བློ་གྲོས་དང་བྱམས་བརྩེ་སྤེལ་བའི་གོ་ལ་སྤྱི་ཁྱབ་ཀྱི་ལས་གཞི་སཱི་ཤེས་ཡོན་སློབ་གསོ་དང་འབྲེལ་བའི་ཚོགས་འདུ་དབུ་འཛུགས་གནང་།

༧གོང་ས་རྒྱལ་བ་རིན་པོ་ཆེ་མཆོག་ནས་ང་ཚོ་ལོ་ཡར་བསླེབས་ཡོང་དུས་ཆུང་བའི་སྐབས་ཨ་མས་གཅེས་སྐྱོང་བྱས་པའི་བྱམས་བརྩེའི་ཚོར་བ་དྲན་པའི་ཐོག་ནས་སོ་སོ་ཡོད་སའི་འཛམ་གླིང་འདིའི་སྒང་ལ་ག་ཚོད་ཐུབ་ཐུབ་ཀྱིས་བྱམས་བརྩེ་སྤེལ་ཐུབ་པ་ཞིག་བྱ་དགོས་སྐོར་བཀའ་སློབ་སྩལ།

ཏཱ་ལའི་བླ་མ་དགེ་རྩ་ཚོགས་པ་དང་ཨེ་མོ་རི་གཙུག་ལག་སློབ་གཉེར་ཁང་ (Emory University) གཉིས་ཀྱི་གོ་སྒྲིག་འོག དེ་རིང་བཞུགས་སྒར་དྷ་རམ་ས་ལའི་༧གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་(The Dalai Lama library and archives) དུ། ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག ཨེ་མོ་རི་གཙུག་ལག་སློབ་གཉེར་ཁང་གི་དབུ་འཛིན་གྷི་རི་གྷོ་རི་ཨེལ་ཧྥན་ཝེ་སི་(Gregory L. Fenves)མཆོག་དང་། ཨེ་མོ་རི་གཙུག་ལག་སློབ་གཉེར་ཁང་གི་སློབ་གསོའི་ལས་དོན་གྱི་འགན་འཛིན་གཞོན་པ་མགོ་འཛིན་ (Ravi V. Bellamkonda)ལགས། དེ་བཞིན་ཨེ་མོ་རི་བྱམས་བརྩེའི་ལྟེ་གནས་ཁང་གི་འགན་འཛིན་འབུམ་རམས་པ་བློ་བཟང་བསྟན་འཛིན་ནེ་གི་ལགས་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བཀའ་བློན་རྣམ་པ། བཀའ་ཟུར་ཟམ་གདོང་རིན་པོ་ཆེ་མཆོག་སོགས་ཕེབས་འདུག་ཅིང་། ཚོགས་འདུའི་སྟེང་ཨ་རི་དང་ཁེ་ན་ཌ། དེ་བཞིན་རྒྱ་གར་དང་སྦར་སིལ། མེག་སི་ཀོ་ (Mexico)། ཁོ་ལོམ་བྷི་ཡ་ (Colombia)། རོ་མ་ནི་ཡ་ (Romania)། སོག་པོ། (Mongolia)། ཀེ་ནེ་ཡ་ (Kenya) བཅས་ནས་ཚོགས་ཞུགས་གནང་འདུག

དབུ་འབྱེད་མཛད་སྒོའི་སྟེང་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོ་གྲོགས་པོ་རྙིང་པ་མང་པོ་ཞིག་རུབ་རུབ་བྱས་པ་རེད། དགའ་པོ་ཞེ་དྲགས་བྱུང་། དེ་རིང་༧སྐྱབས་རྗེ་ཁྲི་ཟུར་རིན་པོ་ཆེ་དགོངས་པ་རྫོགས་པའི་གནས་ཚུལ་ཐོས་བྱུང་། མ་གཞི་འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ་རེད། དེར་བརྟེན་གང་ལྟར་ཆོས་ཉིད་རེད། ངོས་རང་ལ་དྭགས་སུ་འབྱོར་བའི་སྐབས་ཁྲི་ཟུར་རིན་པོ་ཆེའི་སྐུ་མདུན་ནས་འཇིག་བྱེད་གཉན་ཆེན་གྱི་མཚམས་ལ་བཞུགས་པ་དང་། མཚམས་ལ་བཞུགས་སའི་བཞུགས་གདན་དེའི་སྒང་ནས་ངོས་ཀྱིས་རིགས་ཚོགས་དྲུག་གི་ཞལ་ལུང་ཞུས་པ་ཡིན། འདི་གསལ་པོ་ཞེ་དྲགས་དྲན་ཡོང་བགྱིས། ངོས་ནས་གོང་དུ་ཞུས་པ་ལྟར་འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཉེར་ལེན་གྱི་ཕུང་པོ་དེ་འདྲ་བླངས་ཕྱིན་ཆད་ལ་སྐྱེ་རྒ་ན་འཆིའི་སྡུག་བསྔལ་ཐོག་ནས་ཡོང་བསྡད་པ་ཞིག་རེད་མ་གཏོགས། དེ་ལས་ཐར་ཐབས་གང་ཡང་མེད་པ་རེད། ཅེས་གསུངས་སོང་།

༧ཡང་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོ་ཚེ་ལོ་བརྒྱ་པའི་སྐབས་ཀྱི་མི་ཆགས་ཀྱི་ཡོད་རེད། ངོས་རང་ལ་ཆ་བཞག་ན། ཚེ་ལོ་བརྒྱ་པའི་མི་ཞིག་རེད། གོང་དུ་ཞུས་པ་ལྟར། ཆུང་དུས་ཡོངས་འཛིན་དགེ་བའི་བཤེས་གཉེན་གྱི་བཀའ་དྲིན་ལ་བརྟེན་ནས་དཔེ་ཆ་ལ་ཏོག་ཙམ་བལྟས་པ་དང་། དེ་ནས་ང་ཚོ་བཙན་བྱོལ་དུ་བསླེབས་རྗེས་ག་ཚོད་ཐུབ་ཐུབ་ཀྱིས་སྒོམ་ཉམས་ལེན་བྱས་ཏེ། ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ག་ཚོད་ཐུབ་ཐུབ་ཀྱིས་ཉམས་ལེན་བྱེད་ཀྱི་ཡོད་པ་རེད། དེར་བརྟེན་ངོས་རང་གི་ཉམས་མྱོང་གི་ཐོག་ནས་བྱང་ཆུབ་ཀྱི་སེམས་ཟེར་བ་དེ་ནུས་པ་ཆེན་པོ་དང་ཕན་ཐོགས་ཞེ་དྲགས་ཡོད་པ་ཞིག་རེད་འདུག ང་ཚོ་ཆུང་དུས་སྐྱེ་བའི་སྐབས་ནས་མའི་བརྩེ་བས་བསྐྱངས་པ་རེད། མའི་བརྩེ་བ་དེ་ལ་བརྟེན་ནས་རང་ཉིད་འཚོ་ཡི་ཡོད་རེད། བརྩེ་བ་དེ་ཆུང་དུས་ནས་གོམས་བསྡད་ཡོད་པ་དང་། མིའི་སྤྱི་ཚོགས་ཟེར་བ་དེ་བརྩེ་བ་ལ་བརྟེན་མཁན་ཆགས་ཀྱི་ཡོད་པས། ང་ཚོར་ལྷན་སྐྱེས་ཀྱིས་སེམས་པ་བཟང་པོ་བྱ་རྒྱུའི་གཞི་རྩ་ཞིག་ཡོད་པར་བརྟེན། ལོ་ཡར་བསླེབས་ཡོང་དུས་ཆུང་བའི་སྐབས་ཨ་མས་གཅེས་སྐྱོང་བྱས་པའི་བྱམས་བརྩེའི་ཚོར་བ་དྲན་པའི་ཐོག་ནས། སོ་སོ་ཡོད་སའི་འཛམ་གླིང་འདིའི་སྒང་ལ་ག་ཚོད་ཐུབ་ཐུབ་ཀྱིས་བྱམས་བརྩེ་སྤེལ་ཐུབ་པ་ཞིག་བྱ་དགོས། དེ་ཡང་འཛམ་གླིང་འདིའི་སྒང་གི་སྲོག་ཆགས་སྤྱི་དང་ལྷག་པར་མི་དེ་དག་མའི་བརྩེ་བས་བསྐྱངས་པ་ཞིག་ཡིན་པར་བརྟེན། ག་ཚོད་ཐུབ་ཐུབ་ཀྱིས་མི་ཚེ་གང་པོར་བརྩེ་བ་ཟེར་བ་དེ་ཟིན་ཐུབ་པ་ཞིག་དང་། མཐའ་མ་ཤི་བའི་སྐབས་སུ་རང་གི་མཐའ་འཁོར་དུ་བརྩེ་བ་ཡོད་མཁན་གྱི་གྲོགས་པོ་ཚོ་འཁོར་བསྡད་ན། སོ་སོའི་སེམས་ལ་ཞི་བདེ་མང་བ་ཡོང་བ་དང་ཤི་སྲོལ་བདེ་པོ་ཡོང་གི་རེད། གཞན་ཤི་བའི་སྐབས་རྒྱུ་དངོས་པོ་ག་ཚོད་ཡོད་རུང་ཕན་ཐོགས་རྒྱུ་གང་ཡང་མེད། ཅེས་དང་། དེང་སང་གོ་མཚོན་སླད་འགྲོ་སོང་མང་པོ་གཏོང་གི་ཡོད་པ་དེ་ནོར་གྱི་ཡོད་པས། ང་ཚོས་འཛམ་གླིང་ཞི་བདེ་ལྡན་པ་ཞིག་ཡོང་རྒྱུར་བསམ་བློ་གཏོང་དགོས་གལ་ཆེ་བ་དང་། འཛམ་གླིང་ཁྱོན་ཡོངས་སུ་བྱམས་བརྩེ་སྤེལ་ཐུབ་པ་དང་། ཞི་བདེ་བསྐྲུན་པར་སེམས་པ་བཟང་པོ་དང་སྙིང་རྗེ་དགོས་ལ། ཆོས་ལུགས་ལ་ཡིད་ཆེས་ཡོད་མེད་ལ་མ་ལྟོས་པར་བྱམས་སྙིང་རྗེ་ཉམས་ལེན་བྱས་པའི་ཐོག་ནས་འཛམ་གླིང་ཞི་བདེ་དང་ལྡན་པ་ཟིག་བསྐྲུན་ཐུབ་ཀྱི་ཡོད་སྐོར་སོགས་གསུངས་སོང་།

དྷ་སའི་སྟོང་ལེན་སློབ་གྲྭ་ (Tong-Len School) ནས་ཡིན་པའི་རང་ལོ་ ༡༤ སོན་པའི་བུ་མོ་ (Ms. Sanjna Taktiyan) ཡིས།  ང་རང་སྟོང་ལེན་སློབ་གྲྭའི་སྡོད་ཁང་ནང་སྡོད་ཀྱི་ཡོད་པ་དང་། ང་རང་ཕ་མ་དང་ཐག་རིང་ཆགས་ཀྱི་ཡོད་སྐོར་དང་། ཕ་མ་གཉིས་དབུལ་པོ་ཡིན་པར་བརྟེན། ཁོང་ཚོའི་འཚོ་བར་དཀའ་ངལ་མང་པོ་འཕྲད་བཞིན་ཡོད་པས། ཕ་མར་ཞབས་ཕྱི་གང་འདྲ་ཞུ་དགོས་སྐོར་བཀའ་འདྲི་ཞུས་པར། ༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་གི་བསམ་ཚུལ་ལ། ཁྱེད་རང་གི་ཕ་མ་དང་སྤྱི་ཚོགས་ཀྱི་དོན་དུ་སློབ་སྦྱོང་སྦྱོང་གི་ཡོད་པར་བརྟེན། སློབ་སྦྱོང་སྦྱངས་པའི་ཐོག་ནས་ཁྱེད་རང་ལ་ཤེས་ཡོན་མང་པོ་ཐོབ་ཀྱི་རེད། དེའི་ཐོག་ནས་དཀའ་ངལ་གང་འདྲ་སེལ་དགོས་པ་དང་མི་ཚེ་བདེ་སྐྱིད་དང་ལྡན་པ་གང་འདྲ་བསྐྲུན་ཐུབ་ཀྱི་ཡོད་པ་སོགས་ཤེས་ཀྱི་རེད། ཁྱེད་རང་ལ་ཐོབ་པའི་ཤེས་ཡོན་དེ་དག་རང་ཉིད་ཀྱི་ཕ་མར་བསླབ་དགོས་རེད། སྤྱིར་བཏང་ཕ་མ་དེ་དག་ཤེས་ཡོན་མི་ལྡན་པས་བསམ་རྒྱ་ཆུང་བ་ཡོད་པ་རེད། དེར་བརྟེན། ད་ལྟའི་ཆར་གཞོན་སྐྱེས་རྣམས་ལ་སློབ་སྦྱོང་སྦྱང་རྒྱུའི་གོ་སྐབས་མང་པོ་ཡོད་རེད། སློབ་སྦྱོང་སྦྱངས་པའི་ཐོག་ནས་བསམ་རྒྱ་ཐོས་རྒྱ་ཆེ་རུ་འགྲོ་ཡི་རེད། ཤེས་རབ་དང་བསམ་བློ་རྒྱ་ཆེ་བའི་ཐོག་ནས་ཕ་མར་ཞབས་ཕྱི་ཞུ་ན་ཕན་ཐོགས་དང་ནུས་པ་ཆེ་བ་ཡོད་རེད། ང་ཚོར་དཀའ་ངལ་འཕྲད་པའི་སྐབས། ལམ་སེང་སེམས་ཤུགས་ཆག་ནས་བསྡད་པ་དེ་ནོར་གྱི་ཡོད་པས། སེམས་ཤུགས་ནམ་ཡང་མ་ཆག་པར་དཀའ་ངལ་ཇི་ལྟར་སེལ་དགོས་པ་དང་། གཞི་རྩ་གཙོ་བོ་ག་རེ་ཡིན་པའི་ཐོག་བསམ་བློ་གཏང་སྟེ་དཀའ་ངལ་སེལ་ཐབས་བྱ་དགོས་ལ། གཞན་ལ་རོགས་རམ་བྱ་དགོས། དེ་འདྲ་སོང་ཙང་སློབ་སྦྱོང་དེ་གལ་ཆེན་པོ་ཞེ་དྲགས་རེད། ཅེས་བཀའ་ལན་གནང་སོང་།

དེ་རིང་སཱི་ཤེས་ཡོན་སློབ་གསོ་དང་འབྲེལ་ནས་སློབ་གྲྭ་དང་འཛིན་གྲྭ། དེ་བཞིན་སྤྱི་ཚོགས་ནང་ཤུགས་རྐྱེན་ཇི་ལྟར་སྤྲད་ཡོད་སྐོར་དང་། མི་ཚེ་དོན་དང་ལྡན་པ་དང་ནུས་ལྡན་ཡོང་བར་བྱམས་བརྩེ་ཉམས་ལེན་ཇི་ལྟར་བྱ་དགོས་པ། དེས་ཤེས་ཡོན་ལ་ཤུགས་རྐྱེན་ཇི་ལྟར་སྤྲོད་ཀྱི་ཡོད་པའི་སྐོར་ལ་བགྲོ་གླེང་གནང་བཞིན་འདུག་ལ། སང་ཉིན་ཕྱི་ཚེས་ ༡༠ ཉིན་སཱི་ཤེས་ཡོན་སློབ་གསོ་བརྒྱུད་སློབ་ཕྲུག་གི་གྲུབ་འབྲས་སོགས་ལ་ཁེ་ཕན་ཇི་ལྟར་སྤྲོད་ཐུབ་སྐོར་དང་། ཚོགས་པའི་ནང་སཱི་ཤེས་ཡོན་སློབ་གསོ་ལག་བསྟར་གང་འདྲ་བྱེད་ཀྱི་ཡོད་སྐོར། དེ་བཞིན་ད་ལྟའི་སཱི་ཤེས་ཡོན་སློབ་གསོའི་ཤུགས་རྐྱེན་དང་མ་འོངས་པའི་ཁ་ཕྱོགས་སོགས་ཀྱི་སྐོར་ལ་བགྲོ་གླེང་གནང་རྒྱུ་རེད་འདུག

གསར་འགོད་པ། བསྟན་འཛིན་ཕུར་བུ།