༧གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ཧྲིལ་པོ་ ༣༣ འཁོར།

ནོ་སྦེལ་ཞི་བདེའི་གཟེངས་རྟགས་༧གོང་ས་མཆོག་ལ་འབུལ་བཞེས་མཛད་དེ་ལོ་ངོ་ཧྲིལ་པོ་ ༣༣ འཁོར་བའི་མཛད་སྒོའི་ཐོག་སྲིད་སྐྱོང་མཆོག་ནས་༸མགོན་པོ་མཆོག་གི་གདམས་ངག་རྣམས་ནི་ང་ཚོར་སྙིང་སྟོབས་དང་བློ་སྤོབས་འཕེལ་སྐྱེད་ཀྱི་སྨན་མཆོག་ཏུ་འཛིན་དགོས་ཤིང་ང་ཚོས་དུས་ཆེན་སྲུང་གཙིའི་དགོས་དོན་ངོ་མའང་འདི་ཡིན་སྐོར་གསུངས་སོང་།

དེ་རིང་ཞོགས་པའི་ཆུ་ཚོད་ ༡༠ བའི་ཐོག་དྷ་སའི་ཐེག་ཆེན་ཆོས་གླིང་གཙུག་ལག་ཁང་དུ། ༸གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ཧྲིལ་པོ་ ༣༣ འཁོར་བའི་གཞུང་འབྲེལ་མཛད་སྒོ་སྲུང་གཙི་གནང་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་འཇམ་དབྱངས་ཚེ་རིང་རྣམ་རྒྱལ་མཆོག་དང་། དམིགས་བསལ་སྐུ་མགྲོན་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇེ་ཐ་ཀུ་མར་མཆོག ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་ཁྲིམས་རྩོད་པ་སྐུ་ཞབས་བཀྲ་ཤིས་རྒྱལ་མཚན་ལགས་དང་རྒྱུན་ལས་འཐུས་མི། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་དབུས་པའི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། དྷ་ས་ཁུལ་གྱི་སེར་སྐྱ་མི་མང་དང་སློབ་ཕྲུག་བཅས་འཛོམས་འདུག་ལ། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ལས་བྱེད་སྐལ་བཟང་ཆོས་སྒྲོན་ལགས་ལ་ཞབས་ལོ་ ༢༥ ཧྲིལ་བོ་ལོན་པའི་གཟེངས་བསྟོད་བྱ་དགའ་གནང་སོང་བ་དང་། དེ་བཞིན་སྐུ་མགྲོན་གཙོ་བོ་འཇམ་དབྱངས་ཚེ་རིང་རྣམ་རྒྱལ་མཆོག་ནས་བོད་ཀྱི་ཟློས་གར་ཚོགས་པས་དབྱར་སྐྱིད་གཞས་སྣ་ཁག་པར་ལེན་ཕྱོགས་སྒྲིག་བྱས་པའི་མཐེབ་སྡེར་དབུ་འབྱེད་གནང་བ་དང་། དམིགས་བསལ་སྐུ་མགྲོན་སྐུ་ཞབས་སུ་ཇེ་ཐ་ཀུ་མར་མཆོག་གིས་འགྲོ་ཕན་སྨན་རྩིས་ཁང་གིསྨན་པ་འཇིགས་མེད་དགེ་འདུན་ལགས་ཀྱིས་རྩོམ་སྒྲིག་གནང་བའི་བོད་ཀྱི་གས་ོ་རིག་འཇམ་དཔྱད་རིག་པའི་རྣམ་བཤད་དང་ལག་ལེན་བེེཌཱརྱའི་འོད་སྣང་ཞེས་པའི་དཔེ་དེབ་དབུ་འབྱེད་གནང་སོང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་བཤད་གནང་སྐབས། འཛམ་གླིང་དུ་སྙན་གྲགས་ཆེ་བའི་གཟེངས་རྟགས་འདི་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་མཛད་པ་ནི། ༸མགོན་པོ་གང་ཉིད་ཀྱིས་བོད་དོན་བདེན་མཐའ་གསལ་ཐབས་ཆེད་ཐོག་མཐའ་བར་གསུམ་དུ་འཚེ་མེད་ཞི་བའི་ཐབས་ལམ་རྒྱུན་འཁྱོངས་གནང་བ་དང་། རྒྱལ་སྤྱིའི་རྩོད་རྙོག་འདུམ་འགྲིག་དང་། འགྲོ་བ་མིའི་ཐོབ་ཐང་གི་གནད་དོན། གོ་ལའི་ཁོར་ཡུག་གི་གནད་དོན་ཐད་དགེ་མཚན་ལྡན་ཞིང་གཟིགས་རྒྱང་ཡངས་པའི་དགོངས་ཚུལ་འདོན་གནང་མཛད་པ་ལ་ནོ་བྷེལ་ཞི་བདེའི་གཟེངས་རྟགས་ཚོགས་ཆུང་གིས་ངོས་འཛིན་ཆེ་བསྟོད་ཞུས་པའི་མཚོན་བྱེད་ཅིག་ཡིན། དམག་འཁྲུག་གི་དུས་རབས་སྔ་མའི་བསླབ་བྱ་བླངས་ཏེ། དུས་རབས་ཉེར་གཅིག་པ་འདི་གྲོས་མོལ་དང་ཞི་བདེའི་འཛམ་གླིང་ཞིག་ཏུ་འགྱུར་ཐུབ་པའི་ང་ཚོའི་རེ་སྨོན་དེ་རེ་བ་བརྒྱབ་པ་ནང་བཞིན་ཡོང་ཐུབ་ཀྱི་མེད་པས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དཀྱེལ་ཡངས་ཀྱི་དགོངས་པ་རྣམས་འགྲོ་བ་མི་སྤྱི་ཡོངས་ལ་མུ་མཐུད་དགོས་གལ་ཆེན་པོ་ཆགས་ཡོད་པ་མངོན་གསལ་ཡིན། ཞེས་གསུངས་སོང་།

ཡང་སྲིད་སྐྱོང་མཆོག་གིས། འཛམ་གླིང་ཞི་བདེའི་གདམས་ངག་གི་མཛོད་འཛིན་ཞིང་། ཉམས་སུ་བཞེས་ལ། གཞན་ལ་འདོམས་མཁས་པ་༸གོང་ས་༸སྐྱབས་མགོན་ཆེན་པོ་མཆོག་ལས་ལྷག་པ་ཞིག་འཇིག་རྟེན་འདིར་རྙེད་དུ་མེད། དེར་བརྟེན། ང་ཚོ་མི་རེ་ངོ་རེ་ནས་འགོ་བཙུགས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཇིག་རྟེན་ཀུན་ཕན་གྱི་བསླབ་བྱར་གཙིགས་འཛིན་དང་། ཉམས་ལེན་བྱེད་ཐུབ་པ་ཡིན་ན། ཁྱིམ་ཚང་དང་། མི་སྡེ། སྤྱི་ཚོགས། འགྲོ་བ་མིའི་གཞིས་ཁྱིམ་གོ་ལ་འདི་བཅས་སུ་ཞི་བདེའི་འགལ་རྐྱེན་དུ་འགྲོ་གཞིའི་གཡུལ་འཁྲུག་དང་། བཤུ་གཞོག བཙན་གནོན། མནར་གཅོད་ཀྱི་རྒུད་ཚོགས་གཞིལ་བར་ཕན་ནུས་རྨད་དུ་བྱུང་བ་འདོན་ཐུབ་རྒྱུར་ཐེ་ཚོམ་མེད་ལ། བོད་དོན་བདེན་མཐའ་གསལ་བར་འབད་པ་བསྟེན་མཁན་གྱི་བོད་མི་རིགས་ལ་མཚོན་ནའང་། ༸མགོན་པོ་མཆོག་གི་གདམས་ངག་འདི་དག་ནི་ང་ཚོར་སྙིང་སྟོབས་དང་བློ་སྤོབས་འཕེལ་སྐྱེད་ཀྱི་སྨན་མཆོག་ཏུ་འཛིན་དགོས་ཤིང་། ང་ཚོས་དུས་ཆེན་སྲུང་བརྩིའི་དགོས་དོན་ངོ་མའང་འདི་ཡིན། ཞེས་གསུངས་སོང་།

སྲིད་སྐྱོང་གིས། ད་ལྟའི་ཆར། རྒྱལ་སྤྱིའི་འགྲོ་བ་མིའི་ཐོབ་ཐང་གི་བཅའ་ཁྲིམས་ལ་མོས་མཐུན་མིང་རྟགས་འགོད་མཁན་གྱི་རྒྱལ་ཁབ་ཇི་སྙེད་ཅིག་ཡོད་ནའང་། གྲངས་ཉུང་མི་རིགས་དང་། ཉམ་ཐག་མི་སྡེ་ལ་གཉའ་གནོན་སྡང་གཙེར་གྱི་གནས་ཚུལ་རྒྱུན་ཆད་མེད་པར་ཡོང་གི་ཡོད། བོད་ས་སྟོད་སྨད་བར་གསུམ་དུ་རྒྱ་གཞུང་གིས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བའི་གནས་ཚུལ་རྒྱུན་ཆད་མེད་པར་འབྱུང་བཞིན་པའི་ཐོག ལོ་ཤས་གོང་ནས་བཟུང་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་དང་། བོད་བརྒྱུད་ནང་བསྟན་རྒྱ་ནག་ཅན། རྒྱ་སྐད་ཁྱབ་སྤེལ་གྱི་སྲིད་ཇུས་འོག་ནས་བོད་ཕྲུག་རྣམས་གཏན་འཇགས་སློབ་གྲྭར་སྡེབ་བཅུག་གིས་བོད་ཀྱི་སྐད་ཡིག་སློབ་སྦྱོང་དང་བཀོལ་སྤྱོད་བཀག་སྡོམ་བཅས་བརྒྱུད། མི་རིགས་གཅིག་དང་། རིག་གཞུང་གཅིག ཆོས་ལུགས་གཅིག སྐད་ཡིག་གཅིག་གི་སྲིད་ཇུས་འགེབས་སྦས་མེད་པའི་སྒོ་ནས་བོད་མིར་བཙན་འགེལ་ལག་བསྟར་བྱེད་བཞིན་པ་ནི་བོད་མི་རིགས་ཀྱི་ངོ་བོ་རྒྱུན་འཛིན་ཐོག་ལོ་རྒྱུས་སུ་གྲགས་མ་མྱོང་བའི་ཉེན་ཚབས་ཆེན་པོ་ཞིག་ཡིན་པ་དང། མའོ་ཙེ་ཏུང་གིས་བོད་ནང་ངོ་རྒོལ་ལས་འགུལ་བྱུང་ན་དྲག་གནོན་གྱི་གོ་སྐབས་འཐོབ་རྒྱུར་དགའ་སྒུག་བྱེད་པ་ལྟར་རྒྱ་གཞུང་གིས་ད་དུང་དེ་ལྟ་བུའི་བསམ་ཕྱོགས་འཛིན་གྱི་ཡོད་ན་མ་གཏོགས། དགེ་སྐྱོན་གྱི་གནས་བབ་ལ་དཔྱད་ཞིབ་ཚད་ལྡན་བྱས་པའི་ཐོག་ནས། རྒྱལ་སྤྱིའི་ཁྲིམས་སྲོལ་དང་མཐུན་ཞིང་། མི་རིགས་མཐུན་སྒྲིལ་དང་རྒྱལ་ཁབ་བརྟན་ལྷིང་ལ་ཕན་པའི་དོན་དངོས་ཕུགས་ཕན་གྱི་ཐབས་ཚུལ་བསྟེན་དགོས་པ་གལ་ཆེན་པོ་ཡིན། ཞེས་སོགས་གསུངས་འདུག

དེའི་རྗེས་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་སྤྱི་འཐུས་ཀྱི་གསུང་བཤད་གནང་སྐབས། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡང་ཡིན་པས་མང་གཙོ་དང་། རང་དབང་ལྡན་པའི་རྒྱལ་ཁབ་ཁག་གི་མི་རྣམས་འགྲོ་བ་མིའི་ཐོབ་ཐང་གི་ཉིན་མོ་དགའ་སྤྲོ་ལྡན་པའི་ངང་སྲུང་བརྩི་ཞུ་བཞིན་ཡོད་ནའང་། བོད་ནང་ད་དུང་རྒྱ་ནག་དམར་གཞུང་གིས་དམ་དྲག་ཚ་ནན་གྱིས་ཕྱི་མི་བོད་ནང་འགྲོ་འོང་མི་ཆོག་པའི་མུར། འགྲོ་བ་མིའི་ཐོབ་ཐང་བརྡལ་བཤིག་གིས་བོད་མི་ཚོར་དྲང་བདེན་མིན་པའི་ཁྲིམས་གཅོད་དང་། ནག་མེད་ཉེས་འཛུགས་ཀྱིས་འཛིན་བཟུང་བཙོན་འཇུག་དང་གར་སོང་ཆ་མེད་གཏོང་བ། སྡུག་སྦྱོང་མནར་གཅོད། རང་མི་རིགས་ཀྱི་བླ་སྲོག་སྐད་ཡིག་དང་། ཆོས། རིག་གཞུང་བཅས་རྩ་མེད་གཏོར་བཤིག་སོགས་བཏང་དང་གཏོང་བཞིན་པར་འཛམ་གླིང་དབུ་ཁྲིད་རྣམས་ནས་རྒྱ་ནག་ལ་འགན་ཁུར་དགོས་པའི་བརྡ་ལན་གནང་དགོས་པའི་འབོད་སྐུལ་ཞུ་རྒྱུ་ཡིན།  དུས་རབས་ཉེར་གཅིག་པ་འདིའི་ནང་གཅིག་བསྡུས་དབང་འཛིན་གྱི་ལམ་ལུགས་ད་མུར་གནས་པ་ཙམ་དུ་མ་ཟད་རྒྱ་ནག་དམར་གཞུང་ནི་བོད་ཙམ་མིན་པར་འཛམ་གླིང་ཁྱོན་ཡོངས་ཀྱི་བདེ་འཇགས་ལ་འགལ་རྐྱེན་ཆེ་ཤོས་དེ་ཡིན་པ་ནན་བརྗོད་བྱ་རྒྱུ་དང་། ཕྱོགས་མཚུངས་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འགོས་ཁྱབ་ལ་བསྙད་དེ་ཟླ་ཤས་སྔོན་ནས་བཟུང་བོད་ནང་གི་བོད་མི་ཚོར་འགྲོ་འདུག་སྤྱོད་གསུམ་གང་ཅིའི་ཐད་དཀའ་ངལ་འཕར་མ་ཞིག་བཟོ་བཞིན་པར་རྒྱ་གཞུང་ནས་དེ་དག་འཕྲལ་དུ་མཚམས་འཇོག་དགོས་པའི་སྐུལ་འདེད་བྱ་རྒྱུ་ཡིན། ཞེས་གསུངས་སོང་།

ཡང་ཚོགས་གཞོན་མཆོག་གིས། ཉེ་ཆར་རྒྱ་ནག་དམར་ཤོག་ཚོགས་པའི་སྐབས་ཉི་ཤུ་པའི་ཚོགས་ཆེན་རྗེས་སུ་རྒྱ་ནག་གི་ཞིང་ཆེན་དང་གྲོང་ཁྱེར་ཁག་ནང་མི་མང་དང་། ལྷག་པར་དུ་མཐོ་སློབ་ཁག་གི་སློབ་མ་དང་དགེ་རྒན་སོགས་དངོས་སུ་ཕྱིར་ཐོན་ནས་འདུ་འཛོམས་དང་རྔམ་སྟོན་ཁྲོམ་སྐོར་བྱས་དང་བྱེད་མུས་མ་ཟད། ཁོང་ཚོའི་འབོད་ཚིག་གཙོ་བོ་ཁག་གཅིག་ནི། ང་ཚོར་སྲིད་དབང་སྒེར་གཅོད་མི་དགོས་པར་རང་དབང་མང་གཙོ་དགོས། དམར་ཤོག་ཚོགས་པ་མགོ་རྟིང་སློག ཞིའི་ཅིང་ཕིང་མར་བོབས། སྨྲ་བརྗོད་རང་དབང་དགོས། གསར་འགྱུར་ཕྱི་གསལ་ནང་གསལ་དགོས། ང་ཚོ་བྲན་གཡོག་བྱ་འདོད་མེད་ཅེས་སོགས་རྒྱ་གཞུང་གིས་ད་ལྟའི་སྲིད་བྱུས་འཛིན་བཞིན་པར་མོས་མཐུན་མེད་པའི་ཞི་རྒོལ་གཞི་རྒྱ་ཆེ་བ་བྱས་པར་རྒྱ་ནག་གཞུང་གི་ཆེས་མཐོའི་དཔོན་རིགས་ཚོས་འདས་པའི་ལོ་རྒྱུས་ལ་ཕྱི་མིག་བལྟས་ཏེ་ཕྱི་ལོ་ ༡༩༨༩ ལོའི་དྲུག་བཞིའི་དོན་རྐྱེན་གྱི་ཐབས་སྡུག་གནས་སྟངས་དེ་རིགས་བསྐྱར་དུ་མི་ཡོང་བ་དང་། ད་ལྟ་རྒྱ་ནག་ནང་འགྲོ་བཞིན་པའི་གནས་སྟངས་ཐད་རྒྱལ་སྤྱིའི་ཁྱོན་ནས་དོ་སྣང་ངེས་ཅན་གྱིས་དཔལ་འབྱོར་ཁེ་ཕན་ཙམ་ལ་གཞི་མ་བཞག་པར་རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་ཡར་རྒྱས་ཡོང་ཐབས་ཆེད་སྐུལ་འདེད་བྱ་དགོས་པའི་འབོད་སྐུལ་བྱ་རྒྱུ་ཡིན། ཞེས་དང་། ཕྱི་ལོ་ ༡༩༥༩ ལོ་ནས་བཟུང་བོད་དེ་རྒྱ་ནག་དམར་གཞུང་གིས་བཙན་དབང་འོག་ཧམ་བཟུང་བྱས་རྗེས་ཛ་དྲག་གི་གནས་སྟངས་ཇི་ཆགས་ཚང་མའི་དགོངས་པར་མངའ་གསལ་ལྟར་དུས་ད་ལྟའང་རྒྱ་ནག་གཞུང་གི་ངན་བྱུས་དང་། བཙན་གནོན་འོག་གཞིས་ལུས་བོད་མི་རྣམས་ཉིན་མཚན་འཁྱོལ་དཀའི་མནར་གཅོད་སྡུག་སྦྱོང་མྱངས་དང་མྱོང་བཞིན་པའི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་དང་། ད་བར་གཞིས་བཞུགས་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ཀྱི་ལྷག་བསམ་དང་། དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་བཅས་ལ་ཡི་རངས་བསྔགས་བརྗོད་བཅས་ཞུ་བཞིན་ཡོད། བོད་དོན་བདེན་མཐའ་གསལ་ཆེད་རང་དབང་ལུང་པར་ཡོད་པའི་བོད་མི་རྣམས་ནས་ཆིག་སྒྲིལ་གྱི་སྒོ་ནས་བོད་དོན་དྲིལ་བསྒྲགས་དང་ཞུ་སྐུལ་ལས་འགུལ་སོགས་ཀྱི་ཐོག་ལ་ནུས་པ་མཉམ་སྤུངས་དང་གོ་སྐབས་དམ་འཛིན་དགོས་པའི་ནན་སྐུལ་ཞུ་རྒྱུ་ཡིན། ཞེས་སོགས་གསུངས་སོང་།

དམིགས་བསལ་སྐུ་མགྲོན་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇེ་ཐ་ཀུ་མར་མཆོག་ནས་༧གོང་ས་མཆོག་ནི་མཱ་ཧཱ་དི་མ་གྷན་དྷི་མཆོག་གི་འཚེ་མེད་ཞི་བའི་ཕྱག་ལས་གནང་མཁན་གྱི་རླབས་ཆེ་བའི་སྐྱེས་བུ་ཞིག་ཡིན་ལ། ༧གོང་ས་མཆོག་གི་བྱམས་བརྩེ་དང་སྙིང་རྗེའི་ཉམས་ལེན་གྱི་ལམ་སྟོན་གྱིས་མིའི་རིགས་ཀྱི་དཔལ་ཡོན་ལ་ཕན་ཐོགས་ཆེན་པོ་བྱུང་ཡོད། ཁོང་ནི་བོད་མི་མང་དང་སེམས་ཐག་ཉེ་བའི་མི་ཞིག་ཡིན་པས། བོད་མི་མང་གིས་བོད་དོན་ཆེད་དུ་འབད་བརྩོན་བྱས་ཀྱང་། རྒྱལ་སྤྱི་སོགས་ནས་འགྲོ་བ་མིའི་ཐབ་ཐང་གི་ཐད་འགྱུར་བ་ཅི་ཡང་འགྲོ་ཡི་མེད་པ་ནི་ཧ་ཅང་ཡིད་སྐྱོ་དགོས་པ་ཞིག་ཡིན་སྐོར་སོགས་གསུངས་སོང་།

མཇུག་ཏུ་སྐུ་མགྲོན་གཙོ་བོ་རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་མཆོག་གིས། འཛམ་བུ་གླིང་དུ་བཀའ་དྲིན་བླ་ན་མ་མཆིས་པའི་༧སྐྱབས་མགོན་རྒྱལ་བའི་དབང་བོ་མཆོག་གི་སྐུ་ཡི་མཛད་པ་འཕྲིན་ལས་དང་། གསུང་གི་མཛད་པ་འཕྲིན་ལས། ཐུགས་ཀྱི་མཛད་པ་འཕྲིན་ལས་གསུམ་གྱི་བརྗོད་དཀའ་བའི་རྣམ་ཐར་ཡོད་པ་དེ། འཛམ་བུ་གླིང་དུ་བྱམས་སྙིང་རྗེ་དང་བྱང་ཆུབ་སེམས། འཚེ་མེད་ཞི་བའི་ལམ་དུ་ཁྲིད་དང་འཁྲིད་བཞིན་པའི་བཀའ་སློབ་ཁག་དང་སྐུ་ངལ་མུ་མཐུད་སྐྱོན་བཞིན་པར་བརྟེན། ཕྱི་ལོ ༡༩༨༩ ལོའི་ཟླ ༡༢ ཚེས ༡༠ ནོ་སྦེལ་ཞི་བདེ་གཟེངས་རྟགས་ཕུལ་བ་རེད། དེ་ནི་༧གོང་ས་མཆོག་གི་དབུས་པའི་འཛམ་གླིང་གི་ཞི་བདེར་དགའ་མཁན་ཡོངས་དང་། བོད་ཕྱི་ནང་གཉིས་ཀྱི་བོད་རིགས་ཡོངས་ཀྱི་དཔལ་དང་། གཟི་བརྗིད། ངོམས་ཆོས་རེད་བསམ་གྱི་འདུག་པ་མ་ཟད། ༧གོང་ས་མཆོག་ལ་འཛམ་གླིང་གི་གཟེངས་རྟགས་འདྲ་མིན་སྣ་ཚོགས་ཕུལ་ཡོད་པ་རེད། ༧གོང་ས་མཆོག་རྒྱ་གར་ནང་ཆིབས་བསྒྱུར་བཀའ་དྲིན་བསྐྱངས་བའི་རྗེས་སུ་རྒྱ་གར་གྱི་མི་སེར་ཡོངས་དང་། ནང་པ་ཡིན་མིན་ཚང་མས་༧གོང་ས་མཆོག་ལ་དགའ་བོ་གནང་གི་ཡོད། དེའི་རྒྱུ་མཚན་ཆེན་པོ་གཅིག་ནི་༧སྐུ་མདུན་འཛམ་གླིང་གི་ཕྱོགས་གང་དུ་ཕེབས་ཀྱང་རྒྱ་གར་གྱི་དཔལ་ནལེནྜ་ནས་བརྒྱུད་ཡོང་བའི་བོད་བརྒྱུད་ནང་བསྟན་ཡིན་གསུང་གི་ཡོད་པ་བཞིན། འཛམ་གླིང་དུ་དར་ཁྱབ་འགྲོ་བཞིན་ཡོད་པའི་རྒྱ་གར་གྱི་རིག་གཞུང་དེ་རྒྱ་གར་མི་རིགས་ཀྱིས་ཀྱང་མཐོང་ཆེན་བྱེད་བཞིན་ཡོད་ལ། བྱེད་དགོས་པ་ཞིག་ཀྱང་ཡོད་རེད། ཅེས་དང་། དེ་བཞིན་བོད་དང་བོད་ཆེན་པོ་ཞེས་ཟེར་བཞིན་ཡོད་པ་བཞིན། ད་ལྟའི་བོད་ངོ་མ་ནི་བོད་དང་། རྒྱ་གར་དང་ཧི་མ་ཡ་ལའི་ཁུལ་དུ་ཡོད་པའི་ལ་དྭགས་སོགས་བོད་ཆེན་པོའི་ནང་དུ་འདུས་པ་རེད། དེ་ཡང་སྐད་བྷོ་ཊེ་དང་། ཆོས་བོད་བརྒྱུད་ནང་བསྟན། རིག་གཞུང་གཅིག་པ་ཡིན་ལ། ལྟོ་ཆས་རྩམ་པ་དང་རྩམ་ཐུག། གོས་ཕྱུ་བ་གཅིག་པ་ཡིན་པས། ང་ཚོའི་བར་དུ་ཁྱད་པར་མེད་དུས། ༧སྐུ་མདུན་གྱིས་ང་ཚོར་ཐུགས་མཉེས་པོ་གནང་གི་ཡོད་རེད། བོད་ཀྱི་ཡུལ་དང་། བོད་ཀྱི་མི་མང་། བོད་ཀྱི་རིག་གཞུང་འབོད་དུས། ང་ཚོའི་སེམས་ནང་དུའང་ཚོར་བ་ཆེན་པོ་ཞིག་སླེབས་ཀྱི་ཡོད། གང་ཡིན་ཟེར་ན་ང་ཚོ་མི་རིགས་གཅིག་པ་དང་། རིག་གཞུང་གཅིག་པ་ཡིན་པའི་གདུང་སེམས་མཉམ་བསྐྱེད་ཀྱི་ཚོར་བ་ཞིག་ང་ཚོའི་སེམས་ནང་དུ་ཡོད།

༧སྐུ་མདུན་གྱིས་བོད་ཀྱི་རིག་གཞུང་ལ་དཀའ་ངལ་འཕྲད་པའི་སྐབས་ལ་དྭགས་པར་འཛིན་སྐྱོང་སྤེལ་གསུམ་བྱེད་པར་རེ་བ་རྒྱག་གི་ཡོད་གསུང་གི་ཡོད་པ་བཞིན། ལ་དྭགས་པ་ཚོས་ཀྱང་འཇོན་ཡང་མ་འཇོན་ཡང་ང་ཚོར་རེ་བ་བཅོལ་ཡོད་རེད་བསམ་པའི་ཚོར་བ་ཤུགས་ཆེན་པོ་ཡོད། ང་ཚོས་ཀྱང་༧གོང་ས་མཆོག་གི་ཐུགས་དགོངས་འགྲུབ་པའི་ཆེད་དུ་དཀའ་ལས་རྒྱག་གི་ཡོད། དེ་ཡང་དེ་རིང་སྡིངས་ཆ་འདིའི་ཐོག་ནས་༧སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་དབུས་བོད་ཀྱི་ཆོས་བརྒྱུད་ཁག་གི་བླ་ན་མེད་པའི་བླ་ཆེན་ཚང་མར་ཐུགས་རྗེ་ཆེ། བཀའ་དྲིན་ཆེ་ཞུ། རྒྱ་གར་ནང་བོད་ཀྱི་བླ་ཆེན་དག་གིས་ཕྱག་བཏབ་པའི་དགོན་སྡེ་གྲངས ༢༨༨ ཡས་མས་ཡོད་པ་རེད། དེའི་ནང་ང་ཚོར་སྐད་ཡིག་དང་རིག་གཞུང་གི་སློབ་སྦྱོང་གཅིག་པ་རག་གི་ཡོད་པ་རེད། ང་ཚོར་དཔེ་མི་སྲིད་པས་བཀའ་དྲིན་ཆེན་པོ་རེད་བསམ་གྱི་འདུག ང་ཚོས་ཐུགས་རྗེ་ཆེ་ཞུ་རྒྱུ་ཡིན། བོད་བརྒྱུད་ནང་བསྟན་ཐོག་འབུར་དུ་ཐོན་པ་ཞིག་ཁ་སང་དགའ་ལྡན་ཁྲི་ཟུར་རི་རྫོང་རིན་པོ་ཆེ་དགོངས་པ་ཆོས་དབྱིངས་སུ་འཐིམས་རེད། དེ་ལ་གདུང་སེམས་མཉམ་བསྐྱེད་ཀྱི་མྱ་ངན་གུས་འདུད་དང་མཉམ་དུ། རིན་པོ་ཆེ་མཆོག་གི་ཡང་སྲིད་འཁྲུལ་མེད་སླར་ཡང་མཇལ་བའི་སྨོན་ལམ་ཞུ་བཞིན་ཡོད། དེ་རིང་ང་ཚོ་ལ་དྭགས་ནས་སྐད་བཏང་བར་སྲིད་སྐྱོང་མཆོག་དང་གྲ་སྒྲིག་བྱེད་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞོགས་པར་ང་ཚོ་ལ་དྭགས་ཀྱི་ངོས་ནས་༧གོང་ས་མཆོག་ལ་ཆིབས་བསྒྱུར་བསྐྱངས་རོགས་ཞེས་གསོལ་འདེབས་ཞུས་པ་བཞིན་ཞལ་བཞེས་ཐོབ་སོང་། ང་ཚོས་༧གོང་ས་མཆོག་གི་དབུས་པའི་བོད་ཕྱི་ནང་གཉིས་ཀྱི་བོད་པར་ཐུགས་རྗེ་ཆེ་ཞུ་བ་དང་མཉམ་དུ། གདུང་སེམས་མཉམ་བསྐྱེད་ཡོད་ཞུ་རྒྱུ་ཡིན། རྒྱ་གར་ནང་དུ་ཡོད་པའི་ཧི་མ་ལ་ཡའི་རི་རྒྱུད་ཀྱིས་རྒྱ་གར་གྱི་གཟེངས་རྟགས་ཆེ་ཤོས་བྷ་ར་ཏ་རཱ་དཱ་ན་༧གོང་ས་མཆོག་ལ་འབུལ་དགོས་པའི་ཤུགས་རྒྱག་གི་ཡོད་པ་ལྟར། དེ་རིང་ཡང་བསྐྱར་སྡིངས་ཆ་འདིའི་ཐོག་ནས་འཛམ་གླིང་ཡོངས་གྲགས་སུ་བརྡ་ལན་བསྐུར་ཏེ་རྒྱ་གར་གཞུང་ལ་ཞུ་བ་རྒྱག་གི་ཡོད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་།