ང་ཚོ་འགྲོ་བ་མི་ཡིན་པ་གཅིག་མཚུངས་དང་གཅེན་གཅུང་ཡིན་པའི་ཆ་ནས་ཕན་ཚུན་གསོད་རེས་བྱེད་དགོས་དོན་གང་ཡང་མེད།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་གྱི་རྒྱལ་ས་ལྡི་ལི་གུ་རུ་གྷ་རམ་ (Gurugram) ཁུལ་དུ་རྟེན་གཞི་བྱས་པའི་སཱལ་ཝན་མི་མང་སློབ་གྲྭ་ (Salwan Public School) རུ་ལྡི་ལི་ཁུལ་གྱི་སློབ་གྲྭ་ཆེ་འབྲིང་གི་སློབ་ཕྲུག་སྟོང་ཕྲག་མང་པོར་ཆོས་ལུགས་དང་མ་འབྲེལ་བའི་བཟང་སྤྱོད་ (Secular Ethics) ཀྱི་བརྗོད་གཞིའི་ཐོག་བཀའ་སློབ་བསྩལ་ཡོད་འདུག

༧གོང་ས་རྒྱལ་བ་རིན་པོ་ཆེ་མཆོག་གིས། སྤྱིར་འཛམ་གླིང་ནང་གི་མི་ཐེར་འབུམ་ ༧ ལྷག་རྣམས་ནི་གཅེན་གཅུང་ཡིན་པ་རེད། རྒྱུ་མཚན་ནི་ང་ཚོ་མའི་ཁོག་ནས་སྐྱེ་སྟངས་གཅིག་པ་ཡིན་པ་ལས་དམིགས་བསལ་གང་ཡང་ཡོད་མ་རེད། ཨ་མས་ཕྲུ་གུར་འོ་མ་སྤྲོད་པ་དང་། བྱམས་སྐྱོང་དང་གཅེས་སྤྲས་བྱེད་སྟངས་རྣམས་གཅིག་མཚུངས་རེད། དུད་འགྲོ་སེམས་ཅན་ཞིག་ཡིན་རུང་ཨ་མས་རང་གིས་པུ་གུར་གཅེས་སྤྲས་བྱེད་ཀྱི་ཡོད་པ་རེད། དེར་བརྟེན་མཐར་ཐུག་ན་འཛམ་གླིང་འདི་བྱམས་སྙིང་རྗེ་ལ་རྟེན་དགོས་ཀྱི་ཡོད་པ་རེད། ད་ལྟའི་ཆར་འཛམ་གླིང་འདིའི་སྟེང་གི་འགྲོ་བ་མི་དང་སེམས་ཅན་མཐའ་དག་ལ་ཨ་མས་འོ་མ་སྤྲོད་པ་དང་བརྩེ་བས་བསྐྱངས་པ་ཤ་སྟག་རེད་ལ། ཆོས་ལུགས་ཀྱི་དབྱེ་བ་མེད་པར་ང་ཚོས་འདོན་པ་འདོན་པ་སོགས་གཅིག་མཚུངས་རེད། དེ་ཡང་ངོས་རང་ཚུད་པའི་ཕྲུ་གུ་ཁྱེད་རང་ཚོའི་ཆོས་ལུགས་གང་ཡིན་མིན་དང་ཚོགས་པ་ག་རེ་ཡིན་མིན་སོགས་ལ་མ་ལྟོས་པར། ཚང་མས་མཉམ་དུ་སྨོན་ལམ་འདེབས་པ་དང་གད་མོ་བགད་ཀྱི་ཡོད་པ་རེད། དེར་བརྟེན་ངོས་རང་གིས་བསམ་ཚུལ་ལ་ང་ཚོ་འགྲོ་བ་མི་ཡིན་པ་གཅིག་མཚུངས་ཡིན་པའི་ཆ་ནས། འཛམ་གླིང་འདི་འགྲོ་བ་མིའི་འཛམ་གླིང་ཞིག་ཆགས་ཀྱི་ཡོད་པ་རེད།  ཅེས་གསུངས་སོང་།

ཡང་༧གོང་ས་མཆོག་གིས།  ངོས་རང་གི་བསམ་ཚུལ་ལ། འདས་པའི་ལོ་ངོ་སྟོང་ཕྲག་གོང་ལ་རྒྱ་གར་ལ་བྱམས་སྙིང་རྗེ་ (Karuna) དང་འཚེ་བ་མེད་པའི་ (Ahimsa) སྐོར་ལ་སློབ་ཀྱི་ཡོད་པ་རེད། སྤྱིར་གཞི་རྩའི་ཐོག་ནས་བྱམས་སྙིང་རྗེ་དང་འཚེ་བ་མེད་པ་གཉིས་པོ་འགྲོ་བ་མིའི་རིན་ཐང་ཆགས་ཀྱི་ཡོད་པ་རེད། དེ་ཡང་སེམས་ཅན་སྟག་དང་སེང་གེ་ལའང་ཨ་མའི་འོ་མས་གཅེས་སྤྲས་བྱེད་ཀྱི་ཡོད་རེད། འོན་ཀྱང་སྟག་དང་སེང་གེ་སོགས་ཀྱི་གཟུགས་པོའི་རང་བཞིན་མི་འདྲ་བ་ཡོད་པ་དང་། ཁོ་ཚོའི་མཆེ་བ་རྣོ་བོ་ཡོད་པ་དང་རྐང་ལག་གི་སྡེར་མོའང་རྣོ་བོ་ཡོད་པར་བརྟེན། གཞན་ལ་འཚེ་བ་བྱེད་ཀྱི་་ཡོད་པ་རེད། འོན་ཀྱང་ང་ཚོ་ཚང་མ་དེ་ལྟར་མ་རེད། དེར་བརྟེན་གཞི་རྩའི་འགྲོ་བ་མིའི་རང་བཞིན་ནི་བྱམས་སྙིང་རྗེ་དང་འཚེ་བ་མེད་པ་བྱ་རྒྱུ་དེ་རེད། དེར་བརྟེན་ང་ཚོ་ཨ་མའི་འོ་མ་དང་བྱམས་བརྩེས་གསོ་སྐྱོང་བྱས་པའི་འགྲོ་བ་མི་ཞིག་ཡིན་པའི་ཆ་ནས། ང་ཚོའི་གཟུགས་པོའི་རང་བཞིན་དང་བསམ་བློའི་གཏོང་ཕྱོགས་ལ་ཁྱད་པར་ཡོང་གི་ཡོད་པ་རེད། སྤྱིའི་ཆ་ནས་སེམས་ཅན་ལས་ལྷག་པ་འགྲོ་བ་མི་རྣམས་ཞི་བདེ་དང་ལྡན་པའི་ཐོག་ནས་འཚོ་བ་སྐྱེལ་གྱི་ཡོད་པ་རེད། སེམས་ཅན་གཞན་དག་འཚོ་གནས་བྱེད་པར་ཕན་ཚུན་གསོད་རེས་བྱས་ཏེ་འཚོ་བ་སྐྱེལ་དགོས་ཀྱི་ཡོད་རེད། འོན་ཀྱང་ང་ཚོ་དེ་ལྟར་མ་རེད། སྐབས་རེར་ང་ཚོ་མིའི་བསམ་བློ་ཡར་རྒྱས་ཕྱིན་པ་ལ་བརྟེན་ནས་འདོད་ཆགས་མང་བ་ཡོང་བ་དང་། འདོད་ཆགས་མང་བའི་རྐྱེན་གྱིས་དྲག་ཤུལ་ཡོང་གི་ཡོད་རེད། དེར་བརྟེན། ད་ལྟའི་ཆར་ང་ཚོའི་འཛམ་གླིང་ནང་འཚེ་བ་དང་དྲག་རྒོལ། བཙན་གནོན་མང་པོ་བྱུང་བ་མཐོང་གི་ཡོད་རེད་ལ། དེའི་རྐྱེན་གྱིས་མི་མང་པོ་གསོད་པ་དང་ཚེ་སྲོག་ཤོར་གྱི་ཡོད་པ་རེད། ད་དུང་ད་ལྟའི་ཆར་ཚང་མས་རྡུལ་ཕྲན་མཚོན་ཆ་བཟོ་རྒྱུའི་ཚོར་བ་ཤུགས་ཆེན་པོ་ཡོད་པ་རེད། དེ་དག་ནི་བསམ་བློ་གཏོང་ཕྱོགས་རྙིང་པ་རེད། དེར་བརྟེན་ངོས་རང་གིས་གོང་དུ་ཞུས་པ་ལྟར། འཛམ་གླིང་འདིའི་སྟེང་དུ་ཡོད་པའི་སེམས་ཅན་དང་འགྲོ་བ་མི་ཡོངས་རྫོགས་ཨ་མ་ནས་སྐྱེས་པ་དང་ཨ་མའི་བྱམས་བརྩེས་གསོ་སྐྱོང་བྱེད་པ་དང་། གཅེན་གཅུང་གི་བརྩེ་བས་སྐྱོང་བ་ཞིག་ཡིན་པས་ང་ཚོ་བྱམས་སྙིང་རྗེའི་ཐོག་ནས་འཚར་ལོངས་བྱུང་བ་ཞིག་རེད། འདས་པའི་དུས་རབས་ཁ་ཤས་གོང་ནས་འཛམ་གླིང་འདིའི་སྒང་ལ་འཚེ་བ་མང་པོ་བྱུང་ཡོད་པ་རེད། དེ་ཡང་ངོ་མཚར་ཅན་གྱི་མིའི་ཀླད་པ་དེ་དག་གིས་མི་ཇི་ལྟར་གསོད་དགོས་པ་དང་། ཁྱིམ་མཚེས་རྒྱལ་ཁབ་དང་ཁྱིམ་མཚེས་སོགས་གཏོར་བཤིག་ཇི་ལྟར་གཏོང་དགོས་པའི་ཐོག་ལ་བེད་སྤྱོད་བཏང་དང་གཏོང་བཞིན་ཡོད་པ་ནི་ནམ་ཡང་ནོར་གྱི་ཡོད་རེད། ད་ལྟའི་ཆར་ང་ཚོས་འཛམ་གླིང་སྟེང་གི་མི་ཐེར་འབུམ་ ༧ ལྷག་རྣམས་འགྲོ་བ་མི་ཡིན་པ་གཅིག་མཚུངས་ཡིན་པའི་ཆ་ནས་བྱམས་སྙིང་རྗེ་དང་འཚེ་བ་མེད་པ་བྱ་དགོས་པ་དང་། འཛམ་གླིང་ཞི་བདེ་དང་ལྡན་པ་བསྐྲུན་ཐུབ་པར་བསམ་བློ་མང་ཙམ་གཏང་དགོས་ཀྱི་ཡོད་པ་རེད། འདས་པའི་ལོ་ངོ་མང་པོའི་ནང་འཚེ་བ་མང་པོ་བྱུང་ཡོད་རེད་ལ། དེའི་རྐྱེན་གྱིས་འཛམ་གླིང་ཞི་བདེ་དང་བདེ་སྐྱིད་དང་ལྡན་པ་བསྐྲུན་ཐུབ་ཀྱི་མེད་ལ། འཛམ་གླིང་འདིའི་སྟེང་འཚེ་བ་མང་པོ་བྱུང་བའི་རྐྱེན་གྱིས་ཕྱིས་སུ་འཚེ་བ་དེ་བས་མང་བ་འབྱུང་གི་རེད། དེར་བརྟེན་ད་ལྟའི་ཆར་ང་ཚོས་ཞི་བདེ་དང་ལྡན་པ་དང་། འཚེ་བ་མེད་པ། བདེ་སྐྱིད་དང་ལྡན་པའི་འཛམ་གླིང་བསྐྲུན་རྒྱུའི་ཐད་ལ་བསམ་བློ་གཏང་རྒྱུའི་དུས་ལ་བསླེབས་ཡོད་པ་དང་། ང་ཚོ་འགྲོ་བ་མི་ཡིན་པ་གཅིག་མཚུངས་ཡིན་པ་དང་གཅེན་གཅུང་ཡིན་པའི་ཆ་ནས་ཕན་ཚུན་གསོད་རེས་བྱ་དགོས་དོན་མེད་པས། ཚང་མ་མཉམ་དུ་འཚོ་བ་སྐྱེལ་དགོས་ཀྱི་ཡོད་པ་རེད། ཅེས་བཀའ་སློབ་བསྩལ།

དེང་དུས་ཀྱི་ཤེས་ཡོན་དང་འབྲེལ་ནས་༧གོང་ས་རྒྱལ་བ་རིན་པོ་ཆེ་མཆོག་གིས། དུས་རབས་གསར་པའི་གཞོན་སྐྱེས་རྣམས་ཀྱིས་རྒྱ་གར་གནའ་རབས་ཀྱི་རིག་གཞུང་དང་ཤེས་ཡོན་ཐོག་ལ་དོ་སྣང་མང་ཙམ་བྱ་དགོས་སྐོར་དང་། ཕྱི་དངོས་པོའི་ཡར་རྒྱས་དང་འབྲེལ་ནས་དེང་དུས་ཤེས་ཡོན་སློབ་གསོ་སྤྲོད་ཀྱི་ཡོད་པ་ལྟར། ནང་སེམས་ཀྱི་ཞི་བདེའི་སྐོར་ལ་གོ་རྟོགས་སྤེལ་བ་དང་ཡར་རྒྱས་ཡོང་ཐུབ་པར་རྒྱ་གར་གྱི་གནའ་རབས་ཀྱི་ཤེས་ཡོན་སློབ་གསོ་སྤྲོད་དགོས་པ་དེ་གལ་ཆེན་པོ་ཡིན་པར་བརྟེན། ཚང་མས་རྒྱ་གར་གནའ་རབས་ཀྱི་ཤེས་ཡོན་ཐོག་ལ་དོ་སྣང་མང་ཙམ་བྱེད་དགོས་སྐོར་གསུངས་སོང་།

བཀའ་སློབ་གྲུབ་རྗེས་འཛིན་རིམ་དྲུག་པའི་སློབ་མ་ནིལ་ཨ་ཌི་ཀཱ་རི་ལགས་ཀྱིས་མི་རབས་གསར་པའི་གཞོན་སྐྱེས་ཚོར་ཕྱི་དངོས་པོར་དོ་སྣང་མང་བ་སྤྲོད་མཁན་དང་རང་ཤེད་ཚ་བོ་ཆགས་ཀྱི་ཡོད་པ་རེད། དེ་ལས་ལྡོག་ནས་མི་ཡག་པོ་ཇི་ལྟར་བཟོ་དགོས་སྐོར་བཀའ་འདྲི་ཞུས་པར་༧མགོན་པོ་མཆོག་གིས། ནང་སེམས་ཀྱི་ཞི་བདེ་ཡོང་བར་སེམས་ལ་མ་སྐྱིད་པ་བཟོ་མཁན་གྱི་གཞི་རྩ་གཙོ་བོ་གང་ཡིན་པ་དེ་ཤེས་པར་བྱ་དགོས་ཀྱི་ཡོད་པ་རེད། དེ་ཡང་ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པས། ཚང་མས་ནང་སེམས་ཀྱི་ཞི་བདེ་མེད་པར་བཟོ་མཁན་གང་ཡིན་པ་གསལ་པོ་ཤེས་པར་བྱ་དགོས་ཀྱི་ཡོད་རེད། དེ་ཡང་རྒྱ་གར་གྱི་གནའ་རབས་རིག་གཞུང་དང་ཤེས་ཡོན་ནང་དུ་ནང་སེམས་ཀྱི་ཞི་བདེ་ཇི་ལྟར་བསྐྲུན་དགོས་སྐོར་དང་། ནང་སེམས་ཀྱི་ཞི་བདེ་དཀྲུག་མཁན་གཙོ་བོ་འདོད་ཆགས་ཞེ་སྡང་སོགས་མེད་པར་ཇི་ལྟར་བཟོ་དགོས་སྐོར་དང་དེ་དག་ཇེ་ཉུང་དུ་གཏོང་ཐབས་སོགས་ལག་བསྟར་གང་འདྲ་བྱ་དགོས་པའི་སྐོར་ལ་སློབ་ཀྱི་ཡོད་པ་རེད། དེར་བརྟེན། མི་རབས་གསར་པའི་གཞོན་སྐྱེས་རྣམས་ཀྱིས་དེང་དུས་ཀྱི་ཤེས་ཡོན་མཉམ་དུ་རྒྱ་གར་གྱི་གནའ་རབས་ཀྱི་ཤེས་ཡོན་ལ་དོ་སྣང་མང་ཙམ་བྱ་དགོས་སྐོར་གྱི་ལམ་སྟོན་བཀའ་སློབ་གནང་སོང་།

གསར་འགོད་པ། བསྟན་འཛིན་ཕུར་བུ།