁང་ཟེར་བ་གཉིས་ཀྱིས་གཏན་འབེབ་བྱས་པའི་སློབ་ཆུང་དང་དམའ་རིམ་སློབ་མའི་བསླབ་གཞི་ཡོད་ཚད་རྒྱ་ཡིག་ཐོག་ཏུ་བསྒྱུར་བའི་སྲིད་ཇུས་ཀྱི་ཆ་ཤས་ཤིག་ཡིན་འདུག

དེའི་སྐོར་ལ་བོད་ཀྱི་སྲིད་ཇུས་ཉམས་ཞིབ་ཁང་གི་རྒྱ་ནག་སྐོར་གྱི་ཉམས་ཞིབ་པ་བསྟན་འཛིན་ཕན་ཐོགས་ལགས་ཀྱིས། སྔོན་མ་ཡིན་ན་རྒྱ་ནག་གི་གཞུང་ཞབས་ནང་ཡིག་ཚད་གཏོང་སྐབས་རྒྱའི་སྤྱི་སྐད་ཚད་ལེན་གྱི་དཔང་ཡིག་དེ་དགོས་ཀྱི་ཡོད་དུས་སློབ་གྲྭ་ཆེན་མོའི་སྐབས་སུ་ངག་རྒྱུགས་དང་ཡིག་རྒྱུགས་གཉིས་ཀ་གཏོང་དགོས་ཀྱི་ཡོད་པ་རེད། ད་རེས་རྒྱ་ནག་རྒྱལ་ཡོངས་ཀྱི་སློབ་ཆུང་དང་སློབ་འབྲིང་གི་སློབ་མ་ཚང་མས་རྒྱའི་སྤྱི་སྐད་ཀྱི་ཡིག་ཚད་དེ་གཏོང་དགོས་ཀྱི་འདུག དེ་ག་རེ་ལ་དམིགས་པ་ཡིན་སོགས་གསལ་པོ་བྲིས་མི་འདུག་ཀྱང་། མ་འོངས་པར་སློབ་ཆུང་དང་སློབ་འབྲིང་གི་ཡིག་རྒྱུགས་སྐབས་སུ་ཁོང་ཚོས་ཐད་ཀར་འབྲེལ་བ་བཏགས་ནས་སློབ་རིམ་ཡར་འཕར་རྒྱུར་བེད་སྤྱོད་གཏང་བ་ཡིན་ན་དཔེ་ཉེན་ཁ་ཆེན་པོ་རེད། མ་འོངས་པར་སློབ་གྲྭ་ཙམ་མིན་པར་ཁྱིམ་ཚང་རེ་རེའི་ངོས་ནས་ཀྱང་ཤུགས་བརྒྱག་དགོས་པའི་གནས་སྟངས་ཆགས་ཀྱི་རེད། གང་ཡིན་ཟེར་ན། ཕྱི་ལོ་ ༢༠༣༥ བར་དུ་རྒྱ་ནག་རྒྱལ་ཡོངས་རྒྱ་སྐད་སྤྱི་སྐད་ཅན་དུ་བསྒྱུར་བའི་འཆར་གཞི་དེ་ཤུགས་ཆེན་པོའི་ཐོག་ནས་ལག་བསྟར་བྱེད་བཞིན་པ་རེད། ཅེས་བརྗོད་བྱུང་།  

ཞི་ཅིན་ཕིན་གྱིས་སློབ་ཞུགས་མ་བྱས་གོང་གི་བྱིས་པའི་སྐད་ཡིག་སློབ་གསོར་ཤུགས་བརྒྱབ་ནས་མི་ཚེའི་རྨང་གཞི་བརྟན་པོ་ཡོང་བར་ཤུགས་བརྒྱག་དགོས་ཞེས་བཀའ་རྒྱ་ཕབ་པ་ལྟར། རྒྱ་ནག་ཤེས་རིག་ལྷན་ཁང་གི་ལོ་ལྔའི་འཆར་གཞི་བཅུ་བཞི་པ་ཟེར་བའི་ནང་དུ། སློབ་ཞུགས་མ་བྱས་པའི་སྔོན་གྱི་བྱིས་པ་རྣམས་ལ་བྱིས་པའི་སྐད་གདངས་གཅིག་པ་ཞེས་པའི་སྲིད་ཇུས་ལག་བསྟར་བྱས་ཏེ། བོད་དང་ལྷོ་སོག ཤིན་ཅང་སོགས་གྲངས་ཉུང་མི་རིགས་ཀྱི་ས་ཁུལ་ཁག་གི་བུ་བཅོལ་ཁང་ནས་བཟུང་སྟེ་ལག་བསྟར་བྱེད་བཞིན་ཡོད་པ་དང་། བྱིས་པའི་སྐད་གདངས་གཅིག་པ་ཞེས་པའི་སྲིད་ཇུས་དེར་ཁྱོན་དོན་ཚན་ཆེན་པོ་བཞི་ཡོད་པ་དང་། དེའི་དོན་ཚན་དང་པོ་དགོས་དམིགས་ཀྱི་ནང་དུ། ཕྱི་ལོ་ ༢༠༢༡ ལོའི་སྟོན་དུས་ཀྱི་སློབ་སྐབས་ནས་བཟུང་རྒྱལ་ཁབ་ཀྱི་སྤྱིའི་སྐད་སྤྱད་ནས་སློབ་གསོའི་བྱེད་སྒོ་སྤེལ་མེད་པའི་མི་རིགས་ས་ཁུལ་དང་གྲོང་གསེབ་ཁུལ་གྱི་བུ་བཅོལ་ཁང་དག་གིས་སྐད་ཡིག་སློབ་གསོའི་བྱེད་སྒོ་སྤེལ་དགོས་པ་དང་། ལོ་ལྔའི་འཆར་གཞི་བཅུ་བཞི་པའི་རིང་ལ། མི་རིགས་ས་ཁུལ་དང་གྲོང་གསེབ་ཀྱི་བུ་བཅོལ་ཁང་གི་དགེ་རྒན་གྱི་སྤྱི་སྐད་ནུས་པའི་གསོ་སྦྱོང་དུས་ཡུན་ཁག་བགོས་ཀྱིས་སྤེལ་ཏེ། སློབ་ཞུགས་མ་བྱས་གོང་གི་བྱིས་པར་རིམ་བཞིན་གཞི་རྩའི་སྤྱི་སྐད་བྱེད་ནུས་ལྡན་པ་ཞིག་ཏུ་གཏོང་དགོས་པ་དང་། འོས་འགན་སློབ་གསོའི་སྐབས་སུ་སློབ་ཞུགས་པར་སྐད་ཡིག་གི་རྨང་གཞི་ལེགས་པོ་བསྐྲུན་དགོས་པ། སློབ་ཁྲིད་བྱེད་ཕྱོགས་རྒྱུན་འཁྱོངས་དང་གཙོ་གནད་དུ་འཛིན་དགོས་པ་མ་ཟད། སློབ་ཞུགས་མ་བྱས་གོང་གི་སློབ་གསོ་འཕེལ་རྒྱས་གཏོང་ཕྱོགས་ཚགས་ཚུད་པ་དང་། མི་རིགས་ས་ཁུལ་དང་གྲོང་གསེབ་ཁུལ་གྱི་སློབ་ཞུགས་མ་བྱས་གོང་གི་བྱིས་པའི་སྤྱི་སྐད་སློབ་གསོའི་དོན་དངོས་ལ་དམིགས་ནས་བསྒྲུབ་དགོས་སྐོར་བཀོད་འདུག

སྲིད་ཇུས་དེའི་དོན་ཚན་གཉིས་པ་གཞི་རྩའི་བསམ་ཕྱོགས་ནང་དུ་དོན་ཚན་བཞི་ཡོད་པའི་་ནང་གཙོ་གནད་བཟུང་སྟེ་རྒྱའི་སྤྱི་སྐད་རྒྱ་ཁྱབ་ཏུ་སྤེལ་བའི་སྲིད་ཇུས་ལག་བསྟར་དོན་འཁྱོལ་ཡོང་ཐབས་སུ། ས་གནས་ཀྱི་མགོ་འཁྲིད་དང་སྲིད་གཞུང་། སློབ་གྲྭ། ཁེ་ལས་སོགས་ནས་མཉམ་དུ་སྐུལ་འདེད་ནན་པོ་གཏོང་དགོས་སྐོར་དང་།  དོན་ཚན་གསུམ་པ་ལས་འགན་གཙོ་བོ་ཞེས་པར་དོན་ཚན་དྲུག་ཡོད་པའི་ནང་། དགེ་རྒན་གསོ་སྐྱོང་སྦྱོང་བརྡར་བྱེད་ཤུགས་ཆེ་རུ་གཏོང་དགོས་པ་དང་། དགེ་རྒན་གྱི་དཔུང་སྡེ་འཐུས་སྒོ་ཇེ་ཚང་དུ་གཏོང་དགོས། གསུམ། མི་རིགས་ས་ཁུལ་གྱི་དགེ་རྒན་རྣམ་པའི་སྐད་ཡིག་བཀོལ་སྤྱོད་ཐད་བསྒྱུར་བཅོས་གཏོང་དགོས་པ། བཞི། རོགས་སྐྱོར་ལམ་སྲོལ་འཛུགས་དགོས། ལྔ། དཔེ་སྟོན་སྣེ་ཁྲིད་བྱེད་པར་འབོད་སྐུལ་བྱ་དགོས་པ། དྲུག ཁོར་ཡུག་ལེགས་པོ་ཞིག་བསྐྲུན་དགོས་ཟེར་བ་བཅས་བཀོད་འདུག

གསར་འགོད་པ། བྱམས་པ་ཚེ་རིང་།